Magin Maimbod sa Kada Saro

Kahagadan ni Jehova na magin maimbod kita. (Salmo 31:23) Importante ini lalo na sa mga mag-agom, ta kun daing kaimbudan, nawawara an tiwala sa kada saro. An pagtiwala mahalagang marhay tanganing kumusog an pagkamuot ninda sa kada saro.

Kadakul ngunyan an dai nagigin maimbod sa saindang agom. Para maprotektaran an relasyon nindong mag-agom, dapat na magin desidido kang gibuhon an duwang bagay.

1 DAPAT NA PRIYORIDAD MO AN SAIMONG AGOM

AN SINASABI KAN BIBLIYA: ‘Siyertuhon an urog na mahalagang mga bagay.’ (Filipos 1:10, NW) An relasyon nindong mag-agom an saro sa pinakamahalagang bagay sa buhay mo. Tama sana na iyan an magin priyoridad mo.

Gusto ni Jehova na an atensiyon mo yaon sana sa agom mo saka ‘mag-ugma ka sa buhay’ kaiba niya. (Parahulit 9:9, BPV) Malinaw na sinabi niya na dai mo dapat pabayaan an saimong agom kundi pirming hinguwahon na mapaugma an kada saro. (1 Corinto 10:24) Ipamati sa saimong agom na kaipuhan mo siya asin talagang pinapahalagahan mo siya.

AN PUWEDE MONG GIBUHON:

• Siguraduhon na pirmi kang may panahon para sa agom mo, na itinatao sa saiya an bilog mong atensiyon

• Pirming isipon: Bakong “ako” kundi “kita”

2 INGATAN AN SAIMONG PUSO

AN SINASABI KAN BIBLIYA: “An lambang saro na nagpaparahiling sa sarong babayi tanganing magkaigwa nin [salang pagmawot] sa saiya nagsasambay na sa puso niya sa babaying iyan.” (Mateo 5:28, NW) Kun an saro nagpaparaisip nin imoral na mga bagay, garo man sana nagsasambay na siya laban sa saiyang agom.

Sinabi ni Jehova na kaipuhan mong ingatan an puso mo. (Talinhaga 4:23; Jeremias 17:9) Para magibo ini, dapat kang mag-ingat sa mga pighihiling mo. (Mateo 5:29, 30) Arugon an padre de pamilyang si Job, na nakipagkasundo sa mga mata niya na dai maghiling na may imoral na pagmawot sa ibang babayi. (Job 31:1) Magin determinadong dai maghiling nin pornograpiya saka likayan na magkaigwa nin ano man na romantikong interes sa iba apuwera sa agom mo.

AN PUWEDE MONG GIBUHON:

• Ipahiling sa iba na talagang maimbod ka sa agom mo

• Isipon an mamamatian kan agom mo, asin putulon tulos an ano man na relasyon na posibleng pagselosan kan agom mo