Pagkapot nin Kuwarta

Kaipuhan ta gabos nin kuwarta para maitao an mga pangangaipo kan satong pamilya. (Talinhaga 30:8) Tutal, proteksiyon man talaga an kuwarta. (Parahulit 7:12) Totoo, puwedeng bakong madali para sa mag-agom na pag-ulayan an dapit sa kuwarta. Pero dai nindo pagtugutan na magin kawsa iyan nin problema. (Efeso 4:32) Dapat na may tiwala sa kada saro an mag-agom asin nag-uulay sa pagbadyet kan kuwarta.

1 MAGPLANONG MARHAY

AN SINASABI KAN BIBLIYA: ‘Kun igwa saindong buot magtugdok nin tore, bakong minatukaw nguna siya dangan kukuwentahon an magagasto, tanganing maaraman kun igwa siya kan tamang halaga na ikakapahaman kaiyan?’ (Lucas 14:28, BPV) Mahalagang marhay na pagplanuhan nindong duwa kun sain gagamiton an kuwarta. (Amos 3:3) Pag-ulayan kun ano an kaipuhan nindong bakalon saka kun sagkod pira an puwede nindong gastuson. (Talinhaga 31:16) Dawa kaya nindong bakalon an sarong bagay, dai buot sabihon na babakalon na nindo iyan. Likayan na mag-utang. Gastuson kun pira sana an kaya kan badyet nindo.—Talinhaga 21:5; 22:7.

AN PUWEDE MONG GIBUHON:

• Kun may natada sa badyet nindo sa katapusan nin bulan, pag-ulayan kun sain nindo iyan gagamiton

• Kun kinulang an badyet nindo, planuhon kun paano babawasan an gastos nindo. Halimbawa, puwedeng magluto na sana kamo kisa magkakan sa luwas

2 MAGIN ONESTO ASIN PRAKTIKAL

AN SINASABI KAN BIBLIYA: ‘Magtaram kamo nin totoo sa lambang saro.’ (Efeso 4:25) Sabihon sa saimong agom kun pira talaga an income saka nagastos mo.

Pirming konsultahon an saimong agom sa mga desisyon na imbuwelto an dakulang kantidad. (Talinhaga 13:10) An bukas na pag-uulay dapit sa kuwarta makakatabang na magin matuninong an saindong pag-ibanan. Isipon na an saimong income, bako lang saimo, kundi income man kan pamilya mo.—1 Timoteo 5:8.

AN PUWEDE MONG GIBUHON:

• Pag-ulayan kun sagkod pira an puwede nindong gastuson na dai na kaipuhan ipaaram sa kada saro

• Dai na paghalaton na magkaproblema bago mag-ulay dapit sa kuwarta