Pagpahayag nin Apresasyon—Alagad Taano ta Binawi?

KAN Nobyembre kaidtong uminaging taon, sa kombension nin mga obispong Italiano sa Bologna, Italia, an Iglesya Katolika naglansar nin pag-atake tumang sa mga Saksi ni Jehova. Sa temang “Si Cristo na Satong Dios Asin Satong Paglaom: An mga Kristiano sa atubang kan mga Saksi ni Jehova,” an pading si Giovanni Marinelli nagsahot na an mga Saksi “sarong peligro para sa relihiyon asin sosyedad.” Huli sa saindang marikas na pagdakol sa Italia gikan sa mga Katoliko, pinagsahotan nia an mga Saksi na ‘sarong ilo na tinatamaan nangorogna an mga pinakamadaling maapektaran.’

An Katolikong mga diosesis asin parokya sa bilog na Italia pinagbotan na manindogan nin aktibo tumang sa mga Saksi. Paano? Paagi sa pag-organisar sa kada siudad nin mga grupo na “magtatao nin atension” sa aktibidad kan mga Saksi tanganing “ibuklat an mata kan satong mga maimbod.”

Kumusta an mobilisasyon na iyan tumang sa mga Saksi ni Jehova? Sa sarong surat na ipinublikar sa Piario Parish Magazine, an sarong padi nagsurat: “Personalmente, gusto ko an mga Saksi ni Jehova; iyan inaadmitir ko nin prangka. Kamo gabos libreng isipon an laen digdi asin, tibaad, ekskomunikaron pa ako. . . . An mga midbid ko marahayon an ugale, maboot magtaram . . . [asin] nakakokombensir nanggad. Noarin niato masasabotan na an katotoohan nagkakaipo nin maaakong pag-aatubang? Na an mga nagpapaisi kan katotoohan dai kaipuhan na kabanga sana sa boot, mabata, gunos an bado, durat?

“Saro pa, an mga Saksi ni Jehova binibisita kamo sa harong. Sa harong kamo nasa lugar nindo asin kun siring may bentaha. . . . Puwede nindong aboton asin kuanon an saindong Biblia . . . sa estante, asin puwede nindong helingon kun baga an bersikulong sinitar tama, makua an tamang kahulogan kaiyan, abp.

“Asin pabayaan nindong sabihon ko man na an talagang nakaaakit sako iyo an bagay na an mga Saksi ni Jehova nakakamate na sinda personal na ‘inapod’ . . . sa ministeryo kan tataramon. Iyan trabaho na haloy na niatong nalingawan asin dahelan nin labi-labing danyos sa satong pag-ebanghelyo. ‘Paano sinda makakadangog kun mayo nin mapaisi kaiyan?’ Para sa sako an mga Saksi ni Jehova ‘kompleto’: bako sanang kun manongod sa harong, trabaho asin pag-aling-aling, kundi kun manongod sa personal na pag-adal sa saindang mga katokdoan asin kun paano tatabangan an iba na masabotan iyan. Alagad ako ‘gadan’ sa mga paglobong nin mga Saksi ni Jehova. Kun ikokomparar ko iyan sa mga paglobong niatong Katoliko, na an solamenteng daing girong iyo an gadan, na mayo ni sarong may kapot na Biblia tanganing sundan an komunal na pagbasa. . . . Kanigoan na liwanag! Kanigoan kagayon na mga pamibi! Kanigoan na pagtubod! Kanigoan na katoninongan! Siisay an nakakaaram kun baga mapaglalabanan ko an sugot na idugang sa sakong testamento: ‘Gusto kong ilobong nin sa Saksi ni Jehova.’ Siisay an nakakaaram!

“Angay na gayo an saindang mga introduksion. Seguro iyan dahelan ta ako man bakong kontento, dai naninigoan, kaya nasasabotan ko an saindang prangkang mga akusasyon. Sinasabi ninda, ‘An kinaban na nabubuhayan niato pano nin kadahasan asin inmoralidad.’ Namamatean daw nindo an pagmawot na patunayan na sala sinda? Ako dai. . . . ‘An Iglesya Katolika, mantang saro sa pinakalakop asin pinakagurang na relihiyon, igwa kan pangenot na paninimbagan sa karatan na iyan.’ Makontra daw kamo? Ako dai. Marahay na mga tawo, marahay an ugale, . . . dedikado. An mga Saksi ni Jehova igwa kan kapusoan na kaiba nin lohika. An konklusyon ninda, ‘Kaya, bayaan nindo an saindong iglesya asin umiba samo.’

“Aram ko na an pagbaya ko sa relihiyon na namidbid ko poon kan ako sumuso sa sakong ina, asin pag-ako nin iba, magigin makologon sa boot. Alagad kun iyan rasonable taano ta dai iyan gibohon? Kun iisip-isipon iyan, an pagbalyo nin relihiyon bako man na makasosopog. . . . Magigin makasosopog an paghale sa relihiyon tangani sanang makanompong nin bakante, patodon an angkla tangani sanang ianod nin daing padudumanan. Alagad ano kun sa paghona ko maputi an sakong labada ta dai ko pa naheheling an saimo? Garo baga rasonable para sako na pumili nin mas marahay na panlaba, an nakalalaba nin mas maputi pa sa puti! An katuyohan nin mga misyonero saro, asin saro sana: liwaton an relihiyon nin mga tawo. . . . Taano ta dai ako magliliwat nin relihiyon kun dinidiktahan ako kan sakong konsensia? Kun nakombensir ako kan parahulit? Kun rasonableng gibohon iyan? Kun an relihiyon nin mga Saksi ni Jehova mas tama . . . , kun siring . . . maiba ako sa mga Saksi ni Jehova. . . . Gusto kong maaraman kun tama an mga Saksi ni Jehova.”

Sa pagtatapos kan saiyang surat, idinoon kan padi na an paggamit kan mga Saksi sa Jehova imbes na Yahweh sa pagpronunsiar kan banal na ngaran “bakong dahelan na mawara an makosog kong pagkagusto sa mga Saksi ni Jehova.” Taano? “Total,” idinugang nia, “sinda mga Saksi nin Dios asin iyan an mahalaga!”

Dagdag na Pasabot: Minalataw na an surat kan padi nagbunga nin pagkariribok sa nasa haralangkaw na katongdan sa hirarkiya. Sa nahuhuring luwas kan magasin kan parokya, binawi nia an saiyang mga komento manongod sa mga Saksi ni Jehova.