Mga Hapot Hale sa mga Parabasa

◼ An Biblia nagsasabi na binaak ni Samson an sarong leon “siring sa pagbaak nin saro sa ogbon na lalaking kanding.” Iyan daw nangangahulogan na uso para sa mga tawo kaidto na baakon an mga ogbon na kanding?

Bako, an komentong ini posible na saro sanang ilustrasyon. Iyan nangahulogan na paagi sana sa kamot nia nadaog ni Samson an leon na arog kapasil kun idto saro sanang daing maginibong ogbon na kanding.

Si Samson, na naglilingkod bilang hokom sa Israel, nagduman sa Timna tanganing makakua nin “oportunidad tumang sa mga Filisteo.” Sa dalan, sia nakasabat asin tibaad sinalakay pa nin sarong nag-uungal na leon, nin sarong hoben, makosog na leon. An makasaysayan na rekord nagsasabi na an puwersa aktibo nin Dios napaki Samson “kaya [an may bunday na ogbon na leon] binaak nia, siring sa pagbaak nin saro sa ogbon na lalaki nin kanding, asin mayo sia nin ano man na kapot sa saiyang kamot.”—Hokom 14:4-6.

May duwa pang tawo sa rekord kan Biblia na solong guminadan sa mga leon, alagad si Samson sana an sinasabi na ginibo ini paagi sana sa saiyang kamot. (1 Samuel 17:36; 2 Samuel 23:20) Dugang pa, iyan “binaak nia.” Kun iyan nangahulogan na binaak nia an makosog na salang kan leon, posible na may mga Israelitas na may kosog na gibohon an arog kaiyan sa sarong ogbon na kanding. Alagad mayo nin ebidensia na sinda guminibo nin siring na bagay, o nin dahelan man na probaran ninda iyan. Sa ibong na kampi, kun binaraak ni Samson an leon ‘sa mga kalamias kaiyan,’ mas harayo an posibilidad na an komento manongod sa kanding bakong pagbabaing sana. An punto iyo na an espiritu nin Dios nagtao ki Samson nin pambihirang kosog sa pisikal. Sa tabang kaiyan an sarong makosog, maisog na leon kayang-kaya kan daing armas na si Samson kun paanong an maluyang ogbon na kanding kayang-kaya nin sarong normal na tawo.

An bangkay kan leon sa huri napalabot sa sarong patood, na nagtao nin lugar sa pagtao naman nin Dios nin kosog ki Samson, na sa okasyon na ini guminadan sa 30 kan kaiwal.—Hokom 14:8-19.