An Misteryosong mga Nangangabayo sa Apocalipsis

GARO kamo nagagayuma sa pagheling mantang, naglulupad an bunday asin ikog saka darakula an labot kan dongo, an kabayo nagdadalagan na makosog an taguktok pababa sa magapong bakilid. An pusog na nangangabayo garo baga nakadukot sa montura na garo sia kabtang na kan naghihirong kabayo.

Baga man nagsosongko sa sarong bakahan sa harayo sa ekwador na nasyon nin Australia o, sa ibong kan kinaban, sa kaplanodohan nin sarong rantso sa Amerika, an sarong nangangabayo na talagang midbid an saiyang kabayo tunay na nakaaaling na paghelingon. Kapareho man kamakangangalas an kagayonan nin sarong parada nin natokdoan na gayong mga kabayo asin nangangabayo.

Hinahangaan niato an arog kaiyan na mga parakabayo asin an saindang mga kabayo. Minsan siring, an mga kabayo asin nangangabayo na naheling kan kagsurat sa librong Kapahayagan (Apocalipsis) makangangalas na paghelingon! Sinda misteryoso patin nakakakubhan. An mga nangangabayong ini namidbid na nin dakol bilang an Mga Nangangabayo sa Apocalipsis.

Imahinaron na ngonyan, nagtataguktok sa pagdalagan parani sa saindo, an apat na ekspertong mga nangangabayo, na an saro may kapot pang minasbad! Helinga an kolor kan saindang kabayo. An lambang saro laen man. An sarong kabayo maputi, an saro mapula, an saro maitom, asin an saro malungsing kolor na medyo berde-madarag. Tunay na sinda pambihira, misteryosong paghelingon.

Sundan an marikas na pagsaysay sa naheling kan parasurat sa Biblia, si apostol Juan. Sia nagsasabi: “Dangan naheling ko an sarong maputing kabayo, asin an nangangabayo dian may darang arko. Tinawan sia nin korona, asin sia nangabayo bilang ganador tanganing mandaog. . . . Asin nagluwas an saro pang kabayo, na mapula, asin an nangangabayo dian tinawan nin kapangyarihan na haleon an katoninongan sa daga, asin papangyarihon na an mga tawo maggaradanan; tinawan sia nin dakulang minasbad. . . . Asin duman naheling ko an sarong maitom na kabayo, asin an nangangabayo dian may kapot na timbangan sa saiyang kamot, asin nadangog ko an sarong tingog . . . na nagsabi, ‘An trigo sa halaga nin [sarong aldaw na tangdan] an sarong litro, asin an sebada tolong litro sa halaga nin [sarong aldaw na tangdan]’ . . . Asin duman naheling ko an sarong kabayo na kolor abo, asin an ngaran kan nangangabayo dian Kagadanan, asin sinusundan sia kan Hades. Tinawan sinda nin kapangyarihan sa ikaapat na kabtang kan daga, tanganing gadanon an mga tawo paagi sa minasbad, gutom, kagadanan, asin mababangis na hayop kan daga.”—Kapahayagan 6:2-8, An American Translation.

Poon kan enot na isurat an bisyon na ini, an kahulogan kaiyan nagin dakulang problema para sa dai mabilang na mga parabasa. Ano an irenerepresentar kan misteryosong mga kabayong ini asin kan mga nangangabayo dian? Kasuarin nagpoon an saindang pangangabayo? An sainda daw na pangangabayo may koneksion sa buhay ngonyan? An dakol na manlaenlaen na paliwanag itinatao kun dapit sa ipinagrerepresentar kan mga kabayo asin kan mga nangangabayo, asin kun kasuarin nangyari an saindang pangangabayo.

An pinakadakulang pagkakalaen yaon sa mga interpretasyon sa maputing kabayo asin sa nangangabayo dian. Halimbawa, an New Catholic Encyclopedia nagpapaliwanag na an maputing kabayo nagrerepresentar ‘magsalang sa kapangganahan kan ebanghelyo o sa imperyalismo.’

Sa librong Daniel and the Revelation, si Uriah Smith nagtatao kan interpretasyon na ini: “An maputing kabayo . . . angay na simbolo kan mga kapangganahan kan ebanghelyo kaidtong enot na siglo . . . An kaputian kan kabayo nagpapaheling kan pagigin puro kan pagtubod kan panahon na idto.”

An The Expositor’s Bible nagsasabi: “Sa enot na nangangabayo an mobimiento imbes na an persona ni Cristo iiniintrodusir sa sato, sa pinakaenot na tangga kan mapangganang pag-oswag kaiyan, asin ipinanunuga an kapangganahan kaiyan sa ngapit. . . . Nanonodan niato na an mobimientong ini nasa kinaban, na an kahadean na ini nasa tanga niato, asin na an mga minatumang dian madadaog.” Minsan siring, si Woodrow Kroll, kan The Christian Jew Foundation, naghohona na an nangangabayo sa maputing kabayo iyo an Anticristo.

May mga nagsuherir na igwa nin limang kabayo asin nangangabayo, bako sanang apat. Kaya paano daw niato maaaraman kun arin sa dakol na interpretasyon na ini an tama? Paano niato maseseguro na igwa man nanggad nin tamang pakasabot? Siisay man nanggad an misteryosong mga nangangabayong ini sa Apocalipsis, asin kasuarin nagpoon an saindang pangangabayo?