LEKSIYON 11
Nagsurat Sinda Manungod ki Jesus
Nahihiling mo an mga lalaki sa ritrato?— Sinda si Mateo, Marcos, Lucas, Juan, Pedro, Santiago, Judas, saka Pablo. Gabos sinda nabuhay kan si Jesus yaon digdi sa daga, saka nagsurat sinda manungod ki Jesus. Bistuhon ta pa sinda.
Ano an aram mo sainda?
An tulo sainda mga apostol na nakaibanan ni Jesus sa pagtutukdo sa mga tawo. Aram mo kun sairisay sinda?— Si Mateo, Juan, saka Pedro. Bistadong maray si Jesus kan mga apostol na si Mateo asin Juan, saka pareho sindang nagsurat nin libro manungod sa buhay ni Jesus. Isinurat man ni apostol Juan an librong Kapahayagan saka an tulo pang surat, na iyo an Inot na Juan, Ikaduwang Juan, saka Ikatulong Juan. Igwa man si apostol Pedro nin duwang surat na nasa Bibliya, an Inot na Pedro saka Ikaduwang Pedro. Diyan sa ikaduwa, sinabi ni Pedro an nangyari kan magtaram si Jehova hali sa langit tapos magsabi manungod ki Jesus: ‘Ini an aki ko. Padaba ko siya, saka ugmahon ako saiya.’
An iba pang lalaki sa ritrato nagsurat man nin mga libro na nagtutukdo sato manungod ki Jesus. Saro sainda si Marcos. Puwedeng yaon siya kan dakupon si Jesus kaya nahiling niya su mga nangyari. An saro pa iyo si Lucas. Saro siyang doktor. Puwedeng nagin Kristiyano siya pagkagadan ni Jesus.
An duwa pa sa mga nagsurat kan Bibliya na yaon sa ritrato iyo an mga tugang ni Jesus na mas aki saiya. Aram mo an pangaran ninda?— Santiago saka Judas. Kan inot, dai sinda nagtubod ki Jesus. Huna pa ngani ninda nabubua na siya. Pero paghaloy-haloy, nagtubod na sinda tapos nagin Kristiyano.
An natatada sa ritrato na nagsurat man kan Bibliya iyo si Pablo. Bago siya nagin Kristiyano, Saulo an pangaran niya. Habuon niya sa mga Kristiyano saka maisugon siya sainda. Pero aram mo kun pa’no siya nagin Kristiyano?— Sarong aldaw sa tinampo, biglang nakadangog si Pablo nin boses hali sa langit. Si Jesus idto! Hinapot niya si Pablo: ‘Natâ maisugon ka sa mga nagtutubod sako?’ Pagkatapos kaiyan, nagbago si Pablo asin nagin Kristiyano. Isinurat ni Pablo an 14 libro sa Bibliya, puon Roma sagkod Hebreo.
Bakong pigbabasa ta an Bibliya aroaldaw?— Pag pigbabasa ta iyan, dakul kitang nanunudan manungod ki Jesus. Gusto mo pang makanuod manungod ki Jesus?—