Pagmidbid sa Papel ni Cristo sa Areglo nin Diyos

“SA KAPINUNAN linalang nin Diyos an kalangitan asin an daga,” asin an gabos niyang ginibo “marahayon.” (Gen. 1:1, 31) Kan lalangon ni Jehova an mga tawo, tinawan niya sinda nin magayunon na puturo. Pero, temporaryong napundo an maugmang kamugtakan kan mga tawo huli sa pagrebeldeng nangyari sa Eden. Dawa siring, dai nagbago an katuyuhan ni Jehova para sa daga asin sa katawuhan. Ipinarisa nin Diyos na magkakaigwa nin kaligtasan an makinuyog na mga naggikan ki Adan. Ibabalik an tunay na pagsamba, asin tatapuson nin Diyos an saro na maraot kaiba an gabos na maraot na gibo kaini. (Gen. 3:15) Magigin “marahayon” giraray an mga bagay-bagay. Gigibuhon ini ni Jehova paagi sa saiyang Aki, si Jesu-Cristo. (1 Juan 3:8) Kun siring, kaipuhan nanggad na midbidon ta an papel ni Cristo sa areglo nin Diyos.—Gibo 4:12; Fil. 2:9, 11.

KUN ANO AN PAPEL NI CRISTO

² Pag iniisip ta an papel ni Cristo sa areglo nin Diyos, nasasabutan niyato na dakul iyan. Naglilingkod siya bilang Parabalukat kan katawuhan, Halangkaw na Saserdote, Payo kan Kristiyanong kongregasyon, asin ngunyan bilang Hadi kan Kahadian nin Diyos. Pag hinuhurop-hurop ta an mga ini, urog niyatong naaapresyar an areglo nin Diyos asin lalo tang namumutan si Cristo Jesus. Ipinapaliwanag kan Bibliya an nagkapira sa manlain-lain na papel niya.

³ Sa panahon kan ministeryo ni Cristo digdi sa daga, nagin malinaw na si Jesus an gagamiton kan Diyos para maipakipag-ulian sa Saiya an makinuyog na mga tawo. (Juan 14:6) Bilang Parabalukat kan katawuhan, itinao ni Jesus an sadiri niya bilang pantubos na karibay nin dakul. (Mat. 20:28) Kaya si Jesus bako sanang halimbawa nin diyosnon na paggawi. Siya an may pinakadakulang papel sa kautuban kan katuyuhan ni Jehova para sa katawuhan. Siya an solamenteng paagi tanganing makamtan ta giraray an pag-uyon nin Diyos. (Gibo 5:31; 2 Cor. 5:18, 19) Huli sa pagsakripisyo ni Jesus kan saiyang buhay asin pagkabuhay niya liwat, may oportunidad an masinunod na katawuhan na magkamit nin daing sagkod na mga bendisyon sa pamamahala kan langitnon na Kahadian nin Diyos.

⁴ Bilang Halangkaw na Saserdote, ‘nasasabutan ni Jesus an satong mga kaluyahan’ asin magigibo niyang bayadan an mga kasalan kan saiyang nagdusay na mga parasunod digdi sa daga. Ipinaliwanag ni apostol Pablo: “An satuyang halangkaw na saserdote bakong saro na dai nakakasabot kan satong mga kaluyahan, kundi saro na uminagi sa gabos na pagbalo na arog kan inaagihan niyato, alagad mayo nin kasalan.” Dangan dinagka ni Pablo an mga nagtutubod ki Jesu-Cristo na lubos na makinabang sa areglong ini para sa pakipag-ulian sa Diyos: “Dumulok kita sa trono nin daing kapantay na kabuutan asin mamibi sa Diyos na daing pag-alangan, tanganing mag-ako kita nin pagkahirak asin daing kapantay na kabuutan sa mga panahon na kaipuhan ta an tabang.”—Heb. 4:14-16; 1 Juan 2:2.

⁵ Si Jesus man an Payo kan Kristiyanong kongregasyon. Kapareho kan mga parasunod niya kan inot na siglo, dai ta man ngunyan kaipuhan nin lider na tawo. Nagtatao siya nin paggiya paagi sa banal na espiritu asin paagi sa kuwalipikadong katabang na mga pastor, na maninimbag sa saiya saka sa saiyang langitnon na Ama sa pag-asikaso sa aripumpon nin Diyos. (Heb. 13:17; 1 Ped. 5:2, 3) Sa sarong hula manungod ki Jesus, sinabi ni Jehova: “Uya! Ginibo ko siyang sarong saksi sa mga nasyon, sarong lider asin komandante sa mga nasyon.” (Isa. 55:4) Kinumpirmar ni Jesus na siya an kautuban kan hulang ini kan sabihon niya sa saiyang mga disipulo: “Dai man kamo magpaapod na lider, huli ta saro sana an saindong Lider, an Cristo.”—Mat. 23:10.

⁶ Para ipahiling an sabuot ni Jesus asin an pagigin andam niyang tumabang sato, inaagda niya kita: “Madya kamo sa sako, kamo gabos na nagpapagal saka nagagabatan, asin papaginhawahon ko kamo. Pasanon nindo an sakuyang sakal asin makanuod kamo sa sako, huli ta ako may mahuyong buot saka may mapakumbabang puso, asin magiginhawahan kamo. Huli ta an sakuyang sakal komportable, asin an sakuyang pasan magian.” (Mat. 11:28-30) Paagi sa mabuot asin nakakaginhawang pangangataman ni Jesu-Cristo sa Kristiyanong kongregasyon, pinatunayan niya na siya “an marahay na pastor” na nag-aarog sa saiyang langitnon na Ama, an Diyos na Jehova.—Juan 10:11; Isa. 40:11.

⁷ Sa inot na surat ni Pablo sa mga taga Corinto, ipinaliwanag niya an saro pang papel ni Jesu-Cristo: “Kaipuhan siyang mamahala bilang hadi sagkod na maibugtak nin Diyos an gabos na kaiwal sa irarom kan saiyang mga bitis. Alagad pag an gabos na bagay naipasairarom na sa saiya, dangan an Aki mismo ipapasairarom man an saiyang sadiri sa Saro na nagpasairarom kan gabos na bagay sa saiya, tanganing an Diyos lubos na mangibabaw sa gabos.” (1 Cor. 15:25, 28) Bago nagdigdi sa daga si Jesus, siya an “ekspertong trabahador” nin Diyos, ta siya an inot na linalang nin Diyos. (Tal. 8:22-31) Kan siya isugo nin Diyos digdi sa daga, ginibo niya an kabutan nin Diyos sa gabos na panahon. Tinagalan niya an pinakamasakit na pagbalo asin nagadan siyang maimbod sa saiyang Ama. (Juan 4:34; 15:10) Huli kaiyan, binuhay liwat nin Diyos an saiyang Aki pasiring sa langit asin tinawan kan deretso na magin Hadi kan langitnon na Kahadian. (Gibo 2:32-36) Bilang Hadi, igwa si Cristo Jesus nin dakulaon na asignasyon hali sa Diyos na panginutan an manampulong ribong makapangyarihan na espiritung linalang para halion sa daga an pamamahala nin tawo asin an gabos na karatan. (Tal. 2:21, 22; 2 Tes. 1:6-9; Kap. 19:11-21; 20:1-3) Pagkatapos kaiyan, an langitnon na Kahadian nin Diyos na pinapamahalaan ni Cristo iyo an magigin solamenteng awtoridad na mamamahala sa bilog na daga.—Kap. 11:15.

KUN ANO AN KAHULUGAN KAN PAGMIDBID SA SAIYANG PAPEL

⁸ Perpekto an satong Arugan na si Jesu-Cristo. Sinugo siya na atamanon kita. Tanganing makinabang sa mamumuton na pagbantay asin pangangataman niya, kaipuhan tang magin pirming maimbod ki Jehova saka padagos na sumabay sa pag-uswag kan saiyang organisasyon.

⁹ Lubos na minidbid kan mga parasunod ni Jesus kan inot na siglo an papel ni Cristo sa areglo nin Diyos. Ipinahiling ninda ini paagi sa pagtarabangan na may pagkasararo sa irarom kan pagkapayo ni Cristo, na nagpapasakop sa saiyang paggiya, na itinatao paagi sa banal na espiritu. (Gibo 15:12-21) Binanggit ni apostol Pablo an pagkasararo kan linahidan na Kristiyanong kongregasyon kan isurat niya: “Paagi sa pagtaram kan katotoohan asin pagpahiling nin pagkamuot, magtalubo kita sa gabos na bagay bilang pag-arog sa Cristo na iyo an payo. Paagi sa saiya an gabos na kabtang kan hawak nagkakauruyon asin nakikikooperar, asin nangyayari ini huli ta an kada sugpunan kaiyan nagtatao kan ano man na kinakaipuhan. Pag an lambang kabtang nagpupunsiyonar nin areglado, nakakatabang ini sa pagtalubo kan hawak miyentras na pinapakusog kaiyan an sadiri paagi sa pagkamuot.”—Efe. 4:15, 16.

¹⁰ Pag an kada saro sa kongregasyon nakikikooperar asin an gabos nagkakasararo sa irarom kan pamamayo ni Cristo, nag-uuswag an kongregasyon saka hiling-hiling na marhay an pagkamuot, na “bugkos nin lubos na pagkasararo.”—Col. 3:14; 1 Cor. 12:14-26.

¹¹ An mga pangyayari sa kinaban bilang kautuban kan mga propesiya sa Bibliya malinaw na nagpapatunay na puon kan 1914, ipinagkatiwala na ki Jesu-Cristo an kapangyarihan bilang Hadi kan Kahadian. Namamahala na siya ngunyan sa tahaw kan mga kaiwal niya. (Sal. 2:1-12; 110:1, 2) Ano an kahulugan kaini para sa mga nabubuhay ngunyan digdi sa daga? Dai na mahahaloy, gagamiton ni Jesus an saiyang papel bilang Hadi nin mga hadi asin Kagurangnan nin mga kagurangnan pag ginibo na niya an paghukom nin Diyos sa mga kaiwal. (Kap. 11:15; 12:10; 19:16) Dangan, an mga yaon sa tuo ni Cristo na may pag-uyon ni Jehova magkakamit na kan kaligtasan na ipinanuga Niya sa kapinunan kan pagrebelde nin tawo. (Mat. 25:34) Nauugma nanggad kita na minimidbid ta an papel ni Cristo sa areglo nin Diyos! Lugod na padagos kitang magkasararo sa pag-utob kan pambilog na kinaban na ministeryo sa panginginot ni Cristo sa huring mga aldaw na ini!