An Jubileo ni Jehova—Panahon na Kita Maggayagaya
“Asin pakabanalon nindo an ikalimang polong taon asin ibalangibog an katalingkasan sa daga sa gabos na nag-eerok dian. Iyan magigin Jubileo para sa saindo . . . Iyan maninigong magin banal para sa saindo . . . Dangan kamo mag-eerok nanggad sa daga sa katiwasayan.”—LEVITICO 25:10-12, 18.
1. Ano an nasusurat sa Liberty Bell, asin saen kinua an mga tataramon na iyan?
SAEN man kamo nag-iistar, tibaad nabaretaan na nindo an bantog na Liberty Bell, na yaon sa Philadelphia, Pennsylvania, E.U.A. An The World Book Encyclopedia nagsasabi na an kampanang ini “pinatanog kan Hulyo 8, 1776, kadungan nin iba pang kampana nin simbahan, tanganing ianunsiar an pag-aprobar sa Deklarasyon nin Independensia. An nasusurat dian, ‘Ibalangibog an Katalingkasan sa bilog na daga sa gabos na nag-eerok dian,’ kinua sa Biblia (Levitico 25:10).”
2. Ano an saboot nindo manongod sa paglaom sa katalingkasan, alagad anong mga problema an tibaad lumataw manongod dian?
2 An katalingkasan padagos na minamawot na gayo, bako daw? Seguro maggagayagaya kamo sa paglaom na tunay na katalingkasan—sa falsong mga ideya, sa politikal na pangigipit o pan-aapi, sa nakapaluluyang mga epekto nin paggurang asin helang, na nagbubunga nin kagadanan. Kun iyo, may marahay na dahelan na kamo maggayagaya, asin magkakaigwa nin mas dakulang dahelan sa dai na mahahaloy. ‘Paano iyan mangyayari?’ tibaad ihapot nindo, mantang mayo pa nin gobyerno na nakatao nin lubos na katalingkasan, asin an mga sientista saka doktor pareho dai nakaoolang sa paggurang, helang, asin kagadanan. Alagad, inootro mi, igwa nin basihan na kamo maggayagaya huli sa tunay na katalingkasan. Tanganing masabotan kun paano, helingon an mahahalagang pangyayari kaidto na dian puwede kamong mapalabot—ngonyan asin sa ngapit.
3. Ano an Jubileo, asin ano an nangyayari sa taon na iyan?
3 An tekstong sinitar sa itaas naggamit kan terminong “Jubileo.” An Jubileo sarong taon na Sabbath para sa daga nin Israel. Kasunod iyan kan serye nin pitong agrikultural na taon nin Sabbath na sa kabilogan may lawig na 49 taon. An ika-50 taon, an Jubileo, iyo an kulminasyon kan seryeng ini nin mga Sabbath para sa daga na itinao ni Jehova sa saiyang banwaan, na inotob an panuga sa saindang apoon na si Abraham, an “katood ni Jehova.” (Santiago 2:23; Isaias 41:8) Sa okasyon kan Jubileo, ibinabalangibog an katalingkasan sa bilog na daga. Ini nangahulogan nin katalingkasan para sa gabos na Israelitas na ipinabakal an sadiri sa kaoripnan huli sa utang. An saro pang kabtang kan Jubileo iyo na an gabos na minanang daga na ipinabakal (tibaad huli sa pagtios) isinusulit.—Levitico 25:1-54.
4. Kasuarin ipinaiisi an Jubileo, asin paano?
4 Paagi sa kasaysayan na iyan, masasabotan nindo kun taano an Jubileo ta maogmang taon nin katalingkasan. Iyan ipinaiisi paagi sa pagpatanog kan amodyong sa Aldaw nin Pagtubos.a Arog kan isinurat ni Moises sa Levitico 25:9, 10: “Patanogon mo an amodyong na may makosog na tanog sa ikapitong bulan sa ikasampulong aldaw kan bulan; sa aldaw nin pagtubos patanogon nindo an amodyong sa bilog nindong daga. Asin pakabanalon nindo an ikalimang polong taon asin ibalangibog an katalingkasan sa daga sa gabos na nag-eerok dian. Iyan magigin Jubileo para sa saindo, asin ibalik nindo an balang saro sa saiyang rogaring asin ibalik nindo an balang saro sa saiyang pamilya.” Kan 1473 B.C.E., pinangenotan ni Josue an mga Israelitas sa pagbalyo sa Salog nin Jordan pasiring sa Dagang Panuga, na duman ninda ootobon an Jubileo.
Ibinalangibog an Enot na Katalingkasan
5. Anong mga kabtang nin katalingkasan asin Jubileo an pag-oolayan niato?
5 An nasa enotan tibaad garo baga suanoy nang kasaysayan na mayo nin koneksion sa satong buhay, nangorogna kun kita bako man na Judio. Minsan siring, si Jesu-Cristo nagtao sato nin balidong dahelan na maglaom sa mas dakulang Jubileo. Iyo ini an basihan kan satong paggayagaya sa libertad, o katalingkasan. Tanganing masabotan kun taano, kaipuhan na masabotan niato kun paano na si Jesus sa duwang paagi nagtao kan probisyon para sa katalingkasan kan enot na siglo. Dangan pag-oolayan niato kun paano iyan katimbang kan duwang katalingkasan sa satong panahon, alagad mga katalingkasan na orog nanggad na dakula asin nagtatao sato nin orog kadakulang dahelan sa paggayagaya.
6, 7. (a) An Isaias 61:1-7 naghula nin anong makangangalas na mga mangyayari? (b) Paano ipinarisa ni Jesus na an hula ni Isaias naootob?
6 Minsan ngani dai direktang nagtataram manongod sa suanoy na taon nin Jubileo, an makahulang pagkasambit sa nagdadangadang na katalingkasan itinao sa Isaias 61:1-7: “An espiritu kan Soberanong Kagurangnan na Jehova yaon sa sako, huli ta linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, sa pagbalangibog nin katalingkasan sa mga nabihag asin sa pagpabuklat sa mga mata kan mga bilanggo; sa pagbalangibog kan taon nin marahay na boot ni Jehova asin kan aldaw nin pamalos kan satong Dios; sa pagranga kan gabos na nagtatangis . . . Mapapasainda nanggad an pag-ogma sagkod lamang.” Alagad paano asin noarin maootob an hulang iyan?
7 Pakaselebrara kan Paskua kan taon 30 C.E., si Jesu-Cristo naglaog sa sarong sinagoga kan aldaw nin Sabbath. Duman binasa nia an sarong kabtang kan hula ni Isaias asin iinaplikar iyan sa saiya man sana. An Lucas 4:16-21 nagsasabi, sa sarong kabtang: “Binukasan nia an balumbon asin nakua an lugar na duman nasusurat: ‘An espiritu ni Jehova yaon sako, huli ta linahidan nia ako na magpahayag kan maogmang bareta sa mga dukha, isinugo nia ako na maghulit nin pagkabutas sa mga bihag asin nin pagpamuklat sa mga buta, na magbutas sa mga inapi, na maghulit kan taon na aakoon ni Jehova’ . . . Dangan nagsabi sia sa sainda: ‘Ngonyan an kasuratan na ini na saindo pa sanang nadadangog naotob na.’”
8. (a) Anong preliminaryong katalingkasan an itinao ni Jesus? (b) Paano ini ipinag-ilustrar sa Juan 9:1-34?
8 An maogmang bareta na ipinahayag ni Jesus nagtao nin espirituwal na katalingkasan sa mga Judiong nag-ako dian. Huling an saindang mga mata nabukasan sa tunay na kahulogan asin kahagadan nin tunay na pagsamba, sinda nakatalingkas sa dakol na salang paghona. (Mateo 5:21-48) An katalingkasan na ini mas dakula an halaga ki sa pisikal na mga pagpaomay na ginibo ni Jesus. Kaya, minsan ngani binuklat ni Jesus an mata nin sarong tawo na namundag na buta, mas nagdadanay na karahayan an nakamtan kan tawo huli sa saiyang pagmidbid ki Jesus bilang propeta na gikan sa Dios. An bagong katalingkasan kan tawong idto napapalaen sa kamugtakan kan mga namomoon sa relihiyon na oripon kan saindang mga tradisyon asin salang mga paniniwala. (Juan 9:1-34; Deuteronomio 18:18; Mateo 15:1-20) Pero ini primero pa sana o preliminaryong katalingkasan. Dawa kaidtong enot na siglo, si Jesus matabang sa saro pang klase nin katalingkasan na katimbang kan Jubileo sa suanoy na Israel. Taano ta rasonableng isipon iyan?
9. Minsan para sa mga nakatalingkas na sa espirituwal, anong klaseng kaoripnan an nagdanay?
9 Si Jesus nagsabi sa tawong dating buta: “Sa paghokom na ini ako napadigdi sa kinaban na ini: tanganing an mga dai nakakaheling makaheling asin an mga nakakaheling magin buta.” Dangan sinabihan nia an mga Fariseo: “Kun kamo buta, mayo kutana kamo nin kasalan. Alagad ngonyan kamo nagsasarabi, ‘Nakakaheling kami.’ An saindong kasalan nagdadanay.” (Juan 9:35-41) Iyo, an kasalan na nagdadara sa kagadanan saro pang dakulang problema, arog man sana ngonyan. (Roma 5:12) An mga Judio, kaiba na an mga apostol, na nakinabang sa enot na katalingkasan, an espirituwal na katalingkasan na itinao ni Jesus, nagdanay na bakong sangkap na mga tawo. Sinda nagpadagos na oripon nin kasalan asin kan ibinubungang kagadanan. Maliliwat daw iyan ni Jesus? Gigibohon daw nia? Asin kun iyo, noarin?
10. Si Jesus nanuga na itatao nia an ano pang dugang na katalingkasan?
10 Bago kaini, si Jesus nagsabi: “Kun kamo magdanay sa sakong tataramon, kamo tunay na sakong mga disipulo, asin mamimidbid nindo an katotoohan, asin bubutasan kamo kan katotoohan.” An mga Judio na naghihinanyog saiya nagsimbag: “Kami banhi ni Abraham asin dai pa kami noarin man naoripon nin siisay man. Tadaw ta nagsasabi ka, Kamo bubutasan’?” Si Jesus nagsimbag: “Sa katotoohan ako nagsasabi sa saindo, An lambang naggigibo nin kasalan oripon nin kasalan. Dugang pa, an oripon dai nagdadanay sa harong sagkod lamang; an aki nagdadanay sagkod lamang.” (Juan 8:31-36) Kun siring, an pagigin gikan ni Abraham sa laman dai nakatatao sa mga Judio nin katalingkasan sa pagkaoripon nin kasalan. Itinao ni Jesus an makasaysayan na kapahayagan na ini manongod sa katalingkasan tanganing apodon an atension sa bagay na maabot asin magigin orog ki sa naeksperyensiahan nin mga Israelitas sa ano man na Jubileo.
Nagpoon an Kristianong Jubileo
11. Taano an interes niato sa Kristianong Jubileo ta nasisentro sa taon 33 C.E.?
11 Dai nasabotan kan mga Judio na an Jubileo sa tipan kan Pagboot ni Moises naglaladawan sa sarong orog kadakulang Jubileo. (Colosas 2:17; Efeso 2:14, 15) An Jubileong ini para sa mga Kristiano may labot sa “katotoohan” na makabubutas sa mga tawo—an katotoohan na nasisentro sa Aki, si Jesu-Cristo. (Juan 1:17) Kasuarin pinonan na selebraron an orog kadakulang Jubileong ini na puwedeng magtao nin katalingkasan pati sa kasalan asin sa mga epekto kaiyan? Kaidtong tigsoli nin 33 C.E., kan aldaw nin Pentecostes. Ini sampulong aldaw pagkasakat ni Jesus sa langit tanganing ipresentar an merito kan saiyang atang ki Jehova Dios.—Hebreo 9:24-28.
12, 13. Ano an nangyari pagkagadan ni Jesus na nagdara nin pambihirang eksperyensia sa saiyang mga disipulo?
12 Bago si Jesus, mayo nin tawong linalang na binuhay liwat hale sa mga gadan tanganing padagos na mabuhay sagkod lamang. (Roma 6:9-11) Imbes, an gabos natorog sa kagadanan asin padagos na matotorog sagkod na umabot an panahon para sa pagbuhay liwat sa pamilya nin tawo. Paagi sa saiyang pagkabuhay liwat sa kapangyarihan nin Dios, si Jesu-Cristo nagin siring sa pag-apod sa saiya kan ipinasabong na Kasuratan, “an enot na bunga kan mga natorog sa kagadanan.”—1 Corinto 15:20.
13 Limang polong aldaw pagkabuhay nia liwat, may ebidensia na an binuhay liwat na si Jesu-Cristo nagsakat na sa kalangitan asin uminatubang ki Jehova Dios na dara an halaga kan saiyang sangkap na atang bilang tawo asin iinaplikar na iyan para sa katawohan. Ini kan aldaw nin Pentecostes 33 C.E. Bilang pagkuyog sa mga instruksion ni Jesus, mga 120 disipulo an nagtiripon sa Jerusalem. Dangan ibinubo ni Cristo an banal na espiritu sa mga disipulong ini, bilang kaotoban kan Joel 2:28, 29. May mga dila na garo kalayo na nagtangod sa ibabaw kan saindang payo, asin nagpoon sindang magtaram nin mga lenguahe na dai ninda aram. (Gibo 2:16-21, 33) Ini pruweba na an binuhay liwat na si Jesu-Cristo nagsakat na sa kalangitan asin uminatubang sa Dios na dara an halaga nin sangkap na atang bilang tawo na iaaplikar para sa katawohan.
14. (a) Ano an kamugtakan kan mga disipulo ni Cristo kun dapit sa mga tipan? (b) An bagong tipan may labot sa anong pambihirang bendisyon?
14 Ano an resulta para sa mga disipulong idto? Primero, sinda nabutasan sa tipan kan Pagboot ni Moises, na ipinakipagtipan nin Dios sa nasyon nin Israel sa laman pero kinanselar na nia, na ipinako iyan sa hariging pasakitan ki Jesus. (Colosas 2:13, 14; Galacia 3:13) An tipan na iyan sinalidahan nin sarong bagong tipan na ginibo, bakong sa nasyon nin Israel sa laman, kundi sa bagong “nasyon” nin espirituwal na Israel. (Hebreo 8:6-13; Galacia 6:16) An bagong tipan na ini, na ihinula sa Jeremias 31:31-34, ginibo paagi sa tagapag-oltanan na orog na dakula sa suanoy na propetang si Moises. Huli sa interes niato sa katalingkasan, espesyalmenteng risahon niato an sarong kabtang kan bagong tipan. Si apostol Pablo nag-apod nin atension digdi, na nagsurat: “‘Iyo ini an tipan na ipakikipagtipan ko sa sainda pakalihis kan mga aldaw na iyan, . . . An saindang mga kasalan asin an saindang mga katampalasanan dai ko na gigirumdomon.’ Ngonyan kun igwa na nin pagpatawad sa mga ini, mayo na nin dolot para sa kasalan.”—Hebreo 10:16-18.
15. Taano ta masasabi niato na kan Pentecostes 33 C.E. an Kristianong Jubileo nagpoon para sa mga linahidan? (Roma 6:6, 16-18)
15 An katalingkasan na ini sa kasalan iyo an boot sabihon ni Jesus kan sia magsabi: “Kun butasan kamo kan Aki, kamo magigin tunay na butas.” (Juan 8:36) Isip-isipa iyan—katalingkasan sa kasalan na pinapangyari basado sa atang ni Cristo! Poon kan aldaw nin Pentecostes, ipinahayag nin Dios na matanos an mga may pagtubod dangan inampon sinda bilang espirituwal na mga aki na may paglaom na maghade kaiba ni Cristo sa langit. Si Pablo nagpapaliwanag: “Huli ta kamo dai nag-ako nin espiritu nin kaoripnan na ginigikanan giraray nin takot, kundi kamo nag-ako nin espiritu nin pagpaniaki . . . Kun siring, kun kita mga aki, kita man mga paramana: mga paramana nin Dios, alagad kapwa mga paramana ni Cristo.” (Roma 8:15-17) Daing duwa-duwa, an Kristianong Jubileo nagpoon na para sa linahidan na mga Kristiano.
16. Ano pang dugang na mga bendisyon asin paglaom an napalabot para sa mga nagseselebrar sa Kristianong Jubileo?
16 Kaya kan aldaw na idto nin Pentecostes kan taon 33 C.E., an bagong nasyon nin espirituwal na Israel naporma. Idto kompuwesto nin mga tawo na an mga kasalan pinatawad na basado sa iinatang na dugo ni Cristo. (Roma 5:1, 2; Efeso 1:7) Siisay sa sato an makaninigar na an enot na mga miembrong idto kan espirituwal na Israel na ilinaog sa bagong tipan nakaeksperyensia nin makangangalas na katalingkasan paagi sa pagpatawad sa saindang mga kasalan? Ginibo sinda nin Dios na magin “‘rasang pinili, sarong makahadeng pagkasaserdote, banal na nasyon, banwaan para sa espesyal na pagkasadiri, tanganing ipahayag [ninda] an mga kamurawayan’ kan saro na nag-apod sa [sainda] hale sa kadikloman pasiring sa saiyang makangangalas na liwanag.” (1 Pedro 2:9) Totoo, an saindang hawak sa laman bako pang sangkap asin sinda magagadan pag-abot nin panahon. Alagad, ngonyan na ipinahayag na sindang matanos nin Dios asin inampon na sindang espirituwal na aki, an saindang kagadanan sa laman ‘pagkatalingkas’ sana na nagtogot na sinda buhayon liwat sa “langitnon na kahadean” ni Cristo.—2 Timoteo 4:6, 18.
17, 18. Taano an katalingkasan kan Kristianong Jubileo ta mas mahalaga ki sa preliminaryong katalingkasan na ibinalangibog ni Jesus?
17 An enot o preliminaryong tangga nin pagbutas sa may pagtubod na mga Judio hale sa salang mga paghona asin gawe may dakulang halaga. Minsan siring, naheling na niato na lihis pa sa espirituwal na katalingkasan na iyan an itinao ni Jesus. Poon kan Pentecostes 33 C.E., kinalda nia an may pagtubod na mga tawo sa “ley nin kasalan asin nin kagadanan.” (Roma 8:1, 2) Sa paaging iyan nagpoon an Kristianong Jubileo para sa linahidan na mga Kristiano. Ini tunay na mas mahalagang katalingkasan, ta kaiba dian an paglaom sa buhay sa langit bilang kairibang paramana ni Cristo.
18 Sagkod digdi napag-olayan niato an duwang kabtang nin Kristianong katalingkasan kan enot na siglo, na daing duwa-duwa na basihan sa paggayagaya. Asin tunay na naggayagaya an mga nagturubod kan enot na siglo. (Gibo 13:44-52; 16:34; 1 Corinto 13:6; Filipos 4:4) Iyan nangorognang totoo mapadapit sa saindang kabtang sa Kristianong Jubileo, na nagbukas kan dalan na sinda mag-ako nin daing katapusan na mga bendisyon sa kalangitan.—1 Pedro 1:3-6; 4:13, 14.
19. Anong mga hapot an nagdadanay para sa mga Kristiano na dai pinaniaki sa espiritu, asin ano an nagpaparisa na sinda magkakaigwa nin kabtang sa itinao nin Dios na katalingkasan?
19 Alagad, saen namumugtak digdi an kadaklan na tunay na Kristiano ngonyan, mantang sinda dai pa ipinahayag na matanos para sa buhay asin linahidan kan banal na espiritu? May Makakasuratan na dahelan na humanap nin lagduan na katalingkasan para sa sainda bilang kabtang kan Kristianong Jubileo. Girumdomon an Gibo 3:20, 21: “Si Jesus, na maninigong magdanay nguna sa langit sagkod sa mga panahon nin pagbabalik kan gabos na bagay na isinabi nin Dios paagi sa ngoso kan saiyang banal na mga propeta kan suanoy na panahon.” (Ikomparar an Gibo 17:31.) Kaagid man kaiyan, si Juan, na linahidan na apostol na nagkakamit na kan Kristianong Jubileo, nagsurat manongod ki Jesu-Cristo: “Sia sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.” (1 Juan 2:2) Iyan daw nangangahulogan na an dakol na maimbod na Kristiano ngonyan na mayo nin langitnon na paglaom makapaggagayagaya sa Kristianong katalingkasan? Iyan daw sa ngapit sana, o kita daw igwa na ngonyan nin dahelan na maggayagaya? Maaaraman niato iyan paagi sa pagsiyasat sa mga kabtang nin Kristianong katalingkasan asin kan Jubileo na igwa nin espesyal na kahulogan para sa tunay na mga parasamba ngonyan.
[Nota sa Ibaba]
a An taonan na Aldaw nin Pagtubos ginibo sa petsa 10 nin Tishri, bulan sa kalendaryong Hebreo, na katimbang kan satong Setyembre-Oktubre.
Ano an Nasa Isip Nindo?
◻ Ano an mga pakinabang na itinao kan Jubileo sa suanoy na Israel?
◻ Paano ibinalangibog ni Jesus an enot na katalingkasan, asin ano an kalabot dian?
◻ Kasuarin nagpoon an Kristianong Jubileo, asin ano an basihan sa pagsabi nin siring?
◻ Taano ta may dahelan kita na maghalat sa katalingkasan may labot sa minilyon na Kristiano na dai linahidan nin espiritu?
[Blurb sa pahina 8]
“An dalan kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.” (Talinhaga 4:18) Kaoyon sa prinsipyong iyan, an artikulong ini asin an minasunod nag-aatubang nin binago asin mas mahiwas na paliwanag manongod sa Jubileo.
[Ritrato sa pahina 10]
Si Jesus nagbalangibog nin katalingkasan kan 30 C.E.
[Ritrato sa pahina 13]
An Kristianong Jubileo nagpoon kan 33 C.E.