Kun Paano Mapapakinabangan an Saindong Pagbasa sa Biblia

“PALADAN an mga dukha sa espiritu.” Iyo iyan an pambukas na mga tataramon kan bantog na sermon ni Jesus sa Bukid, oyon sa nagkapirang Ingles na mga Biblia. (Mateo 5:3, Revised Standard Version, Protestant and Catholic editions) Nasasabotan daw nindo an talagang boot sabihon ni Jesus kan “dukha sa espiritu”? Boot daw niang sabihon an mga maluya an boot? O tibaad boot niang sabihon an mga boaboa? An nahuri tibaad dai sigurado alagad siertong importante na maaraman.

An mga Saksi ni Jehova, na minimidbid minsan kan saindang mga kritiko bilang mga ekselenteng mga estudyante sa Biblia, nanompongan na an New World Translation of the Holy Scriptures kahangahangang naaabot an mga kahagadan nin pagkaklarado asin katamaan. Ilinadawan kaiyan an pagkataram hale sa Sermon sa Bukid: “Maogma idtong mga nakakamate kan saindang espirituwal na pangangaipo.”

Inaako kan nagkapirang mga komentaryo sa Biblia na ini an boot sabihon kan “dukha sa espiritu.” Taano kun siring, ta an mga bersion ngonyan, arog kan Catholic Jerusalem Bible asin an New International Version, danay na ginagamit an ekspresyon na “dukha sa espiritu”?

An halimbawang ini nagpapaheling na tanganing mapakinabangan an pagbasa nin Biblia, kinakaipuhan na pumili nin sarong salin na maimbod, klaro, asin masasabotan.

Tamang Saboot

An mapapakinabangan na pagbasa nin Biblia naghahagad man nin tamang saboot sa kabtang kan nagbabasa. An parehong mga tataramon kan Sermon sa Bukid magayon na biniyo an dapat niatong magin saboot, na: Maogma idtong nakakamate kan saindang espirituwal na pangangaipo.” Nagkukulang daw an saimong buhay nin tunay na espirituwal na sukol? Naririsa daw nindo an katunayan na kaipuhan nindong pakakanon an saindong isip asin puso nin espirituwal na pagkakan? An Biblia makakatabang na mahipnoan an pangangaipong ini.

Minsan siring dai kamo makakakua nin pagkakan para sa isip asin puso sa Biblia kun babasahon nindo iyan siring sa pagbasa nin ibang babasahon. Kaipuhan ibilang nindo iyan “bakong siring sa mga tataramon nin tawo, kundi, siring sa iyo man nanggad siring sa tataramon nin Dios.” (1 Tesalonica 2:13) An babasahon nindo, bakong pilosopiya nin tawo o nasyonalistikong kasaysayan kundi mga kaisipan nin Dios asin kasaysayan kan saiyang pakikiiba sa saiyang mga lingkod sa daga. Naglalaman man iyan nin makangangalas na mga hula, an nagkapira kaini nagka-orotob na, mantang an iba naheheling niatong naootob sa atubangan niato o na maootob pa para sa pinakadakulang karahayan nin katawohan.

Mantang an Biblia iyo an Tataramon nin Dios, tanganing mapakinabangan an pagbasa kaiyan kaipuhan na hagadon nin saro an Saiyang tabang. An pamibi sa Dios, kun siring, iyo an angay na kapinonan sa pagbasa nin Biblia. Sa simpleng pagtaram, ipahayag hale sa saindong puso, hagadon saiya an tabang na masabotan nindo an saindong binabasa asin kun paano iyan i-aaplikar sa saindong sadiri. Kun minsan nagkukulang kita kan abilidad na gamiton an kaaraman na satuyang natipon, na iyo an kadonongan. An Biblia mismo nagsasadol: “Kun an siisay man saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya. Alagad padagos na maghagad sa pagtubod, na dai nin ano man na pagduwaduwa.”—Santiago 1:5, 6.

Pagbasa na May Pagtubod

Tibaad magsabi kamo: ‘Paano ako makakapagpamibi sa pagtubod asin magbasa na may pagtubod kun ako nagkukulang nin pagtubod?’ Bueno, kun ibinibilang nindo an pagbasa kan Biblia ‘na nakakamate kan saindong espirituwal na pangangaipo,’ an saindong pagtubod magdadagdag mantang nakakakua kamo nin kaaraman ki Jehova Dios asin sa saiyang makangangalas na mga katuyohan na nakatorohok ki Cristo. An tunay na pagtubod dai dapat ikaribong sa butang paniniwala na dai nasasabotan. An Biblia mismo nagtatao nin kahulogan sa pagtubod na “iyo an katunayan kan mga bagay na pinaglalaom, an tanda kan mga bagay na dai naheheling.”—Hebreo 11:1.

An tunay na pagtubod naghahagad nin masarig na basihan nin kaaraman, asin an siring na kaaraman minagibo kan mga bagay na ipinanuga nin Dios na magin siring katunay minsan dai pa naheheling. An pagtubod, kun siring, bagay napuwedeng makamit. Iyan minasunod sa pagbasa asin pakadangog kan mga bagay dapit sa Dios asin kan saiyang makangangalas na mga katuyohan para sa katawohan. Siring sa pakasabi ni apostol Pablo, “An pagtubod minasunod sa bagay na nadangog. Dangan an bagay na nadangog paagi sa tataramon manongod ki Cristo.”—Roma 10:17.a

Mantang nagdadagdag an saindong pagtubod, an saindong pagbasa kan Biblia orog na mapapakinabangan. Taano? Huli ta an saindong “paghalat kan mga bagay na linalaoman” magigin orog “kasigurado.” Puwede ining iilustrar sa bagong pagkipag-amigo nindo sa sarong tawo. Mantang nag-aagi an panahon asin namimidbid nindo nin orog an persona, an saindong kompiansa nagtatalubo. Katapustapusi, pakalihis na makaibahan mo sia sa dakol na mga kamugtakan na an saindong amigo dai nagpadisganar saindo, magkakaigwa kamo nin biyong pagtiwala sa siring na persona. Kun sia magsurat saindo, masasabotan nindo kun ano an boot niang sabihon. Minsan ngani an pahayag bakong klaradong gayo, midbid nindong gayo an persona kaya dai kamo madedepisilan na saboton an saiyang sinasabi. Binabasa nindo an surat kan saindong amigo sa paagi na may pagtiwala, bakong sa pagsuspetsa.

Siring man, orog na masasabotan nindo an Biblia asin an Awtor kaiyan, si Jehova Dios, magkakaigwa kamo nin orog na pagsarig kapwa sa Dios asin sa saiyang Tataramon. Maski an nagkapirang mga kasaysayan kan Biblia puwedeng magin depisil na saboton, ini dai makakatanyog kan saindong pagsarig. Halimbawa, minsan ngani dai tolos naheheling an rason para sa sarong paghiro nin Dios tumang sa nagkapirang persona o nasyon, magkakaigwa kamo nin kompiansa na iyan kaipuhan. Siring na gayo kaiyan an puwedeng sabihon nindo sa sarong pinagtitiwalaan na amigo: ‘Bueno, kun ginibo nia iyan, igwa sia nin makosog na rason.’

Siyempre, an saindong pagtubod sa Dios mapapakosog kun kaya nindong hanapon an rason kun taano ta naghiro sia nin siring na paagi o kun taano ta kun minsan minalataw na naaatraso an saiyang paghiro tumang sa mga maraot. Alagad tibaad kaipuhan nindo an tabang. Iyan nagdadara sato sa otro importanteng kabtang nin mapakikinabangan na pagbasa sa Biblia.

An Pangangaipo Para sa Tabang

Sarong ekselenteng bagay na basahon an interong Biblia. Sa rikas na sarong kapitulo kada aldaw, maglalawig kamo nin labing tolong taon na matapos an Hebreo asin an Griegong mga Kasuratan. Kun magbasa kamo nin tolo o apat na kapitulo kada aldaw, maglalawig sana iyan nin haros sarong taon. Minsan siring, tanganing magkaigwa nin pankagabsan na ideya sa kun ano an linalaman kan Biblia, puwedeng ponan nindo an Mga Salmo asin Talinhaga. Dangan bumuwelta sa Genesis, Exodo, asin Enot na Samuel bago magpadagos sa Kristianong kapanahonan, sa Mateo, Mga Gibo, asin an nagkapirang mga surat na isinurat kan suanoy na mga Kristiano, siring kan Mga Taga-Filipos, Santiago, asin an Enot o Ikaduwang Pedro.

Mantang ginigibo ini, marirealisar nindo na tanganing magkaigwa nin praktikal asin espirituwal na pakinabang sa Biblia, marahay na siyasaton an sinasabi kaiyan sa sarong espisipikong tema. An pagkapaliwanag sa sarong tema tibaad surosiriblag. Puwede ser kaipuhan nindo an pantabang sapag-aadal sa Biblia na matabang saindo na makanood sa mga sinasabi kan Kasuratan, topiko por topiko. Siring man, mantang an mga libro kan Biblia dai inareglar oyon sa kronolohikong pagkasuronodsonod, an siring na mga pantabang makakatabang saindo na saboton an pagkasuronodsonod kan panahon. Makakatabang man na gayo an geograpiko asin makasaysayan na mga detalye sa pagsabot kan Kasuratan.

Saen puwedeng makua an siring na mga pantabang sa Biblia? Kan nakaaging mga taon an Katolikong mga awtor nagpublikar nin dakol na mga libro na bukas tanganing tumabang sa mga Katoliko sa saindang pagbasa sa Biblia. Alagad an siring na mga awtor nanompongan an saindang sadiri na nasa kamugtakan na daing mapagpilian. Kun an siring na mga awtor tunay na minatabang sa mga Katoliko tanganing masabotan an Biblia, kan huri tolos na nadiskubre na kadaklan sa mga tokdo kan Katoliko dai makukua dian. Sa ibong na kampi, kun an mga awtor nagpapakangmatanos kan doktrina nin Katoliko, pinapaluya ninda an kompiansa kan parabasa sa Biblia huli ta iniirarom ninda an kasuratan sa tradisyon kan iglesya.—Ikomparar an Marcos 7:13.

Padakol nang padakol na sinserong mga Katoliko an nag-aako nin tabang hale sa mga Saksi ni Jehova. Sa dakol na mga daga, riboribong mga Katoliko an nagpupumirit na basahon an Biblia na may pakasabot alagad nagkakamit nin dikit o mayong tabang hale sa saindang lokal na mga padi. Sinda nakakaagid kan Etiopeng opisyal na nagbabasa kan libro ni Isaias. Kan an ebangelisador na si Felipe hapoton sia kun nasasabotan nia an saiyang binabasa an Etiope mapakumbabang nagsimbag: “Paano ko iyan magigibo, kun daing gumiya sa sako?” (Gibo 8:31, RS, Catholic edition) Tinabangan sia ni Felipe, asin dai naghaloy an sinserong lalaking ini nagin bautismadong Kristiano. Kapareho nanggad, sa saindang pagharong-harong an mga Saksi ni Jehova nakakanompong nin mga Katoliko, asin kun an mga ini nagsasabi na igwa na sinda nin Biblia sa harong, hinahapot sinda kan mga Saksi kun boot nindang tabangan sa saindang pagbasa kan Biblia tanganing tunay na mapakinabangan.

An Pagbasa na Mapapakinabangan

Sa saindang trabahong pagtotokdo sa Biblia an mga Saksi ni Jehova minagamit nin mahiwas na pantabang sa Biblia, arog kan, My Book of Bible Stories (116 na estorya sa Biblia na iprenesentar sa simpleng tataramon asin sa kronolohikong pagkasuronodsonod), Is the Bible Really the Word of God? (para sa sientipiko asin makasaysayan na ebidensia nin pagkamasasarigan kan Biblia), “All Scripture Is Inspired of God and Beneficial” (sarong libro por librong sumaryo kan mga laog kan Biblia, igwang geograpiko asin makasaysayan na detalye asin impormasyon), asin You Can Live Forever in Paradise on Earth (na igwa nin mga kasuratan sa 30 pangenot na mga topiko, kaiba an makangangalas na itinatao kan Tataramon nin Dios sa mga sinserong parabasa kan Biblia ngonyan).

An mga pantabang na ini sa Biblia, kaiba kan personal na tabang na maogmang inaalok kan mga Saksi ni Jehova sa saindo na mayong bayad, gigibohon na maogma asin mapakinabangan an saindong pagbasa nin Biblia. Manonompongan nindo an giya para sa pan-aroaldaw na buhay asin sarong mamuraway na paglaom para sa buhay sa ipinanugang bagong areglo nin Dios, na, sa katapustapusi, an kabotan nin Dios “gigibohon, sa daga kun paano sa langit.”—Mateo 6:10, JB.

[Nota sa Ibaba]

[Ritrato sa pahina 7]

Minidbid kan Etiope an kinakaipuhan tanganing masabotan an Biblia