Kaipuhan na Gayo—Dagdag Pang mga Paraani!
“Totoong gayo na kadakol kan anihon, alagad ta kakadikit kan paraani. Kaya makimaherak kamo sa Kagurangnan kan anihon na magsobol nin mga paraani sa saiyang anihon.”—LUCAS 10:2.
1. Paano kamo puwedeng mangatanosan manongod sa mga tataramon ni Jesus sa Lucas 10:2, alagad ano an marahay nindong gibohon?
SA PAGBASA nindo sa mga tataramon na ini ni Jesus, namamatean daw nindo na kalabot kamo dian? Mantang iyan itinaram kaidtong labi nang 19 siglo an nakaagi, tibaad may tendensia kamo na mangatanosan na iyan bako nang mahalaga. An siring na pabiglabiglang konklusyon magigin sala nanggad. Tanganing maheling an bilog na kahulogan kan mga tataramon ni Jesus, helingon niato an nangyari kan enot na itaram an mga tataramon na iyan, dangan siyasaton an sadiri niatong situwasyon ngonyan.—Ikomparar an 1 Corinto 10:11.
2. Anong situwasyon na naghahagad nin apretadong paghiro an napaatubang ki Jesus kan 32 C.E., asin paano nia iyan inatubang?
2 Kan 32 C.E., mantang nakaagi na an Kapiyestahan nin mga Payag-payag, anom na bulan na sana an natatada bago si Jesus mapaatubang sa kagadanan sa sarong hariging pasakitan. Tanganing makatabang na maparikas an gibong paghuhulit, isinugo ni Jesus an 70 disipulo “nin manduwaduwa na maenot sa saiya sa kada siudad asin lugar na saiyang dudumanan.” Sinda naghale na nadadangog pa an mga tataramon ni Jesus: “Totoong gayo na kadakol kan anihon, alagad ta kakadikit kan paraani. Kaya makimaherak kamo sa Kagurangnan kan anihon na magsugo nin mga paraani sa saiyang anihon.”—Lucas 10:1, 2.
Dakulang Pag-ani an Ibinubunga
3. Iladawan an nagkapira sa mga resulta kan orog na paghuhulit sa ultimong pirang bulan kan ministeryo ni Jesus?
3 Ano an ibinunga kan nag-orog na paghuhulit na ini? Mababasa niato: “Dangan an pitong polo nagbuwelta na may kaogmahan, na an sabi: ‘Kagurangnan, minsan an mga demonyo nasasakop mi paagi sa paggamit sa ngaran mo.’” Ini makangangalas nanggad na pagpaheling kan kapangyarihan nin Dios sa mga demonyo! An siring karahay na report sa paglilingkod tunay na nakapaogma ki Jesus, ta sia nagsabi: “Naheheling ko na si Satanas na naholog sa langit siring sa kikilat.” (Lucas 10:17, 18) Aram ni Jesus na si Satanas asin an saiyang mga demonyo sa katapustapusi ihoholog sa langit pagkamundag kan Mesiyanikong Kahadean sa kalangitan. Alagad mantang si Jesus nasa daga pa, an pagpaluwas na ini nin mga ordinaryong tawo sa dai naheheling na mga demonyo nagserbing dagdag na garantiya sa saiya kan nagdadangadang na maogmang okasyon na iyan. Kaya si Jesus nagtaram manongod sa maabot na pagkaholog na ini ni Satanas hale sa langit bilang sarong seguradong pangyayari.—Kapahayagan 12:5, 7-10.
4. Ano an katuyohan kan pag-ani na ginibo ni Jesus asin kan saiyang mga disipulo bago kan Nisan 14, 33 C.E.?
4 An pag-ani na sinasabi ni Jesus bakong pag-ani nin trigo o mga prutas kundi nin mga tawo, arog-karnerong mga tawo na makuyog tolos sa mensahe kan Kahadean. An mga bunga kan siring na pag-ani nahahayag na. Minsan siring, an pag-ani na ginibo ni Jesus asin kan saiyang mga parasunod sa nagkapirang natatadang mga bulan na idto bago an Nisan 14, 33 C.E., pagbugtak sana kan pundasyon para sa mas mahiwas na pag-ani pagkagadan asin pagkabuhay liwat ni Jesus.—Ikomparar an Salmo 126:1, 2, 5, 6.
5. Anong maogmang mga pangyayari an nangyari kan Pentecostes, 33 C.E., asin paano ini nakaapektar sa pag-ani na masunod?
5 An panahon kaidto aldaw nin Pentecostes, 33 C.E. Mga 120 sa mga parasunod ni Jesus an nagkatiripon sa Jerusalem. “Sa panale nagdatong hale sa langit an ribok na siring sa hagobohob nin makosog na doros, asin iyan nakapano sa bilog na harong na saindang tinutukawan. . . . Asin sinda gabos nagkaparano nin banal na espiritu asin nagpoon na magtaram nin manlaenlaen na tataramon, siring sa ipinataram sa sainda kan espiritu.” Ini an kapinonan nin sarong pambihirang pag-ani! “Sa aldaw na idto mga tolong ribong kalag an nakadugang.” (Gibo 1:15; 2:1-4, 41) “Sa aroaldaw sinda danay na nasa templo na may pagkasararo, . . . na nag-oomaw sa Dios asin nakakakua nin pabor sa bilog na banwaan. Sa panahon man sanang iyan padagos na idinudugang sa sainda ni Jehova aroaldaw an mga naliligtas.” (Gibo 2:46, 47) Sa huri maheheling niato: “An mga nagturubod sa Kagurangnan padagos na nakakadagdag, mga kadaklan nin mga lalaki asin mga babae.” Mas huri pa: “An tataramon nin Dios padagos na nag-oswag, asin an bilang nin mga disipulo marikas na nagdakol sa Jerusalem; asin an dakulang kadaklan nin mga saserdote nagpoon na magkuyog sa pagtubod.”—Gibo 5:14; 6:7.
6. Ano an nagin epekto kan pagtumang sa paghuhulit sa bunga kan Kahadean?
6 Nag-orog ngonyan an pagtumang sa mensahe kan Kahadean. Napaluya daw kaini an gibong pag-ani? Dai, ta “idtong nagkawararak naglibot sa daga na nagpapahayag kan maogmang bareta kan tataramon.” Si Felipe nagduman sa siudad nin Samaria; an mga kadaklan maigot na naghinanyog sa saiya; an mga linaog nin demonyo, mga paralitiko, asin an mga pilay gabos naomayan. Bakong makangangalas na “nagkaigwa nin dakulang kaogmahan sa siudad na iyan.”—Gibo 8:1-8.
7. Sa katapustapusi gurano naotob an pagboot ni Jesus sa saiyang mga disipulo sa Gibo 1:8?
7 An binuhay liwat na si Jesus nagsabi sa saiyang mga disipulo: “Kamo magigin mga saksi ko sa Jerusalem asin sa bilog na Judea asin Samaria patin sagkod sa kaporoporohi nin daga.” (Gibo 1:8) An kahiwasan kan langtad nin aktibidad naghahagad nin dagdag na mga paraani—tolos-tolos! Kanigoan kadakulang pag-ani nin mga disipulo an linalaoman ngonyan! Asin iyan nangyayari na—gabos sa paggiya kan banal na espiritu nin Dios. Pagkakombertir kan may isip na mangadan na si Saulo, sinasabi sa sato: “Dangan, sa katotoohan, an kongregasyon sa bilog na Judea asin Galilea patin Samaria naglaog sa panahon nin katoninongan, na pinapakosog; asin mantang iyan naglalakaw sa pagkatakot ki Jehova asin sa pagranga kan banal na espiritu padagos iyan na nagdakol.” (Gibo 9:31) Mantang nagkokosog an puwersa kan pag-ani sa mga arog-karnero, sierto na perming nagigirumdoman kan enot na mga disipulong idto an mga tataramon ni Jesus: “Makimaherak kamo sa Kagurangnan kan anihon na magsugo nin mga paraani sa saiyang anihon.” Sinimbag daw ni Jehova, an “Kagurangnan kan anihon,” an pamibing iyan? Iyo nanggad! Ta kun dai, paano kutana ikinasurat: “[An] paglaom kan maogmang baretang iyan . . . ikinahulit sa gabos na linalang sa sirong nin langit”?—Colosas 1:23.
Orog na Pagkasibot Ngonyan
8. Taano ta mas dakula ki sa kasuarin pa man an pangangaipo para sa dagdag na mga paraani kan Kahadean sa mga taon na ini nin 1980?
8 Ngonyan, sa mga taon nin 1980, an pangangaipo para sa dagdag na mga paraani orog ki sa kasuarin pa man. Taano? Huli ta mas mahiwas an sakop kan langtad sa kinaban. Bilang resulta, an mga anihon na kaipuhan na gapason asin tiponon mas dakol. Ini kaoyon sa ihinula ni Jesus. Sia nagsabi na an saiyang mga parasunod magibo nin mga gibo na mas dakula ki sa ginibo nia sa daga, kun dapit sa paghuhulit kan maogmang bareta.—Juan 14:12.
9. (a) Paano an pagkaapretado kan paghuhulit ngonyan idinodoon sa sarong bisyon ni Juan, na ilinaladawan sa Kapahayagan 7:1-3? (b) Anong makahulogan na konklusyon an makukua sa mga tataramon na “enot na mga bunga sa Dios asin sa Kordero” sa Kapahayagan 14:4?
9 An kasibotan sa paghuhulit ngonyan idinodoon sa dramatikong eksena na ilinaladawan sa sarong bisyon na itinao ki Juan, na nasusurat sa Kapahayagan kapitulo 7:1-3. Dian, an “apat na anghel na nagtitindog sa apat na kanto kan daga” naheling na “nagpopogol sa apat na doros kan daga.” Gurano kahaloy nindang popogolan an “apat na doros”? Sagkod sana na ‘matatakan an mga oripon kan satong Dios sa saindang angog.’ Gurano kahaloy kaiyan? Itinatao an sarong tanda kan bagay na sa pagselebrar kan Memorial kan Abril 4, 1985, 9,051 sana an naghingako na miembro kan 144,000. An mga linahidan ngonyan iyo an huring miembro kan sinasabi sa Kapahayagan 14:4 na “binakal hale sa katawohan bilang enot na mga bunga sa Dios asin sa Kordero.” Kaya minalataw na an kadaklan sa “enot na mga bunga” natipon na. Alagad an mga tataramon daw na “enot na mga bunga” nangangahulogan na igwa nin ibang bunga na masunod? Iyo nanggad! Ini ipinagsisimbolo kan abundang mga produkto na ibang prutas na tinitipon sa katapusan kan taon nin pag-oma nin mga Judio sa panahon kan Kapiyestahan nin mga Payag-payag.—Deuteronomio 16:13-15.
10. Anong duwang pag-ani an ginibo sa modernong mga panahon, asin paano an bagay na ini nagdodoon kan apretadong pangangaipo para sa dagdag pang mga paraani?
10 Kaya nagigin maliwanag na, mantang natatapos an pag-ani sa natatada sa mga linahidan, mabubukasan an saro pang pag-ani. Dai daw ini ipinaheheling kan sunod na naheling sa bisyon ni Juan? “Pakalihis kan mga bagay na ini ako nagheling, asin, uya! an sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin tataramon.” Sinabihan si Juan: “An mga ini an nagluwas sa dakulang kahorasaan.” (Kapahayagan 7:9, 14) Limitado na sana an panahon na natatada na matapos an pagtipon sa “dakulang kadaklan.” Oras na butasan an “apat na doros kan daga,” na senyal kan pagpopoon kan “dakulang kahorasaan,” magigin huri na! Dai daw nindo nasasabotan an apretadong pangangaipo para sa dagdag na mga paraani tanganing tiponon an mga kadaklan pa na makukua?
Rinibo an Nagkukuyog Ngonyan
11. (a) Gurano an pakikikabtang kan “ibang karnero” ni Jesus sa pag-ani? (b) Ano an ipinaheheling kan nag-atender sa Memorial kan 1985?
11 Ihinula ni Jesus an paghiwas na ini kan saiyang pag-ani sa mga arog-karnero kan sia magsabi: “Asin igwa pa ako nin ibang karnero, na bakong sa toril na ini; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.” (Juan 10:14, 16) Igwa na ngonyan nin labing 2,800,000 sa “ibang karnero” na aktibong nagpamidbid na kabilang sa “sarong aripompon” na iyan. Sa kabilangan na iyan, may 189,800 na nabautismohan kan taon nin paglilingkod na 1985! Pero, an nag-atender sa selebrasyon kan Memorial 7,792,109. Ano an ipinaheheling kaini sa sato? Na dakol pa an ibang nakadangog sa tingog kan Pastor, alagad huli sa dahelan na ini o iyan, sagkod ngonyan dai pa sinda minakuyog sa mainit na pangagda ni Jesus: “Sumunod ka sako.”—Lucas 5:27.
12. Anong mahahalagang hapot an maninigo niatong ihapot ngonyan sa satong sadiri?
12 Ano an kamugtakan nindo kun dapit sa mahalagang pag-aning ini sa ‘pagtatapos kan palakaw na ini nin mga bagay’? (Mateo 13:39) Kabilang daw kamo sa maogmang mga kadaklan na ngonyan nakikikabtang sa mga kaogmahan sa pag-ani? O kamo daw sagkod ngonyan paramasid, na an tendensia kan isip sumibog sa hayag na pag-ako sa pangagda kan Marahay na Pastor: “Sumunod ka sako”? Tunay na mayo nin siisay man ngonyan na boot na manarahotan kapareho kan tolong tawo sa Lucas kapitulo 9, na ipinaliwanag sa sinusundan na artikulo kaini. Isip-isipa kun ano an nawara sa tolong tawong idto—an kaogmahan nin paglilingkod sa Kahadean, seguro kaiba na an pakikikabtang sa pagkalda sa nagkapira na linaog nin mga demonyo!—Lucas 9:57-62; 10:17.
13. Paano an pagtubod may mahalagang kabtang sa saindong pagigin gikan sa boot na paraani?
13 Si apostol Pablo nagsabi: “Kun dai nin pagtubod dai mahihimo na makapaoyon sa [Dios].” (Hebreo 11:6) A, iyo, talagang kaipuhan nin gabos an pagtubod tanganing ipagilid an sadiring interes asin gikan sa boot na idusay an saiyang buhay sa Dios bilang paraani. Halimbawa, tibaad kamo may magabat na problema sa salud; tibaad an ibang miembro kan saindong pamilya tumang nanggad sa mga Saksi ni Jehova; tibaad sa paghona nindo kamo gurang nang gayo tanganing gumibo pa kan kinakaipuhan na mga pagbakle sa saindong buhay; sa ibong na kampi, tibaad ibinibilang nindo an saindong sadiri na dai kayang atubangon an impluwensia nin mga kaklase na inaagihan nindo sa eskuwelahan. Ano man an saindong kamugtakan, noarin man dai paglingawan na mas nasasabotan ni Jehova an saindong mga problema ki sa siisay pa man. Saro pa, sia andam na rumani sa saindo asin pakosogon an saindong desisyon na maglingkod sa saiya kun gigibohon sana nindo an nagkapirang kaipuhan na mga tangga.—Salmo 103:13, 14; Santiago 4:8.
An Pagtubod Nakakapahiro sa ‘mga Bukid’
14. Ipaliwanag an boot sabihon ni Jesus sa saiyang mga tataramon na nasusurat sa Mateo 17:20?
14 Si Jesus nagsabi: “Kun kamo igwa nin pagtubod na siring kadakula kan pisog nin mustasa, masasabihan nindo an bukid na ini, ‘Bumalyo ka hale digdi pasiring duman,’ asin iyan mabalyo, asin mayo nin ano man na dai nindo magigibo.” Ini an personal na eksperyensia nin dakol sa ginatos na ribo na nagkuyog sa pag-apod para sa mas dakol na mga paraani ngonyan na mga taon nin 1980. An personal na mga problema asin kadepisilan na garo baga kaidto bukid para sa sainda napangganahan sa tabang ni Jehova. (Mateo 17:20; 19:26) Helinga an minasunod na mga eksperyensia:
15, 16. Iladawan kun paano an sarong hoben na lalaki sa Estados Unidos asin an sarong Katolikong agom na lalaki sa Brazil nakapanggana sa darakulang problema na nakaoolang sa saindang bautismo.
15 An sarong hoben na lalaki sa California, E.U.A., biktima nin polyo, grabe an diperensia asin pinababayaan kan saiyang pamilya. Dangan nanompongan sia nin saro sa mga Saksi ni Jehova na naghaharongharong. Naponan an sarong pag-adal sa Biblia. Alagad ta sia sobra kamasosopgon na pag-abot kan Saksi tanganing pangenotan iyan, pinaliligid nia an saiyang silya sa sarong kanto kan kuwarto asin minaatubang sa lanob tanganing dai maheling an saiyang lalauogon. Dakol na bulan an kinaipuhan kan hoben na ini tanganing mapangganahan an nagkapira sa saiyang problema. Alagad ta iyan nagibo nia, asin ngonyan sia sarong maogma, bautisadong Saksi.
16 An sarong Katolikong mag-agom sa Brazil diskontento sa saindang relihiyon asin sa katapustapusi nagpoon na makipag-adal sa Biblia sa mga Saksi ni Jehova. Namatean ninda na napapanigoan na ngonyan an saindang espirituwal na mga pangangaipo, alagad ta igwa nin sarong dakula, garo bukid, na problema: An agom na lalaki, si Antonio, makosog na parasigarilyo. 48 anyos na siang nagsisigarilyo, poon kan sia siete anyos! Sa nag-aging mga taon prinobaran niang haleon an bisyo alagad ta daing nangyari. Alagad ngonyan iba, arog kan estorya ni Antonio: “Ngonyan nanodan ko na kun boot kong makapaogma sa Dios asin idusay an sakong sadiri sa paggibo kan saiyang kabotan, kaipuhan na ako pumondo. Pakalihis nin dakol na pamibi, sa katapustapusi nagibo ko iyan.” Kanigoan an saiyang kaogmahan na nahimo niang simbolisaran an saiyang pagdusay ki Jehova paagi sa bautismo sa tubig!—Salmo 66:19; Marcos 11:24.
17. (a) Anong maraot na impluwensia na nanompongan ni Jesus asin kan saiyang mga disipulo an mas makosog ki sa kasuarin pa man ngonyan? (b) Paano inatubang ni Jesus asin kan saiyang mga disipulo an paglaog nin mga demonyo kan enot na siglo, asin paano iyan inaatubang ngonyan?
17 An paglaog nin mga demonyo sa mga Judio sarong problema na perming nanonompongan ni Jesus asin kan saiyang mga disipulo. An kaparehong maraot na mga impluwensia naghihiro man ngonyan, nangorogna ngonyan na si Satanas asin an saiyang mga demonyo iinapon hale sa langit pasiring sa dagang ini. (Kapahayagan 12:7-9, 12, 17) Bakong arog kan Kristianismo na nagpopoon pa sana, si Jehova dai nagtao sa saiyang banwaan ngonyan kan milagrosong kapangyarihan na magpaluwas nin mga demonyo. Minsan siring, an espirituwal na pangalasag na itinao nia sa mga Kristiano puwedeng magserbing proteksion tumang sa impluwensia nin demonyo, asin puwede man iyan na gamiton bilang paagi na makalda an iba sa pamomogol nin mga demonyo. (Efeso 6:10-18) Hale sa Ghana an baretang ini: “Paagi sa determinadong mga paghihingoa kan mga tugang, dakol an nabubutasan hale sa pamomogol kan mga demonyo.” An sarong Saksi nakanompong nin sarong babae sa ministeryo, asin kan oras na pumoon an pag-oolay sa Biblia, “an babae nagpoon na maghibi.” Ano an problema? An Saksi nag-estorya: ‘Linalaog sia nin sarong espiritu, asin basta iyan lumaog, pinahihibi sia kaiyan, asin an ano man na kuwarta na nasa saiya nawawara.’ An regular na pag-adal sa Biblia nakatabang saiya na makabutas sa panriribok na ini nin demonyo, na nagpangyari saiya na idusay an saiyang sadiri ki Jehova.—Juan 8:32.
18. Anong eksperyensia an nagpapaheling na an mga anghel aktibo sa paggiya sa paghuhulit?
18 An mga problema na kapareho kan isinasaysay sa enotan tibaad magin dakulaon sa isip nin saro na iniisip na niang maghugot. Halimbawa yaon an kaso nin sarong hoben na babae sa New Zealand. An Saksi na enot na nagsongko sa saiya nakarisa na sia “dai mapamugtak an boot asin maliwanag na may pinaghahaditan.” Kan huri inadmitir kan tawong ini na “sia maghuhugot na kutana asin nagdesisyon na mamibi nguna sa Dios tanganing humagad sa saiya na tabangan sia.” Kan oras na idto an Saksi tuminuktok sa saiyang puwertahan, kaya tunay na sia “nagpasalamat sa Dios sa pagsimbag sa saiyang pamibi.” Ini daw nagkanorongod sana? Kun siring taano ta parateng nangyayari an kaagid na mga bagay? Ano an isinabi ni Jesus? “Kun an Aki nin tawo magdatong na sa saiyang kamurawayan, asin an gabos na anghel kaibanan nia, . . . pagbubulagbulagon nia an mga tawo, kun paanong ibinubulag nin pastor an karnero hale sa mga kanding.” (Mateo 25:31, 32; helingon man an Kapahayagan 14:6.) An mga anghel nagtatabang ki Jesus sa gibong pagpapastor, asin itinotokdo ninda an “mga katabang” kan Kagurangnan sa mga naghahagad sa Saiya nin tabang.—1 Corinto 3:6, 9; helingon an Gibo 8:26-39; 16:9, 10.
19. Ano an kamugtakan ngonyan sa bilog na kinaban, na naghahagad nin anong paghiro niato?
19 Ngonyan, saen man kita nag-iistar, rinibo an mga tawo na nagagabatan asin nagmomondo huli sa mga problema na kapareho sa napangganahan na kan dakol sa banwaan ni Jehova. An iba sa sainda tibaad kataed sana nindo! Sinda nagkakaipong gayo nin tabang. Tunay na, arog kan sabi ni Jesus: “Totoong gayo na kadakol kan anihon.” Nakikimaherak kita sa Kagurangnan kan anihon ngonyan na magsobol nin dagdag pang mga paraani sa saiyang anihon sa taon na ini nin 1986. Pahiroon logod kamo kan saindong puso na kumuyog sa pag-apod: Kaipuhan na Gayo—Dagdag Pang mga Paraani!
Mga Hapot sa Repaso
◻ Siisay an Kagurangnan kan anihon?
◻ Anong duwang pag-ani an nangyayari?
◻ Ano an mas dakulang mga gibohon na sinabi ni Jesus na gigibohon kan saiyang mga parasunod?
◻ Taano ta kaipuhan an pagtubod kan gabos na mga paraani?