Pagkamapanggana sa “Huring Kabtang kan mga Aldaw”

“Igwa nin sarong Dios na iyo an Parapahayag kan mga hilom, asin ipinaisi nia . . . kun ano an mangyayari sa huring kabtang kan mga aldaw.”—DANIEL 2:28.

1. (a) Paano an mga hula ni Jeremias, Ezequiel, asin Daniel importanteng gayo sa sato ngonyan? (b) Taano an ipinasabong na mga surat na idto ta prineserbar?

JEREMIAS, EZEQUIEL, DANIEL—kanigoan kamakawiwiling mga hula an ipinapagirumdom kan mga ngaran na iyan! Haros 2,600 nang taon an nakalihis, an tolong mapusong mga oripon kan Soberanong Kagurangnan na Jehova nabuhay sa huring mga aldaw kan apostatang Jerusalem, minsan ngani naglilingkod sa manlaenlaen na lugar asin sa irarom nin nagkakaibang mga kamugtakan. Alagad an kada saro sa saiyang sadiring bentahang namumugtakan naghula dapit sa mga pangyayari na magtatapos sa mas huring “huring kabtang kan mga aldaw.” Prineserbar an ipinasabong na mga surat na iyan tanganing magtao nin pagdagka sa gabos na namomoot sa Dios asin sa katanosan, asin sa nagmamawot na maligtas sa “dakulang kahorasaan” na nagdadangadang sa satong panahon.—Mateo 24:3-22; Roma 15:4.

2. Taano ta nangaipo si Jeremias nin kosog hale ki Jehova?

² Si Jeremias naghula sa Jerusalem. Mantang nagdadangadang an pagkalaglag, kapuwa an nagsasakop asin an mga tawo nagin tampalasan asin madaya. Kaya, pinakosog ni Jehova an saiyang propeta siring sa “sarong posog na kotang tanso” tanganing tumindog nin posog sa tahaw kan saindang karatan.—Jeremias 15:11, 20; 23:13, 14.

Mga Propeta nin Katoninongan

3. Anong palsong mga tataramon an itinataram kan mga propeta?

³ Dapit sa delingkuwenteng relihiyosong mga lider nin Jerusalem, si Jehova nagpahayag paagi ki Jeremias: “Dai kamo maghinanyog kan mga tataramon kan mga propeta na naghuhula sa saindo. Tinotokdoan kamo nin daing kahulogan. An gikan sa saindang sadiring puso iyo an itinataram sa saindo—bakong an hale sa ngoso ni Jehova. Sinda paolit-olit na nagsasabi sa mga daing paggalang sa sako, ‘si Jehova nagsabi: “Magkakaigwa kamo nin katoninongan.”’” An mga palsong propetang iyan nagsasabi: “Igwa nin katoninongan! Igwa nin katoninongan!” mantang mayo man nin katoninongan.—Jeremias 23:16, 17; 6:14.

4. Sa anong paglaom an kadaklan sa Kakristianohan nangangapot?

⁴ Siring man, sa apostatang Kakristianohan ngonyan, igwa nin mga propeta nin katoninongan. Kadaklan kaini nangapot sa sinabi ni Papa Paulo Vl bilang “an ultimong paglaom nin pagkaoroyon asin katoninongan,” an Naciones Unidas. Tolos man, an grupong iyan ipapahayag an 1986 bilang an Taon nin Internasyonal na Katoninongan. Sa pagpahayag kan intensyon kaiyan na makikabtang sa Taon, an Holy See nagdeklara na iyan “nagsusustinir kan paglaom na ining Taon magpoprodusir kan linalaoman na mga resulta asin magtatanda nin sarong depinidong tangga sa pagdara nin matoninong na relasyon sa tahaw nin mga tawo asin mga nasyon.” Alagad realistiko daw na laoman an mga nasyon na mag-establisar nin tunay na katoninongan?

5. Ano an ihinula ni Jehova, asin paano iyan maootob sa “huring kabtang kan mga aldaw”?

⁵ An Dios mismo nagsabi kun ano an mangyayari: “Uya! an bagyo ni Jehova kaanggotan mismo, maluwas, siring sa nag-aariporos na kangirhatan. Sa ibabaw kan payo kan mga maraot iyan mahoholog. An kaanggotan ni Jehova dai mahale sagkod na dai maotob asin magibo an mga kaisipan kan saiyang puso. Sa huring kabtang kan mga aldaw kamo banwaan maghohorophorop dian na may pakasabot [o, “biyo nindong masasabotan,” The New English Bible].” (Jeremias 23:19, 20; helingon man an 30:23, 24.) Iyo, an mga lider kan palsong relihiyon makakasabot kun ano an kahulogan para sa sainda kan “huring kabtang kan mga aldaw.” Alagad ano man na pagpahalaga na saindang itao para kaiyan magigin huri nang gayo!—Ikomparar an Kapahayagan 18:10, 16; 19:11-16; Mateo 24:30.

6. Anong maogmang kaaabtan an naghahalat para sa kadaklan?

⁶ May kaogmahan, kun siring, dakol na mga indibiduwal na dating mga bihag nin palsong relihiyon ngonyan ‘nagpapahalaga para kaiyan.’ Sinda naghiro sa pangapodan: “Lumuwas kamo saiya [palsong relihiyon], sakong banwaan,” mantang habo nindang makikabtang sa saiyang mga kasalan o mag-ako nin kabtang kan paghokom nin Dios tumang saiya. Kun kamo saro sa mga ini, logod magpadagos kamo na humiro na oyon sa sinasabi kan Tataramon nin Dios dapit sa “huring kabtang kan mga aldaw” asin an mamuraway na panahon nin katoninongan madatong.—Kapahayagan 18:2, 4, 5; 21:3, 4.

Pagsalakay ni Gog

7. Sa irarom nin anong mga kamugtakan si Ezequiel naghula?

⁷ Paano daw an banwaan nin Dios mahiro sa “huring kabtang kan mga aldaw”? Bayaan niatong si propeta Ezequiel magsabi sato. Bilang sarong hoben na lalaki, daing duwa-duwa na midbid nia si Jeremias, alagad kaidto si Ezequiel dinara pasiring sa Babilonya. Duman, huli kan salog Chebar, sia pinabotan kan 613 B.C.E. na magin propeta ni Jehova asin bantay sa kapakanan kan mga Judiong nakadistiyero, sarong paglilingkod na may kaimbodan na inotob nia sa laog nin dai makulang sa 22 taon. Minsan siring, an saiyang mga hula mas halawig an pananaw sa saiyang panahon. Sa mga kapitulo 38 asin 39, sia nagsasabi dapit ki ‘Gog nin Magog.’

8, 9. (a) Anong pangenot na isyu an kaipuhan husayon, asin noarin? (b) Siisay si Gog, siisay an nagsosonod saiya, asin anong palakad an saiyang sinusunod? (c) Ano an gigibohon ni Jehova ki Gog?

⁸ Siisay ining ‘Gog nin Magog’? Bueno, siisay an dakulang kaiwal ni Jehova na sa saiya kaipuhan ipakipaghusay an pangenot na isyu kan “huring kabtang kan mga aldaw,” nin unibersal na soberaniya? Sia iyo si Satanas na Diablo na ihinulog hale sa langit kan Pastor-Hade, si Jesu-Cristo, na sinundan kan Saiya mismong pagtukaw sa trono kan 1914. An madaya asin naaanggot na Gog ngonyan nalalaom na sa limitadong espirituwal na kamugtakan, “an daga nin Magog,” na harani digdi sa daga. Ini nangangahulogan na “herak man kan daga” huli ta si Gog nakakaisi na an saiyang panahon halipot na sa pagsagibo kan saiyang marompot na palakad nin ‘sakopon o laglagon.’—Ezequiel 37:24-28; 38:1, 2; Kapahayagan 11:18; 12:9-17.

⁹ Kinutar ni Ezequiel an Soberanong Kagurangnan na Jehova na nagsasabi: “Uya ako tumang sa saimo, O Gog, ika na pamayong prinsipe [poon nin kinaban] . . . Asin ta bibirikon taka asin bubugtakan ko nin mga banwit an saimong mga salang asin dadarahon taka kaibanan kan bilog mong puwersa militar, . . . dakol na banwaan sa kaibanan mo.” (Ezequiel 38:3-6; Juan 12:31) Iyo, si Gog igwa nin kadakol na banwaan na kaiba nia, huli ta “an bilog na kinaban namumugtak sa kapangyarihan kan maraot.” (1 Juan 5:19) Pero, kayang bugtakan ni Jehova nin piguratibong mga banwit an mga salang ni Gog tanganing imaniobra sia. Alagad taano, asin paano?

10. (a) Al kontraryo sa mga nasyon, saen ibinubugtak nin mga Saksi ni Jehova an saindang pagsarig? (b) Taano si Gog asin an saiyang mga kagrupo ta naanggot? (c) Kaipuhan gibohon niato an ano tanganing maligtas kitang buhay?

¹⁰ Sa irarom kan impluwensia ni Gog, an makapangyarihan na mga nasyon ngonyan nagsasabi na an katoninongan nin kinaban minadepende sa saindang pagtambak nin orog kamakatatakot na armas nuklear. Asin an ibang nasyon nagtatao kan saindang pagsuportar. Minsan siring, an banwaan nin Dios “na tiniripon hale sa mga nasyon” pinaindahan na an mga armas nin kadahasan. An mga Saksi ni Jehova iyo sana an “nasyon” sa daga na may katotoohan na makakapagsabi, “Sa Dios kita nagsasarig.” (Isaias 2:4; 31:1; Talinhaga 3:5) Ining matoninong na mga saksi ni Jehova “nag-eerok sa katiwasayan, na sinda gabos nag-eerok na mayo nin lanob, asin mayo ngani sinda nin pamarat asin mga tata.” Sinda “nag-eerok sa tahaw kan daga,” huli ta sa gabos na mga nasyon, sinda sana an banwaan na dai nadadaog ni Gog. (Ezequiel 38:11, 12) Kaya, an naaanggot na Gog nin Magog dinara an saiyang bilog na makademonyong organisasyon sa lugar nin iriwal. Siring sa nagngangarob na leon, an madayang si Satanas nag-aandam nin sarong pankagabsan na pagsalakay. Tanganing magdanay na buhay, kaipuhan gabos niatong ‘tumangon nin danay sia, sa satong pagtubod.’—1 Pedro 5:8, 9.

11. Paano ni Jehova ‘dadarahon si Gog tumang sa Saiyang daga,’ asin sa anong katuyohan?

¹¹ Si Jehova nagboot ki Ezequiel: “Kaya ngani maghula ka, aki nin tawo, asin sabihan mo si Gog, ‘Ini an isinabi kan Soberanong Kagurangnan na Jehova: “Bako daw na sa aldaw na iyan kun an sakong banwaan [espirituwal] Israel mag-erok sa katiwasayan dai mo daw iyan maaraman?”’” Si Gog asin an saiyang grupo nauuri sa katiwasayan asin prosperidad na naheheling ninda sa tahaw kan mga Saksi ni Jehova ngonyan. Naaanggot sinda kaini huli ta sinda “bakong kabtang kan kinaban [ni Satanas].” Kaya si Jehova tinutuya si Gog, inaatrakar sia na lusubon an daing depensang mga Saksi. Sinasabihan ni Jehova si Gog: “Asin ika masakat tumang sa sakong banwaan na Israel, siring sa mga panganoron na makakatakop sa daga. Sa huring kabtang kan mga aldaw iyan mangyayari, asin dadarahon taka nanggad tumang sa sakong daga, sa katuyohan na an mga nasyon makamidbid sa sako kun pakangbanalon ko an sakong sadiri sa saimo sa atubang kan saindang mga mata, O Gog.”—Ezequiel 38:14, 16; Juan 17:14, 16.

12. Oyon sa Ezequiel 38:18-23, ano an magigin resulta kan pagsalakay ni Gog?

¹² An naaanggot na si Gog naghihiro sa pagsalakay kan maoswag na “daga” kan banwaan ni Jehova. Minsan siring, si Gog sana daw an maaanggot? Ano daw an kaanggotan kan Soberanong Kagurangnan na Jehova tumang ki Gog asin sa saiyang mga nadaya? Sa Ezequiel 38:18-23 si Jehova naglaladawan kun paano nia ‘papakangbanalon an saiyang sadiring ngaran sa mga mata nin dakol na mga nasyon’ paagi sa pagdara ki Gog sa kalaglagan asin pagligtas kan saiyang maimbod na mga oripon. Sa pagtapos kan saiyang report sa kapangganahan ki Gog asin sa saiyang mga kairiba, an Soberanong Kagurangnan mismo nagpahayag: “Makakaaram sinda na ako si Jehova.” An saiyang mamuraway na ngaran nabindikar!

‘Mga Hilom Ipinahayag’

13. Paano daw si Daniel nagtao nin marahay na halimbawa sa mga barobatang Saksi ngonyan?

¹³ Mantang si Ezequiel naghuhula sa tahaw kan mga distiyeradong mga Judio harani sa Babilonya, an hoben na si Daniel, na naggikan sa Judiong pagkaprinsipe, tinotokdoan sa makahadeng harong ni Nabocodonosor. Duman, bilang sarong nagdadanay sa integridad, nagtao sia ni marahay na halimbawa sa gabos na barobatang oripon ni Jehova ngonyan.—Daniel 1:8, 9.

14. Sa anong punto itinao kan hoben na si Daniel an gabos na kredito sa Dios?

¹⁴ Kan ikaduwang taon pagkaholog kan Jerusalem, napaanggot si Nabocodonosor nin sarong pangatorogan. Sa saiyang pagmata dai ngani nia nagirumdoman an pangatorogan. Alagad an matatakton sa Dios na si Daniel ipinaisi sa hade an pangatorogan asin mismo an interpretasyon kaiyan. Sa pagsagibo kaini, itinao nia an gabos na kredito sa Dios, sa pagsabi sa hade: “Alagad ta igwa nin sarong Dios sa langit na Parapahayag kan mga hilom, asin ipinaisi nia ki Hadeng Nabocodonosor an mangyayari sa huring kabtang kan mga aldaw.” (Daniel 2:28) Ano an satong manonodan sa pangatorogan asin an aplikasyon kaiyan sa “huring kabtang kan mga aldaw”?

15, 16. Ano an interpretasyon kan pangatorogan ni Nabocodonosor?

¹⁵ Digdi makakaheling kita nin dakulaon, sarong dai masokol na ladawan na kumpuwesto nin manlaenlaen na mga metal sa kadaklan na pagkasuronosonod. Ipinaliwanag ni Daniel na ini nagrerepresentar nin sunodsonod na mga kahadean asin sinabihan si Nabocodonosor, “Ika mismo an payo na bulawan,” maririsang nagtotokdo sa dinastiya nin Babilonya. Dian nagsunod an iba pang pankinaban na kapangyarihan, an pirak na daghan asin mga braso na naglaladawan sa Medo-Persia, an kalongkaking tulak asin piad para sa Gresya, asin an batbat na mga bitis para sa Roma asin, dangan, an pankinaban na kapangyarihan nin Britanya asin Amerika. (Daniel 2:31-40) Sagkod sa “itinalaan na panahon nin mga nasyon,” poon 607 B.C.E. sagkod sa 1914 C.E., ining mga makapangyarihan nakipag-ibahan sa kahadean kan ‘dios kaining kinaban.’—Lucas 21:24; 4:5, 6; 2 Corinto 4:4.

¹⁶ Minsan siring, iyan “sa huring kabtang kan mga aldaw” na “an mga gikan nin katawohan,” an komon na tawo, an nangengenot. Sa dakol na mga kadagaan an mga hade, mga emperador, asin mga Cesar sinsalidahan nin mga rebulosyonario asin demokratikong mga nagsasakop. An dai tamang pagsakop nin tawo sa daga nagigin sarong pagkasaralak nin maringis na pagkadiktador asin orog na oyon-oyon na demokratikong porma nin gobyerno. Siring sa batbat asin laboy ini dai nagkakasalak. Maski sa Naciones Unidas dai sinda nagkakasaro alagad naiimbuwelto, imbes, sa mainit na debate asin mga patakot. Totoo, ‘an kahadean tunay na nababanga.’—Daniel 2:41-43.

17. Paano naootob an hula sa “huring kabtang kan mga aldaw”?

¹⁷ Kaya, sa “huring kabtang kan mga aldaw,” an isyu nin pankinaban na pagsakop nagdadangadang na sa kulminasyon kaiyan. Asin ano an solusyon? Uya! Nagpoon nang maghiro poon 1914 iyo an Mesiyanikong Kahadean nin Dios. Iyo iyan an “gapo” na naggikan sa “bukid” nin unibersal na soberaniya ni Jehova. Dai nin siisay man na tawong politiko an nakikabtang dian! Iyan minaabot, sa tamang kurso, na igwa nin tamang natotorohok. Sa panahon nin Dios tinamaan kaiyan an bitis kan ladawan asin binaraak an bilog na dakulang ladawan na magin pulbos. Siring sa ata na ipinapadpad nin doros, an pagsakop nin tawo ipinadpad, na mayo nin natada man lamang. Alagad an “gapo”—an Kahadean kan dakulang Dios asin kan saiyang Cristo—nagin sarong dakulang bukid na nakalakop sa bilog na daga. An kahadean na iyan ‘dai noarin man malalaglag asin dai itatao sa arin man na banwaan.’ Iyan magdadanay na daing sagkod. Dakulang pasalamat niato ki Jehova sa saiyang patienot na ‘pagpahayag’ kan siring na mga hilom!—Daniel 2:29, 44, 45.

Modernong Aldaw na ‘Pagtulod’

18. (a) Ano an mas nahuring bisyon na itinao ki Daniel? (b) Ano an importante sa bisyon na ini?

¹⁸ Minsan siring, si Daniel igwa pa nin orog na sasabihon dapit sa gobyerno nin tawo asin sa “huring kabtang kan mga aldaw.” Mga 70 anyos pakapahayagan ki Nabocodonosor kan pangatorogan, an gurang nang si Daniel yaon pa sa Babilonya alagad naglilingkod sa irarom ni Ciro, hade nin Persia. Mantang yaon sia sa pangpang kan salog nin Hidekel, an sarong anghel naglataw sa saiya, na nagsabi: “Puminadigdi ako tanganing ipaisi sa saimo an mangyayari sa saimong banwaan sa huring kabtang kan mga aldaw, huli ta iyan saro pang bisyon sa mga aldaw na madatong.” (Daniel 10:14) An anghel nagpadagos na magladawan sa paagi nin dakol na mga detalye an mga hade asin mga pangyayari na maheheling sa kasaysayan nin Persia, Griego, Egipsiyo, Romano, Germaniko, Anglo-Amerikano, asin sosyalistikong mga porma nin pagsakop. Tunay na naheling nangggad an gabos na ini sa kasaysayan, nin labing 2,500 na mga taon, na ikinasurat nin patienot! Iyan nagtatao sato nin dakulang pagsarig sa ipinasabong na propetikong Tataramon ni Jehova Dios!a

19. Anong modernong mga pangyayari an isinabi kan hula?

¹⁹ An hulang ini nagsasabi na, sa igong panahon, duwang makapangyarihan na mga nasyon an malataw, “an hade kan amihanan” asin “an hade kan timogan.” Sa kahurihurihi, an anghel nagsabi, an hade nin timogan “papahalangkawon nia an saiyang sadiri asin papadakulaon an saiyang sadiri sa ibabaw nin lambang dios; asin tumang sa Dios nin mga dios sia magtataram nin makangangalas na mga bagay”—bakong marahay na mga bagay, huli ta iyan ‘sa dios nin mga kuta sa saiyang kamugtakan sia magtatao nin kamurawayan.’ Tumang sa mahambog na “hadeng,” ini tinutumang an “hade nin amihanan,” na makapangyarihan man sa kosog nin militar. Siring sa ihinula, an duwang hadeng ini “nagpapadagos . . . sa pagtinuludan.” An modernong aldaw na pag-iwal sa tahaw kan duwang makapangyarihan na mga nasyon tunay na iniilustrar ini. Kun beses sinda ‘nagtitinulodan’ nin makosog mantang sinda nag-aargumento dapit sa pagkapareho nin nuklear na mga armas, mantang linilimitaran an saindang pagpaoswag kan saindang mga pag-andam sa ralaban.—Daniel 11:36-45.

20. Paano maaaraman an kaaabtan, asin paano si “Miguel” mapapalabot digdi?

²⁰ Minsan ngani an hula nagsasabi na “an hade nin timogan” makakalakop na siring sa baha sa dakol na mga daga bako iyan an madeterminar kan kaaabtan. An sokolan isinasabi sa Daniel 12:1: “Asin sa panahon na iyan si Miguel matindog, an dakulang prinsipe na nagtitindog para sa mga aki kan saimong banwaan.” An Miguel na ini iyo si Cristo Jesus, ‘nagtindog’ sa saiyang Kahadean kan 1914, na tolos man pinatalsik si Satanas sa mga langit. Asin iyo ini an “Hade nin mga hade” na maghihiro sa Armagedon na darahon an gabos “na mga hade sa daga,” kaiba an yaon sa “timogan” asin an sa “amihanan,” sa kalaglagan.—Kapahayagan 12:7-10; 19:11-19.

21. Dangan, ano an kaaabtan sa “huring kabtang kan mga aldaw”?

²¹ Duman, sa kulminasyon kan “huring kabtang kan mga aldaw,” an kaaabtan maririsa, sa kapangganahan kan Kahadean nin Dios. An anghel ilinadawan ini sa siring na mga tataramon: “Asin mangyayari an panahon nin kasakitan na dai pa nangyari poon na magkaigwa nin nasyon sagkod sa panahon na iyan.”—Daniel 12:1; Ikomparar an Jeremias 25:31-33; Marcos 13:19.

22. Bilang banwaan nin Dios, paano kita mahiro oyon sa mga hulang ini asin igwang anong paglaom?

²² Dapat daw kitang matakot sa panahon nin kahorasaan asin kasakitan? Dai kun kita yaon sa kampi ni Jehova, huli ta an anghel nagpadagos na magsabi: “Sa panahon na iyan an saimong banwaan madulag, an lambang saro na nasusurat sa libro.” (Daniel 12:1) Logod na an lambang saro sato, kun siring, magmahigos sa satuyang pag-aadal sa Biblia asin maghingoa sa paglilingkod ki Jehova. Kaya, sa “huring kabtang kan mga aldaw,” manompongan logod niatong an satong mga ngaran nakasurat sa “libro nin girumdoman” nin Dios na “pinonan na isurat sa atubang nia para sa mga natatakot ki Jehova asin para sa mga naghohorophorop sa saiyang ngaran.” (Malaquias 3:16) Sa pagsagibo kaini, kita magkakapribilehiyo na makikabtang sa saiyang kapangganahan sa “huring kabtang kan mga aldaw.”

[Nota sa Ibaba]

Dapit sa “huring kabtang kan mga aldaw”—

◻ Anong kaaabtan an ihinula ni Jeremias dapit sa katoninongan nin kinaban?

◻ An pagsalakay ni Gog magreresulta sa pagkahusay nin anong isyu, asin paano?

◻ An pangatorogan ni Nabocodonosor nagtotokdo sa anong dakulang pagtatapos?

◻ Paano daw matatapos an paglalaban nin kapangyarihan sa tahaw kan duwang “mga hade”?

[Kahon sa pahina 8]

AN LOGO na inaprobaran kan NU para sa Internasyonal na Taon nin Katoninongan kaiyan (1986) nagpapaheling nin sarong koronang olibo, sarong salampati, asin mga kamot nin tawo. Ini ipinaliwanag siring kan minasunod: “An salampati iyo an simbolo nin katoninongan na konektado sa koronang olibo na simbolo kan Naciones Unidas. An mga kamot nin tawo na kinakapotan an salampati na andam sa paglupad naglaladawan sa kabtang nin tawo sa pagmantenir nin katoninongan.”

Sa nuklear na panahon na ini, igwa nin tunay na nagtatangis na pangangaipo na maestablisar asin papagdanayon an katoninongan. Alagad mahihimo daw iyan kan mga kamot nin tawo? Si Jeremias nagpagirumdom sato: “Aram kong marahay, O Jehova, na bakong sadiri nin tawo an saiyang dalan mayo sa tawong naglalakaw na giyahan an saiyang lakad.” Asin an propeta nagdagdag kaining pakiolay: “O Jehova, . . . bubuan an saimong kabangisan sa mga nasyon na dai nagbidbid sa saimo.”—Jeremias 10:23-25.

An salampati asin an dahon nin olibo sinubli sa rekord kan Biblia dapit kan aldaw ni Noe. (Genesis 8:11) Paano daw an katoninongan ikinabuwelta sa panahon na idto? Iyan paagi sa paghiro nin Dios, an panglobong baha na naghale kan gabos na lapang kapagarakian nin katawohan. Si Jesus nagsabi na “an mga aldaw ni Noe,” kaiba an saindang karungawan asin karatan, ihinula sa panahon kan saiyang “presensia,” na iyo na ngonyan.—Mateo 24:37-39; Genesis 6:5-12.

Sa giraray, “an Dios na nagtatao nin katoninongan” kaipuhan paraon an satanikong palakaw nin mga bagay, na pagkatapos kaiyan an “Prisipe nin Katoninongan,” si Jesu-Cristo, magiya nin daing sagkod na katoninongan.—Roma 16:20; Isaias 9:6, 7; 33:7.

[Ritrato sa pahina 8]

Itinotokdo ni Jeremias an tunay na paglaom para sa katoninongan

[Ritrato sa pahina 9]

Si Ezequiel nagpapatanid sato na mag-andam na ngonyan para sa pagsalakay ni Gog

[Ritrato sa pahina 11]

Ipinahayag ni Daniel an mangyayari sa “huring kabtang kan mga aldaw”