Dai Pinabayaan ni Jehova si Jose

Kan nakapreso si Jose, nangaturugan si Faraon, an hadi kan Ehipto, asin warang makapaliwanag kan kahulugan kaiyan. Sinabi ki Faraon kan saro niyang suruguon na kaya ni Jose na ipaliwanag an kahulugan kan mga pangaturugan niya. Ipinaapod tulos ni Faraon si Jose.

Hinapot siya ni Faraon: ‘Kaya mong ipaliwanag an kahulugan kan mga pangaturugan ko?’ Sinabi ni Jose ki Faraon: ‘Sa laog nin pitong taon magkakaigwa nin dakulon na kakanon sa Ehipto, pero susundan iyan nin pitong taon na tiggutom. Kaya magpili po kamo nin saro na madunong para magtipon nin kakanon tanganing dai magutom an mga tawo digdi.’ Nagsimbag si Faraon: ‘Ika an pipilion ko! Ika an magigin ikaduwa sa pinakamakapangyarihan na tawo sa Ehipto!’ Paano naaraman ni Jose an kahulugan kan mga pangaturugan ni Faraon? Tinabangan kaya siya ni Jehova.

Nagtipon si Jose nin kakanon sa suminunod na pitong taon. Dangan nagkaigwa nin tiggutom sa bilog na daga, arog kan sinabi ni Jose. Hali sa iba-ibang lugar an nagduruman ki Jose para magbakal nin kakanon. Kan mabaretaan kan ama niyang si Jacob na may kakanon sa Ehipto, pinaduman kaini an sampulo niyang aki para magbakal nin kakanon.

Kan magduman ki Jose an mga aki ni Jacob, nabisto niya tulos sinda. Pero dai ninda aram na siya si Jose. Nagsubsob sinda sa saiya, arog kan napangaturugan niya kan aki pa siya. Gustong maaraman ni Jose kun baga maraot pa man giraray an mga tugang niya. Kaya sinabi niya sa sainda: ‘Mga espiya kamo. Gusto nindong aramon an kaluyahan kan nasyon mi.’ Suminabi sinda: ‘Dai po! Taga Canaan kami, 12 kaming magturugang na lalaki. Gadan na su saro ming tugang, tapos an pinakanguhod kaibanan ni Tatay.’ Dangan sinabi ni Jose: ‘Darahon nindo sako an pinakanguhod nindong tugang, para maniwala ako sa saindo.’ Kaya nagpuli sinda sa saindang ama.

Kan maubusan giraray nin kakanon an pamilya, pinabalik ni Jacob sa Ehipto an saiyang mga aki. Iniba na ninda si Benjamin, an pinakanguhod nindang tugang na lalaki. Para maaraman kun nagbago na an mga tugang niya, itinago ni Jose an saiyang kopang plataa sa sako ni Benjamin na pinaglagan nin mga tipasi tapos sinahutan niya an saiyang mga tugang nin paghabon, o paghabas. Kan makua kan mga suruguon ni Jose an kopa sa sako ni Benjamin, nabigla an saiyang mga tugang. Nakimahirak sinda ki Jose na sinda na sana an padusahan imbes na si Benjamin.

Aram na ngunyan ni Jose na nagbago na an saiyang mga tugang. Dai na napugulan ni Jose an saiyang sadiri. Bigla siyang naghibi asin nagsabi: ‘Ako si Jose, an tugang nindo. Buhay pa si Tatay?’ Grabe an pagkabigla kan mga tugang niya. Sinabi niya sa sainda: ‘Dai na nindo pagparaisipon su ginibo nindo sako. An Diyos an nagsugo sako digdi para iligtas an saindong buhay. Dalian nindo, darahon nindo digdi si Tatay.’

Nagpuli sinda para sabihon sa saindang ama an maugmang bareta asin para darahon siya sa Ehipto. Pakalihis nin haluyon na panahon, nagkaibanan giraray si Jose asin an saiyang ama.