Sarong Gobyerno na Magibo kan Dai Kayang Gibohon nin Tawo

“Madia kamo, banwaan, asin helinga nindo an mga gibo nin Dios. Makangingirhat an saiyang mga gibo sa mga aki nin mga tawo.”—SALMO 66:5.

1, 2. (a) Paano ipinaheheling kan naheheling na uniberso an makangangalas na kapangyarihan kan Kaglalang? (b) Taano ta maninigo niatong tubudon an sinasabi kan makahulang Tataramon ni Jehova manongod sa satong panahon?

SI Jehova igwa kan kapangyarihan na gibohon an dai kayang gibohon nin tawo. Bilang ilustrasyon: An mga tawo napapangalas sa puwersa kan bomba nuklear; alagad an puwersa kaiyan daing ano man kun ikokomparar sa labi-labi kakosog na puwersa na yaon sa satong aldaw. Alagad an aldaw saro sana sa mga 200 bilyones na bitoon sa sato sanang galaksiang Milky Way. Kinakarkulo nin mga astronomo na sa bilog na uniberso tibaad igwa nin mga 100 bilyones na galaksia, na an lambang saro igwa nin binilyon na bitoon. Kanigoan kamakangangalas na kapangyarihan an kinaipuhan tanganing lalangon an gabos na iyan! (Isaias 40:26) An makangangalas na kapangyarihan na ini kan Kaglalang ginigibong haros mayo an kapangyarihan nin mga tawo.—Isaias 40:15.

² Kaya mayo nin siisay man na maninigong magduda na kaya ni Jehova na gibohon an sinasabi nia na gigibohon nia. (Isaias 46:9, 10; 55:11) Maninigo niatong tubudon kun an saiyang makahulang Tataramon nagsasabi sato na kita harani na sa katapusan kan panahon na itinao nia sa mga tawo tanganing gibohon an saindang pagkaindependiente. Ipinaheheling kan kasaysayan na an ginibo nin mga tawo sa buhay nin tawo asin sa buhay nin mga hayop, saka sa daga mismo, sarong kasopganan, sarong mantsa sa uniberso nin Dios. Kaya, si Jehova may lubos na katanosan na sa katapustapusi paraon an mantsang ini.—Oseas 4:1-3; Judas 14, 15.

3. Ano an sinasabi kan hula sa Biblia manongod sa harani nang ngapit?

³ An nangyayari sa kinaban ngonyan malinaw na ebidensia na an palakaw na ini nin mga bagay tunay na nasa huring kabtang kan “huring mga aldaw” na ihinula sa 2 Timoteo kapitulo 3. Dai na mahahaloy na paparaon ni Jehova an palakaw na ini asin ibibilanggo an namomoon dian, si Satanas na Diablo. Iyan susundan nin biyo nanggad na bagong palakaw nin mga bagay sa daga, na pinamamahalaan kan langitnon na gobyerno na itinokdo ni Jesus sa saiyang mga parasunod na ipamibi kan sia magsabi: “Dumatong logod an kahadean mo. Gibohon logod an boot mo, kun paano sa langit, siring man sa daga.”—Mateo 6:10; Daniel 2:44; Roma 16:20.

An Prinsipyo nin Pagtubos

4. Paano ginamit ni Jehova an prinsipyo nin pagtubos sa suanoy na Israel?

⁴ Dai kaya nin mga gobyerno nin tawo na haleon an kasalan, helang, asin kagadanan. Pero, gigibohon kan gobyerno nin Dios an dai kayang gibohon nin mga tawo. Masasabotan niato kun paano ini mangyayari paagi sa pagsiyasat sa ginibo ni Jehova sa saiyang banwaan na suanoy na Israel. Kaidto, ginamit nin Dios an prinsipyo nin pagtubos, o pagbalukat. Halimbawa, kun an sarong Israelita magin dukha, tibaad kaipuhan na ipabakal nia an saiyang sadiri bilang oripon sa sarong bakong Israelita. Alagad puwede siang tubuson nin sarong haraning paryente kun igwa ini kan igong panbalukat.—Levitico 25:47-49.

5, 6. (a) Paano an prinsipyo nin pagtubos nagkakaepekto sa pagkalda sa katawohan sa minanang kasalan? (b) An gabos daw automatikong nakakalda sa kasalan?

⁵ Sa kaparehong paagi, an Dios nagtao nin probisyon para sa pagtubos sa katawohan hale sa pagkaoripon sa kasalan. An halaga kaipuhan na katimbang kan nawara. (Deuteronomio 19:21) Iwinara ni Adan an sangkap, daing sagkod na buhay bilang tawo. Mantang mayo nin ano man na rogaring an makasalan na mga tawo na katimbang kaiyan sa halaga, dai sinda puwedeng “makabalukat minsan sa tugang.” (Salmo 49:7) Minsan siring, ihinula kan Biblia an pagdatong kan saro na makakabalukat. An sarong iyan iyo si Jesu-Cristo. Ipinahayag na si Jesus nabuhay sa langit bago nagin tawo. Alagad an saiyang buhay ibinalyo sa matris ni Maria paagi sa kapangyarihan ni Jehova. Sa paaging ini sia namundag bilang tawo. Alagad mantang an Dios an saiyang Ama, dai nia minana an pagkamakasalan na nakapilay sa gabos na katawohan.—Mateo 1:18-21; Juan 1:1, 14; 1 Pedro 2:22.

⁶ Kun siring, yaon ki Jesus an solamenteng bagay na katimbang sa halaga nin sangkap na buhay bilang tawo—an saro pang sangkap na buhay bilang tawo. Alagad bakong arog kan masumbikal na si Adan, si Jesus nagdanay na makinuyog sa Dios. Asin kan idolot nia an saiyang buhay para sa pamilya nin tawo, inako iyan ni Jehova bilang an angay na pantubos. (Galacia 1:4) Alagad ini daw nangangahulogan na an gabos automatikong nakakalda sa kasalan asin magkakamit nin pagkasangkap na sakop kan Kahadean? Dai, ta an Juan 3:16 nagsasabi: “An Dios namoot na gayo sa kinaban na itinao nia an saiyang Aking bugtong, tanganing an lambang magsagibo nin pagtubod sa saiya dai mapahamak kundi magkaigwa nin buhay na dai nin katapusan.” Solamente kun aakoon niato an probisyon nin pagtubos asin mahiro sono dian na kita makakanamit kan pagbuwelta kan satong hawak asin isip sa pagkasangkap sa Paraiso.—Kapahayagan 21:4.

Edukasyon sa Bagong Areglo

7, 8. Ano an potensial para sa pakanood sa ngapit na nasa hotok nin tawo?

⁷ An isip igwa nin dakulang potensial para sa pakanood, minsan sa presenteng bakong sangkap na kamugtakan nin tawo. Alagad ini sadit sanang kabtang kan makakaya kaiyan na manodan sa Bagong Areglo, kun an kasalan dai na makakaolang sa pagpunsionar kaiyan. Sa The Brain Book an autor nagsasabi: “Nasa laog kan satong payo an saro sa pinakakomplikadong sistema sa uniberso. An kapangyarihan asin abilidad kaiyan sa dakol na bagay nakalalabi nanggad sa arin pa man na computer na gibo nin tawo.” Idinugang pa nia: “Parateng sinasabi na ginagamit niato an 10 porsiento sana sa satong bilog na mental na kakayahan. Ini, naaaraman na ngonyan, sobrang pagkarkulo. Posible na dai ngani niato nagagamit an 1 porsiento—mas posibleng 0.1 porsiento o mas hababa pa.”

⁸ Imahinara na sana kun ano an ipapagibo kan hotok sa mga tawo kun iyan makaabot sa bilog na potensial kaiyan sa Bagong Areglo. Isip-isipa an gabos na makawiwiling mga bagay na ibinugtak ni Jehova sa daga na puwede niatong pag-adalan, arog kan mga hayop, sira, asin pananom dian. Isip-isipa man an pag-adal manongod sa makangangalas na uniberso kaiba an binilyon na galaksia kaiyan. Isip-isipa an gabos na abilidad na mapag-aadalan niato sa arte, musika, mga trabaho, asin dakol pang ibang bagay.

9. Anong klaseng edukasyon an nagtatao kan pinakadakulang mga pakinabang sa Bagong Areglo?

⁹ Igwa nin saro pang klase nin edukasyon sa Bagong Areglo na magtatao kan pinakadakulang pakinabang sa gabos. Si Jesus nagsabi: “Sinda gabos totokdoan ni Jehova.” (Juan 6:45) Ini an pinakahalangkaw na grado nin edukasyon. Asin iyan itatao sa gabos na sakop kan Kahadean nin Dios, pati sa mga makaliligtas sa katapusan kan palakaw na ini nin mga bagay. (Kapahayagan 7:9, 14) An iba pang mga sakop kan Kahadean sinasabi sa Juan 5:28 asin 29, na dian si Jesus nagsabi: “An oras maabot na an gabos na nasa mga lolobngan nin girumdoman makakadangog kan saiyang tingog asin maruluwas.” An pagbuhay na ini liwat sa binilyon na gadan—na imposible nanggad na magibo nin mga tawo—nangangahulogan na kakaipuhanon na gibohon an mahiwas na pagtotokdo para sa sainda.

10. Paano gigibohon an edukasyon sa Bagong Areglo?

¹⁰ Ngonyan kadakol kan nagkakaturumang na sistema nin edukasyon. Alagad sa Bagong Areglo, an langitnon na gobyerno nin Dios magtatao nin sarong pankinaban na sistema nin edukasyon tanganing itokdo sa mga tawo an katotoohan manongod ki Jehova sa sararong paagi. An sarong kabtang kaini iyo an pagtotokdo sa mga tawo manongod sa tamang pakikiiba. Dai itotokdo an pag-orgolyo sa rasa, nasyonalidad, o sosyal na posisyon. Imbes, an mga nag-eerok sa daga makakanood na magkaminorootmootan, na iginagalang an dignidad kan lambang saro. An siring na edukasyon magbubunga man nin marahay na pagbakle nin mga personalidad tanganing ikapaheling an superyor na mga kuwalidad ni Jehova.—Gibo 10:34, 35; Colosas 3:9-12.

11, 12. Paano niato maseseguro na an siring na edukasyon sa Bagong Areglo magigin mapanggana sa katuyohan kaiyan?

¹¹ Talaga daw na magigin epektibo an siring na edukasyon? Nakaseseguro kita na iyan puwede asin talagang magigin mapanggana. An sarong dahelan iyo na si Jehova, na dai puwedeng magputik, nagsasabi na iyan mangyayari. (Tito 1:2) Dugang pa, an klaseng ini nin edukasyon nagigin epektibo ngonyan mismo! Si Jehova igwa na nin sarong pankinaban na organisasyon na nagtotokdo sa minilyon manongod sa saiyang Kahadean asin sa mga kahagadan kaiyan. Ini nangyayari huli ta an Kahadean nagsasakop na poon kan an “huring mga aldaw” magpoon kan 1914.

¹² Poon kan panahon na idto, an hula sa Mateo kapitulo 25 naootob na. Iyan nagpapaheling na si Jesus mag-aako kan kapangyarihan sa Kahadean mantang an mga kaiwal nin Dios nasa daga pa. An bersikulo 32 nagsasabi: “An gabos na nasyon titiponon sa atubang nia, asin pagbubulagbulagon nia an mga tawo, kun paanong ibinubulag nin pastor an karnero hale sa mga kanding.” An mga arog-karnerong ini tinotokdoan na ngonyan ni Jehova paagi sa saiyang nagdadakula, naheheling na organisasyon. Mantang inaapresyar an saindang nanonodan, sinda naghihingoa na bakleon an saindang personalidad na magin kaagid nin Dios. Asin an bagay na an edukasyon na ini nakakaapektar sa minilyon para sa ikakarahay ngonyan mismo sarong seguradong garantiya na iyan magibo kaiyan sa mas mahiwas pang paagi sa Bagong Areglo nin Dios.

Pagtotogdok nin Sarong Paraiso

13. Anong dakulang gibong pagtotogdok an mangyayari sa pagsakop kan Kahadean?

¹³ An saro pang trabaho sa irarom kan Kahadean iyo an paggibo sa dagang ini na magin paraiso. Asin dai puwedeng magkaigwa nin mga lugar nin pobre o nin pagtios sa Paraiso. An mga tawo gusto nin disenteng mga harong asin kadikit na daga na may mga kahoy, burak, asin hardin. An mga andam na patokdo sa Dios magkakamit nanggad kaiyan. An Isaias 65:21 asin 22 naghuhula: “Asin sinda siertong magtotogdok nin mga harong asin mag-oontok sinda dian, asin siertong magtatanom sinda nin mga ubasan asin kakakanon ninda an bunga kaiyan. Dai sinda magtotogdok asin iba an mag-oontok; dai sinda matanom asin iba an makakan. . . . An ginibo kan saindang mga kamot lubos na gagamiton kan sakuyang mga pinili.”

14, 15. Taano ta makakasarig kita na an mga lingkod ni Jehova makakapagtogdok nin sarong paraiso?

¹⁴ Dai pagdudahan an gigibohon ni Jehova paagi sa andam na puso asin mga kamot kan saiyang banwaan sa Bagong Areglo. Dawa ngonyan an kinaban nin mga paratogdok napapangalas sa ginigibo nin mga Saksi ni Jehova sa pagtotogdok, arog kan itinogdok sa panale na mga Kingdom Hall. Pakatapos na an saro kaini itogdok sa Estados Unidos, an sarong editoryal sa diaryo nagsabi: ‘May sarong bagay na mas mahalaga ki sa sarong edipisyo na nagibo kan 2,000 na mga boluntaryong idto. An mga lider sibiko maninigong orog na magsiyasat sa nagibo kan Sabado asin Domingo. An entusiasmo, dedikasyon asin kamawotan na maotob an sarong pasohan ginamit na may makangangalas na mga resulta. Kun makokontrol sana nin lokal na mga grupo an mga kayamanan na iyan, an ano man na pasohan—baga man iyan pag-recycle, pag-olang sa krimen, o pagpaoswag sa komunidad—makakaya. An sarong hukbo nin mga trabahador nagpatunay kun ano an potensial na nasa laog kan kalag kun an komunidad nagkakasararo. Linalaom niamo na an Kingdom Hall magin lugar para sa burabod nin inspirasyon sa kongregasyon nin mga Saksi. An pag-eksister kaiyan inspirasyon na sa samo gabos.’

¹⁵ An pagigin andam na ini asin nag-ooswag na abilidad kan mga lingkod ni Jehova gagamiton na igwa nin mas dakula pang mga pakinabang sa Bagong Areglo nin Dios. Asin makaoogma nanggad na salidahan an gabos na makanos na mga lugar nin magagayon na harong asin natad! Nakakokontento nanggad na maaraman na sa kada aldaw an saindong mga paghihingoa irinarani nin sarong aldaw an daga sa pagigin panglobong paraiso!

Sararong Panglobong Pamilya

16. Taano an mga nag-eerok sa Bagong Areglo ta dai noarin man matatakot sa kadahasan?

¹⁶ An mga nag-eerok sa Bagong Areglo dai na man matatakot sa krimen, pagkariribok, o guerra. An Salmo 46:9 nagsasabi: “Pinapaontok [nin Dios] an mga ralaban sagkod sa kaporoporohi kan daga.” An “Prinsipe nin Katoninongan,” si Jesu-Cristo, mapaotob sa nagdadanay na panglobong katoninongan, ta “an kadakolan kan sa-prinsipeng pamamahala asin katoninongan magigin daing kasagkodan.” (Isaias 9:6, 7) Mantang may tunay na katoninongan, asin mantang an bilog na pamilya nin tawo tinokdoan sa pararehong halangkaw na pamantayan, an gabos magkakasararo sa dai napapatod na bogkos nin pagkamoot. Kaya, dai na magkakaigwa nin nakakabangang nasyonal na mga linderos.

17. Gurano kalakop kan katoninongan asin pagkasararo na nasa mga lingkod nin Dios minsan ngonyan?

¹⁷ Imposible daw na maotob an siring na mga panuga? Bako, ta an katoninongan asin pagkasararo dati nang sarong katunayan sa tahaw kan mga maimbod na nagpapasakop sa Kahadean! Isip-isipa ini: May labing duwa may kabangang milyon na saksi ni Jehova na lakop sa bilog na daga. Pero, inootob na ninda an Isaias 2:4, na nagsasabi: “Asin dadaragopdopon ninda an saindang mga minasbad na magin tarom nin arado asin an saindang mga budyak na magin mga sanggot. An nasyon dai mabingat nin minasbad tumang sa nasyon asin dai na sinda mag-aadal sa pakilaban.” An mga Saksi ni Jehova dai tuyong magadan sa saindang tugang, o sa siisay pa man, sa arin man na nasyon sa irarom nin ano man na kamugtakan. Arog kan ikinomento kan Italianong publikasyon na Il Corriere di Trieste: “Sinda andam na umatubang sa kagadanan imbes na lapason an pundamental na presepto . . . DAI KA GUMADAN!” Huli sa pangangapot sa mga pamantayan nin Dios, an mga Saksi ni Jehova igwa nin tunay na katoninongan asin pagkasararo, na imposibleng magibo kan kinaban na ini. Asin an bagay na an minilyon sa sainda nasa kamugtakan na ini sa tahaw kan nagkakabaranga huli sa ralaban na kinaban na ini nagpapatunay sa mangyayari kun an Kahadean nin Dios an namamahala na sa gabos na gibo-gibo sa daga.—Juan 13:34, 35; 1 Juan 3:10-12.

18, 19. Ano an iba pang mga pakinabang na nakakamtan kan mga nangangapot sa haralangkaw na pamantayan nin Dios?

¹⁸ Apuwera pa sa internasyonal na katoninongan asin pagkasararo, an pangangapot sa superyor na mga pamantayan nin Dios nagbubunga nin mga tawo na may pagmakolog sa saindang kapwa asin sa rogaring kan saindang kapwa. Kaya sinda ‘minagawe nin sadiosan sa gabos na bagay.’ (Hebreo 13:18) Mapadapit digdi, an sarong Pranses-Canadianong kolumnista, na nagsusurat sa Le Journal de Montreal, nagsabi manongod sa mga Saksi ni Jehova: “Kun sinda na sana an mga tawo sa kinaban, dai na niato kaipuhan na kandadohan an satong mga pinto kun banggi asin paandaron an alarma.”

¹⁹ An maimbod na mga sakop na ini kan gobyerno nin Dios mayo nin problema sa krimen sa tahaw ninda, mantang iyan dai nang kontrol sa kinaban. Saro pa, mantang sinda nangangapot sa halangkaw na mga pamantayan sa moral kan Biblia, dai sinda dinadamat nin mga helang na ikinakaolakit sa seksuwal na paagi o nin mga pagpakua sa aki na epidemya sa gabos na nasyon. Asin iginagalang nin mga lingkod ni Jehova an pag-aragoman, bakong arog kan konsintidor na punto-de-vista kan kinaban sa pag-agoman. Taano ta napagdadanay kan mga Saksi ni Jehova an siring na mga pamantayan? Huli ta ginigiyahan ni Jehova an saiyang maimbod na mga parasamba, asin “sa Dios an gabos na bagay mahihimo.”—Mateo 19:26.

Lumaog sa Tunay na Pagsamba

20. Ano an pinakamakahulogan na mobimiento sa modernong mga panahon?

²⁰ Aram man o dai nin mga tawo, an panglobong pagtipon sa mga arog-karnero palaog sa organisasyon ni Jehova iyo an pinakamakahulogan na mobimiento sa modernong mga panahon. Ini kaotoban kan makangangalas na hula sa Isaias 2:2, 3: “Asin mangyayari sa huring kabtang kan mga aldaw na an bukid kan harong ni Jehova [an saiyang ilinangkaw na tunay na pagsamba] magigin marigon sa ibabaw kan alitoktok kan kabukidan, asin iyan ilalangkaw nanggad sa ibabaw kan mga bolod; asin an gabos na nasyon maturukad pasiring dian. Asin dakol na banwaan an maduruman asin masarabi: ‘Madia kamo, banwaan, asin magtukad kita sa bukid ni Jehova, . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.’”

21. An mga may sadiosan na puso dinadagka na gibohon an ano?

²¹ Dinadagka mi an gabos na may sadiosan na puso na magin kabtang kan pinakahahalat na pankinaban na mobimientong ini pasiring sa tunay na pagsamba asin matanos na gobyerno. Kamtan an mga bendisyon na ngonyan mismo nakakamtan gikan sa pakikiasosyar sa sarong banwaan na tinotokdoan kan mga pagboot asin prinsipyo nin Dios. Maimbod na pasakop sa gobyerno kan Kahadean na sa dai na mahahaloy gigibohon na paraiso an dagang ini. Manarig sa Kahadean na iyan asin bakong sa mga pakana kan kinaban na ini, ta arog kan sabi kan Salmo 127:1: “Sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan.” Kumuyog sa pag-agda kan Salmo 66:5: “Madia kamo, banwaan, asin helinga nindo an mga gibo nin Dios. Makangingirhat an saiyang mga gibo sa mga aki nin mga tawo.” Kaya dumolok sa Dios na naggagarantiya kan pinakamarahay na gobyerno para sa katawohan, an gobyerno na magibo kan dai kayang gibohon nin tawo, an gobyerno na sa dai na mahahaloy iyo an magigin solamenteng gobyerno sa dagang ini.

Ano an Isisimbag Nindo?

◻ Taano ta makasisierto kita na ootobon ni Jehova an saiyang mga katuyohan?

◻ Paano an prinsipyo nin pagtubos nagkakaepekto tanganing makalda an saro sa kasalan?

◻ Anong dakulang mga trabaho nin edukasyon asin pagtotogdok an gigibohon sa Bagong Areglo?

◻ Ano an ebidensia ngonyan na an katoninongan, pagkasararo, asin pagkamoot mag-eeksister sa bilog na daga sa Bagong Areglo?

[Ritrato sa pahina 15]

Sa pagsakop kan Kahadean, an mga mamomoton sa katotoohan “gabos totokdoan ni Jehova”

[Ritrato sa pahina 17]

An katoninongan asin pagkasararo dati nang katunayan sa tahaw kan mga nagpapasakop sa gobyerno kan Kahadean