Paogmahon an Puso ni Jehova Paagi sa Pagdadanay sa Integridad!
“Baga man kita mabuhay o magadan, sadiri kita ni Jehova.”—ROMA 14:8.
1, 2. (a) Taano an mga Saksi ni Jehova ta determinado na papagdanayon an saindang integridad sa Dios? (b) Alagad anong mga hapot an minalataw?
AN MGA tataramon na iyan ni apostol Pablo marahayon an pagkapahayag sa mga saboot kan solamenteng tunay na mga nagdadanay sa integridad sa ika-20 siglong ini! Kun kita magkapribilehiyo na mabuhay asin maheling an pagkarumpag kan presenteng maraot na palakaw sa atubang mismo kan satong mga mata, kita maoogmang gayo! Alagad ta kun kita kaipuhan na magadan sa paglilingkod sa Dios, pabayaan na mangyari iyan. Arin man digdi, kita determinado na magin maimbod na mga saksi kan satong Dios, si Jehova. Papagdadanayon niato an satong integridad sa saiya. Taano? Huli ta mabuhay man kita o magadan, tunay na kita sadiri ni Jehova!
2 Alagad ta ano an integridad? Ano an mga hinahagad kaiyan sa sato? Asin an satuya daw na pagdadanay sa integridad talagang may halaga sa Dios?
An Integridad Asin an mga Kahagadan Kaiyan
3. Sono sa Biblia, an pagdadanay sa integridad nangangahulogan nin ano?
3 Sa Tataramon nin Dios, an integridad nangangahulogan nin moral na karigonan asin pagkakompleto, kadaihan nin kanawayan asin kadaihan nin kasalan. Iyan nangangahulogan nin marigon na debosyon sa katanosan. An totoo, an integridad naghahagad nin dai mababaring debosyon sa sarong persona—ki Jehova Dios. Iyo, an pagdadanay sa integridad nangangahulogan nin pagpapadagos na otobon an soberanong kabotan ni Jehova.
4. Siisay an enot na nagbaya sa integridad, asin ano an isinutsot nia na gibohon kan orihinal na mag-agom na tawo?
4 An enot na nagbaya sa integridad iyo an espiritung linalang na nagdara sa orihinal na mag-agom na tawo sa pagrebelde tumang sa saindang Kaglalang. Si Adan asin Eva nagkaigwa kan oportunidad na ipaheling an saindang integridad ki Jehova paagi sa paggalang sa pangangalad nin Dios manongod sa kahoy nin kaaraman. Alagad ta sa impluwensia kan pagpukaw kan Kaiwal sa kapasloan, sinda napadara sa pagmasumbikal. An saindang puso dai napatunayan na daing kasalan kun dapit sa mga reglamento ni Jehova, asin dai sinda nagdanay sa saindang integridad sa saiya.—Salmo 119:1, 80.
5. An pagrebelde ni Satanas nagpalataw sa anong isyu, asin paano ini pinatutunayan kan mga eksperyensia kan matanos na si Job?
5 An pagrebelde ni Satanas nagpalataw sa isyu manongod sa pagigin tama kan soberaniya nin Dios sa gabos Niang linalang, manongod sa diretso ni Jehova na maghagad kan saindang bilog na pagkuyog. Kaya an isyu manongod sa integridad nin tawo sa soberanong kabotan nin Dios nagin mahalagang kabtang kan isyu nin unibersal na soberaniya. An pruweba digdi maheheling sa kaso kan lingkod ni Jehova na si Job, sarong daing kanawayan, matanos, asin matatakton sa Dios na tawo. (Job 1:1) Si Job dai nagsuki sa tamang dalan nin Dios. Dai sia naimpluwensiahan nin seksuwal na inmoralidad. Nungka siang nagin bakong matanos sa paghusgar o bakong matinao sa balo, sa ilo, o sa dukha. Imbes na magsarig sa materyal na kayamanan, si Job biyong nagsarig sa Kaharohalangkawe. (Job 31:7-40) Alagad ta an Diablo nagsahot na si Job naglilingkod sa Dios huli sa paslong mga dahelan. Minsan ngani tinogotan ni Jehova si Satanas na halean si Job kan saiyang mga rogaring patin kan saiyang mga aki, an Numero Unong Paradaya dai nahimong laglagon an integridad kan matanos na tawong idto. Minsan an makosog na helang asin nanmemenus na pagtatsar nin falsong mga pararanga daing epekto, huli ta si Job napatunayan na nagdadanay sa integridad.—Job 1:6–2:13; 27:5, 6; 31:6; 42:8, 9.
6. Ano an hinahagad sa mga ‘sadiri ni Jehova’?
6 Kaya an mga tawo igwa kan daing kaagid na pribilehiyo na makakontribuwir sa pagpakangbanal sa banal na ngaran nin Dios. Paano? Paagi sa pagdadanay sa integridad, na ipinaheheling na sinda maimbod na nagsusuportar sa unibersal na soberaniya ni Jehova. Kun siring, ano an hinahagad sa mga ‘sadiri ni Jehova’? Kaipuhan kitang maglingkod sa Dios na may bilog na debosyon, na noarin man dai linilingawan na si Jehova “sarong Dios na naghahagad nin dai nababangang debosyon.”—Exodo 20:5.
Puwede Niatong Mapaogma an Puso ni Jehova
7, 8. (a) Mantang kita bakong sangkap, paano niato mapagdadanay an satong integridad sa Dios? (b) Kun kita mga nagdadanay sa integridad, paano maaplikar sa sato an Talinhaga 27:11?
7 Mantang kita gabos bakong sangkap, dai niato kayang maotob nin sangkap an matanos na mga pamantayan nin Dios. Kun siring, an satuyang pagdadanay sa integridad dai nangangahulogan nin pagkasangkap sa gibo o pagtaram. Imbes, iyan nangangahulogan nin pagigin bilog na puso, o kompleto kan debosyon sa puso. Sa siring, minsan ngani si David nakaginibo nin magagabat na kasalan, sia ‘naglakaw na may integridad sa puso.’ (1 Hade 9:4) Inaako an pagsagwe, itinanos nia an saiyang dalan asin paagi kaiyan pinatunayan na an saiyang puso pano nin tunay na pagkamoot ki Jehova. (Salmo 26:1-12) Kita man puwedeng magpaheling nin siring na pagkamoot, na minagawe ‘sono sa integridad nin puso.’—Salmo 78:72.
8 An pagdadanay sa integridad posible huli ta igwa kita nin hararom na pagtubod ki Jehova Dios asin kita biyong nagsasarig sa saiya asin sa saiyang kapangyarihan na iligtas kita. (Salmo 25:21; 41:12) Bakong madali an magdanay sa satong integridad, huli ta si Satanas na Diablo—an pinakadakulang kaiwal ni Jehova, asin niato—binubuta an isip nin mga daing pagtubod asin “nagdadaya sa bilog na ineerokan na daga.” (Kapahayagan 12:9; 2 Corinto 4:4) Alagad, kapareho ni Job, kita puwedeng magin mga paradanay sa integridad. Minsan ngani kita bakong sangkap, mapapaogma niato an puso kan satong mamomoton na Dios. Arog kan pagkasabi kan Talinhaga 27:11: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.” Makaoogma, bilang maimbod na mga lingkod ni Jehova, puwede kitang magtao saiya nin epektibong simbag sa saiyang nagduduhaging Kaiwal. Kaya may halaga nanggad an satuyang pagdadanay sa integridad. Bilang mga nagdadanay sa integridad, puwede niatong mapaogma an puso ni Jehova. Asin kanigoan na kagayagayahan an itinatao kaini sa sato!
Halawig na Linya nin mga Nagdanay sa Integridad
9. Siisay an nagkapira sa dakulang “panganoron” nin mga nagdadanay sa integridad na saksi ni Jehova, asin anong mga pagbalo sa integridad an inagihan ninda?
9 An totoo, an mga Saksi ni Jehova ngonyan kaiba sa halawig na linya nin mga nagdanay sa integridad. Iyan pabalik sagkod sa maimbod na si Abel asin kabilang an mga lalaki asin babae na arog ni Abel, Enoc, Noe, Abraham, Sara, Isaac, Jacob, Jose, Moises, Rahab, Gideon, Barac, Samson, Jefte, David, asin Samuel. An mga nagdanay sa integridad na si Sadrac, Mesac, asin Abednego, na nagsayuma na sumamba sa ladawan na tinindog kan hade nin Babilonya na si Nabucodonosor asin iinapon sa mainiton na horno, malinaw na iyo an sinasabing “nakasigbo kan kapangyarihan nin kalayo.” An ibang bago-Kristianong mga saksi ni Jehova ‘pinag-olog-olog, linatigo, binilanggo, ginapo, pinagbista, pinaglagadi, ginadan sa minasbad; sinda naggurubing nin anit nin karnero, nin anit nin kanding, mantang nagtitios nin kasakitan asin inaapi.’ Tunay na minaoyon kita ki Pablo, na nagsabi: “An kinaban bakong angay sa sainda.” Nakaoogma nanggad na mapalibotan nin siring kadakulang “panganoron” nin mga nagdadanay sa integridad na saksi!—Hebreo 11:1–12:1; helingon man an Daniel, kapitulo 3.
10. Paano si apostol Pablo nakapaogma sa puso ni Jehova?
10 Paagi sa itinao nin Dios na kapusoan asin kosog, si apostol Pablo nagtagal sa pagkabilanggo, mga paghampak, pagkalunod, dakol na peligro, mga bangging daing torog, gutom, paha, lipot, kahubaan, asin “sa mga haros pagkagadan parate.” (2 Corinto 11:23-27) Tinios nia an mga kasakitan na iyan huli sa ministeryo, asin sa gabos na ini pinaogma nia an puso ni Jehova bilang mapusong nagdadanay sa integridad. Magigibo man niato iyan.
11. Kun dapit sa integridad, anong halimbawa an itinao ni Jesu-Cristo?
11 Nangongorog sa mga nagdadanay sa integridad an “Poon na Ahente asin Parasangkap kan satong pagtubod,” si Jesu-Cristo. Kan sugotan kan Diablo sa kapatagan, si Jesus nagdanay sa saiyang integridad, na sa katapustapusi nagsabi: “Humale ka, Satanas! Huli ta nasusurat, ‘Ika magsamba ki Jehova na saimong Dios, asin sa saiya ka sana magtao nin banal na paglilingkod.’” Malinaw na daing maginibo sa atubang nin siring na determinasyon na itinao nin Dios, binayaan kan Diablo si Jesus. Bako idto an ultimong pagsalakay ni Satanas ki Jesus, alagad ta an Diablo daing maginibo na raoton an integridad kan Aki nin Dios. ‘Huli sa kaogmahan na ibinugtak sa atubangan nia tinios ni Jesus an pasakitan na kahoy,’ na noarin man dai nagin parabaya sa integridad. Permi logod niatong arogon an saiyang pambihirang halimbawa asin paogmahon an puso ni Jehova bilang mga nagdadanay sa integridad.—Hebreo 12:2, 3; Mateo 4:1-11.
12, 13. Anong mga pagbalo sa integridad an mapangganang naatubang kan enot na mga Kristiano?
12 Sinabihan ni Jesus an saiyang mga disipulo: “Ikakaongis kamo nin gabos na tawo huli sa ngaran ko.” (Mateo 10:22) Iyan totoo nanggad para sa tunay na mga Kristiano! Sa saiyang librong Christianity and the Roman Government, si E. G. Hardy nagsurat: “Minalataw na may kasiertohan, pareho gikan sa surat ni Pliny asin sa nasusurat na simbag ni Trajan, na an mga Kristiano puwedeng padusahan huli sana sa nomen [ngaran], o sa paghingako sana nin pagka-Kristiano, minsan mayo nin legal na deklarasyon o pruweba nin depinidong mga krimen.”
13 Kanigoan na mga pagbalo sa integridad an mapangganang naatubang kan enot na mga Kristianong idto paagi sa itinao nin Dios na kosog! Halimbawa, manonongod sa sainda sinasabi: “Kun beses sinda pinasasakitan asin iinaapon sa nagugutom na mababangis na hayop sa ampiteatro tanganing alingon an mga tawo.” Minsan siring, sa ibong nin siring na mga kasakitan sinasabi na “an paglamag nakapakosog sana sa saindang pagtubod asin nagdara nin dakol na nakombertir sa saindang mobimiento.” (From the Old World to the New, ni Eugene A. Colligan asin Maxwell F. Littwin, 1932, pahina 90-1) Pareho man an nangyayari sa nagdadanay sa integridad na mga saksi ni Jehova sa ika-20 siglong ini. Dai sinda makaya kan mga ahente kan Diablo.
14, 15. Siisay an “duwang saksi,” asin ano an naeksperyensiahan ninda kan 1918 asin 1919?
14 Helinga an inagihan kan linahidan na mga lingkod ni Jehova, an piguratibong “duwang saksi,” kan 1918 asin 1919, kan an saindang mga kaiwal ‘maggibo nin karatan paagi sa pagboot.’ (Kapahayagan 11:3, 7-10; Salmo 94:20) Si J. F. Rutherford (na presidente kaidto kan Watch Tower Society) asin an pito pang kairiba ibinilanggo na daing katanosan. Kan panahon na idto, an “duwang saksi” ginadan kun dapit sa saindang paghula, asin an saindang mga kaiwal nag-ogma. Sa saiyang librong Preachers Present Arms, si Ray H. Abrams nagkomento: “An pagsiyasat sa bilog na kaso [may labot ki Rutherford asin sa saiyang kairiba] nagdadara sa konklusyon na an mga iglesya asin an klero orihinal na nasa likod kan mobimiento na paraon [an mga Estudyante sa Biblia]. . . . Kan an bareta manongod sa beinte anyos na mga sentensia makaabot sa mga editor kan relihiyosong mga babasahon, haros an lambang saro sa mga publikasyon na ini, dakula asin sadit, ipinag-ogma an okasyon. Mayo pa akong nadidiskobreng ano man na kapahayagan nin simpatiya sa arin man na mga babasahon kan ortodoksong relihiyon.”
15 Alagad pag-abot nin panahon an walong mga nabibilanggong Estudyante nin Biblia pinaluwas asin biyong ipinahayag na daing sala, na ikinasopog na gayo ni Satanas asin kan saiyang mga kampon. Pinakosog kan espiritu nin Dios, an “duwang saksi,” an sadit na hukbo nin mga linahidan, nagtindog giraray bilang mga parabalangibog kan Kahadean. (Kapahayagan 11:11) Asin poon kaidto an mga kaiwal ni Jehova nadadaog sa pakikipaglaban tumang sa mga nagdadanay sa integridad na iyan.
16. Ano an sinabi nin sarong hoben na nagdadanay sa integridad?
16 Sa pag-ilustrar: Horophoropa an mapusong mga tataramon na isinurat nin sarong barobata sa saiyang pamilya mantang sia naghahalat sa kagadanan sa kamot kan mga paralamag na Nazi. Sia nagsurat: “Lihis na sa matangang banggi. May panahon pa na liwaton ko an sakong isip. A! puwede daw akong magin maogma giraray sa kinaban na ini pagkatapos na paindahan ko an satong Kagurangnan? Dai nanggad! Alagad ngonyan makakaseguro kamo na mahale ako sa kinaban na ini na may kaogmahan asin katoninongan.” Iyan daw tanda nin maluya, kobarde, nadaog na nagbaya sa integridad? Dai nanggad!
17. An mga pag-arestar sa mga Saksi ni Jehova sa Unyon Sobyet nagkaigwa nin anong epekto sa saindang paghuhulit kan Kahadean?
17 An mga pagprobar na raoton an integridad kan mga lingkod ni Jehova nagpadagos. Halimbawa, sa saiyang librong Religion in the Soviet Union, an peryodistang si Walter Kolarz nagsaysay manongod sa lagduan na mga pag-arestar sa mga Saksi ni Jehova sa kapinonan nin 1951 asin nagsabi: “An mga Saksi mismo nagkakarkulo na 7,000 gabos an idineportar, sa Urals, Siberia, Far North (Vorkuta) asin Kazakhstan.” Idinugang nia: “Bako ini an katapusan kan mga ‘Saksi’ sa Rusya, kundi kapinonan sana nin bagong kapitulo sa saindang paggibo nin mga proselito. Pinaghingoa ngani ninda na ilakop an saindang pagtubod kun sinda minapondo sa mga istasyon pasiring sa pagkadistiyero. Sa pagdeportar sa sainda an Gobyernong Sobyet dai makakagibo nin mas marahay pa ki sa digdi para sa pagpalakop kan saindang pagtubod. Hale sa saindang pagsolosolo sa baryo an mga ‘Saksi’ dinara sa mas mahiwas na kinaban, dawa pa kun ini an makangingirhat sanang kinaban nin mga kampo de konsentrasyon asin patrabaho.” Duman an mga lingkod ni Jehova nakanompong nin dakol na maogmang nag-ako sa nakakapaogmang mensahe kan Kahadean.—Ikomparar an Gibo 11:19-21.
Siring sa Mapangganang Hukbo
18, 19. Paano puwedeng magin posible na manggana bilang mga nagdadanay sa integridad?
18 An paglamag sa banwaan nin Dios nagpapadagos sagkod sa aldaw na ini. Kaya paano mahihimo nin mga Saksi ni Jehova na manggana bilang mga nagdadanay sa integridad? Magigibo niato iyan huli ta kinukuyog niato an Tataramon nin Dios, asin an ‘satuyang kakayahan nin pagmansay napatood na mamidbid kun ano an tama asin sala.’ Bilang maimbod na mga saksi ni Jehova, ‘dai kita naglalakaw na arog sa palakaw na ini nin mga bagay kundi naliwat kita huli kan pagbago kan satong pag-isip.’ Maogma niatong ginigibo an nakakapaogma ki Jehova, asin tinatawan nia kita nin kapangganahan sa satong mga kaiwal, demonyo asin tawo.—Hebreo 5:12-14; Roma 12:1, 2.
19 Kita na ‘sadiri ni Jehova’ puwedeng ibaing sa sarong mapangganang hukbo. Siyempre, an pakikipaglaban niato espirituwal, asin kita “padagos na nagkukua nin kapangyarihan sa Kagurangnan asin sa puwersa kan saiyang kosog.” Nasa sato an bilog na espirituwal na pangalasag hale sa Dios, asin tinatabangan kita kan saiyang banal na espiritu. Iyan an dahelan na kita ‘marigon na nakakapanindogan kontra sa mga pakana kan Diablo.’ (Efeso 6:10-20; 2 Corinto 10:3, 4) Iyo, asin iyan an dahelan na kita padagos na manggagana bilang mga nagdadanay sa integridad.
20. Ano an tabang asin kasarigan na nasa sato mantang kita naghihingoa na mapagdanay an satong integridad?
20 Tunay na kita pambihirang hukbo. Tara, sa tahaw niato minsan “an mga babae na nagsasabi kan maogmang bareta dakulang hukbo”! (Salmo 68:11) Minsan ngani napapaatubang kita sa mga kaiwal na masakit daogon, “mas dakol an nasa sato ki sa nasa sainda.” (2 Hade 6:16) An mga anghel kaibanan niato mantang kita nagpapahayag kan maogmang bareta sa mga nag-eerok sa daga. (Kapahayagan 14:6) Asin bilang mga nagdadanay sa integridad, makakasarig kita na ‘an ano man na armas na gibohon tumang sa sato dai magkakaepekto.’—Isaias 54:17.
21. Sa ibong kan paglamag na inaagihan niato, ano an nagpapadagos?
21 Daing duwa-duwa, naghahampangan na an duwang lado sa ralaban. An mga hukbo ni Satanas determinado na paontokon an satong pagpapatotoo. Kun siring, kaipuhan na kita “padagos na makilaban kan marahay na pakilaban.” (1 Timoteo 1:18) Mantang an pinamuraway na si Jesu-Cristo an satong Kumandante asin Namomoon, an lambang saro logod sa sato maglingkod “bilang marahay na soldado ni Cristo Jesus.” (2 Timoteo 2:3, 4) Minsan kita sinasalakay sa man-ibong-ibong, kita kaipuhan—asin talagang iyo, paaging sa dai na kutana maninigong kabootan nin Dios—na marigon na manindogan bilang mga nagdadanay sa integridad. An satuyang mga lalauogon maogma mantang kita nakakaheling nin sunod-sunod na pagdakol. Padakol nang padakol na ‘kawiliwiling bagay kan mga nasyon’ an minalaog asin pinapano an harong ni Jehova nin kamurawayan. (Haggeo 2:7) Sa ibong nin paglamag, mga pagbilanggo, paghampak, pagprohibir kan satong gibohon sa laen-laen na kadagaan, asin maigot na paghihingoa na paontokon an satong mga ngabil, an dakulang paggibo nin disipulo nagpapadagos asin nagkokosog.—Mateo 24:14; 28:19, 20.
22. Bilang mga sadiri ni Jehova, ano an maninigo niatong gibohon?
22 Mantang nagkokosog an pag-omaw ki Jehova, ini panahon nin pagdedesisyon para sa gabos na nasa daga. Kanigoan kadakula kan pribilehiyo niato na ilakop an maogmang bareta asin tokdoan an mga nag-aako nin tunay na pagsamba! Kun siring, mantang nagdadakula an “dakulang kadaklan,” magpadagos logod kita bilang mapusong mga lingkod kan Kaharohalangkaweng Dios. (Kapahayagan 7:9) “Baga man kita mabuhay o magadan, sadiri kita ni Jehova.” Kaya magpadagos kita pasiring sa pasohan na buhay, na danay na nagpapasalamat sa satuyang dakulang pribilehiyo na mapaogma an puso ni Jehova paagi sa pagdadanay sa integridad!
Masisimbag Daw Nindo?
◻ Ano an integridad?
◻ Ano an hinahagad kan pagdadanay sa integridad sa banwaan ni Jehova?
◻ Paano ikakapaheling na an pagdadanay niato sa integridad may halaga sa Dios?
◻ Sa anong mga paagi na ipinaheling kan nagkapira kan mga nakaagi na sinda mga nagdadanay sa integridad?
◻ Paano mahihimo na magin mga nagdadanay sa integridad ngonyan an mga Saksi ni Jehova?
[Ritrato sa pahina 22]
An mga lingkod ni Jehova ngonyan kaiba sa halawig na linya nin mga saksi na nagdanay sa integridad. Kabilang daw kamo sa sainda?
Enoc
Sara
Jefte
Pablo
Mga Kristiano sa Modernong Aldaw