An Ikaduwang Milagro Mantang Nasa Cana

Pakalihis nin mga duwang aldaw sa Samaria, nagpuli na si Jesus sa saiyang sadiring lugar. Nagin halawig an paghuhulit niya sa Judea, pero dai siya mapuli sa Galilea para magpahingalo. Imbes, pinunan niya an mas mahiwas pa nganing ministeryo sa lugar kun sain siya nagdakula. Puwedeng dai nag-aasa si Jesus na magigin magayon an pag-ako sa saiya duman, huling sinabi niya na “an sarong propeta dai tinatawan nin onra sa sadiri niyang lugar.” (Juan 4:44) Imbes na magdanay na kaiba niya, an saiyang mga disipulo nagbaralik sa saindang pamilya asin sa dati nindang mga hanapbuhay.

Anong mensahe an pinunan ni Jesus na ihulit? Iyo ini: “An Kahadian nin Diyos harani na. Magsurulsol kamo, asin magtubod sa maugmang bareta.” (Marcos 1:15) Asin ano an reaksiyon kan mga tawo? An totoo, dakul na taga-Galilea an nag-ako ki Jesus asin nagtao sa saiya nin onra. Bako sana ining huli sa saiyang mensahe. An nagkapirang taga-Galilea yaon sa Paskuwa sa Jerusalem kan nakaaging mga bulan asin nahiling an makangangalas na mga tanda na ginibo ni Jesus.—Juan 2:23.

Sain pinunan ni Jesus an saiyang mahiwas na ministeryo sa Galilea? Minalataw na sa Cana, kun sain niya kaidto ginibong arak an tubig sa sarong bangkete sa kasal. Mantang yaon siya giraray duman, nabaretaan ni Jesus an sarong aking lalaki na grabe an hilang, na naghihingagdan na. Siya an aki kan sarong opisyal ni Herodes Antipas, an hadi na paghaloy-haloy nagbuot na pugutan si Juan Bautista. Naaraman kan opisyal na ini na nag-abot si Jesus sa Cana haling Judea. Kaya nagbiyahe an lalaki hali sa saiyang harong sa Capernaum pasiring sa Cana para hanapon si Jesus. Nakiulay sa saiya an haditon na opisyal: “Kagurangnan, mag-iba ka sa sako bago magadan an aki ko.”—Juan 4:49.

Siguradong napangalas an lalaki sa isinimbag ni Jesus: “Magpuli ka na; rahay na an saimong aki.” (Juan 4:50) Nagtubod ki Jesus an opisyal ni Herodes asin nagpuon na magbiyahe papuli. Kan papuli na ini sinabat siya kan saiyang mga uripon, na naghihidaling magsabi sa saiya kan magayon na bareta. Iyo, buhay asin rahay na an saiyang aki! ‘Kasuarin siya narahay?’ an hapot niya, na pighihinguwang pagkonektaron an mga pangyayari.

“Nawara su kalintura niya kasuudma, kan ikapitong oras,” an simbag ninda.—Juan 4:52.

Narealisar kan opisyal na kan mismong oras na iyan sinabi ni Jesus, “Rahay na an saimong aki.” Pagkatapos kaiyan, an mayaman na lalaking ini na igwa nin mga uripon saka an gabos niyang kairiba sa harong nagin mga disipulo ni Cristo.

Kaya duwang beses na naggibo si Jesus nin milagro sa Cana, an inot, ginibo niyang arak an tubig; asin an ikaduwa, pinaumayan niya an aking lalaki na mga 26 kilometros an rayo. Siyempre, bako sana ini an mga milagrong ginibo niya. Pero mahalaga an pagpaumay na ini huling malinaw na ipinahiling kaiyan na siya sarong propeta nin Diyos kan siya magbalik sa Galilea. Alagad sagkod sain an ‘propetang ini tatawan nin onra sa sadiri niyang lugar’?

Maaaraman iyan pagpuli ni Jesus sa Nazaret. Ano an naghahalat sa saiya duman?