Ano an Kaipuhan Para Magin Maugma an Pamilya?

AN SABI KAN BIBLIYA

“Maugma an mga nagdadangog kan tataramon nin Diyos asin nag-uutob kaiyan!”—Lucas 11:28, Bagong Kinaban na Traduksiyon.

AN MGA PAKINABANG MO DIYAN

Mamamatian an tunay na pagkamuot.—Efeso 5:28, 29.

Magkakaigwa nin paggalang sa kada saro.—Efeso 5:33.

Magigin pamugtak an isip asin pagmati.—Marcos 10:6-9.

TALAGA DAW NA MAKAKAPAGTIWALA KITA SA SINASABI KAN BIBLIYA?

Iyo, huli sa duwang panginot na dahilan:

• An Diyos an Kagpundar kan pamilya. Sabi kan Bibliya, “utang kan gabos na pamilya . . . an saindang pangaran” sa Diyos na Jehova. (Efeso 3:14, 15) Buot sabihon, igwa nin pamilya dahil ginibo iyan ni Jehova. Taano ta importante ini?

  Isip-isipa: Kun gustong-gusto mo an sarong masiram na putahe tapos gusto mong maaraman an mga sangkap kaiyan, kiisay ka mahapot? Siyempre, sa nagluto.

  Kaagid kaiyan, tanganing maaraman an mga “sangkap” para sa maugmang buhay bilang pamilya, dapat man kitang magpatabang ki Jehova, an Kagpundar kan pamilya.—Genesis 2:18-24.

• An Diyos may pagmakulog saindo. Marahay para sa mga pamilya na pag-adalan an mga pagirumdom ni Jehova, na itinatao niya paagi sa saiyang Tataramon. Taano? “Huli ta nagmamakulog siya sa saindo.” (1 Pedro 5:6, 7) Gusto talaga ni Jehova na mapakarhay kamo—asin an mga sadol niya pirming epektibo!—Talinhaga 3:5, 6; Isaias 48:17, 18.