An Milagro sa Dagat na Pula

Kan maaraman ni Faraon na naghali na sa Ehipto an mga Israelita, nagbasol siya ta tinugutan niya sindang maghali. Sinugo niya an saiyang mga suldados: ‘Ihanda nindo an gabos na karwaheng panggiyera, lalapagon ta sinda! Dai ta dapat sinda pinahali.’ Kaya linapag ninda an mga Israelita.

Ginigiyahan ni Jehova an saiyang banwaan kun sain ini maduman gamit an sarong panganuron pag aldaw tapos kalayo pag banggi. Giniyahan niya sinda pasiring sa Dagat na Pula, saka sinabihan na magkampo duman.

Tapos natanaw kan mga Israelita na linalapag sinda ni Faraon saka kan hukbo kaini. Wara sindang madudulagan dahil napatahawan sinda kan dagat tapos kan mga suldados na Ehipsiyo. Nagsarabi sinda ki Moises: ‘Magkakagaradan kita! Binayaan mo na lang dapat kami sa Ehipto.’ Pero nagsabi si Moises: ‘Dai kamo matakot. Hilingon nindo kun paano kita ililigtas ni Jehova.’ Talagang nagtiwala si Moises ki Jehova, ano?

Sinabihan ni Jehova an mga Israelita na mag-impake. Kan bangging idto, ipinuwesto ni Jehova an panganuron sa tahaw kan mga Ehipsiyo asin mga Israelita. Nagin madiklom sa kinamumugtakan kan mga Ehipsiyo. Pero maliwanag sa lugar kan mga Israelita.

Sinabihan ni Jehova si Moises na iunat an saiyang kamot sa ibabaw kan dagat. Dangan magdamlag na nagpahuyop si Jehova nin makusog na duros, o paros. Nabanga an dagat, asin nagkaigwa nin agihan sa tahaw kaiyan. Naglakaw an minilyon na mga Israelita sa marang daga sa tahaw kan garo mga lanob na tubig, pabalyo sa ibong.

Sinundan ni Faraon pati kan hukbo niya an mga Israelita sa marang agihan sa tahaw kan dagat. Pero rinibong ni Jehova an hukbo ni Faraon saka tinarangkas su mga ruweda kan karwahe ninda. Nagkururahaw an mga suldados: ‘Dulag na kita! Si Jehova an nakikipaglaban para sa sainda.’

Sinabihan ni Jehova si Moises: ‘Iunat mo an saimong kamot sa dagat.’ Biglang buminagsak an mga lanob na tubig sa hukbo kan mga Ehipsiyo. Nagadan si Faraon asin an gabos niyang suldados. Wara lamang saindang nakaligtas.

Sa balyo kan dagat, nagkaranta nin pag-umaw sa Diyos an mga Israelita: “Magkanta ki Jehova, huling nagin mamurawayon siya. An kabayo saka an nakasakay diyan inapon niya sa dagat.” Mantang nagkakaranta sinda, nagbarayle an mga babayi na nagpapakaling-kaging nin mga tamburin. Maugmahon an gabos dahil bako na sindang uripon.