An Tunay na mga Kristiano mga Parahulit kan Kahadean

“An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—MATEO 24:14.

1, 2. (a) Taano an mensahe kan Kahadean ngonyan ta dapat na ikapahayag sa bilog na kinaban? (b) Anong mga hapot an puwedeng ihapot kan lambang saksi ni Jehova?

NAGPAPAHAYAG KAN KAHADEAN NI JEHOVA. Sa laog nin mga dekada, iyan an pangenot na katuyohan kan magasin na ini. An totoo, iyan kabtang kan titulo kan magasin. Asin mahalaga na an mensahe kan Kahadean ngonyan ikapahayag sa bilog na kinaban. Taano? Huli sa isinabi ni Jesu-Cristo pakasitara kan iba pang kabtang kan “tanda” kan saiyang dai naheheling na “presensia” asin katapusan kan palakaw na ini. Si Jesus nagsabi: “An Maogmang Baretang ini kan kahadean ibabalangibog sa bilog na kinaban bilang patotoo sa gabos na nasyon. Dangan madatong an katapusan.”—Mateo 24:3, 14, The Jerusalem Bible.

² Ngonyan, “an katapusan” talagang harani na. Kaya, marahay na ihapot kan lambang nagdusay na saksi ni Jehova: Ano an saboot ko manongod sa gibong paghuhulit kan Kahadean? Ako daw regular na nakikikabtang dian? Asin an sakuya daw na ministeryo ginigibo na may kahusayan asin kaigotan?

An Pagboot na Maghulit

3. An mga tataramon ni Jesus na nasusurat sa Mateo 5:14-16 nagpaparisa nin ano manongod sa saiyang mga parasunod?

³ Mayo nin tunay na Kristiano na makakasikwal sa pribilehiyong gibohon na pagbalangibog kan “maogmang bareta” sa iba. Sinabihan ni Jesus an saiyang mga disipulo: “Kamo iyo an ilaw nin kinaban. An siudad dai matatago kun namumugtak sa ibabaw nin bukid. An mga tawo minasolo nin ilawan asin ibinubugtak iyan, bakong sa irarom kan basket na takadan, kundi sa ibabaw kan bugtakan nin ilaw, asin iyan nakakaliwanag sa gabos na nasa harong. Siring man paliwanaga an saindong ilaw sa atubang nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:14-16) Iyan nagparisa na an mga disipulo ni Jesus magigin mga parahulit kan Kahadean.

4. Ano an isinabi manongod sa pangenot na parabalangibog kan Kahadean?

⁴ Mapadapit sa pangenot na parahulit kan Kahadean, sinasabi: “Mantang an satong Kagurangnan naghuhulit kan kahadean Saiyang . . . inandam asin inorganisar an Ministeryo kaiyan . . . pinonan Nia an makahulang ministeryo . . . asin ginibo an Kagduwa asin an Pitong Polo na mga may kabtang dian. Mantang Sia naghuhulit kan nagdadangadang na kahadean asin naggigibo nin ‘mga tanda,’ isinugo Nia sinda hale sa Saiyang atubangan na dara an kaparehong mensahe asin kaparehong kapangyarihan. Paagi sa makangangalas na kurso nin detalyadong pagtotokdo, . . . sinda Saiyang tinokdoan kaidto para sa mga katongdan na mas halangkaw na paninimbagan na itatao sa huri.”—A Church History, ni Milo Mahan.

5. Kun dapit sa paghuhulit kan Kahadean, ano an ginibo ni Jesus?

⁵ Si Jesus nagtao nin marahay na pagtotokdo sa saiyang mga apostol asin sa 70 disipulo na isinugo nia. (Lucas 6:12-16; 10:1-22) Dugang pa, an sato mismong Arogan “naglibot sa siudad-siudad asin baryo-baryo, na naghuhulit asin nagpapahayag kan maogmang bareta kan kahadean nin Dios.” Kaibanan nia an mga apostol asin nagkapirang babae “na naglilingkod sa sainda gikan sa saindang mga rogaring.” (Lucas 8:1-3) Iyo, si Jesus mahigos na parabalangibog kan maogmang bareta asin naggibo kan paagi na maponan an sarong organisasyon na naghuhulit kan Kahadean.

6. Bago nagsakat sa langit, ano an ipinagboot ni Jesus sa saiyang mga parasunod?

⁶ Pakalihis nin tolo may kabangang taon na ministeryo, tinapos ni Jesus an saiyang buhay sa daga. Alagad ta bago sia nagsakat sa langit, tinawan nia an saiyang mga parasunod kan pagboot na ini: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo. Asin, uya! ako danay na nasa saindo sagkod sa pagtatapos kan palakaw nin mga bagay.” (Mateo 28:19, 20) Tunay na sinda magigin mga parahulit kan Kahadean.

7. Dawa ngani an mga disipulo ni Jesus sa primero kulang nin tamang kaaraman manongod sa Kahadean, taano ta magigin mapanggana sinda sa pagigin saiyang mga saksi?

⁷ Kan si Jesus mahale na sa daga, an saiyang mga disipulo naghapot: “Kagurangnan, ibabalik mo ngonyan an kahadean sa Israel?” Sa pagsimbag, sinabihan nia sinda: “Mayo sa saindo an pakaaram kan mga aldaw o panahon na ibinugtak kan Ama sa saiyang sadiring kapangyarihan.” Minsan ngani an mga disipulo kaidto kulang nin tamang kaaraman manongod sa Kahadean, puwede sindang iasignar ni Jesus na magin mga parabalangibog kaiyan, ta magkakaigwa sinda kan kinakaipuhan na tabang na maotob an saindang gibohon. “Alagad kamo maako nin kapangyarihan kun dumatong na saindo an banal na espiritu,” idinugang pa ni Jesus, “asin kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.” (Gibo 1:6-8) Sa paggiya kan banal na espiritu, marerealisar sa huri kan mga parasunod ni Jesus na an Kahadean sarong langitnon na gobyerno. (Juan 16:12, 13) Asin pag-abot nin panahon an mga katotoohan manongod sa Kahadean ikakabalangibog “sagkod sa kaporoporohi nin daga.”

8. Gurano kamapanggana an paghuhulit kan enot na siglo?

⁸ Marahayon an pagkagibo kan mga saksing idto sa saindang gibohon. Siyempre, nasa sainda si Jehova, asin nasa sainda an pagsuportar kan pinamuraway na si Jesu-Cristo. (Gibo 8:1-8; 11:19-21) Bakong makangangalas na kaidto pang 60 sagkod 61 C.E. ikinasabi ni apostol Pablo na an “maogmang bareta” ‘ikinahulit na sa gabos na linalang sa sirong nin langit’!—Colosas 1:23.

9. Arog kan sinasabi digdi, ano an pangenot na gibohon kan Kristianong kongregasyon?

⁹ Manonongod sa paghuhulit, nasusurat: “An pagbalangibog kan ebanghelyo . . . bakong sarong aktibidad sa kaibanan nin dakol na ginigibo kan Iglesya kan B[agong] T[ipan], kundi iyan an pundamental, pinakamahalagang aktibidad kaiyan. . . . Mangnoha, si Jesus dai nagsabi [sa Gibo 1:8], Kamo mananaksi sa sako, o, Kamo magpapatotoo sa sako, kundi, Kamo magigin mga saksi ko. An paggamit sa berbong ‘magigin’ digdi igwa nin halaga na dapat na saboton na may lubos asin literal na pagkaseryoso. An ekspresyon [sa Griego] dai sana nagsasabi kun ano an gigibohon kan Iglesya, kundi kun magigin ano an Iglesya. . . . An Iglesya ni Jesu-Cristo sarong . . . grupong nagpapatotoo.” (Pentecost and the Missionary Witness of the Church, ni Harry R. Boer, pahina 110-14) Iyo, an pagpatotoo iyo an pangenot na gibohon kan tunay na Kristianong kongregasyon.

Paagi sa Diosnon na Paggiya

10, 11. (a) Sa pundamental, paano inorganisar an mga parabalangibog kan Kahadean kan enot na siglo? (b) Ano an nangyari kan magkaigwa nin bagong mga kamugtakan?

¹⁰ An mga parabalangibog kan Kahadean kan enot na siglo nag-ako nin paggiya hale sa sarong namamahalang grupo. An nagbibiyaheng kamagurangan naglingkod sa laog kan organisasyon, asin an mga paninimbagan sa kongregasyon isinaabaga nin mga paraataman asin ministeryal na lingkod. (Gibo 15:1, 2, 22-36; Filipos 1:1) Alagad ano an nangyari kan magkaigwa nin bagong mga kamugtakan?

¹¹ Bueno, helinga an nangyari dai mahaloy pakalihis kan Pentecostes nin 33 C.E. An nagtataram nin Griegong mga Judio nagpoon na maggumodgumod tumang sa nagtataram nin Hebreong mga Judio “huli ta an saindang mga balo napapabayaan sa aroaldaw na pagwaras.” Tanganing maresolberan an problema, an mga apostol nagnombra nin “pitong lalaki na marahay an dangog” tanganing mangataman sa pagwaras na ini nin kakanon. (Gibo 6:1-8) Manonongod digdi mababasa niato: “Sa primero, an pag-asikaso na an pankagabsan na pagkakan sa aroaldaw ikawaras na daing pinapaorog iyo sana, siring sa sinasabi sato, an dahelan na an ‘pito’ isiniblag, alagad, siyempre, an iba pang mga paninimbagan idudugang sono sa pangangaipo, huli ta mantang an mga prinsipyo kan bagong pagtubod dai maliliwat, an makinarya asin mga paagi nin pag-aatubang, na paagi kaiyan an mga ini puwedeng pinakaepektibong ikaestablisar asin mapahiwas, ipinamahala sa kadonongan asin praktikal na kabatidan kan suminunod na mga kapag-arakian . . . An pag-adaptar asin pagliwat sa bakong gayong mahalagang mga detalye . . . kaipuhan sa ano man na dakulang organisasyon.”—Hours With the Bible, New Testament Series, tomo II, ni Cunningham Geikie.

12. (a) Ano an nakakontribuwir sa pag-oswag kan enot na Kristianismo? (b) Saen asin paano an mga parasunod ni Jesus inapod na mga Kristiano?

¹² An may pagngayongayong pagsarig sa Dios, kaiba an “kadonongan asin praktikal na kabatidan” kan namamahalang grupo, nakakontribuwir sa pag-oswag kan enot na Kristianismo. Asin an mga bagay tunay na nangyari sa paggiya nin Dios. Halimbawa, an enot na mga parasunod ni Jesus sinasabi na kabilang sa “An Dalan.” (Gibo 9:1, 2) Alagad tibaad kaidto pang 44 C.E. sa Antioquia, Siria, “inapod na mga Kristiano an mga disipulo huli sa diosnon na paggiya.” (Gibo 11:26) Ini ngaran na itinao nin Dios na maogma nindang inako.—1 Pedro 4:16.a

13. Kun paanong an mga Saksi ni Jehova ngonyan naggagamit nin modernong mga paagi sa pagpublikar, ano an ginamit kan enot na mga Kristiano sa saindang paghuhulit kan Kahadean?

¹³ Sa tahaw kan enot na mga Kristianong idto, an ibang mga pangyayari nasa paggiya man nin Dios. Halimbawa, kun paanong an mga Saksi ni Jehova ngonyan naggagamit nin modernong mga paagi sa pagpublikar, an enot na mga Kristiano iyo man an enot na naggamit sa codex—sarong tunay na bendisyon sa saindang maigot na paghuhulit kan Kahadean. Sa bagay na ini, si C. C. McCown nagsurat: “An relihiyosong mga libro kan mga Kristiano, pareho an Daan na Tipan asin an bagong mga kasuratan . . . bakong para sa pagbasa kan mga mayayaman sa pag-aling-aling. Boot nin mahihigos na trabahador na ikabugtak sa sarong libro an pinakadakol na mahihimo ninda. Sinda asin an maigot na mga misyonerong Kristiano boot na listong mabuksan an tekstong ini o iyan bilang pruweba, na dai na kaipuhan na bukladon an dakol na piye nin papiro.”—The Biblical Archaeologist Reader, pahina 261.

14. An mga apostol ni Jesus desididong maghulit sa irarom nin anong mga kamugtakan?

¹⁴ An ‘listong pakabukas sa tekstong ini o iyan bilang pruweba’ napakahalaga huli sa mga paagi nin paghuhulit kan Kahadean na ginagamit kan enot na mga Kristiano. Kun beses, siyempre, sinda impormal na nagpapatotoo sa mga tawo, arog kan parateng ginigibo ngonyan nin mga Saksi ni Jehova. Manonongod digdi sinasabi: “An saro sa pambihirang bagay sa apostolikong paghuhulit iyo an insidental na karakter kaiyan. Dai naghahalat an sarong apostol para sa sarong dakulang oportunidad. An solamenteng opisyal na okasyon para sa saiya iyo an kun, kapareho ni Pablo sa atubangan ni Felix, sia dinadara bilang sarong preso sa atubangan nin nakapurpurang hade tanganing mag-esplikar asin simbagon an sahot na pagbalga sa mga ley. Sia bako man na mayo nin oportunidad, kundi iyan itinatao sa saiya sa bilanggoan, sa gilid nin dalan, asin sa dukhang harong na tibaad pinagpapahingaloan nia para sa banggi. . . . Para sa saiya an saiyang mensahe sa kadaklan para sa mga indibiduwal, dawa ngani sia andam man na iatubang iyan sa kadaklan. Sia komportable sa atubang nin minsan siisay na nagdadangog. Dai nia nalingawan an halimbawa ni Cristo, . . . [na an] lugar na pinagtotokdoan iyo an maalpog na tinampo, o an surusuan na lansangan, o an magapong baybayon kan Judiong Galilea . . . [An mga apostol] dai nakalingaw na sa kapinonan kan saindang pakikiiba sa saiya sia nagtao sa sainda nin espesyal na mga instruksion kun dapit sa pinakamarahay na paagi nin paghuhulit kan saiyang mga doktrina, dinugangan an enot na mga leksion na ini nin iba pa, asin, bago sia nagsakat, itinokdo sa sainda an kinaban bilang saindang langtad asin an lambang linalang bilang saindang paradangog.”—History of the Christian Church, ni John F. Hurst, tomo I, pahina 96.

“Sa Harong-harong”

15. Paano ginigibo kan mga apostol an paghuhulit kan mga aldaw pakalihis kan Pentecostes nin 33 C.E.?

¹⁵ Kan mga aldaw pakalihis kan Pentecostes nin 33 C.E., an mga disipulo ni Jesus naggagamit na nin marahayon na paagi nin paghuhulit kan “maogmang bareta.” Pakatapos na an pinaglalamag na mga apostol mapasopog huli sa ngaran ni Jesu-Cristo, ano an ginibo ninda? Tara, “aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus”! (Gibo 5:41, 42) Iyo, an mga apostol nagpatotoo sa harong-harong.

16. Sa anong klaseng paghuhulit tinokdoan ni Pablo an kamagurangan sa Efeso?

¹⁶ Kan huri, ikinapagirumdom ni apostol Pablo sa nombradong kamagurangan hale sa Efeso: “Dai ako nagpogol sa pagsabi sa saindo kan ano man na bagay na kapakipakinabang ni sa pagtokdo sa saindo sa publiko asin sa pagharongharong. Kundi lubos akong nagpatotoo sa mga Judio asin Griego manongod sa pagsolsol sa atubang nin Dios asin pagtubod sa satong Kagurangnan na si Jesus.” (Gibo 20:20, 21) Dai boot sabihon ni Pablo na tinotokdoan nia an nombradong kamagurangan sa saindang harong. Imbes, sia nagpapatotoo sa daing pagtubod na mga Judio asin Griego manongod sa pagsolsol sa atubang ni Jehova Dios asin pagtubod ki Jesu-Cristo. Daing duwa-duwa, tinokdoan man ni Pablo an kamagurangan na idto kun paano maghuhulit sa harong-harong.

17. Ano an sinabi nin laen-laen na iskolar manongod sa ministeryo ni Pablo sa harong-harong sa Efeso?

¹⁷ Manongod sa ministeryo kan apostol sa Efeso, sinasabi: “An kaugalean ni Pablo iyo an magtrabaho sa saiyang hanapbuhay sa pagsubang kan aldaw sagkod sa alas-11 n.a. (Gibo 20:34-35) na sa oras na iyan si Tirano natatapos kan saiyang pagtotokdo; dangan magpoon alas-11 n.a. sagkod alas-4 n.h. maghulit sa auditoryo, makipagkomperensia sa mga katabang asin makipag-olay nin pribado sa mga kandidato, magplano nin pakaabot sa interior; dangan sa huri mag-ebanghelyo sa harong-harong poon sa alas-4 n.h. sagkod sa matangang banggi (Gibo 20:20-21, 31).” (A. E. Bailey) An iba pang iskolar nagsasabi: “Dai sia nanigoan na magdiskurso sana sa pampublikong asamblea, asin haleon an ibang mga instrumento, kundi maigot na ginibo an saiyang dakulang gibohon sa pribado, sa harong-harong, asin literal na dinara an katotoohan nin langit sa mga harong asin puso kan mga taga-Efeso.” (A. A. Livermore) “Sa publiko asin sa harong-harong, sa siudad asin sa bilog na probinsia, sia naghulit kan ebanghelyo.” (E. M. Blaiklock) “Mahalagang mangnohon na an kadarudakulai sa gabos na parahulit na ini naghulit sa harong-harong asin dai ginibong sosyal na mga pagbisita sana an saiyang mga pagsongko.”—A. T. Robertson.

18. (a) Taano ta sasabihon nindo na igwa nin marigon na pasisikadan sa Kasuratan para sa ministeryo sa harong-harong kan mga Saksi ni Jehova? (b) Kapareho ni Jesus asin kan saiyang enot na mga disipulo, saen asin paano ihinuhulit kan mga Saksi ni Jehova an mensahe kan Kahadean?

¹⁸ An paghuhulit sa harong-harong ginibo kan mga apostol ni Jesus kan 33 C.E. Kabtang idto kan ministeryo ni Pablo sa Efeso asin sierto na sa iba pang lugar. Kaya igwa nin marigon na pasisikadan sa Kasuratan para sa ministeryo sa harong-harong kan mga Saksi ni Jehova. Asin totoo ini dapit sa laen-laen pang ibang paagi na ginagamit ninda tanganing ilakop an mensahe kan Kahadean. Interesante nanggad, an Cyclopedia ni McClintock asin Strong nagsasabi: “An satong Kagurangnan asin an saiyang mga apostol nakanompong nin mga lugar na huhulitan saen man nagtitiripon an mga tawo. An gilid nin bukid, an mga baybayon nin dagat asin pangpang nin salog, an tinampo, pribadong mga harong, an patyo kan Templo, an Judiong sinagoga, asin an iba pang mga lugar nagamit para sa pagbalangibog kan Ebanghelyo.” (Tomo VIII, pahina 483) Kapareho ni Jesus asin kan saiyang enot na mga disipulo, an mga Saksi ni Jehova naghuhulit kan mensahe kan Kahadean sa “tinampo, pribadong mga harong, . . . asin iba pang mga lugar.” Halimbawa, sinda nagwawaras nin magasin sa tinampo (na ginagamit an magasin na ini asin an kapadis kaiyan na Magmata!) asin midbid nanggad sa saindang paghuhulit sa harong-harong.

19. Paano ginigibo an mga desisyon manongod sa mga paagi nin paghuhulit na ginagamit ngonyan kan mga Saksi ni Jehova?

¹⁹ An pundamental na mga paagi nin pagministeryo na ginagamit ngonyan nin mga Saksi ni Jehova establisado na kan enot na siglo, asin, apuwera kaini, maninigo para sa presenteng Namamahalang Grupo nin linahidan na mga Kristiano na magdesisyon kun anong mga paagi nin paghuhulit an angay sa panahon na ini. An siring na mga desisyon sa sarong parte puwedeng ibasar sa “kadonongan asin praktikal na kabatidan” kan mga lalaking ini. Alagad sinda nangorognang nagdedesisyon kapareho kan Kristianong namamahalang grupo kan enot na siglo. An pagdirehir nin Dios asin an paggiya kan saiyang banal na espiritu hinahagad sa pamibi, asin an Makakasuratan na mga arogan sinusunod kun pinagdedesisyonan kun anong mga paagi nin paghuhulit an pinakaangay sa “huring mga aldaw” na ini.—2 Timoteo 3:1; Gibo 15:23, 28.

20. (a) Taano ta masisierto niato na inooyonan nin Dios an mga paagi nin paghuhulit na ginagamit nin mga Saksi ni Jehova? (b) Ano an maninigong magin kaisipan kan gabos na lingkod ni Jehova manongod sa paghuhulit kan Kahadean?

²⁰ Maliwanag na an mga paagi nin paghuhulit na ginagamit kan mga Saksi ni Jehova sono sa paggiya nin Dios, ta kinoronahan nin Dios an mga paghihingoang ini nin abundang kapangganahan asin bendisyon. (Talinhaga 10:22) Kadakoldakol kan nag-aako kan tunay na pagsamba asin nakikiiba sa natatada kan linahidan na mga parasunod ni Jesus bilang kabtang kan iyo-iyong organisasyon na nagtatao nin onra sa banal na ngaran ni Jehova asin daing takot na nagpapahayag kan maogmang bareta kan napatindog nang langitnon na Kahadean. Kaya an gabos logod na lingkod ni Jehova padagos na maghingoa sa paggibo nin disipulo mantang nagrarani sa katapusan an palakaw na ini. Ini kaipuhan na gibohon niato na may kaimbodan, ta an tunay na mga Kristiano daing duwa-duwa na mga parahulit kan Kahadean.

[Mga Nota sa Ibaba]

Ano an Pakasabot Nindo?

◻ Taano an mensahe kan Kahadean ta maninigong ipahayag ngonyan sa bilog na daga?

◻ Ano an pangenot na gibohon nin gabos na tunay na Kristiano?

◻ Taano ta masasabi na sa tahaw kan mga lingkod ni Jehova an mga bagay talagang nangyayari sa paggiya nin Dios?

◻ An paghuhulit sa harong-harong kan mga Saksi ni Jehova may anong marigon na pasisikadan?

[Ritrato sa pahina 9]

Sinabihan ni Jesus an saiyang mga parasunod: ‘Paduman kamo, gumibo kamo nin mga disipulo.’ Maigot daw nindong ginigibo an pangenot na gibohon na ini nin gabos na tunay na Kristiano?

[Ritrato sa pahina 11]

Kamo daw regular na nagpapatotoo sa harong-harong? Ginibo iyan kan enot na mga apostol ni Jesus. Siring man kan maigot na parabalangibog kan Kahadean na si Pablo