“Magin Mapuso Asin Makosog na Gayo”

“Dai kamo matakot sa sainda, huli ta si Jehova na saindong Dios iyo an Saro na nakikipaglaban para sa saindo.”—DEUTERONOMIO 3:22.

1. (a) Ano an kamugtakan kan Israel pagkatapos kan pagbaklay sa kapatagan? (b) Ano an itinaong hatol kaidto ni Moises?

NAG-ABOT na an panahon para sa mahahalagang pangyayari sa kasaysayan nin Israel. An banal na nasyon nin Dios kaipuhan na ngonyan na mag-andam sa paglaog sa Dagang Panuga! Sa nakaaging 40 taon, giniyahan ni Moises an mga Israelitas sa mahiwas asin makatatakot na kapatagan. Alagad ngonyan, sa lugar kan Salog nin Jordan sa daga nin Moab, nagpahayag sia sa banwaan nin Dios sa ultimong pangyayari. Sa edad na 120, “an saiyang mata dai duminiklom, asin dai nawara an saiyang bagsik,” ni nagluya man an saiyang boses. Si Josue, na masalihid sa saiya, asin an bilog na Israel seguradong naogma na madangog an mapuwersang esplikasyon ni Moises manongod sa pagboot ni Jehova asin an saiyang mapuwersang pagsadol na magmapuso sinda paglaog ninda tanganing sadirihon an daga.—Deuteronomio 1:1-5, 19, 21, 29, 30; 3:22; 31:6, 7, 23; 34:7.

2. Paano niato naaaraman na an tala sa mga bagay na ini para sa pagtotokdo sato ngonyan?

² Makasaysayan sana daw an mga nangyaring idto kaidtong haloyon nang panahon an nakaagi? Bako nanggad! Sinasabi sato ni apostol Pablo: “An gabos na mga bagay na isinurat kaidto isinurat sa pagtokdo sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) An rekord na iyan may mga katimbang sa modernong aldaw. Mapakokosog kita kaiyan ngonyan para sa espirituwal na pakikilaban. Iyan nagseserbi man na “pagpatanid sato na inabotan kan mga katapusan kan mga palakaw nin mga bagay,” na tinatabangan kitang makalikay sa mga siod ni Satanas.—1 Corinto 10:11; 1 Pedro 4:7.

An Kosog ni Josue—Gikan Saen?

3, 4. (a) Taano ta kaipuhan niatong kultibaron an kadaihan nin takot? (b) Paano daw niato ini magigibo?

³ Dai na mahahaloy ngonyan, an banwaan nin Dios malaog sa bagong palakaw nin mga bagay ni Jehova. Huli sa mga nangyayari sa kinaban, kaipuhan na pataluboon niato an kadaihan nin katakotan. Paano daw niato ini magigibo? Kan si Josue nag-aandam na lumaog sa Dagang Panuga, sinabihan sia nin Dios: “Magin ka sanang mapuso asin makosog na gayo na mag-ingat na gumibo oyon sa gabos na ipinagboot saimo ni Moises na sakong lingkod. Dai ka magsiko dian sa too o sa wala, tanganing ika humiro na may kadonongan saen ka man magduman. An librong ini kan katogonan dai dapat sumuhay sa saimong ngoso, asin maingat na basahon mo iyan sa aldaw asin sa banggi, tanganing ika makapag-ingat na gumibo oyon sa gabos na nasusurat dian; huli ta paagi kaiyan magigin kang mapanggana asin mahiro ka na may kadonongan.”—Josue 1:7, 8.

⁴ A, yaon an sekreto! Basahon an Biblia sa aroaldaw. Yaon dian an pagboot nin Dios sa sato. Horophoropon iyan. Kuyogon an mga pagirumdom kaiyan. Dai pagtogotan na kamo maholog sa materyalistiko, inmoral na kinaban na nasa palibot nindo. Ano man an kamugtakan nindo, gumawe na may kadonongan. Gibohon an praktikal na pag-aplikar kan tamang kaaraman asin espirituwal na pakasabot na nakamtan nindo paagi sa saindong pag-adal sa Tataramon nin Dios. Ipakipag-olay iyan sa iba. Paagi sa paggibo kaiyan asin pagsarig ki Jehova, tunay na kamo magigin ‘mapuso asin makosog na gayo, asin magigin kang mapanggana.’—Ikomparar an Salmo 1:1-3; 93:5; 119:165-168.

5. (a) Arog ni Josue, paano magkakamit nin kosog an hoben na mga ministro ngonyan? (b) Ano an marahay na pasohan para sa hoben na mga Saksi ngonyan?

⁵ Si Josue an “sugo ni Moises poon sa saiyang pagkabarobata” padagos. (Bilang 11:28) Daing duwa-duwa na an haraning pakikiibang ini nakatabang saiya na magkamit nin espirituwal na kosog. Siring man, an hoben na mga ministro ngonyan puwedeng magkamit nin kosog paagi sa pakikiiba sa maimbod na mga magurang, payunir, gurangan nang mga Saksi, asin iba pang maimbod na mga lingkod ni Jehova. An pakikikabtang sa pagharongharong kaiba kan mga mahihigos na iyan puwedeng magin kawiliwili asin makatatabang na an mga hobenes niato makakultibar nin pagkamaygurang asin pagmawot na umoswag sa ministeryo. (Gibo 20:20, 21; Isaias 40:28-31) Ano pa an mas marahay na pasohan para sa hoben na mga Saksi kisa bilog na panahon na paglilingkod para sa Kahadean ni Jehova!—Salmo 35:18; 145:10-12.

6. Paano si Josue sarong halimbawa sa sato may labot sa kampanya tumang ki Amalec?

⁶ Kan isugo ni Moises si Josue na makilaban sa mga Amalequita, “ginibo ni Josue an siring sa isinabi sa saiya ni Moises.” Sia makinuyog; kaya, nagkamit sia nin kapangganahan. Kita man makakapakikabtang sa pagkabindikar ni Jehova kun magdadangog kita sa mga instruksion para sa pakikilaban na inaako niato paagi sa saiyang organisasyon. Sinabihan ni Jehova si Moises na gibohan nin girumdoman an pagkadaog Nia ki Amalec paagi sa pagsurat kaiyan sa sarong libro asin pagpaliwanag kaiyan sa pagdangog ni Josue. Sierto na orog pang pinamuraway ni Josue an kapangganahan ni Jehova paagi sa pag-estorya kaiyan sa iba. Siring man, kita ngonyan puwedeng maghayag kan makakamhan na mga gibo kan Soberanong Kagurangnan na Jehova, asin ikakabalangibog niato an saiyang nagdadangadang na “aldaw nin pamamalos” sa mga maraot.—Exodo 17:10, 13, 14; Isaias 61:1, 2; Salmo 145:1-4.

7, 8. (a) Anong pagsarig an ipinahayag ni Josue asin Caleb kan magbuwelta hale sa Canaan? (b) Anong patanid asin pagpakosog an maheheling niato sa ginibo ni Jehova kan panahon na idto?

⁷ Kan si Moises magsobol nin 12 namomoon na mag-espiya sa Dagang Panuga, iiniba nia sainda si Josue. Kan pagpuli, sampulo sa mga espiya an nagpahayag nin grabeng takot sa mga Cananeong nag-iistar sa daga asin kinombensir an banwaan na magkampanya para sa pagpuli sa Egipto. Alagad ta si Josue asin Caleb mapusong nagsabi: “Kun si Jehova nawili sa satuya, kun siring sierto na ilalaog nia kita sa dagang ini asin itatao iyan sa satuya, daga na binubulusan nin gatas asin tangguli. Dai sana kamo magtumang ki Jehova; asin kamo, dai kamo matakot sa mga tawo kan daga, huli ta tinapay ta sinda. Binayaan na sinda kan saindang pailihan, asin si Jehova nasa sato. Dai kamo matakot sa sainda.”—Bilang 13:1–14:38.

⁸ Minsan siring, an kasararoan nin Israel nagpadagos na maggumodgumod, kaya si Jehova nakilabot asin kinondenar an matatakton na mga Israelitang idto sa 40 taon na paglagawlagaw sa kapatagan. Puwera ki Caleb asin Josue, an gabos nindang lalaking parapakilaban nagadan na dai naheheling an Dagang Panuga. Ini makosog na patanid sa sato ngonyan! Dai kita noarin man maggumodgumod tumang sa mga areglo ni Jehova. Dawa kun kita mapaatubang sa matatagas na teritoryo, magin kitang mapuso asin makosog sa pagduman sa harong nin mga tawo na dara an nagliligtas-buhay na mensahe kan Kahadean. Dai logod kita noarin man magin arog kan mga apostata sa modernong aldaw na, imbes na tumao nin patotoo sa publiko, mas gustong magbalobagi sa saindang mga tugang asin bumalik sa mga gibo kan kinaban—an antitipikong Egipto.—Bilang 14:1-4, 26-30; Lucas 12:45, 46; ikomparar an Gibo 5:27-29, 41, 42.

Ibantog an Ngaran ni Jehova!

9. Paano inotob ni Josue an bago niang ngaran?

⁹ An lista sa Biblia kan 12 espiya inaapod si Josue na Oseas, na an kahulogan “Kaligtasan.” Alagad sa puntong ini an rekord nagsasabi: “Asin padagos na inapod ni Moises si Oseas na aki ni Nun na Jehosua [na an kahulogan, ‘Si Jehova Kaligtasan’].” Taano ta idinoon ni Moises an ngaran ni Jehova sa paaging iyan? Idto huli ta si Josue pangenot na naglingkod para sa pagkabindikar kan ngaran na iyan. Si Josue nagin buhay na halimbawa nin pagkuyog sa pagboot na sa huri idodoon ni Moises sa Israel: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong kosog.” Sa paggibo nin siring, sia nagkapribilehiyo na ipaheling na ‘si Jehova kaligtasan.’—Bilang 13:8, 16; Deuteronomio 6:5.

10. (a) Ano an kahulogan sa saindo kan ngaran ni Jehova? (b) Anong kosog an makukua niato sa isinabi pa ni Jehova ki Josue?

¹⁰ Bako daw na ibinibilang man niato an ngaran ni Jehova na pinakamahalaga asin maninigo sa gabos na kaomawan? An saiyang bantog na ngaran nangangahulogan “Saiyang Pinapangyayari” mapadapit sa pag-otob sa saiyang mga panuga. Nakaoogma nanggad an mga panuga nia sa Kahadean! May kaigotan na arog ki Josue, maninigong mawoton niato na omawon an ngaran asin mga katuyohan ni Jehova sa atubang nin gabos na tibaad umako pa sa paglaom sa saiyang malinig asin matanos na bagong palakaw nin mga bagay. Sa depisil na mga panahon na ini, puwede kitang makakua nin kosog sa dugang pang mga tataramon ni Jehova ki Josue: “Bako daw na pinagbotan ta ka? Magmapuso asin magmakosog ka. Dai ka mahandal o matakot, huli ta si Jehova na saimong Dios danay na nasa kaibanan mo saen ka man paduman.”—Josue 1:9.a

11. (a) Paano an kahulogan kan ngaran ni Jesus idinoon kan sia lumaog sa Jerusalem na nakasakay sa asno? (b) Ano an pagheling ni Jesus sa ngaran ni Jehova, asin ano an nagpapaheling kaini?

¹¹ An katimbang sa Griego kan ngaran na Josue, o Jehosua, Jesus, na nangangahulogan man “Si Jehova Kaligtasan.” Paagi ki Jesu-Cristo na si Jehova nagtatao nin kaligtasan sa katawohan. Kan 33 C.E. kan si Jesus maglaog sa Jerusalem na nakasakay sa ogbon nin asna, an mga kadaklan nagkukururahaw: “Ligtasan kami, ipinakikimaherak niamo! Omawon sia na minadatong sa ngaran ni Jehova!” (Marcos 11:9; Zacarias 9:9) Si Josue tunay na tipo ni Jesus, na ‘nagwalat sato nin padara tanganing sunodon niato an saiyang mga lakad.’ (1 Pedro 2:21) Arog ni Josue, ibinilang ni Jesus na mahalaga an ngaran ni Jehova, asin inomaw nia an ngaran na iyan. Makaduwa sa saiyang ultimong pamibi kaiba kan saiyang mga disipulo, idinoon nia an ngaran nin Dios, na an sabi: “Ipinahayag ko an saimong ngaran sa mga tawo na itinao mo sa sako hale sa kinaban. . . . Ipinamidbid ko sa sainda an saimong ngaran asin ipapamidbid ko pa, tanganing an pagkamoot na ikinamoot mo sa sako mapasa sainda asin ako sa kasaro ninda.” (Juan 17:6, 26) Kanigoan kadakula kan pribilehiyo niato na ipamidbid sa iba an ngaran na iyan!

12. Anong makakamhan na mga gibo an hinahalat niato ngonyan, asin taano?

¹² Sa pagbasa niato sa rekord kan Biblia manongod sa maimbod na pangengenot ni Josue, puwede niatong isaisip na an Orog Kadakulang Josue, si Jesu-Cristo, nangengenot sa banwaan nin Dios ngonyan. An “aldaw ni Jehova” nin pagkabindikar harani na. Kanigoan an paghalat niato sa kaotoban kan panuga nia na matanos na bagong palakaw na masunod sa aldaw na iyan! (2 Pedro 3:10-13, 17, 18) Kaya may pagsarig na hinahalat niato an dugang pang makakamhan na mga gibo ni Jehova, na mas makakamhan pa ki sa ginibo nia kaidto paagi ki Josue.

An Milagro ni Jehova sa Jordan

13. (a) Anong garo baga imposibleng kamugtakan an napaatubang sa Israel sa parteng sirangan kan Jordan? (b) Paano binalosan an pagkuyog nin Israel?

¹³ Panahon kaidto nin pag-ani kan taon 1473 B.C.E., asin an Salog nin Jordan baha. Paano ikakadakit sa makosog an sulog na salog na idto an pirang milyon na kalag, gurang asin hoben, lalaki, babae, asin mga aki? Pero pinagbotan ni Jehova si Josue: “Ngonyan buhat, dumakit ka sa Jordan na ini, ika asin an bilog na banwaan na ini.” An banwaan nagsabi man ki Josue: “An gabos na ipinagboot mo sa samo gigibohon mi.” An Israel nag-impake para sa paglarga. An mga saserdote an enot na nagmartsa, na dara an kaban kan tipan, na may tahob asin nagrerepresentar sa presensia ni Jehova sa tahaw ninda. Dangan si Jehova nagpoon na ‘gumibo nin makangangalas na mga bagay sa tahaw ninda,’ ta “sa panale na an mga nagdadara kan Kaban nakaabot sa Jordan asin kan magkabarasa an mga bitis kan mga saserdote na nagdadara kan Kaban sa pangpang kan tubig . . . an mga tubig na naghaharale sa itaas nag-orontok.” An tubig sa ibaba ‘nasagop,’ tanganing bumolos sa Gadan na Dagat, “asin an banwaan nagdakit.” (Josue 1:2, 16; 3:5-16) Makangangalas nanggad na milagro!

14. Ano an katimbang ngonyan, asin ano an ibinunga kan patotoong itinao?

¹⁴ An makosog an sulog na Jordan katimbang kan baha nin katawohan na ngonyan pasiring sa kalaglagan sa Armagedon. (Ikomparar an Isaias 57:20; Kapahayagan 17:15.) Ngonyan, na an katawohan nasa gati kan ultimong pagtagbang na iyan, pinakokosog ni Jehova an saiyang banwaan, na ngonyan may kabilangan nang labing 3,000,000—kabilangan na kapareho kan sa banwaan nin Dios na nagmartsa kaiba ni Josue.—Ikomparar an Habacuc 2:3.

15. (a) Ano sa modernong panahon an nakaaagid sa mapusong ginibo kan mga saserdote kaidto? (b) Paano irinerepresentar an “dakulang kadaklan” sa paglaladawan na ini?

¹⁵ Kan an minilyon nin Israel nagdadakit sa salog, “an mga saserdote na nagdadara kan kaban kan tipan ni Jehova nagpadagos na tumindog na daing hiro-hiro sa marang daga sa tahaw kan Jordan,” tanganing magrepresentar sa panggunlabot ni Jehova Dios. (Josue 3:17) Kan 1919 na an sadit na grupo nin linahidan na mga Saksi mapusong tuminongtong sa atubangan kan “katubigan” nin katawohan. Kan 1922 mapuso nindang sinimbag an pag-apod na ‘ipaisi, ipaisi, ipaisi an Hade asin an saiyang Kahadean,’ na garo baga sinasabi: “Uya ako! Sugoa ako.” Sinierto sa sainda ni Jehova: “Kun ika mag-agi sa katubigan, ako masasakaibanan mo; asin sa mga salog, dai ka masasanop kaiyan.” Kan 1931, tinawan nia sinda nin onra paagi sa pagtao sainda kan ngaran na mga Saksi ni Jehova. (Isaias 6:8; 43:2, 12) Kabilang sa mga nagdakit sa Jordan an magigin bakong-Leviticong mga Israelitas asin an mga gikan kan bakong Israelitang “dakulang kadaklan na manlaenlaen” na naghale sa Egipto kaiba ni Moises. Kaagid kaiyan, an “dakulang kadaklan” ngonyan nakikikabtang sa pagdakit pasiring sa bagong palakaw nin Dios, mantang an natatada sa espirituwal na grupong saserdote nagtitindog na “marigon, dai natatanyog,” arogan sa saindang pagtubod.—Exodo 12:38; Kapahayagan 7:9; 1 Corinto 15:58.

Paggirumdom sa Milagro

16. (a) Paano binugtakan nin girumdoman an milagro sa Jordan? (b) Ano an isinusuherir kaini kun dapit sa makakamhan na mga gibo ni Jehova ngonyan?

¹⁶ Binugtakan ni Jehova nin girumdoman an milagrong ini sa Jordan, na ipinagboot na an 12 katawo, na nagrerepresentar sa mga tribo nin Israel, kumua nin 12 gapo hale sa salog asin ibugtak ini sa pangpang na nasa solnopan sa Gilgal. An mga gapong idto magdadanay duman bilang nagdadanay na girumdoman sa ngaran ni Jehova asin sa saiyang makakamhan na mga gibo. An maabot na mga aki nin Israel kaipuhan na sabihan na an girumdoman na ini “tanganing an gabos na banwaan sa daga makamidbid sa kamot ni Jehova, na iyan makosog; tanganing kamo matakot ki Jehova na saindong Dios sa gabos na aldaw.” (Josue 4:1-8, 20-24) Sa modernong mga panahon, an makangangalas na mga gibo ni Jehova sa pagpreserbar sa saiyang banwaan, sa ibong nin maringis na mga pagsalakay kan politikal asin relihiyosong mga namomoon, nagdadanay bilang girumdoman na sia nasa saiyang banwaan. Daing duwa-duwa na an saiyang makangangalas na mga gibo sa modernong panahon sa pagbindikar sa saiyang ngaran gigirumdomon sagkod lamang sa saiyang bagong palakaw nin mga bagay.—Kapahayagan 12:15, 16; Salmo 135:6, 13.

17. (a) Ano pang girumdoman an tinindog ni Josue? (b) An katawohan dai nakadulag sa anong kaagid na patotoo ngonyan?

¹⁷ Maninigo an saro pang girumdoman: “May dose man na gapo na ibinugtak si Josue sa tahaw kan Jordan sa natitindogan kan mga saserdote na nagdadara kan kaban nin tipan, asin an mga ini yaon pa duman sagkod ngonyan.” Kan an mga saserdote humawas sa salog asin pabuloson ni Jehova an nasagop na tubig, ini nagbulos sa palibot kan 12 gapo nin patotoo. (Josue 4:9) Poon kaidto, an baha dai makakadulag sa presensia kan mga gapong idto. Siring man ngonyan, an katawohan parikas nang parikas an dalagan pasiring sa “Gadan na Dagat” nin Armagedon. Alagad dai kaiyan madudulagan an patotoo na itinambak kan mga Saksi ni Jehova sa bilog na kinaban mantang sinda “marigon na naninindogan sa sarong espiritu, na sa sarong kalag daramay na naghihingoa para sa pagtubod sa maogmang bareta.” (Filipos 1:27, 28) Ipinaheheling nin yaon na mga rekord na, sa laog kan 67 taon sagkod sa taon na ini nin 1986, an mga Saksi nakawaras sa harong nin mga tawo sa bilog na daga, sa labing 200 na tataramon, nin labing 570,000,000 na libro asin labing 6,400,000,000 na kopya kan mga magasin na Torrengbantayan asin Magmata!, saka nin minilyon na suskripsion sa magasin—saro nanggad na dakulang patotoo!

18. (a) Anong mga kuwalidad an ipinaheling ngonyan kan grupong saserdote? (b) Paano napahiro an bilog na banwaan nin Dios?

¹⁸ Ikakaogma niato na an patotoo nagpapadagos sagkod sa taon na ini nin 1986. An pag-otob sa kabotan nin Dios magabat na trabaho, arog kan pasanon kan lambang saro sa 12 lalaki an saiyang gapo nin girumdoman asin darahon iyan sagkod sa Gilgal. Alagad an dakulang espiritu nin pagpapayunir nakabogkos sa banwaan nin Dios sa modernong aldaw, na permi sindang pinahihiro na “magin mapuso asin makosog na gayo.”—Salmo 27:14; 31:24; Sofonias 3:9.

19. Sa pagrepaso sa iba pang pangyayari kan kaaldawan ni Josue, puwede kitang magkaigwa nin anong kasarigan?

¹⁹ An iba pang nangyari kan kaaldawan ni Josue maninigong makadagka sato na umabante, na nagsasarig na si Jehova magibo nin dugang pang mga milagro para sa saiyang banwaan. Rerepasohon kan minasunod na artikulo an nagkapira digdi.

[Mga Nota sa Ibaba]

Paghorophorop sa mga Nangyari kan Kaaldawan ni Josue—

◻ Taano ta dapat na ibilang ini na labi sa kasaysayan sana?

◻ Paano niato mapatatalubo an kapusoan asin espirituwal na kosog?

◻ Anong marahay na arogan na itinao sato ni Josue?

◻ Sa anong mga paagi na si Josue nanganino ki Jesus?

◻ Anong mga pangyayari ngonyan an nakakatimbang kan mga nangyari sa Jordan?