Nisan 14—Sarong Aldaw Para sa Paggirumdom

“Padagos nindong gibohon ini sa paggirumdom sa sako.”—1 CORINTO 11:24.

1. Paano nadaog ni Jesus an kinaban?

“MAGIN mapuso kamo! Nadaog ko an kinaban.” Paagi sa mga tataramon na iyan nin panranga asin pagpakosog, pinakosog ni Jesus an saiyang 11 maimbod na mga apostol kan banggi bago sia nagadan. Pinatunayan ni Jesus na sia ganador sa kinaban! Napaglabanan nia an gabos na paghihingoa kan saiyang Kaiwal, si Satanas na Diablo, na raoton an saiyang kaimbodan ki Jehova. Asin ngonyan, na napapaatubang sia sa kagadanan sa sarong hariging pasakitan sa pira na sanang oras, sia may kompiansa na mapagdanay an saiyang maimbod na integridad sagkod sa kagadanan.—Juan 16:33; Hebreo 12:2.

2. Taano ta inestablisar ni Jesus an “pamanggihan kan Kagurangnan”?

² An okasyon na ini na mahalaga sa bilog na uniberso nangyari kaidtong kagsiyam na gatos may limang polo may duwang taon na an nakaagi sa ika-14 aldaw nin Nisan, an enot na bulan na lunar sa sagradong kalendaryo kan mga Judio. An aldaw na ini saro na noarin man dai malilingawan kan saiyang debotadong mga parasunod. Tanganing maseguro na dai noarin man malilingawan kan saiyang maimbod na mga parasunod an kahulogan kan mangyayari kaidto, inestablisar ni Jesus an espesyal na pamanggihan nin paggirumdom, na inaapod ni apostol Pablo na “an pamanggihan kan Kagurangnan.” Sa pasabong nin Dios isinasaysay ni Pablo na sa okasyon na ini pinagbotan ni Jesus an saiyang mga disipulo na yaon kaidto: “Padagos nindong gibohon ini sa paggirumdom sa sako.” (1 Corinto 11:20, 24) Kun kamo boot na magin saro sa mga parasunod ni Jesus, nasasabotan daw nindo kun taano ta ipinagboot nia iyan, kun ano an hinahagad kaiyan na gibohon nindo, asin kun ano an puwedeng magin kahulogan kaiyan para sa saindong ngapit?

Sarong Aldaw na Memorable

3. Taano, asin sa anong mga kamugtakan, na an Nisan 14 ginibo kan primero na aldaw para sa paggirumdom?

³ Bako idto an enot na panahon sa kasaysayan nin tawo na an Nisan 14 itinagama bilang aldaw sa paggirumdom. Kan 1513 B.C.E., si Jehova, paagi sa saiyang lingkod na si Moises, nagboot sa mga Israelitas: “An aldaw na ini [Nisan 14] kaipuhan na magserbing rumdoman para sa saindo, asin selebraron nindo iyan bilang kapiyestahan ki Jehova sa bilog nindong kapag-arakian.” Ano an dahelan kan selebrasyon kaidto? Si Jehova mismo nagsimbag: “Iyan an atang kan paskua ki Jehova, na luminihis sa mga harong kan mga aki ni Israel sa Egipto kan tawan nia nin damat an mga taga-Egipto.”—Exodo 12:14, 27.

4. Anong mahahalagang isyu an napapalabot sa pagliligtas kan Israel sa Egipto?

⁴ An makangangalas na pagligtas na idto sa Egipto kan lambang panganay nin Israel, sa mga tawo asin sa hayop, nangyari kan bangging idto nin Nisan 14. Idto an kulminasyon sa siyam na naenot na mga damat tumang sa mga dios na demonyo na sinasamba kan mga Egipcio, na idinodoon an katuyohan na isinabi na kaidto ni Jehova sa maabhaw na si Faraon: “Sa katotoohan, huli kaini pinapagdanay ta ka, tanganing ipaheling ko saimo an sakong kapangyarihan asin tanganing an sakong ngaran ikapahayag sa bilog na daga.” Pakalihis nin pirang aldaw an ngaran asin kapangyarihan ni Jehova orog pang nahayag kan iligtas nia an minilyon na Israelitas asin an dakulang kadaklan na saralak sa Dagat na Pula, mantang linalamos an pinakaprimera sa mga hukbo ni Faraon. Bakong makangangalas na si Moises asin an mga aki ni Israel nag-arawit: “Mag-aawit ako ki Jehova, ta sia napamuraway na gayo”!—Exodo 9:16; 15:1.

5. Ano an katuyohan kan selebrasyon kan Paskua?

⁵ Kan an mga Israelitas nag-eerok na sa daga na ipinanuga sa saindang apoon na si Abraham, an Paskua ipinagboot na selebraron kan nasyon makasaro kada taon sa Jerusalem, bilang pagkuyog sa pagboot sa Deuteronomio 16:1-8. Kaya iinareglo ni Jehova na an Nisan 14 danay na ikadoon sa isip kan saiyang tipikong banwaan. Ano an katuyohan kaini? Idto magigin aldaw para sa pag-omaw sa ngaran ni Jehova, para sa paggirumdom sa saiyang makangangalas na mga gibo nin pagliligtas. Kaya pakalihis nin dakol na siglo an kahulogan kan Paskua nangongorog sa puso asin isip kan mga magurang ni Jesus na, sinasabi sato, “nakaugalean na . . . na paduman sa Jerusalem taon-taon para sa kapiyestahan kan paskua.” Sono sa kaugalean na Judio, kaiba ninda an saindang aking si Jesus.—Lucas 2:41, 42.

6. Sa anong mga dahelan na si Jesus nagmamawot na selebraron an Paskua kan 33 C.E. kaiba kan saiyang maimbod na mga apostol?

⁶ Pagkabautismohi ki Jesus sa Jordan asin pagkapoon kan saiyang ministeryo, posible na ipinagpadagos niang selebraron an Paskua kaiba ni Maria, an saiyang daganon na ina, asin kan mga aki ni Maria, an saiyang mga tugang sa ina. Minsan siring, para sa Nisan 14, 33 C.E., iinareglo ni Jesus na selebraron an kapiyestahan kaiba kan saiyang 12 apostol. An tala ni Lucas nagsasabi sato kun ano an saboot ni Jesus manongod sa okasyon na ini: “Minawot kong gayo na kakanon an Paskuang ini kaiba nindo bago ako magtios!” (Lucas 22:15, Today’s English Version) Taano ta may siring kadakulang pagmawot si Jesus? Huli ta aram nia an kahulogan kan mga madali nang mangyari sa memorableng aldaw na idto na nagpoon sa pagsolnop kan aldaw. Aram man ni Jesus na an mga pangyayaring iyan magigin mas mahalaga nanggad ki sa mga nangyari kaidtong 1513 B.C.E. Iyan magpapamuraway sa ngaran ni Jehova nin orog ki sa kasuarin pa man asin magbubugtak kan pundasyon para sa pagbendisyon sa ngapit sa gabos na pamilya kan daga. Saro pa, dakol siang kaipuhan na isabi sa saiyang mga disipulo bago sia magadan, na pinakokosog sinda na magdanay na maimbod niang mga parasunod. An detalyadong mga rekord kan Ebanghelyo minatogot sato na garo baga makadangog sa isinabi asin ginibo ni Jesus.—Juan 12:31; 17:26.

Ano an Nangyari? Ano an Kahulogan Kaiyan?

7. (a) Anong mga pangyayari kaidtong ultimong Paskua ni Jesus an guminiya pasiring sa saiyang pag-establisar kan Memorial sa saiyang kagadanan? (Juan 13:1-30) (b) Isaysay an ginibo ni Jesus sa pag-establisar kan Pamanggihan kan Kagurangnan.

⁷ Mantang sinda nagkakakan, si Jesus nagbuhat asin hinanawan an mga bitis kan saiyang mga disipulo, sa siring nagtatao nin sangkap na halimbawa sa kapakumbabaan. Dangan si Jesus nagsabi, “An saro sa saindo mapasaloib sa sako.” Dai nahaloy, hineling nia si Judas asin nagsabi, “An ginigibo mo tapuson mo na tolos.” An tala ni Juan nagsasabi: “Tolos siang nagluwas. Asin banggi kaidto.” (Juan 13:21, 27, 30) Pakalihis kaini na inestablisar ni Jesus an Memorial kan saiyang kagadanan. Dangogon niato kun paano isinasaysay kan nakaheling mismong si Mateo an nangyari: “Mantang sinda nagkakakan, si Jesus nagkua nin tinapay asin, pakapamibi, binaraak iyan asin, sa pagtao kaiyan sa mga disipulo, sia nagsabi: ‘Kua, kakan kamo. Ini nangangahulogan kan sakong hawak.’ Siring man, nagkua sia nin sarong kopa asin, pakapagpasalamat, itinao nia iyan sa sainda, na an sabi: ‘Inom kamo kaiyan, kamo gabos; huli ta ini nangangahulogan kan sakong “dugo kan tipan,” na papabuloson manongod sa dakol para sa kapatawadan nin mga kasalan. Alagad sinasabi ko sa saindo, Magpoon ngonyan dai na ako mainom kaining bunga kan ubas sagkod sa aldaw na inomon ko iyan na bago sa kaibanan nindo sa kahadean kan sakong Ama.’ Sa katapustapusi, pakaawit ninda nin mga pag-omaw, nagduruman sinda sa Bukid nin mga Olibo.”—Mateo 26:26-30; helingon man an Marcos 14:22-26, Lucas 22:19, 20, asin 1 Corinto 11:23-26.

8. Taano ta napakahalaga na masabotan an kahulogan kan mga tataramon asin aksion ni Jesus sa pag-establisar kan Memorial?

⁸ Ano an bilog na kahulogan kan isinabi asin ginibo ni Jesus sa okasyon na idto? Idinoon ni Pablo kun gurano kahalaga na masabotan ini nin gabos na linahidan na parasunod ni Cristo, na an sabi: “Kaya an siisay man na kumakan kan tinapay o uminom kan kopa nin Kagurangnan na bakong angay magkakasala mapadapit sa hawak asin sa dugo kan Kagurangnan.” Tunay na mayo sa mga linahidan an magmamawot na magin “bakong angay” sa mata ni Jehova, na magbubunga kan saiyang pagkondenar. Saro pa, an “dakulang kadaklan” maninigong magmawot na ibilang na angay bilang kairiba kan linahidan na natatada. Kaya, mantang nagdadangadang an saro na naman na Memorial sa Lunes, Marso 24, 1986, napapanahon na siyasaton giraray niato gabos nin iriba an bagay na ini nin detalyado.—1 Corinto 11:27.

9. (a) Taano an pagtradusir kan mga tataramon ni Jesus na, “Ini nangangahulogan kan sakong hawak” ta mas tama ki sa, “Ini iyo an hawak ko”? (Helingon an nota sa ibaba.) (b) Anong espesyal na kahulogan an itinao ni Jesus sa tinapay? (c) Sa arak?

⁹ Si Jesus nagsabi, “Ini nangangahulogan kan sakong hawak.”a Sa pagsabi kaini, si Jesus nagtao nin espesyal na kahulogan sa tinapay—idto simbolo kan saiya mismong daing kasalan na hawak sa laman na saiyang itinao “manongod sa buhay kan kinaban.” (Juan 6:51) Siring man, kan sia magsabi manongod sa kopa nin arak, “Ini nangangahulogan kan sakong ‘dugo kan tipan,’ na papabuloson . . . para sa kapatawadan nin mga kasalan,” ginagamit nia an uminalsom nang arak sa kopa bilang simbolo kan saiya mismong dugo. An dugong ini iyo an magigin pasisikadan tanganing magpunsionar an “sarong bagong tipan.” An saiyang pinabolos na dugo magigin paagi man na ikatao an “kapatawadan nin mga kasalan.”—Mateo 26:28; Jeremias 31:31-33; Hebreo 9:22.

10. Ano an ipinaririsa kan pakikikabtang sa tinapay asin arak?

¹⁰ Kun siring, ano an ipinaririsa sa parte kan mga nakikikabtang sa tinapay asin arak sa selebrasyon nin Memorial? An akto mismo nagpapaheling sa mga nakikikabtang, asin sa mga nagmamasid, na sinda nakinabang na sa pantubos na atang ni Cristo Jesus, alagad sa sarong espesyal na paagi asin para sa sarong espesyal na katuyohan. Paano ini nangyayari? Basado sa saindang pagtubod sa atang ni Cristo asin sa saindang pagdusay ki Jehova, itinatao sa sainda ni Jehova an merito kan atang ni Jesus bilang tawo. Sa anong katuyohan? Tanganing ikaatribuwir sa sainda an pagkasangkap nin tawo asin sa siring magkaigwa nin matanos na kamugtakan sa atubang nin Dios. Dangan an mga ini pinapangyayari ni Jehova na magin aki paagi sa saiyang banal na espiritu asin sinda nagigin saiyang espirituwal na mga aki. Sinda ngonyan nasa kamugtakan na isakripisyo an saindang diretso na mabuhay sa daga bilang karibay sa sarong langitnon na mana. Ini gabos nangyayari bago sinda makikabtang sa Pamanggihan kan Kagurangnan.—Roma 5:1, 2, 8; 8:15-17; Santiago 1:18.

11, 12. (a) Anong duwang dugang pang bagay an ipinaririsa kan pag-inom sa arak? (b) Ipaliwanag an tipan na ginibo ni Jesus sa mga nakikikabtang.

¹¹ Helinga ngonyan kun ano pa an ipinaririsa kan pag-inom sa arak. Minsan ngani iinatribuwir ni Jehova an katanosan sa saiyang espirituwal na mga aki asin inako sinda bilang mga aki, sinda nasa bakong sangkap na laman pa man giraray. Sinda nagkakasala pa asin ini minimidbid ninda. Sa pag-inom kan arak, saindang minimidbid an saindang aroaldaw na pagsarig sa dugo ni Cristo Jesus, na “papabolosan manongod sa dakol para sa kapatawadan nin mga kasalan.”—1 Juan 1:9, 10; 2:1.

¹² Alagad ta igwa nin saro pang bagay na ipinaririsa kan pag-inom sa arak. Pinatutunayan kan mga nakikikabtang na sinda pinalaog sa “bagong tipan” na haloy nang ihinula ni Jehova paagi ki propeta Jeremias. An tipan na ini ginibong epektibo paagi sa dugo ni Jesus. An mga may kabtang sa tipan na iyan iyo si Jehova Dios asin an saiyang espirituwal na mga aki, na bilang kabilogan minakompuwesto sa espirituwal na Israel. An lambang miembro pinipili nin Dios. Si Jesus iyo an Nangongoltanan sa tipan, na paagi kaiyan tinatabangan nia an 144,000 na mga miembro sa tipan na magin kabtang kan banhi ni Abraham. (Jeremias 31:31-34; 2 Tesalonica 2:13; Hebreo 8:10, 12; 12:22-24; Galacia 3:29) An mga ini man an pinalalaog ni Jesus sa sarong ‘tipan para sa kahadean.’ Bilang resulta, sinda sa katapustapusi gagamiton kaiba kan saindang Hadeng si Jesu-Cristo na ipaabot an mga bendisyon ni Jehova sa buhay sa gabos na pamilya kan daga.—Lucas 22:28-30; Juan 6:53; Kapahayagan 5:9, 10; Genesis 22:15-18.

13. Ano an mga bagay na maninigong girumdomon ngonyan sa Nisan 14?

¹³ Tunay na mantang sinisiyasat niato an bilog na kahulogan kan mga isinabi ni Jesus sa aldaw na ini nin paggirumdom, kita napapagirumdom na gayo kan pagkamoot ni Jehova sa pagtao kan saiyang namomotan na Aki. Ipinagigirumdom man kaini sa sato an pagkamoot ni Jesus sa pagtao kan saiyang buhay bilang pantubos para sa gabos na tawo na may pagtubod. (Juan 3:16; Roma 5:8; 1 Timoteo 2:5, 6) Minsan siring, igwa nin iba pang mahahalagang katotoohan na ipinakipag-olay ni Jesus sa saiyang mga parasunod kan bangging idto. Sa mga parasurat sa Biblia, si apostol Juan sana an nagtala kan dayupot na orolay na ini.

Kamurawayan, Pagkamoot, Asin Pagkasararo

14. (a) Paano si Jehova napapamuraway kan kada selebrasyon nin Memorial? (b) Ano an kabtang kan pagkamoot sa paggirumdom ki Jesus, asin anong pagsiyasat sa sadiri an maninigong pukawon kaini sa isip nin gabos na partisipante?

¹⁴ Si Jesus nagsabi: “Ngonyan an Aki nin tawo napapamuraway, asin an Dios napapamuraway may labot sa saiya.” (Juan 13:31) Poon pa kan iligtas an Israel sa Egipto, an Nisan 14 konektado na sa pagbindikar sa ngaran nin Dios, sa saiyang soberaniya, asin sa saiyang kapangyarihan. Ngonyan, paagi sa kaimbodan ni Jesus sagkod sa kagadanan asin sa saiyang suminunod na mamuraway na pagkabuhay liwat paagi sa kapangyarihan nin Dios, mas dakula pang onra asin kamurawayan an itinatao sa ngaran nin Dios. (Ikomparar an Talinhaga 27:11.) Sinabihan ni Jesus an saiyang mga disipulo na sinda makapagpapatunay na sinda mga disipulo paagi sa pag-otob sa sarong “bagong togon,” an ‘pagkaminorootmootan ninda siring sa pagkamoot nia sa sainda.’ (Juan 13:34, 35) An rarom kan satuyang pagkamoot sa tugang sokol kan satong pag-apresyar sa pagkamoot na ipinaheling ni Jesus sa sato kan panahon na idto.—1 Juan 4:19.

15. (a) Anong paglaom sa buhay an iinoopresir sa gabos na angay na nakikikabtang? (b) Paano napapatunayan an pagkamoot ki Jesus?

¹⁵ An paglaom na sarong aldaw mabuhay sa sarong erokan sa langit kaiba sa kaogmahan na iinopresir sa mga pinili na magin kairibang hade ni Cristo. (Kapahayagan 20:6) Iinintrodusir ni Jesus an paglaom na ini, na sinasabi: “Ako maduman tanganing mag-andam nin lugar para sa saindo. . . . Ako madigdi liwat asin ipag-iiba ko kamo.” (Juan 14:2-4) Kanigoan kaogmang pagpuli an naghahalat sa gabos na magdadanay na maimbod sagkod sa katapusan! Kaya, si Jesus nagsasadol, “Kun kamo namomoot sako, ootobon nindo an sakong mga togon.” Ini nangangahulogan kan gabos niang togon, kabale na an pagboot na magtokdo asin gumibo nin mga disipulo.—Juan 14:15, 21; Mateo 28:19, 20.

16. (a) Paano idinoon ni Jesus an pangangaipo na magkasararo an saiyang mga parasunod, asin taano ta napakahalaga kan pagkasararong ini? (b) Ano an kaipuhan na atubangon nin gabos na parasunod ni Jesus, alagad ano an nakatatabang sainda na magibo ini?

¹⁶ Napakahalaga nanggad na an mga parasunod ni Jesus magin kasaro nia asin kan lambang saro! Ginagamit ni Jesus an ilustrasyon manongod sa poon nin ubas asin sa mga sanga kaiyan tanganing idoon an bagay na ini. An pagkasararo nagreresulta sa pamumunga asin ini man nakakapamuraway sa Ama. (1 Corinto 1:10; Juan 15:1, 5, 8) An paglamag asin pagtumang inaatubang kan gabos na parasunod ni Jesus. Alagad ta nakakapakosog nanggad sa pagtubod an pakaaram na si Jesus nakapagdanay sa saiyang integridad bilang ganador sa kinaban sa ibong kan gabos na pagsalakay ni Satanas!—Juan 15:18-20; 16:2, 33.

17. Ipaliwanag an nagkapira sa mga inarang ni Jesus sa saiyang pamibi na nasusurat sa Juan kapitulo 17.

¹⁷ Tinapos ni Jesus an banggi paagi sa sarong odok na pamibi sa saiyang Ama. An pagpamuraway sa saiyang Ama iyo an naeenot sa saiyang pamibi. Ipinamibi nia na an saiyang mga parasunod ingatan logod sa maraot, si Satanas, mantang sinda nagdadanay na siblag sa kinaban. Asin ipinamibi man nia na an mamomoton na pagkasaro na nasa pag-oltanan nia asin kan saiyang Ama magpadagos logod na magtalubo sa pag-oltanan kan saiyang padakol nang padakol na mga parasunod.—Juan kapitulo 17.

18. Kun hehelingon an kabilangan kan mga nag-atender sa Memorial kan 1984, taano ta kakadikit kan nakikabtang sa mga emblema?

¹⁸ Napag-olayan niato an pira sana sa mahahalagang katotoohan asin mga punto na itinao ni Jesus sa saiyang mga disipulo kan bangging idto mga 1,952 na taon na an nakaagi, alagad tunay na ini nakatatabang sato na masabotan kun taano an Nisan 14 ta talagang sarong aldaw nin paggirumdom. Kaya bakong makangangalas na kan nakaaging taon 7,416,974 sa mga Saksi ni Jehova asin sa saindang mga katood an nakasabot sa halaga nin pagtiripon tanganing selebraron an Pamanggihan kan Kagurangnan. Pero, sa dakulang kadaklan na iyan, nagkaigwa sana nin 9,081 na nakikabtang sa mga emblema. Taano? Huli ta an kadaklan sa mga Saksi ni Jehova ngonyan ibinibilang an saindang sadiri na kabtang kan “dakulang kadaklan” na nagtitindog “sa atubang kan trono asin sa atubang kan Kordero.” Sinda naglalaom na mabuhay sa planetang Daga bilang saindang daing sagkod na erokan, bakong sa pag-istar sa mga langit na duman an 144,000 “maghahade . . . sa kaibanan [ni Cristo] sa laog nin sangribong taon.”—Kapahayagan 7:9; 20:6; Salmo 37:11.

19. Ano an basihan kan pag-aadalan sa masunod na luwas kan magasin na ini, asin taano ta mahalaga na an gabos mag-atender?

¹⁹ Minsan siring, may mga hapot na naglataw manongod sa relasyon sa pag-oltanan kan Pamanggihan kan Kagurangnan asin kan “dakulang kadaklan” nin “ibang karnero.” (Juan 10:16) Kaya garo baga angay na an mga bagay na ini ipaliwanag sa sarong artikulo sa masunod na luwas, tanganing dai masala sa pagsabot an siisay man mantang nagdadangadang an saro na naman na selebrasyon sa Memorial.—1 Tesalonica 5:21.

[Nota sa Ibaba]

Nagigirumdoman daw Nindo—

◻ Siisay an nakikikabtang sa mga emblema sa Memorial?

◻ Ano an mahahalagang bagay na maninigong ipagirumdom kan Memorial?

◻ Paano pinatutunayan an pakagirumdom ki Jesus sa aroaldaw?

◻ Anong mahalagang isyu an perming konektado sa Nisan 14?