Bumalik Ka sa “Pastor Asin Paraataman kan Saindong Kalag”

MAKAKASIGURO ka na aalalayan ka ni Jehova sa pagbalik mo sa saiya. Tatabangan ka niya na makayanan an mga kahaditan, mahali an kulog nin buot, asin magkaigwa nin katuninungan nin isip asin puso huli sa pagkaigwa nin malinig na konsiyensiya. Mapapahiro ka kaiyan na maglingkod giraray ki Jehova kaiba kan mga kapagtubod. Magigin kapareho mo an nagkapirang Kristiyano kan inot na siglo, na sinuratan ni apostol Pedro: “Kaidto kamo siring sa mga karnero na nalalagalag, pero ngunyan nagbalik na kamo sa pastor asin paraataman kan saindong kalag.”—1 Pedro 2:25, NW.

An pagbalik ki Jehova an pinakamarahay nanggad na magigibo mo. Taano? Mapapaugma mo siya. (Talinhaga 27:11) Arog kan aram mo, may pagmati si Jehova, kaya may epekto sa saiya an mga ginigibo ta. Siyempre, dai niya kita pinupuwersa na mamutan siya asin maglingkod sa saiya. (Deuteronomio 30:19, 20) Arog kaini an pagkasabi nin sarong iskolar sa Bibliya dapit diyan: “Dai nin kaputan na pambukas sa luwas kan pinto kan puso nin tawo. Kaipuhan na bukasan iyan sa laog.” Mabubukasan ta an pintong iyan kun sasambahon ta si Jehova na may pusong pano nin pagkamuot. Kun gigibuhon ta iyan, tinatawan ta siya nin mahalagang marhay na regalo—an satong integridad—asin napapaugma ta nanggad siya. Iyo, mayong makakapantay sa namamatian tang kaugmahan huli sa pagtao ta ki Jehova kan pagsambang maninigo sana sa saiya.—Guibo 20:35; Kapahayagan 4:11.

Apuwera diyan, pag nagbalik ka sa Kristiyanong pagsamba, mapapaniguan an saimong espirituwal na pangangaipo. (Mateo 5:3) An mga tawo sa bilog na kinaban naghahapot, ‘Taano ta yaon kita digdi?’ Gustong-gusto nindang maaraman an simbag sa mga hapot dapit sa katuyuhan nin buhay. Yaon sa mga tawo an pangangaipong iyan huling arog kaiyan an pagkalalang sa sainda ni Jehova. Dinisenyo niya kita na makamati nin satispaksiyon sa paglilingkod sa saiya. Dai nang ibang makakatao sa sato nin urog na pagkakontento kisa sa pakaaram na sinasamba ta si Jehova huling namumutan ta siya.—Salmo 63:1-5.

Tandaan tabi na gusto ni Jehova na bumalik ka sa saiya. Paano ka makakasigurado? Isip-isipon: Maingat na inandam an brosyur na ini na may dakul na pamibi. Sinabi sa saimo an dapit sa brosyur na ini, tibaad nin sarong elder o sarong kapagtubod. Dangan napahiro kang basahon ini asin naghimati ka sa mensahe kaini. Gabos ini patunay na dai ka nalilingawan ni Jehova. Sa kabaliktaran, mabuot ka niyang tinatabangan na bumalik sa saiya.—Juan 6:44.

Nakakarangang maaraman na nungkang linilingawan ni Jehova an nawawara niyang mga lingkod. Iyan an napahalagahan nin sarong sister na an pangaran Donna. Sabi niya: “Luway-luway akong naparayo sa katotoohan, pero pirmi kong naiisip-isip an Salmo 139:23, 24, na nagsasabing: ‘Siyasaton mo ako, O Diyos, asin midbida an sakuyang puso. Baluon mo ako, asin aramon mo an sakong [napupurisaw] na kaisipan. Hilingon mo kun igwa sa sakuya nin nakakaraot na dalan, asin itukdo mo ako sa daing katapusan na dalan.’ Aram kong bako akong kabtang kan kinaban—talagang dai ako bagay diyan—saka aram kong dapat yaon ako sa organisasyon ni Jehova. Nahiling ko na dai talaga ako pinabayaan ni Jehova; kaipuhan ko sanang bumalik sa saiya. Ugmahon ako na ginibo ko iyan!”

Sinsero ming ipinapamibi na lugod mamatian mo giraray an kaugmahan na itinatao ni Jehova. (Nehemias 8:10) Dai mo nanggad pagbabasulan an pagbalik mo ki Jehova.