Nag-ako si Cornelio nin Banal na Espiritu

Sa Cesarea, may sarong importanteng Romanong opisyal nin hukbo na an pangaran Cornelio. Dawa bako siyang Judio, iginagalang siya kan mga Judio. Matinabang siya sa mga pobre asin sa mga nangangaipo. Nagtutubod siya ki Jehova asin pirming namimibi saiya. Sarong aldaw, nagpahiling ki Cornelio an sarong anghel asin nagsabi: ‘Dinangog nin Diyos an mga pamibi mo. Ngunyan magsugo ka nin mga tawuhan mo pasiring sa Jope, kun sain nagdadagos si Pedro, asin padigdihon mo siya.’ Nagsugo tulos si Cornelio nin tulong tawuhan pasiring sa Jope, na mga 48 kilometros patimog.

Mantang nasa Jope, nakahiling si Pedro nin sarong bisyon. May nahiling siyang mga hayop na dai puwedeng kakanon kan mga Judio, asin may nadangog siyang sarong boses na nagsasabi na magkakan siya kaiyan. Nagsayuma si Pedro, na nagsasabi: ‘Pero dai pa ako kasuarin man nagkakan nin maating hayop.’ Dangan sinabi saiya kan boses: ‘Dai mo pag-apudon na maati an mga hayop na ini. Lininig na sinda nin Diyos.’ Sinabihan man si Pedro: ‘May tulong lalaki sa may pinto mo. Mag-iba ka sainda.’ Nagduman si Pedro sa may pinto asin hinapot an mga lalaki kun ano an tuyo ninda. Nagsimbag an mga ini: ‘Isinugo kami kan Romanong opisyal nin hukbo na si Cornelio. Pinapaduman ka niya sa harong niya sa Cesarea.’ Pinadagos ni Pedro sa harong an mga lalaki bilang mga bisita asin duman pinaturog. Kinaagahan, nag-iba siya sainda pasiring sa Cesarea kaiba an nagkapirang tugang sa Jope.

Kan mahiling na ni Cornelio si Pedro, nagluhod ini. Pero nagsabi si Pedro: ‘Tumindog ka! Tawo lang ako arog mo. Sinabi sako nin Diyos na magdigdi sa harong mo, dawa ngani an mga Judio dai nagdadagos sa mga harong kan mga Hentil. Sabihon mo tabi sako ngunyan kun ta’no ta pinadigdi mo ako.’

Nagsabi si Cornelio ki Pedro: ‘Apat na aldaw na an nakaagi, namimibi ako sa Diyos, tapos sarong anghel an nagsabi sako na padigdihon ka. Itukdo mo tabi samo an mga tataramon ni Jehova.’ Nagsabi si Pedro: ‘Nasasabutan ko nang an Diyos mayong pinapalain. Inaako niya an siisay man na gustong sumamba sa saiya.’ Tinukduan sinda ni Pedro nin dakul na bagay manungod ki Jesus. Dangan an banal na espiritu buminaba ki Cornelio asin sa gabos na kaibahan niya, asin gabos sinda binawtismuhan.