An Pangako ni Jefte

Dai na naman sinusunod kan mga Israelita si Jehova asin nagsasamba na naman sa mga bakong tunay na diyos. Kan salakayon kan mga Ammonita an mga Israelita, dai lamang sinda natabangan kan mga bakong tunay na diyos na iyan. Haloy na panahon na nagsakit an mga Israelita. Nagsabi man giraray sinda ki Jehova: ‘Nagkasala kami. Iligtas mo po kami sa samong mga kalaban.’ Rinaot kan mga Israelita an saindang mga diyos-diyosan asin nagsamba giraray ki Jehova. Habo na ni Jehova na mahiling sindang nagsasakit.

Sarong parapakilaban na an pangaran Jefte an pinili para magin lider kan mga Israelita sa pakikilaban sa mga Ammonita. Sinabi niya ki Jehova: ‘Kun tatabangan mo po kami na manggana sa ralaban na ini, pangako po, pag-uli ko, itatao ko sa saimo an inot na tawo na magluwas sa harong para sabaton ako.’ Dinangog ni Jehova an pamibi ni Jefte asin tinabangan ini na manggana sa ralaban.

Pag-uli ni Jefte, an inot na nagluwas para sabaton siya iyo an aki niyang babayi, an solo niyang aki. Nagbabayle ini asin nagpapakaling-kaging nin tamburin. Ano an gigibuhon ni Jefte? Nagirumduman niya an saiyang pangako tapos nagsabi: ‘Ay, aki ko! Pinamundo mo akong marhay. Nangako ako ki Jehova. Para magibo iyan, kaipuhan takang padumanon sa tabernakulo sa Shilo para maglingkod duman.’ Pero sinabi saiya kan aki niya: ‘Tatay, kun nangako ka po ki Jehova, dapat mong gibuhon iyan. Mahagad sana ako nin duwang bulan para makaibanan ko sa bukid an sakong mga amiga. Tapos maduman na ako.’ Maimbod na naglingkod sa tabernakulo an aking babayi ni Jefte sa bilog kaining buhay. Taon-taon, binibisita siya sa Shilo kan saiyang mga amiga.