Prinoteksiyunan si Hezekias kan Anghel ni Jehova

Nasakop na kan Imperyo nin Asiria an sampulong tribong kahadian nin Israel. Gusto man sakupon ni Senakerib na hadi kan Asiria an duwang tribong kahadian nin Juda. Saro-saro kaining sinakop an mga siyudad kan Juda. Pero an pinakagusto niya iyo an Jerusalem. An dai aram ni Senakerib pinoproteksiyunan ni Jehova an Jerusalem.

An hadi kan Juda na si Hezekias nagbayad ki Senakerib nin dakulon na kuwarta para dai na kaini salakayon an Jerusalem. Maski ngani kinua ni Senakerib an kuwarta, sinugo pa man niya giraray an saiyang makusugon na hukbo para salakayon an Jerusalem. Nagkatarakot an mga tawo sa siyudad dahil parani na an mga Asiriano. Kaya sinabi sainda ni Hezekias: ‘Dai kamo matakot. Makusog an mga Asiriano, pero mas papakusugon kita ni Jehova kisa sainda.’

Sinugo ni Senakerib an mensahero niya, an Rabsake, para kantiyawan an mga tawo sa Jerusalem. Sa luwas kan siyudad, nagkurahawa an Rabsake: ‘Dai kamo matatabangan ni Jehova. Dai kamo magpadaya ki Hezekias. Warang diyos na makakapagligtas saindo laban samo.’

Naghapot si Hezekias ki Jehova kun ano an dapat niyang gibuhon. Nagsimbag si Jehova: ‘Dai ka matakot sa sinabi kan Rabsake. Dai masasakop ni Senakerib an Jerusalem.’ Sunod, may ipinadarang mga surat si Senakerib para ki Hezekias na nagsasabi: ‘Sumuko ka na lang. Dai kamo kayang iligtas ni Jehova.’ Namibi si Hezekias: ‘Iligtas mo po kami Jehova para maaraman kan gabos na ika sana an tunay na Diyos.’ Sinabi saiya ni Jehova: ‘Dai makakalaog sa Jerusalem an hadi kan Asiria. Poproteksiyunan ko an sakuyang siyudad.’

Naghuhuna si Senakerib na dai mahahaloy, siguradong mapapasaiya na an Jerusalem. Pero sarong banggi, nagsugo si Jehova nin sarong anghel sa kampo kan mga suldados na Asiriano sa luwas kan siyudad. Ginadan kan anghel an 185,000 na suldados! Nagadan an pinakamatitibay na mga suldados ni Hading Senakerib. Mayo siyang ibang magibo kundi umuli na daog. Prinoteksiyunan ni Jehova si Hezekias asin an Jerusalem, arog kan ipinangako niya. Kun nasa Jerusalem ka kaidto, magtitiwala ka man daw ki Jehova?