Si Jacob Asin si Esau Nakipagkatuninungan sa Kada Saro

Nangako si Jehova ki Jacob na poprotektaran niya ini arog ki Abraham asin Isaac. Nag-istar si Jacob sa lugar na inaapod na Haran, nakaagom siya duman, nagkaigwa nin dakulang pamilya, asin nagin mayamanon.

Pag-abot nin panahon, sinabihan ni Jehova si Jacob: ‘Magbalik ka sa sadiri mong lugar.’ Kaya pinunan ni Jacob asin kan saiyang pamilya an halawig na pagbaklay pabalik duman. Sa dalan, may nagdulok ki Jacob na mga suruguon niya asin nagsabi: ‘Pasiring digdi an tugang mong si Esau, may kaibanan siyang 400 na lalaki!’ Natakot si Jacob ta ’baad gusto siyang kulgan ni Esau pati an pamilya niya. Namibi siya ki Jehova: ‘Iligtas mo po ako sa tugang ko.’ Kinaagahan nagpadara si Jacob ki Esau nin regalo—dakul na karnero, kanding, baka, kamelyo, asin asno.

Kan nagsosolo si Jacob kan bangging idto, nakahiling siya nin sarong anghel! Nakipaggumulan saiya an anghel sagkod na inabutan sinda nin aga. Maski ngani nakulgan si Jacob, dai siya suminuko. Nagsabi an anghel: ‘Butasan mo na ako.’ Pero sinabi ni Jacob: ‘Dai, bendisyunan mo nguna ako.’

Binendisyunan man giraray kan anghel si Jacob. Aram na ngunyan ni Jacob na dai itutugot ni Jehova na kulgan siya ni Esau.

Kan agang iyan natanaw ni Jacob sa harayo si Esau asin an 400 na lalaki. Nag-inot si Jacob sa saiyang pamilya pasiring ki Esau asin pitong beses na nagsubsob sa daga. Nagdalagan si Esau pasiring ki Jacob asin kinugos ini. Naghibian an magtugang asin nakipagkatuninungan sa kada saro. Ano daw an namatian ni Jehova sa mga ginibong ini ni Jacob para ki Esau?

Dai nahaloy nagbalik si Esau sa lugar niya, asin si Jacob nagpadagos sa pagbaklay. Nagkaigwa si Jacob nin 12 aking lalaki—si Ruben, Simeon, Levi, Juda, Dan, Neftali, Gad, Aser, Isacar, Zebulon, Jose, asin Benjamin. An saro sainda, si Jose, ginamit ni Jehova tanganing iligtas an Saiyang mga lingkod. Aram mo kun paano? Hilingon ta.