Padagos na Likayan an Siod nin Kapasloan
“Mag-ingat kamo sa gabos na klase nin kapasloan, huli ta minsan pa an tawo igwa nin labi sa bastante, an saiyang kayamanan dai nagtatao sa saiya nin buhay.”—LUCAS 12:15, The New English Bible.
1. Taano ta napapanahon an patanid ni Pablo tumang sa kapasloan?
KITA nabubuhay sa kinaban na nagsasamba sa materyal na prosperidad. An komersial na intereses perming pinupukaw an kapasloan nin mga tawo na magpakayaman. An kapangganahan parateng sinosokol paagi sa kantidad kan suweldo. Kaya, napapanahon an dakol na patanid kan Biblia tumang sa kapasloan asin sa kaibang bisyo nin pagkamaaraon. (Colosas 3:5; 1 Timoteo 6:10) Sono sa diksionaryo, an kapasloan asin pagkamaaraon pareho igwa kan elemento nin “pagkaigwa o pagpaheling nin makosog na pagmawot sa mga rogaring asin nangorogna sa materyal na mga rogaring.” An kapasloan puwedeng magin arog kagabat kan pakikisaro o pagsamba sa ladawan, ta si Pablo nagpatanid: “Umontok sa pakikiiba sa siisay man na inaapod na tugang na nagin parapakisaro o paslo o parasamba sa ladawan o paramuda o paraburat o parakikil, na dai ngani makikakan sa siring na tawo.”—1 Corinto 5:11; Efeso 5:3, 5.
2. Anong mga patanid an itinao ni Jesus asin ni Jehova sa sato tumang sa kaaraan?
2 Si Jesus nagpatanid sa saiyang mga parasunod: “Lumikay kamo sa gabos na klase nin kaaraan.” (Lucas 12:15) Asin si Jehova mismo iiniiba an sarong togon tumang sa bisyong ini kaiba kan Sampulong Togon: “Dai ka maara sa harong kan saimong kapwa. Dai ka maara sa agom kan saimong kapwa, ni sa saiyang oripon na lalaki ni sa saiyang oripon na babae ni sa saiyang baka ni sa saiyang asno ni sa ano pa man na sadiri kan saimong kapwa.”—Exodo 20:17; Roma 13:9.
Mayo nin Siisay Man na Puwedeng Magpabaya
3. Paano si Eva dangan an mga Israelitas naholog sa kapasloan?
3 An totoo iyo na mayo nin siisay man na puwedeng inaan an saiyang pag-iingat tumang sa kapasloan asin kaaraan. Kan si Eva magkasala sa tatamnan nin Eden, idto huli sa kapasloan: “Naheling kan babae na an bunga kan kahoy marahayrahay na kakanon asin kawiliwili sa mga mata, iyo, an kahoy nakakaarang paghelingon.” (Genesis 3:6) Sa sarong okasyon sa kapatagan, an mga Israelitas nagpaheling nin nakababaldeng kapasloan. Kan, bilang simbag sa saindang mga reklamo manongod sa bagay na manna sana an saindang kinakakan, si Jehova nagtao nin abundang pugo, sinda guminawe na siring sa mga pakal asin pinadusahan.—Bilang 11:4-6, 31-33.
4. Ano pang ibang makasaysayan na halimbawa an nagpapaheling kan mga peligro nin kapasloan?
4 Dangan, sa ralaban sa Jerico, kapasloan an nagtulod ki Acan na habonon an pirak asin bulawan asin an mamahalon na gubing sa sinamsaman sa siudad. (Josue 7:20, 21) An kapasloan an dahelan na si Guejazi, an katabang ni Eliseo, maghingoa na magkamit nin pinansial na ganansia sa milagrosong pagkapaomay sa lepra ni Naaman. (2 Hade 5:20-27) Si Hadeng Acab saro pang paslong tawo. Tinogotan nia si Jezabel, an saiyang paganong agom, na planohon an kagadanan ni Nabot, na saiyang kataed, tanganing makua nia an ubasan ni Nabot. (1 Hade 21:1-19) Sa katapustapusi, si Judas Iscariote, sarong miembro kan dayupot na kairibaiba ni Jesus, paslong ginamit an saiyang katongdan tanganing maghabon sa komun na pundo. Asin kapasloan an nagdara sa saiya na pasaloiban si Jesus sa kantidad na 30 pidasong pirak.—Mateo 26:14-16; Juan 12:6.
5. Ano an manonodan niato sa mga eksperyensia nin laen-laen na klase nin tawo na naholog sa siod nin kapasloan?
5 An gabos na paslong ini pinadusahan. Alagad narisa daw nindo an laen-laen na klase nin tawo na naholog sa siod nin kapasloan? Si Eva sarong sangkap na babae na nag-iistar sa Paraiso. Si Acan asin an mga Israelitas personal na nakaheling sa mga milagro ni Jehova. Si Acab sarong hade, tibaad an pinakamayaman na tawo sa nasyon. Si Guejazi asin Judas binendisyonan nin mayaman na espirituwal na pakikiasosyar asin nin halangkaw na pribilehiyo nin paglilingkod. Alagad ta sinda gabos nagin paslo. Kaya an gabos—minsan pa gurano kayaman, minsan pa gurano kalangkaw an saiyang pribilehiyo sa paglilingkod, o ano man an saiyang eksperyensia—puwedeng maholog sa siod na ini. Bakong makangangalas na si Jesus nagpatanid: “Lumikay kamo sa gabos na klase nin kaaraan!”—Lucas 12:15.
6. Ano an kaipuhan tanganing makalikay kita sa siod nin kapasloan?
6 Alagad paano niato iyan magigibo? Solamente paagi sa pagpopogol sa sadiri asin danay na pagsiyasat sa sadiri. An kapasloan minapoon sa puso. Tanganing malikayan an siod nin kapasloan, kaipuhan na siyasaton niato an satong puso nin dayaday tanganing helingon kun baga nagkakagamot dian an kadikit na kapahayagan nin kapasloan. An Biblia nakakatabang sato na gibohon iyan. Paano? Primero, itinala kaiyan an isinabi ni Jesus asin kan saiyang mga disipulo manongod sa kapasloan. Kun sisiyasaton niato an mga komentong iyan, iyan nagsusuherir nin nakakarorop na mga hapot na maninigong ihapot niato sa satong sadiri tanganing helingon kun kumusta kita kun dapit sa kapasloan.
Pagsiyasat sa Satong Motibo
7. Paano an simbag ni Jesus sa tawo na napapalabot sa iriwal sa mana nakatatabang sato na masiyasat an satong sadiri?
7 An patanid ni Jesus tumang sa kaaraan gikan sa sarong pakiolay kan saro sa mga naghihinanyog sa saiya: “Paratokdo, sabihi an sakong tugang na hirasan ako kan pamana.” Si Jesus nagsimbag: “Lalaki, siisay an nagnombra sako na magin hokom o parahiras sa saindo?” (Lucas 12:13, 14) Dangan sia nagtao nin patanid tumang sa kaaraan. Habo ni Jesus na mapalabot sa sarong iriwal huli sa materyal na mga bagay, huli sa importanteng espirituwal na trabaho na kaipuhan niang hamanon kaya sia yaon digdi. (Juan 18:37) Alagad an orolay na ini nagsusuherir nin nakakarorop na mga hapot na puwedeng ihapot niato sa satong sadiri. Halimbawa kita mayo man nin partikular na pangangaipo, pero sa paghona niato igwa kita nin diretso sa sarong pinag-iiwalan na sadiri o kayamanan, o sa sarong pinag-iiwalan na mana. Gurano an gigibohon niatong pakikilaban tanganing manggana sa kaso niato? Gurano an isasakripisyo niatong paglilingkod ki Jehova o relasyon sa satong mga tugang tanganing ganahon an pinaghohona niatong satong mga diretso?—Talinhaga 20:21; 1 Corinto 6:7.
8. Paano niato malilikayan na dai magin arog kan mga eskriba na sinabi ni Jesus sa Lucas 20:46, 47?
8 Horophoropa an saro pang komento ni Jesus. Pinatanidan nia an saiyang mga parasunod: “Maglikay kamo sa mga eskribas na . . . nagsasamsam sa harong kan mga balo.” (Lucas 20:46, 47) Kanigoan nanggad karingis na kapahayagan nin kapasloan! Siyempre, an mga Kristiano obligado na atamanon an mga balo, bakong biktimahon sinda. (Santiago 1:27) Minsan siring, halimbawa may midbid kamong balo na nakakobra nin darudakulang bayad sa seguro, asin nangangaipo kamo nin kuwarta sa madali para sa sarong emerhensia. An enot daw nindong maiisip dolokon an balo, na naghohona na sia an pinakamadaling kombensiron, o na sia dapat na tumabang ta ‘dakol siang kuwarta’? O halimbawa kamo nakautang na nin kuwarta, asin ngonyan may problema kamo sa pagbayad. Iisipon daw nindo na kamo may katanosan na dai nguna bayadan an balo, ta sia ‘dai man magtatao nin problema,’ o tibaad huli ta sa paghona nindo ‘dai man nia kaipuhan an kuwarta’? Kaipuhan na kita mag-ingat na dai pabayaan na an satong kaisipan sa mga prinsipyo magin biko kun kita napapaatubang sa mga problema sa kuwarta.
9. Paano kita tibaad maholog sa siod na ‘pag-omaw sa mga tawo para sa sadiri niatong kapakinabangan’?
9 Si Judas may ilinaladawan man na paagi na puwede kitang masiod nin kapasloan. Sia nagtaram manongod sa mga tawo na naglaog sa Kristianong kongregasyon asin rinaraot iyan kan saindang kapasloan asin malaswang gawe, na “nagpapainda sa satong iyo sanang Kagsadiri asin Kagurangnan, si Jesu-Cristo.” (Judas 4) Saro pa, sinda “nag-oomaw sa mga tawo para sa sadiri nindang kapakinabangan.” (Judas 16) Habo niatong magin siring. Alagad horophoropa: Naririsa daw niato na mas gusto niatong makiiba sa mas may kayang mga Kristiano asin dai nagtatao nin dakol na atension sa mga mas dukha sa kongregasyon? Kun iyo, posible daw na kita naglalaom na may pakinabangon? (Ikomparar an Gibo 20:33; 1 Tesalonica 2:5.) Kun kita nag-iistimar sa mga may paninimbagan sa organisasyon, iyan daw ginigibo niato huli sa pagkamoot o huli ta naglalaom kita sa mga pribilehiyo bilang balos? Kun an ikaduwa, tibaad kita man ‘nag-oomaw sa mga tawo para sa sadiri niatong kapakinabangan.’
10. Sa anong mga paagi puwedeng makaganansia gikan sa satong pagsamba ki Jehova? Kun gigibohon niato ini, kiisay na halimbawa an inaarog niato?
10 An sarong kapahayagan nin kapasloan na ikinaanggot na gayo ni Jesus iyo an kan “maabotan nia sa templo an mga nagpapabakal nin baka asin karnero patin mga salampati saka an mga pararibay nin pirak na nagtuturukaw.” Huli sa kaigotan para sa harong ni Jehova pinalayas nia an mga ini sa templo asin nagsabi: “Dai ninda paggibohon an harong kan sakong Ama na harong nin negosyo!” (Juan 2:13-17) Igwa man daw kita nin kaparehong kaigotan? Kun siring marahay na ihapot sa satong sadiri: Ipakikipag-olay ko daw an dapit sa negosyo sa Kingdom Hall? Ako daw nag-oopresir nin negosyo sa mga kapwa Kristiano huli ta an pagigin espirituwal na tugang ninda nagpapagin masakit sainda na sumayuma? Ginagamit ko daw an dakol na amigo ko sa organisasyon tanganing mapahiwas an mga kontak ko sa negosyo? Tunay na kita dai maninigong may kapasloan na magganansia gikan sa pag-aprobetsar sa satong relasyon sa satong mga tugang.
11. Anong mga prinsipyong Kristiano an nakatatabang sato na mapagdanay an tamang kaisipan kun kita may mga transaksion sa negosyo sa lambang saro?
11 Iyan daw nangangahulogan na an mga Kristiano dai na noarin man puwedeng magkaigwa nin transaksion sa negosyo? Dai. Iyo sana iyan ta igwa nin oras asin lugar para sa negosyo, asin iba man na oras asin lugar para sa pagsamba. (Eclesiastes 3:1) Minsan siring, kun an mga Kristiano may relasyon sa negosyo, dai ninda maninigong lingawan an mga prinsipyo sa Biblia. Kun an Kristiano minagibo nin kontrata sa negosyo, dai sia maninigong humanap nin legal na mga labot tanganing makalikay sa saiyang moral na mga obligasyon. (Mateo 5:37) Ni magigin man siang daing herak o benggatibo kun an negosyo mapierde asin mawaran sia nin kuwarta. Si apostol Pablo nagsurat sa mga taga-Corinto: “Kaya, sa katotoohan iyan nangangahulogan na nin pagkadaog para sa saindo na kamo nagdidiremandahan. Taano ta dai na sana nindo pabayaan na kamo pagkasalaan? Taano ta dai na sana nindo pabayaan na kamo madaya?” (1 Corinto 6:7) Pipilion daw nindong madaya imbes na magdemanda, para sa ikakarahay kan kongregasyon?
12. Anong mga prinsipyo sa Biblia an makatatabang sa mga may negosyo na malikayan an siod nin kapasloan?
12 An siisay man na Kristiano na nagnenegosyo kaipuhan na mag-ingat na gayo. Ngonyan an dakol na ugale sa negosyo daing prinsipyo, pero an Kristiano dai puwedeng gumawe nin siring kaiyan. Dai nia dapat noarin man lingawan na sia disipulo ni Cristo. Habo nia na magkaigwa kan reputasyon na sia madaya o naggagamit nin tusong mga paagi. (Ikomparar an Talinhaga 20:14; Isaias 33:15.) Asin dai nia noarin man maninigong lingawan an patanid tumang sa paggibo sa kayamanan na magin dios, o sa patanid ni Juan tumang sa “horot nin laman asin an horot nin mga mata asin an pagpaabaw-abaw kan kaya sa buhay.” (1 Juan 2:16; Mateo 6:24) Bilang Kristianong negosyante o negosyanta, mapaglalabanan daw nindo an sugot na pukawon an kapasloan nin ibang tawo tanganing mas dakol an ikapabakal nindo? O pupukawon daw nindo an saindang kapaabhawan o kapalangkawan tanganing mapaoswag an saindong negosyo? Pinalalakaw daw nindo an saindong sekular na trabaho sa paagi na dai nindo ikinakasopog na ipakipag-olay iyan ki Jehova sa saindong mga pamibi?—Mateo 6:11; Filipos 4:6, 7.
13, 14. (a) Anong pagkatimbang an kinakaipuhan na mapagdanay nin mayayaman na Kristiano? Asin kan mga bakong mayaman? (b) Paano an pamibi sa Talinhaga 30:8 nakatatabang sato na makanood nin pagkarasonable kun dapit sa kayamanan?
13 Sa katapustapusi, si Pablo nagsurat ki Timoteo: “Idtong mga nag-iisip na magyaman nahoholog sa sugot asin sa siod asin sa dakol na rungaw asin nakakaraot na horot, na nagdadara sa mga tawo sa kalaglagan asin kapahamakan.” (1 Timoteo 6:9) An pagigin mayaman bakong kasalan, minsan ngani an kayamanan nagdadara nin sadiring mga problema asin sugot. (Mateo 19:24-26) An peligro iyo an ‘pag-isip na yumaman.’ Halimbawa, an sarong magurang nagsabi: “An problema parateng minalataw kun an saro nagheheling sa saiyang mayaman na Kristianong tugang asin nagsasabi: ‘Taano ta dai ako makaarog kaiyan?’”
14 An Biblia nagsasadol: “An saindo logod na pamumuhay ligtas sa pagkamoot sa pirak, mantang kamo naninigoan na sa mga bagay na yaon. Huli ta sia nagsabi: ‘Sa ano man na paagi dai ta ka babayaan ni sa ano man na paagi dai ta ka pababayaan.’” (Hebreo 13:5) Kun kamo mayaman, ibinibilang daw nindo iyan na balaog, bagay na magagamit nindo sa paglilingkod ki Jehova? Sarong beses, sinabihan ni Jesus an sarong mayaman na barobata na kun sia boot na sumunod sa saiya, kaipuhan na ipanao nia an gabos niang kayamanan. Kun sinabi iyan ni Jesus sa saindo, pipilion daw nindo na pangaptan an saindong kayamanan o sumunod ki Jesus? (Mateo 19:20-23) Kun kamo bakong mayaman, puwede daw kamong makontento kaiyan? Puwede daw nindong likayan an siod nin kaaraan? Andam daw kamong magsarig sa panuga ni Jehova: “Sa ano man na paagi dai ta ka babayaan ni sa ano man na paagi dai ta ka pababayaan”?—Helingon man an Talinhaga 30:8.
Magin Mayaman sa Dios
15, 16. (a) Anong ilustrasyon an ginamit ni Jesus tanganing mapakosog an saiyang hatol manongod sa kaaraan? (b) Ano an pundamental na problema kan tawo sa parabola ni Jesus?
15 Kan patanidan ni Jesus an mga naghihinanyog sa saiya na “lumikay kamo sa gabos na klase nin kaaraan,” sia nagsaysay manongod sa sarong paraoma na nagin mabungang gayo an mga oma. An tawo “naghorophorop sa saiya man sana, na an sabi, ‘Ano daw an gigibohon ko, ngonyan na mayo ako nin matitiponan kan sakong mga inani?’ Kaya sia nagsabi, ‘Ini an gigibohon ko: gagabaon ko an sakong mga tambobong asin magtotogdok ako nin orog pa kadarakula, asin dian titiponon ko an gabos kong inani asin an gabos kong rogaring; asin masabi ako sa sakong kalag: ‘Kalag, dakol ka nang rogaring na naririmpos para sa dakol na taon; magpahingalo ka, magkakan ka, mag-inom, magpasiramsiram.’” Alagad ta kan mismong bangging idto, an tawo nagadan. An gabos na natipon na kayamanan na idto dai man lamang nakatabang saiya ni kadikit. Si Jesus nagkonklusyon: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa Dios.”—Lucas 12:16-21.
16 An tawo daw nakaginibo nin ano man na hayag na kasalan, arog baga kan pangingikil o paghabon? An parabola dai nagsasabi nin siring. Pero, may problema sia. Nagsarig sia sa saiyang kayamanan para sa tiwasay na ngapit asin liningawan an bagay na mas mahalaga: an pagigin “mayaman sa Dios.” Sa dahelan na an tunay na mga Kristiano ginigibo an saindang relasyon sa Dios na iyo an pinakaimportanteng bagay sa saindang buhay na sinda nakakalikay sa siod na kapasloan asin sa siring bakong kabtang kan kinaban.—Juan 17:16.
17. Ano an punto-de-vista nin sarong timbang na Kristiano dapit sa problema nin paghanap-buhay?
17 Sarong beses si Jesus nagtao kan hatol: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon.” (Mateo 6:31, 32) Totoo, kita gabos napapaatubang sa kaparehong mga problema na inaatubang kan “mga nasyon.” An kadaklan sa sato kaipuhan na magmahigos sa paghanap-buhay tanganing mabakal an kinakaipuhan na mga bagay na kakakanon, iinomon, asin gugubingon. (2 Tesalonica 3:10-12) Alagad ta dai niato tinotogotan na an siring na mga kahaditan makatahob sa satong pagigin “mayaman sa Dios.”
18. Paano an pagsarig ki Jehova magpapangyari sato na malikayan an siod nin kapasloan?
18 Si Jehova an burabod kan gabos na kayamanan. (Gibo 14:15, 17) Sia nanuga na espesyal na aatamanon an saiyang mga lingkod. Si Jesus nagsabi: “An saindong langitnon na Ama nakakaaram na kaipuhan nindo an gabos na bagay na ini. Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:32, 33; Salmo 37:25) Nagtutubod daw kamo sa panugang iyan? Nagsasarig daw kamo na ootobon iyan ni Jehova? Makokontento daw kamo sa mga itinatao ni Jehova? Kun iyo, malilikayan nindo an siod na kapasloan. (Colosas 3:5) An saindong paglilingkod ki Jehova asin an saindong relasyon sa saiya perming magkakaigwa nin enot na lugar, asin an saindong bilog na pamumuhay magigin kapahayagan kan saindong pagtubod sa saiya.
Nagigirumdoman daw Nindo?
◻ Anong klaseng mga tawo an apektado nin kapasloan?
◻ Paano kita makakalikay sa kapasloan?
◻ Paano an kapasloan kun beses nahahayag?
◻ Anong mga hapot an nakatatabang sato na maaraman kun baga nalilikayan niato an siod na kapasloan o dai?
◻ Ano an dakulang proteksion tumang sa kapasloan?
[Blurb sa pahina 19]
Kun may transaksion sa negosyo, an mga Kristiano dai noarin man maninigong makalingaw sa mga prinsipyo sa Biblia