Ginatos na Tawo an Nakahiling sa Saiya Bago kan Pentecostes

Pakabuhaya liwat ki Jesus, guminibo siya nin paagi na maghirilingan sinda kan 11 apostol sa sarong bukid sa Galilea. Yaon man duman an iba pang disipulo, mga 500, na an nagkapira nagduwa-duwa kan inot. (Mateo 28:17; 1 Corinto 15:6) Pero makakatabang an sasabihon ngunyan ni Jesus para makumbinsir an kada saro sa sainda na talagang buhay siya.

Ipinaliwanag ni Jesus na itinao na sa saiya nin Diyos an gabos na awtoridad sa langit asin sa daga. Sinabihan niya sinda: “Padumán kamo asin gumibo kamo nin mga disipulo sa mga tawo kan gabos na nasyon, na binabawtismuhan sinda sa ngaran kan Ama asin kan Aki asin kan banal na espiritu, na tinutukduan sinda na utubon an gabos na bagay na ipinagbuot ko sa saindo.” (Mateo 28:18-20) Iyo, gustuhon pa man niya giraray na maihulit an maugmang bareta.

An gabos na parasunod ni Jesus—mga lalaki, mga babayi, asin mga aki—tinawan kan pagbuot na gumibo nin mga disipulo. Dawa pa hinguwahon kan mga paratumang na papunduhon sinda, sinigurado ni Jesus sa sainda: “An gabos na awtoridad sa langit asin sa daga itinao na sa sako.” Ano an kahulugan kaiyan para sa saiyang mga parasunod? Sinabi niya sa sainda: “Uya! kaibanan nindo ako sa gabos na aldaw sagkod sa pagtatapos kan sistema nin mga bagay.” Dai man sinasabi ni Jesus na an gabos na makikikabtang sa paghuhulit kan maugmang bareta makakagibo nin mga milagro. Pero, tatabangan sinda kan banal na espiritu.

Sa manlain-lain na pagkakataon, nagpahiling si Jesus sa mga disipulo “sa laog nin 40 aldaw” pakabuhaya liwat sa saiya gamit an iba-ibang pisikal na hawak. “Pinatunayan niya sa sainda na buhay siya paagi sa dakul na nakakakumbinsir na patotoo,” na tinutukduan sinda “manungod sa Kahadian nin Diyos.”—Gibo 1:3; 1 Corinto 15:7.

Malinaw na mantang nasa Galilea pa an mga apostol, pinagbutan sinda ni Jesus na bumalik sa Jerusalem. Kan kaibanan niya sindang nagtitiripon sa siyudad, sinabi niya: “Dai kamo maghali sa Jerusalem, kundi padagos nindong halaton an ipinanuga kan Ama na nadangog nindo sa sako; tunay nanggad na si Juan nagbawtismo sa tubig, alagad babawtismuhan kamo sa banal na espiritu pirang aldaw puon ngunyan.”—Gibo 1:4, 5.

Dai nahaloy, nakipaghilingan giraray si Jesus sa mga apostol. Iiniba niya “sinda paluwas sa siyudad sagkod sa Betania,” na nasa sirangan na bakilid kan Bukid nin mga Olibo. (Lucas 24:50) Apisar kan gabos na sinabi ni Jesus sa sainda dapit sa saiyang paghali, nagtutubod pa man giraray sinda na sa paano man, digdi sa daga papatindugon an saiyang Kahadian.—Lucas 22:16, 18, 30; Juan 14:2, 3.

Naghapot an mga apostol ki Jesus: “Kagurangnan, ibabalik mo na ngunyan sa Israel an kahadian?” An simbag sana niya: “Bako para sa saindo an pag-aram kan mga panahon asin itinalaan na mga aldaw, huli ta sakop iyan kan awtoridad kan Ama.” Dangan, tanganing iduon giraray an gibuhon na dapat nindang asikasuhon, sinabi niya: “Maako kamo nin kapangyarihan pag uminabot sa saindo an banal na espiritu, asin kamo magigin mga saksi ko sa Jerusalem, sa bilog na Judea saka Samaria, asin sa pinakaharayong parte kan daga.”—Gibo 1:6-8.

An mga apostol nasa Bukid nin mga Olibo kaiba kan binuhay liwat na si Jesus kan magpuon siyang mag-itaas pasiring sa langit. Dai nahaloy may panganuron na naglipod sa saiya asin dai na ninda siya nahiling. Pakabuhaya liwat ki Jesus, nagpahiling siya gamit an iba-ibang pisikal na hawak. Pero ngunyan, hinali ni Jesus an pisikal na hawak na ginamit niya sa pagkakataon na ini, asin nagsakat sa langit bilang sarong espiritung persona. (1 Corinto 15:44, 50; 1 Pedro 3:18) Mantang nakatingkalag sa langit an maimbod na mga apostol kan nag-iitaas siya, “duwang lalaking nakaputi” an nagtunga sa may harani ninda. An mga ini, na mga anghel na nagsulot nin pisikal na hawak, naghapot: “Mga taga Galilea, taano ta nakatindog kamo diyan na nakahiling sa langit? Ining Jesus na dinara sa langit hali digdi sa saindo madatong sa iyo man sanang paagi na nahiling nindo siya na pasiring sa langit.”—Gibo 1:10, 11.

Kan naghali si Jesus sa daga, dai siya nagpaeksibir sa publiko; an maimbod na mga parasunod sana niya an nakahiling. Madatong siya “sa iyo man sanang paagi”—dai nin pagpaeksibir sa publiko, kun sain an saiya sanang maimbod na mga parasunod an makakasabot kan saiyang presensiya bilang tagapamahala kan Kahadian.

Nagbalik an mga apostol sa Jerusalem. Kan suminunod na mga aldaw, nagtiripon sinda saka an iba pang mga disipulo, kaiba “si Maria na ina ni Jesus saka an mga tugang na lalaki ni Jesus.” (Gibo 1:14) Sinda gabos matiyagang namibi. An saro sa ipinamibi ninda iyo an pagpili nin disipulo na masalida ki Judas Iscariote para magin 12 giraray an mga apostol. (Mateo 19:28) An pipilion nindang disipulo iyo an saro na nakahiling kan mga ginibo ni Jesus asin kan saiyang pagkabuhay liwat. Ini an ultimong pagkakataon na sinambit sa Bibliya an pagburunutan tanganing maaraman an kabutan nin Diyos. (Salmo 109:8; Talinhaga 16:33) Si Matias, na posibleng saro sa 70 isinugo ni Jesus an napili asin “idinagdag siya sa 11 apostol.”—Gibo 1:26.

Sampulong aldaw pakasakat ni Jesus sa langit, isinelebrar an Kapiyestahan nin Pentecostes kan mga Judio kan 33 C.E. Mga 120 disipulo an nagkatiripon sa sarong kuwarto sa itaas sa Jerusalem. Bigla na sana, sarong makusog na tanog siring sa siwit nin makusog na duros an nakapano sa bilog na harong. May nahiling na garo mga dila nin kalayo, na nagtugdon sa lambang saro sa sainda. Nagpuon na magtaram an mga disipulo sa lain-lain na lengguwahe. Iyo na ini an pagbubo kan banal na espiritu na ipinanuga ni Jesus!—Juan 14:26.