Kinaulay ni Jehova si Samuel

An Halangkaw na Saserdoteng si Eli may duwang aking lalaki—si Hofni saka Finehas. Naglilingkod sinda bilang mga saserdote sa tabernakulo. Dai ninda sinusunod an mga tugon ni Jehova, tapos marauton an ginigibo ninda sa mga tawo. Pag nagdara nin iaatang an mga Israelita ki Jehova, kinukua ni Hofni saka Finehas an pinakamarahay na karne. Naaraman ni Eli an ginigibo kan saiyang mga aki, pero pinabayaan niya sana. Itutugot daw ni Jehova na magpadagos ini?

Maski ngani akion pa si Samuel kun ikukumparar ki Hofni saka Finehas, dai niya sinda inarog. Naugma si Jehova ki Samuel. Sarong banggi, kan nagtuturog si Samuel, may nadangog siyang boses na inaapod an pangaran niya. Nagbuhat siya, nagdalagan pasiring ki Eli, dangan nagsabi: ‘Uni po ako!’ Pero nagsabi si Eli: ‘Dai taka man inapod. Magturog ka giraray.’ Kaya nagturog giraray si Samuel. Pero inapod giraray siya kan boses na idto. Kan madangog ni Samuel an boses sa ikatulong beses, naisip ni Eli na si Jehova an nag-aapod ki Samuel. Sinabi ni Eli ki Samuel na pag nadangog giraray kaini an boses, ini an dapat niyang sabihon: ‘Magtaram ka po, Jehova. Nagdadangog an lingkod mo.’

Naghigda giraray si Samuel. Dangan nadangog niya ini: ‘Samuel! Samuel!’ Nagsimbag siya: ‘Magtaram ka po, nagdadangog an lingkod mo.’ Sinabi saiya ni Jehova: ‘Sabihon mo ki Eli na papadusahan ko siya saka an saiyang pamilya. Aram niya na an mga aki niyang lalaki may ginigibong maraot digdi sa sakuyang tabernakulo, pero pinabayaan niya sana.’ Kan sunod na aga, binukasan ni Samuel an mga pinto kan tabernakulo, arog kan pirmi niyang ginigibo. Natatakot siyang sabihon sa halangkaw na saserdote an sinabi ni Jehova. Pero inapod siya ni Eli tapos hinapot: ‘Aki ko, ano an sinabi saimo ni Jehova? Sabihon mo sako gabos.’ Kaya sinabi ni Samuel ki Eli an gabos.

Pirming tinatabangan ni Jehova si Samuel mantang nagdadakula ini. Aram kan gabos sa bilog na banwaan nin Israel na pinili ni Jehova si Samuel para magin propeta asin hukom.