Ipinahayag na Matanos Bilang Katood nin Dios
“‘Si Abraham nagtubod ki Jehova, asin iyan ibinilang sa saiya na katanosan,’ asin sia inapod na ‘katood ni Jehova.’”—SANTIAGO 2:23.
1, 2. Paano an “mga bagay sa kalangitan” asin an “mga bagay digdi sa daga” ipinakikipag-uli sa Dios?
“BINOOT nin Dios na dian sa saiya [si Cristo] mamugtak an bilog na kapanoan, asin paagi sa saiya mapag-uli an gabos na ibang bagay sa saiya man sana paagi sa pakikipagkatoninongan huli sa dugo na saiyang pinabolos sa hariging pasakitan, baga man sinda mga bagay digdi sa daga o mga bagay sa kalangitan.” (Colosas 1:19, 20) An banal na katuyohan na ini nin pakipag-uli pasiring na sa kulminasyon kaiyan.
2 An “mga bagay sa kalangitan” bakong espiritung mga linalang, ta an mga anghel dai natutubos kan dugo ni Cristo. Imbes, sinda an mga tawo na binakal kan dugo kan Kordero na magin “sarong kahadean asin mga saserdote” kaiba ni Cristo sa “bagong kalangitan.” An mga ini lubos nang ikinapahayag na matanos paagi sa dugo ni Cristo. Dugang pa, sa laog nin mga 50 taon na ngonyan, si Jehova nakikipagkatoninongan man sa “mga bagay digdi sa daga,” an mga tawo na magigin kabtang kan matanos na “bagong daga.” (Kapahayagan 5:9, 10; 2 Pedro 3:13) An pagtipon na ini sa “gabos,” pareho an mga bagay na daganon asin an mga bagay na langitnon, ‘sono sa saiyang [ki Jehova] kabotan na saiyang minawot.’—Efeso 1:9, 10.
An Katuyohan nin Dios Para sa Saiyang Aking si Adan
3, 4. Ano an kamugtakan ni Adan sa atubang nin Dios, alagad sa anong bagay na sia kaipuhan pang ipahayag na matanos?
3 Si Adan linalang na sangkap, matanos, tawong aki nin Dios. (Lucas 3:38) An saiyang katanosan dai iinatribuwir, o ibinilang. Idto nasa saiyang naturalesa. Sa punto-de-vista nin pagigin daing kasalan sa atubang ni Jehova, si Adan dai nagkakaipo na “ipahayag” na matanos. Sagkod na sia nagpapasakop sa may diretsong paghade nin Dios, nagdadanay siang may marahay na kamugtakan sa atubang kan saiyang Kaglalang.
4 Minsan siring, dai pa nia napatutunayan na sia magdadanay sa integridad asin dai pa nahusgaran na maninigo sa diretso sa buhay na daing katapusan digdi sa daga. Para dian, kaipuhan na ipaheling nia, sa laog nin sarong peryodo nin panahon, an kaimbodan ki Jehova asin pangangapot sa katanosan. Kun napatunayan nia an saiyang integridad sa irarom nin pagbalo, naresibi nia kutana an diretso sa buhay na daing katapusan digdi sa daga. An nangyari kutana garo an Dios nagpahayag, o nagbugtak sa rekord, na si Adan maninigo sa buhay na daing sagkod. Bilang simbolo kaini, daing duwa-duwa na dinara kutana sia ni Jehova sa “kahoy nin buhay” asin pinakakan sia sa bunga kaiyan.—Genesis 2:9, 16, 17; 3:22.
5. (a) Ano an iwinara ni Adan para sa saiya man sana asin sa saiyang mga aki? (b) Anong paglaom sa pagkaligtas sa kasalan asin kagadanan an itinao ni Jehova sa mga tawong linalang?
5 Alagad ta si Adan dai nakapasar kan baloon asin paagi kaiyan nawaran nin pagkasangkap, katanosan, asin pagigin aki para sa saiya asin sa saiyang mga aki. (Roma 5:12) Kaya, an mga gikan ni Adan gabos namundag na siblag sa Dios, na may naturalesang maraot. (Efeso 2:3; Roma 3:10) Kaya, an linalang na mga tawo “ipinasakop sa kasayangan” alagad “basado sa paglaom,” na an paglaom na ini sa kaligtasan sa kasalan asin kagadanan itinao tolos pakalihis kan pagrebelde sa Eden.—Roma 8:20, 21; Genesis 3:15.
Ipinahayag na Matanos Bago si Cristo—Paano Daw?
6, 7. (a) Sagkod sa anong sokol na an nagkapirang tawo ipinahayag na matanos bago an kagadanan ni Cristo bilang atang? (b) Ano an pirang halimbawa nin mga lingkod ni Jehova bago-Kristiano na nag-ako nin matanos na kamugtakan?
6 An paglaom nin katawohan sa pakaligtas sa kasalan asin kagadanan nasasarig sa pagdatong kan ipinanugang “banhi,” an bugtong na Aki nin Dios. (Juan 3:16) Bago an kagadanan ni Cristo bilang atang, mayo nin paagi na an tawo magkamit nin “kapatawadan asin buhay,” o “pagpapahayag sa sainda na matanos para sa buhay.” (Roma 5:18, Revised Standard Version; New World Translation) Minsan siring, bago pa man bayadan ni Cristo an pantubos para sa kaligtasan nin tawo, may mga lalaki asin babae na nagtubod sa panuga nin Dios asin pinatunayan an pagtubod na iyan paagi sa mga gibo. Huli kaini, maboot na pinatawad ni Jehova an saindang kasalan asin inako sinda bilang saiyang mga lingkod. May pagkamoot na ibinilang nia sinda na daing kasalan, kun ikokomparar sa kadaklan na mga tawo na siblag sa Dios. (Salmo 32:1, 2; Efeso 2:12) Tinawan nia sinda nin matanos na kamugtakan, na ipinahahayag sindang matanos sagkod sa sokol na maninigo sa panahon na idto.
7 Kaya, huli sa pagtubod si Abel “nag-ako nin patotoo na sia matanos.” (Hebreo 11:4) Si Noe “nagin paramana kan katanosan na sono sa pagtubod.” (Hebreo 11:7) Sa ibong kan saiyang mga kakulangan, si Job sinabi na “daing kasalan asin matanos.” (Job 1:1, 22; 7:21) Si Fineas nagpaheling nin kaigotan para sa malinig na pagsamba, “asin idto ibinilang sa saiya na katanosan.” (Salmo 106:30, 31; Bilang 25:1-13) “Huli sa pagtubod” asin sa saiyang mga ginibong kabootan sa banwaan nin Dios, an bakong Israelitang patotot na si Rahab nagkamit nin matanos na kamugtakan, o ipinahayag na matanos.—Hebreo 11:31; Santiago 2:25.
Kun Paano si Abraham Ibinilang na Matanos
8, 9. (a) Kiisay na katanosan an pangenot na tema kan surat ni Pablo sa mga taga-Roma? (b) Sa anong mga bagay na an pagpahayag na matanos sa “mga banal” labi ki sa ki Abraham?
8 An kaso ni Abraham maninigong tawan nin partikular na atension. An pagpahayag sa saiya na matanos nasabihan nin duwang kagsurat sa Kristianong Griegong Kasuratan, na pareho nagsusurat sa mga Kristiano kan enot na siglo na inapod na magin kabtang kan 144,000 na miembro kan espirituwal na Israel.—Roma 2:28, 29; 9:6; Santiago 1:1; Kapahayagan 7:4.
9 Sa saiyang surat sa mga taga-Roma, si Pablo nangatanosan na an mga “inapod na magin mga banal” (1:7), pareho an mga Judio asin Hentil (1:16, 17), ipinahahayag na matanos “paagi sa pagtubod na siblag sa mga gibo kan pagboot.” (3:28) Tanganing patunayan an saiyang pangangatanosan, pinonan nia an halawig na paliwanag (4:1-22) asin kinotar an Genesis 15:6 sa pagsabi: “Si Abraham nagtubod ki Jehova, asin idto ibinilang sa saiya na katanosan.” Dangan, sa huring mga bersikulo kan kapitulo 4, si Pablo nagsabi na si Jesus “itinao para sa satong mga katampalasanan asin binuhay liwat para sa pagpahayag sa sato [an boot sabihon, “an mga banal” (Roma 1:7)] na matanos.” Dai puwedeng kabale sa “sato” si Abraham, huli ta sia haloy nang nagadan bago an kagadanan asin pagkabuhay liwat ni Cristo. Kaya, kan, sa minasunod na mga kapitulo, si Pablo magtaram manongod sa mga “maghahade” asin manongod sa pagpahayag sa sainda na matanos “para sa buhay” na may katuyohan na magin “mga aki nin Dios” asin “kapwa mga paramana ni Cristo,” maliwanag na sia nagtataram manongod sa bagay na laen nanggad sa pag-atribuwir nin Dios nin katanosan ki Abraham.—Roma 5:17, 18; 8:14, 17, 28-33.
10. Paano si Santiago nagtao nin liwanag sa sokol kan pagkapahayag ki Abraham na matanos?
10 Nasabihan man ni Santiago si Abraham bilang halimbawa tanganing patunayan na an pagtubod kaipuhan na suportado nin diosnon na mga gibo. Pakapagsabi na si Abraham ipinahayag na matanos, na kinokotar an Genesis 15:6, idinugang ni Santiago an sarong komento na nakatatabang sato na masabotan kun gurano an pagpakangmatanos ki Abraham. Sia nagsurat: “An kasuratan naotob na nagsasabi: ‘Si Abraham nagtubod ki Jehova, asin iyan ibinilang sa saiya na katanosan,’ asin sia inapod na ‘katood ni Jehova.’” (Santiago 2:20-23) Iyo, huli sa saiyang pagtubod, si Abraham ipinahayag na matanos bilang katood ni Jehova, bakong bilang aki na may diretso sa sangkap na buhay bilang tawo o sa pagkahade kaiba ni Cristo. Interesante nanggad, sa saiyang Synonyms of the Old Testament, si Robert Girdlestone nagsurat manongod sa katanosan ni Abraham: “An katanosan na ini bakong lubos, an boot sabihon arog kan magrerekomendar ki Abraham sa Dios bilang may diretsong umako kan mana nin pagkaaki.”
An Libro nin Girumdoman ni Jehova
11. Kiisay na mga ngaran an nasusurat sa libro nin girumdoman ni Jehova, asin taano?
11 An pag-atribuwir nin limitadong katanosan sa maimbod na mga lalaki asin babae bago si Cristo sarong garantiya kan tunay, o aktuwal, na katanosan asin pagkasangkap na konektado sa buhay na daing katapusan na puwede nindang kamtan sa bagong daga nin Dios. Huli sa saindang linalaoman na buhay, puwede sindang ibilang na an ngaran nasusurat sa sarong libro nin girumdoman. (Ikomparar an Malaquias 3:16; Exodo 32:32, 33.) Yaon dian an ngaran kan mga ibinilang ni Jehova na “mga matanos” na ipinaheling an saindang pagtubod paagi sa matanos na mga gibo, asin may paglaom na mag-ako nin buhay na daing katapusan sa daga.—Salmo 69:28; Habacuc 2:4.
12. Ano an kaipuhan na gibohon kan mga “matanos” na binuhay liwat tanganing mapagdanay an saindang ngaran sa libro nin girumdoman ni Jehova?
12 Minsan siring, an mga ngaran na iyan dai pa nasusurat sa “libro nin buhay” ni Jehova. (Kapahayagan 20:15) Kun an may pagtubod na mga lalaki asin babaeng idto kan mga nakaagi bumuwelta sa daga sa ‘pagkabuhay liwat kan mga matanos,’ sierto na aakoon ninda na may pagtubod an probisyon ni Jehova para sa buhay paagi sa pantubos na atang ni Cristo. (Gibo 24:15) Sa siring sinda magigin kabtang kan mga “ibang karnero” ni Jesus, kaiba an “dakulang kadaklan” na nakaligtas sa “dakulang kahorasaan.” (Juan 10:16; Kapahayagan 7:9, 14) Sa paggibo nin siring, mapagdadanay ninda an saindang ngaran sa libro nin girumdoman ni Jehova.
Ibinilang na Matanos Bilang mga Katood Para sa Kaligtasan
13. Siisay an ilinalaog ngonyan kan Marahay na Pastor, asin paano sinda ikinakasurat sa libro nin girumdoman ni Jehova?
13 Ilinalaog na ngonyan kan Marahay na Pastor, si Jesu-Cristo, an “ibang karnero” na bakong kabilang sa “sadangoton na aripompon” kan 144,000 na “mga banal” na tinawan kan langitnon na Kahadean. (Lucas 12:32; Daniel 7:18) An mga “ibang karnerong” ini naghihinanyog sa tingog kan Marahay na Pastor. (Juan 10:16) Sinda nagtutubod ki Jehova asin sa saiyang Aki. Saindang idinudusay an saindang buhay ki Jehova basado sa pantubos na atang ni Cristo. Sinda nababautismohan “sa ngaran kan Ama asin kan Aki patin kan banal na espiritu” asin nagmimidbid sa pangangaipo na pataluboon an “mga bunga kan espiritu.” (Mateo 28:19, 20; Galacia 5:22, 23) An saindang ngaran nasusurat sa libro nin girumdoman ni Jehova.
14. Ano an nagtatao sa mga “ibang karnero” nin malinig na kamugtakan sa atubang ni Jehova, alagad ano an kaipuhan na hagadon ninda sa Dios?
14 An mga “ibang karnerong” ini na natipon sa panahon na ini kan katapusan makompuwesto sa “dakulang kadaklan” na naheling ni apostol Juan sa bisyon, pakatapos na maheling nia an 144,000 na miembro kan espirituwal na Israel. (Kapahayagan 7:4, 9) Ilinadawan nia an “dakulang kadaklan” bilang mga “hinugasan an saindang mga gubing asin pinaputi iyan sa dugo kan Kordero.” (Bersikulo 14) Huli sa saindang pagtubod sa pinabolos na dugo kan Kordero, iinaatribuwir sa sainda an sarong sokol nin katanosan. Ini ipinaheling kan saindang simbolikong maputing gubing. Sinda igwa nin malinig na kamugtakan sa atubang ni Jehova, asin “kaya ngani” tinotogotan nia sinda na ‘magtao sa saiya nin banal na paglilingkod aldaw asin banggi sa saiyang templo.’ (Bersikulo 15) Pero, aroaldaw kaipuhan na ituga ninda an saindang mga kasalan ki Jehova asin humagad nin kapatawadan paagi ki Jesu-Cristo.—1 Juan 1:9–2:2.
15. (a) Paano an parabola manongod sa mga karnero asin kanding nagpapaheling na an mga “ibang karnero” igwa nin matanos na kamugtakan sa Dios? (b) Sagkod sa anong sokol na sinda ipinahahayag na matanos sa presenteng panahon?
15 Na an “ibang karnero” mga katood nin Dios asin dawa ngonyan igwa na nin limitadong matanos na kamugtakan sa atubang nia liniliwanag man sa hula ni Jesus manongod sa ‘tanda kan saiyang presensia,’ na dian kabale an ilustrasyon manongod sa mga karnero asin kanding. Huling an “mga karnero” naggigibo nin karahayan sa natatada sa 144,000 na “mga tugang” ni Cristo na yaon pa sa daga, sinda bebendisyonan kan Ama ni Jesus asin inaapod na “mga matanos.” Kapareho ni Abraham, sinda ibinibilang, o ipinahahayag, na matanos bilang mga katood nin Dios. An saindang matanos na kamugtakan mangangahulogan man nin kaligtasan para sa sainda kun an “mga kanding” pumaduman na sa “pagkaparang daing katapusan.” (Mateo 24:3–25:46) Sinda ‘maruluwas sa dakulang kahorasaan’ na mangangahulogan kan pagkatapos kan presenteng maraot na palakaw nin mga bagay.—Kapahayagan 7:14.
Dadarahon sa Pagkasangkap
16. Paano niato naaaraman na an dakulang kadaklan dai ipinahahayag na matanos para sa buhay bago an “dakulang kahorasaan”?
16 An “dakulang kadaklan,” na maliligtas sa “dakulang kahorasaan,” dai pa ipinahahayag na matanos para sa buhay. Maheheling niato ini sa bagay na an kapitulo na nagsasambit sa sainda nagpapadagos sa pagsabi: “An Kordero, na nasa tahaw kan trono, aatamanon sinda, asin gigiyahan sinda sa mga burabod kan tubig nin buhay.” (Kapahayagan 7:17) Kaya, minsan ngani kan enot ibinilang sinda nin Dios na matanos kun ikokomparar sa katawohan sa kagabsan asin bilang saiyang mga katood, sinda nagkakaipo nin dagdag pang tabang, o mga gigibohon, tanganing sinda ikapahayag na matanos para sa buhay.
17. (a) Ano an boot sabihon kan “pagpaomay sa mga nasyon”? (b) Siisay an kaipuhan na ikasurat an saindang ngaran sa “libro nin buhay”?
17 Sa laog kan Milenyo, an natutukaw sa tronong Kordero, si Cristo Jesus, kaiba an saiyang 144,000 na kairibang hade asin saserdote, gigibohon an sarong programa nin espirituwal asin pisikal na “pagpaomay sa mga nasyon.” (Kapahayagan 22:1, 2) An “mga nasyon” na iyan kompuwesto kan mga nakaligtas sa dakulang kahorasaan, kan arin man na mga aki na ipinangaki ninda pakalihis kan Har–Magedon, asin kan mga mabubuhay liwat sa ‘pagkabuhay liwat kan mga matanos asin kan mga bakong matanos.’ (Gibo 24:15) An gabos na tumubod sa dugo ni Cristo asin gumibo nin angay na “mga gibo” sa katapustapusi isusurat an saindang ngaran sa “libro nin buhay.”—Kapahayagan 20:11-15.
18. Sa anong kamugtakan nadara an mga nag-eerok sa daga sa katapusan kan Milenyo?
18 Sa katapusan kan Milenyal na Paghade ni Cristo, an mga nag-eerok sa daga na nagpatunay na inaako ninda an pantubos ni Cristo asin mamumuhay sinda oyon sa mga pamantayan ni Jehova nadara na sa pagkasangkap. Sinda magigin kapareho ni Adan bago sia nagkasala. Kapareho nia, sinda babaloon kun dapit sa saindang pagkuyog.
“Mamuraway na Katalingkasan” Bilang “mga Aki nin Dios”
19. (a) Ano an mangyayari pagkatapos tolos kan Milenyo? (b) Ano an mangyayari sa mga an ngaran dai nasurat sa “libro nin buhay”?
19 Pagkatapos tolos kan Milenyo, iientrega ni Cristo sa saiyang Ama an sangkap na rasa nin tawo. (1 Corinto 15:28) “Si Satanas paluluwason” para sa pangultimong pagbalo sa katawohan. (Kapahayagan 20:7, 8) An ngaran kan siisay man na dai makapasar sa pagbalo dai “isusurat sa libro nin buhay.” Sinda simbolikong ‘iaapon sa danaw nin kalayo,’ na nangangahulogan kan “ikaduwang kagadanan.”—Kapahayagan 20:15; 21:8.
20. (a) Siisay an ipahahayag ni Jehova na matanos para sa buhay, asin taano? (b) Paano maootob kan maheherakon na areglo ni Jehova nin pagpapakangmatanos an katuyohan kaiyan?
20 An mga magigin maimbod ki Jehova isusurat na dai mapapara an saindang ngaran sa “libro nin buhay,” bilang sangkap sa integridad asin maninigo na umako kan diretso sa buhay na daing katapusan sa daga. Dangan si Jehova mismo an magpapahayag sa sainda na matanos sa lubos na sentido. (Roma 8:33) Sinda napakangmatanos na sa buhay na daing sagkod. (Kapahayagan 20:5) Aamponon sinda nin Dios bilang saiyang daganon na mga aki, asin sinda malaog sa ipinanugang “mamuraway na katalingkasan kan mga aki nin Dios.” (Roma 8:20, 21) An katoninongan asin pagkaoroyon nakabalik na sa uniberso. An pakipag-uli sa Dios magigin lubos na para sa “mga bagay digdi sa daga” asin “mga bagay sa kalangitan.” (Colosas 1:20) An maheherakon na areglo ni Jehova nin pagpapakangmatanos nakaotob na sa katuyohan kaiyan. Sa hapot na, “Kamo daw matanos sa atubang nin Dios?” an gabos na linalang sa langit asin sa daga makasisimbag nin iyo asin idudugang: “Sa Saro na nagtutukaw sa trono asin sa Kordero mapasainda an kaomawan asin an kagalangan asin an kamurawayan patin an kakosogan sagkod noarin pa man.”—Kapahayagan 5:13.
Manonongod sa kamugtakan kan mga “ibang karnero” sa atubang nin Dios—
◻ Taano si Adan ta dai ipinahayag na matanos?
◻ Sagkod sa anong sokol na si Abraham asin an iba pang mga lalaki asin babae bago si Cristo ipinahayag na matanos?
◻ Kiisay na mga ngaran an isinurat sa libro nin girumdoman ni Jehova?
◻ Sagkod sa anong sokol na an mga “ibang karnero” may matanos na kamugtakan sa presenteng panahon, asin noarin sinda dadarahon sa pagkasangkap?
[Blurb sa pahina 23]
Huli sa pagtubod sa “dugo kan Kordero,” an mga “ibang karnero” tinatawan nin inooyonan na kamugtakan sa atubang ni Jehova asin sa siring ipinahahayag na matanos para sa pakipagkatood sa saiya asin para sa pagkaligtas sa “dakulang kahorasaan.” Sinda magigin sangkap sa katapusan kan Milenyo. Pakalihis kan ultimong pagbalo sinda ipahahayag na matanos para sa buhay.
[Mga Ritrato sa pahina 16]
An ngaran nin mga matanos nasusurat sa libro nin girumdoman ni Jehova
Rahab
Abel
“Dakulang kadaklan” sa modernong aldaw
Job