Si Jonathan—Maimbod Asin Makusog an Buot

An pinakamatuang aking lalaki ni Hading Saul na si Jonathan sarong parapakilaban na makusog an buot. Sinabi ni David na si Jonathan mas marikas sa agila asin mas makusog sa leon. Sarong aldaw, nakahiling si Jonathan nin mga Filisteo sa bulod. Sinabi niya sa paradara kan kalasag niya saka armas: ‘Sasalakayon ta sana sinda pag tinawan kita ni Jehova nin tanda. Pag sinabihan kita nindang tumukad, iyan na an tanda.’ Nagkurahaw an mga Filisteo: ‘Tumukad kamo digdi para labanan kami!’ Nagtukad sindang duwa asin dinaog an 20 suldados sa bulod.

Si Jonathan an pinakamatuang aki ni Saul, kaya siya kuta an puwedeng magin sunod na hadi. Pero dai nauri si Jonathan dawa aram niyang si David an pinili ni Jehova na magin sunod na hadi. Nagin dayupota na mag-amigo si Jonathan asin David. Nangako sinda na poproteksiyunan saka susurugon an kada saro. Itinao ni Jonathan ki David an saiyang pang-ibabaw na bado, espada, pana, saka paha bilang tanda na mag-amigo sinda.

Kan nagdudulag si David ki Saul, dinumanan siya ni Jonathan tapos sinabihan: ‘Dai ka matakot, kusugan mo an buot mo. Pinili ka ni Jehova na magin hadi. Aram iyan pati kan sakong ama.’ Gusto mo man daw magkaigwa nin marahay na amigong arog ni Jonathan?

Bako lang sarong beses na isinapeligro ni Jonathan an buhay niya para tabangan an amigo niya. Aram niyang gustong gadanon ni Hading Saul si David, kaya sinabi niya sa ama niya: ‘Magkakasala ka pag ginadan mo si David; mayo man siyang ginibong sála.’ Angguton si Saul ki Jonathan. Pakalihis nin pirang taon, magkaibanan na nagadan si Saul saka Jonathan sa ralaban.

Pagkagadan ni Jonathan, hinanap ni David an aki kaining si Mefiboset. Kan mahiling ini ni David, sinabi niya digdi: ‘Dahil nagin marahay na amigo sako an ama mo, aasikasuhon taka sa bilog mong buhay. Papaistaron taka sa palasyo ko asin makakan ka sa lamesa ko.’ Dai nalingawan ni David an amigo niyang si Jonathan.