Sarong Tabernakulo Para sa Pagsamba

Kan si Moises nasa Bukid nin Sinai, sinabi saiya ni Jehova na maggibo nin sarong espesyal na tolda, na inaapod na tabernakulo. Diyan Siya sasambahon kan mga Israelita. Turutangkas an mga parte kan tabernakulo kaya madadara ninda iyan pag nagbabalyo sinda nin lugar.

Sinabi ni Jehova: ‘Sabihan mo an banwaan na magtao kan kaya ninda para sa paggibo kan tabernakulo.’ Nagtao an mga Israelita nin mga bulawan, plata,a tanso, mamahalon na mga bato, saka mga alahas. Nagtao man sinda nin telang lana, telang lino, mga anit nin hayop, asin iba pa. Matinao nanggad sinda kaya kinaipuhan ni Moises na magsabi: ‘Tama na ini!’

Dakul na lalaki asin babayi na mahusay magtrabaho an nagtabang sa paggibo kan tabernakulo. Tinawan sinda ni Jehova nin kadunungan sa paggibo kaiyan. May naggibong tursido, naggibong tela, o nagburda. May naglaag man nin mga batong pantampok, naggibo nin mga gamit na may bulawan, o nag-ukit nin mga kahoy.

Sinunod kan mga Israelita an gabos na sinabi ni Jehova kun paano gigibuhon an tabernakulo. Naggibo sinda nin magayon na kurtina para pagsuwayon an duwang parte kan tabernakulo, an Banal asin an Kabanal-banali. Nasa laog kan Kabanal-banali an kaban kan tipan, na gibo sa kahoy na akasya asin bulawan. Sa laog kan lugar na inaapod na Banal, may patungan nin lampara na gibo sa bulawan, sarong lamesa, saka sarong altar na pigtututungan nin insenso. Sa patyo, may sarong dakulang planggana na gibo sa tanso asin sarong dakulang altar. An kaban kan tipan nagpapagirumdom sa mga Israelita kan pangako ninda na sunudon si Jehova. Aram mo kun ano an tipan? Saro iyan na espesyal na pangako.

Pinili ni Jehova si Aaron saka an mga aki kaining lalaki para maglingkod sa tabernakulo bilang mga saserdote. Sinda an maasikaso kaiyan asin madulot ki Jehova. An halangkaw na saserdote sanang si Aaron an puwedeng maglaog sa Kabanal-banali. Naglalaog siya diyan nin sarong beses kada taon tanganing mag-atang para sa mga kasalan niya, mga kasalan kan pamilya niya, asin mga kasalan kan bilog na nasyon nin Israel.

Natapos kan mga Israelita an tabernakulo sarong taon pakahali ninda sa Ehipto. Igwa na sinda ngunyan nin lugar para sambahon si Jehova.

Ipinahiling ni Jehova na naugma siya sa ginibong tabernakulo asin nagpalataw siya nin panganuron sa ibabaw kaiyan. Pag an panganuron nasa ibabaw kan tabernakulo, an mga Israelita dai naghahali sa pinagkakampuhan ninda. Pero pag nag-itaas iyan, aram nindang kaipuhan nang magbalyo pasiring sa ibang lugar. Tatarangkason ninda an tabernakulo asin susundan an panganuron.