An Sunod na Anom na Damat

Nagduman ki Faraon si Moises saka Aaron para sabihon an mensahe nin Diyos: ‘Kun dai mo papahalion an sakuyang banwaan, mapaabot ako digdi nin mga nangangagat na langaw.’ Duminagsa an mga nangangagat na langaw sa mga harong kan mga Ehipsiyo, sa mayayaman saka pobre. Luminakop sa bilog na Ehipto an mga nangangagat na langaw. Pero dai kaiyan nagkaigwa sa Gosen, an lugar na pig-iistaran kan mga Israelita. Puon sa ikaapat na damat na ini, mga Ehipsiyo na lang an tinatamaan. Nakimahirak si Faraon: ‘Makiulay ka ki Jehova na halion na an mga langaw na ini. Papahalion ko na kamo.’ Pero kan hinali ni Jehova su mga nangangagat na langaw, nagbago an isip ni Faraon. Makakanuod pa daw siya nin leksiyon?

Nagsabi si Jehova: ‘Kun dai papahalion ni Faraon an sakuyang banwaan, magkakahilang an mga hayop kan mga Ehipsiyo asin magkakagaradan.’ Kan suminunod na aldaw, nagkagaradan an mga hayop, pero su sa mga Israelita, dai. Matagas pa man giraray an payo ni Faraon, habo kaining sumunod.

Kaya pinaduman giraray ni Jehova si Moises ki Faraon asin sinabihan si Moises na magwarak nin abo paitaas. Nagin alpog su abo, naglakop ini asin nagdurukot sa gabos na Ehipsiyo. Nagin iyan makukulog na mga lugad sa mga Ehipsiyo pati sa saindang mga hayop. Pero, habo pa man giraray pahalion ni Faraon an mga Israelita.

Pinabalik ni Jehova si Moises ki Faraon dara an Saiyang mensahe: ‘Habo mo pang pahalion an sakuyang banwaan? Sa aga, mauran nin mga tipak nin yelo.’ Kan suminunod na aldaw, nagpadaguldol si Jehova saka nagpauran nin mga tipak nin yelo, asin kalayo. Iyan an pinakagrabeng pag-uran sa Ehipto. Nagkararaot an gabos na kahoy asin pananom, pero sa Gosen, dai. Suminabi si Faraon: ‘Makimahirak kamo ki Jehova na papunduhon na ini! Tapos puwede na kamong maghali.’ Pero kan magpundo na an pag-uran nin mga tipak nin yelo, nagbago an isip ni Faraon.

Dangan sinabi ni Moises: ‘Kakakanon ngunyan nin mga duron an ano man na pananom na natada kan pag-uran nin mga tipak nin yelo.’ Milyon-milyon na duron an kuminakan sa gabos na natadang pananom asin kahoy. Nakimahirak si Faraon: ‘Makiulay kamo ki Jehova na pahalion na an mga duron na ini.’ Pero dawa hinali na ni Jehova su mga duron, matagas pa man giraray an payo ni Faraon.

Sinabihan ni Jehova si Moises: ‘Iunat mo an saimong kamot paitaas.’ Biglang nagin madiklumon an langit. Tulong aldaw na daing nahiling an mga Ehipsiyo. Pero may liwanag sa mga harong kan mga Israelita.

Sinabi ni Faraon ki Moises: ‘Makakahali na kamong mga Israelita. Iwalat sana nindo digdi an saindong mga hayop.’ Nagsabi si Moises: ‘Dapat ming darahon an samong mga hayop ’nganing maiatang mi an mga iyan sa samuyang Diyos.’ Anggutona si Faraon. Kuminurahaw ini: ‘Lumayas ka digdi! Pag nahiling taka giraray, gagadanon taka.’