An Kinaban Bakong Angay sa Sainda
“Sinda ginapo, pinagbista, . . . asin an kinaban bakong angay sa sainda.”—HEBREO 11:37, 38.
1, 2. Sa irarom nin anong mga kamugtakan na an mga Saksi ni Jehova kan suanoy na mga panahon nagdanay sa integridad, asin paano an saindang mga ginibo nakaaapektar sa mga lingkod nin Dios ngonyan?
AN MGA Saksi ni Jehova kan suanoy na mga panahon nagdanay sa integridad sa Dios sa ibong nin dakol na pagbalo na itinao sa sainda kan maraot na sosyedad nin tawo. Halimbawa, an mga lingkod nin Dios ginapo asin ginadan paagi sa minasbad. Sinda nagtios nin pagmaltrato asin kahorasaan. Alagad ta dai nagluya an saindang pagtubod. Tunay na, arog kan sabi ni apostol Pablo: “An kinaban bakong angay sa sainda.”—Hebreo 11:37, 38.
2 An nakapupukaw nin pagtubod na mga ginibo nin diosnon na mga tawo bago kan baha, kan mga patriarka, asin ni Moises nagpapahiro sa mga saksi ni Jehova sa modernong aldaw na maglingkod sa Dios na may pagtubod. Alagad kumusta man an iba na sinasabi sa Hebreo kapitulo 11 asin 12? Paano kita makikinabang sa paghorophorop sa mga kabtang kan saindang pagtubod?
An Pagtubod nin mga Hokom, Hade, Asin Propeta
3. Paano an mga pangyayari may labot sa Jerico asin ki Rahab nagpapaheling na an pagtubod kaipuhan na patunayan paagi sa mga gibo?
3 An pagtubod bako sanang paniniwala; iyan kaipuhan na patunayan nin mga gibo o paghiro. (Basahon an Hebreo 11:30, 31.) Pagkagadan ni Moises, an pagtubod nagtao sa mga Israelitas nin sunod-sunod na kapangganahan sa Canaan, alagad ini naghagad sainda nin paghihingoa. Halimbawa, huli sa pagtubod ni Josue asin kan iba pa “nagaba an mga lanob kan Jerico pakatapos na an mga iyan malibotan sa laog nin pitong aldaw.” Alagad “huli sa pagtubod si Rahab na patotot dai napara kaibanan kaidtong [mga daing pagtubod na taga-Jerico na] mga masinuway.” Taano? “Huli ta inako nia an [Israelitang] mga espiya sa matoninong na paagi,” na pinatunayan an saiyang pagtubod paagi sa pagtago sa sainda sa mga Cananeo. An pagtubod ni Rahab may marigon na basihan sa mga bareta na “pinamara ni Jehova an katubigan kan Dagat na Pula” sa atubangan kan mga Israelitas asin tinawan sinda nin kapangganahan sa mga hadeng Amorrheo na si Sihon asin Og. Si Rahab naggibo nin tamang moral na mga pagbakle asin binendisyonan huli sa saiyang aktibong pagtubod paagi sa pagkaligtas kaiba kan saiyang pamilya kan an Jerico malaglag asin paagi sa pagigin lolahon ni Jesu-Cristo.—Josue 2:1-11; 6:20-23; Mateo 1:1, 5; Santiago 2:24-26.
4. Ano an idinodoon kan mga inagihan ni Gedeon asin Barac kun dapit sa pagpaheling nin pagtubod sa atubang nin peligro?
4 An pagtubod ipinaheheling sa lubos na pagsarig ki Jehova sa atubang nin peligro. (Basahon an Hebreo 11:32.) Inadmitir ni Pablo na magkukulang sia nin panahon kun isasaysay nia an manongod ki “Gedeon, Barac, Samson, Jefte, David siring man ki Samuel asin an iba pang mga propeta,” na an mga ginibo nagtao nin dakol na pruweba nin pagtubod asin pagsarig sa Dios sa peligrosong mga kamugtakan. Kaya, huli sa pagtubod asin kaiba an 300 katawo sana, si Hokom Gedeon pinakosog nin Dios na daogon an militar na kosog kan mapan-aping mga Midianita. (Hokom 7:1-25) Pinakosog kan propetisang si Debora, si Hokom Barac asin an impanteriya nin 10,000 na kulang nin kasangkapan na mga lalaki dinaog an mas makosog na hukbo ni Hadeng Jabin na igwa nin 900 na may proteksion na mga karrong panguerra na pinangengenotan ni Sisara.—Hokom 4:1–5:31.
5. Sa anong mga paagi na si Samson asin Jefte nagpaheling nin pagtubod na nagtao nin patotoo sa lubos na pagsarig ki Jehova?
5 An saro pang halimbawa nin pagtubod kan mga aldaw kan mga hokom sa Israel iyo si Samson, makosog na kaiwal kan mga Filisteo. Totoo, kan huri sia nagin saindang butang bihag. Alagad ta ginadan ni Samson an dakol sa sainda kan itumba nia an mga harigi kan harong na duman sinda nagdodolot nin dakulang atang sa saindang falsong dios na si Dagon. Iyo, si Samson nagadan kaiba kan mga Filisteong idto alagad bakong bilang nagmomondong parahugot. Huli sa pagtubod sia nagsarig ki Jehova asin nag-arang sa saiya nin kosog na kaipuhan tanganing makapamalos sa mga kaiwal na idto nin Dios asin kan Saiyang banwaan. (Hokom 16:18-30) Si Jefte, na tinawan ni Jehova nin kapangganahan sa mga Amonita, nagpaheling man nin pagtubod na nagpatunay sa saiyang lubos na pagsarig ki Jehova. Huli sana sa siring na pagtubod na naotob nia an saiyang sumpa sa Dios paagi sa pagdusay kan saiyang aking babae sa paglilingkod ki Jehova bilang daraga sagkod na nabubuhay.—Hokom 11:29-40.
6. Paano ipinaheling ni David an saiyang pagtubod?
6 Pambihira man an pagtubod ni David. Hoben pa sia kaidto kan kalabanon nia an higanteng Filisteo na si Goliat. ‘Ika minadolok sako na may darang minasbad, budyak, asin garod,’ sabi ni David, ‘alagad ako minadolok sa saimo sa ngaran ni Jehova nin mga hukbo.’ Iyo, si David nagsarig sa Dios, ginadan an halangkawon na Filisteo, asin nagin mapusong guerrero-hade na nakikilaban para sa banwaan nin Dios. Asin huli sa pagtubod ni David, sia tawong naooyonan kan puso ni Jehova. (1 Samuel 17:4, 45-51; Gibo 13:22) Sa bilog na buhay, si Samuel asin an iba pang propeta nagpaheling man nin dakulang pagtubod asin lubos na pagsarig sa Dios. (1 Samuel 1:19-28; 7:15-17) Marahayon nanggad na mga halimbawa para sa mga lingkod ni Jehova sa presente, hoben asin gurang!
7. (a) Siisay an “huli sa pagtubod nakadaog sa mga kahadean sa ralaban”? (b) Siisay an “nakapangyari nin katanosan” paagi sa pagtubod?
7 Huli sa pagtubod mapanggana niatong maaatubang an gabos na pagbalo sa integridad asin magigibo an ano man na kaoyon sa banal na kabotan. (Basahon an Hebreo 11:33, 34.) Sa pagsitar sa iba pang mga gibo nin pagtubod, malinaw na nasa isip ni Pablo an mga hokom, hade, asin propetang Hebreo, ta nginaranan pa sana nia an mga tawong iyan. “Nin huli sa pagtubod” an mga hokom na arog ni Gedeon asin Jefte “nakadaog sa mga kahadean sa ralaban.” Iyo man si Hadeng David, na dinaog an mga Filisteo, Moabita, Siriano, Edomita, asin iba pa. (2 Samuel 8:1-14) Huli man sa pagtubod, an matanos na mga hokom “nakapangyari nin katanosan,” asin an matanos na hatol ni Samuel asin nin ibang propeta nakapahiro kisuerra sa iba na likayan o talikdan an salang gibo.—1 Samuel 12:20-25; Isaias 1:10-20.
8. Anong panuga an inako ni David, asin ano an ibinunga kaiyan?
8 Si David saro na huli sa pagtubod “nag-ako nin mga panuga.” Si Jehova nanuga sa saiya: “An saimo mismong trono magigin masarig sagkod sa panahon na daing sagkod.” (2 Samuel 7:11-16) Asin inotob nin Dios an panugang iyan paagi sa pagpatindog kan Mesiyanikong Kahadean kan 1914.—Isaias 9:6, 7; Daniel 7:13, 14.
9. Sa irarom nin anong mga kamugtakan na an ‘mga ngoso nin mga leon napintoan paagi sa pagtubod’?
9 Si propeta Daniel mapangganang naatubang an pagbalo sa integridad kan sia padagos na namibi sa Dios sono sa saiyang kaugalean sa aroaldaw sa ibong kan pagprohibir kan hade. Huli sa pagtubod nin sarong nagdadanay sa integridad, si Daniel “nagpinto sa mga ngoso nin mga leon” ta sia ilinigtas na buhay ni Jehova sa bobon nin mga leon na inaponan sa saiya.—Daniel 6:4-23.
10. Siisay an “nakasigbo kan kapangyarihan nin kalayo” paagi sa pagtubod, asin an kaagid na pagtubod magpapangyari satong gibohon an ano?
10 An nagdadanay sa integridad na Hebreong kairiba ni Daniel na si Sadrac, Mesac, asin Abednego garo man sana “nakasigbo kan kapangyarihan nin kalayo.” Kan nasa peligrong magadan sa mainiton na horno, sinabihan ninda si Hadeng Nabucodonosor na, baga man iligtas sinda o dai kan saindang Dios, dai sinda maglilingkod sa mga dios kan hade nin Babilonya o masamba sa ladawan na tinindog nia. Dai sinigbo ni Jehova an kalayo sa hornong idto, pero sinierto nia na dai kaiyan maano an tolong Hebreo. (Daniel 3:1-30) An kaagid na pagtubod nagpapangyari sato na magdanay sa integridad sa Dios sagkod sa posibleng kagadanan sa kamot nin mga kaiwal.—Kapahayagan 2:10.
11. (a) Paagi sa pagtubod, siisay an “nakalikay sa tarom nin minasbad”? (b) Siisay an “napakosog” paagi sa pagtubod? (c) Siisay an “nagin mapuso sa ralaban” asin “nakapadulag kan mga hukbo nin mga tagaibang daga”?
11 Si David “nakalikay sa tarom nin minasbad” kan mga tawohan ni Hadeng Saul. (1 Samuel 19:9-17) Si propeta Elias asin Eliseo nakalikay man sa pagkagadan sa minasbad. (1 Hade 19:1-3; 2 Hade 6:11-23) Alagad sairisay an ‘napakosog hale sa kaluyahan huli sa pagtubod’? Bueno, si Gedeon ibinilang an sadiri asin an saiyang mga tawohan na maluya nanggad tanganing iligtas an Israel sa mga Midianita. Alagad ta sia “napakosog” nin Dios, na nagtao sa saiya kan kapangganahan—asin 300 katawo sana an kaiba nia! (Hokom 6:14-16; 7:2-7, 22) “Hale sa kaluyahan” kan bologan an saiyang buhok, si Samson “napakosog” ni Jehova asin nagdara nin kagadanan sa dakol na Filisteo. (Hokom 16:19-21, 28-30; ikomparar an Hokom 15:13-19.) Tibaad naisip man ni Pablo si Hadeng Ezequias bilang saro na “napakosog” hale sa kaluyahan sa militar asin minsan sa pisikal. (Isaias 37:1–38:22) Kabilang sa mga lingkod nin Dios na “nagin mapuso sa ralaban” si Hokom Jefte asin Hadeng David. (Hokom 11:32, 33; 2 Samuel 22:1, 2, 30-38) Asin kabilang sa mga “nakapadulag kan mga hukbo nin mga tagaibang daga” si Hokom Barac. (Hokom 4:14-16) An gabos na ginibong ini maninigong makakombensir sato na huli sa pagtubod puwede niatong mapangganang atubangon an gabos na pagbalo sa satong integridad asin magigibo an ano man na kaoyon sa kabotan ni Jehova.
An Iba na May Arogan na Pagtubod
12. (a) Siisay na “mga babae [an] nag-ako kan saindang mga gadan paagi sa pagkabuhay liwat”? (b) Sa anong paagi na an pagkabuhay liwat nin nagkapirang tawong may pagtubod magigin “mas marahay”?
12 An pagtubod may kaibang paniniwala sa pagkabuhay liwat, paglaom na nakatatabang sato na mapagdanay an integridad sa Dios. (Basahon an Hebreo 11:35.) Huli sa pagtubod, “an mga babae nag-ako kan saindang mga gadan paagi sa pagkabuhay liwat.” Huli sa pagtubod asin sa kapangyarihan nin Dios, binuhay liwat ni Elias an aki nin sarong balo sa Sarepta, asin binuhay ni Eliseo an aki nin sarong babaeng Sunamita. (1 Hade 17:17-24; 2 Hade 4:17-37) “Alagad an ibang mga lalaki pinasakitan [sa literal, “pinagpukpuk”] nin huli ta habo sindang mag-ako nin pagkabutas paagi sa ibang pantubos, tanganing sinda magkamit nin mas marahay na pagkabuhay liwat.” Malinaw na an mga dai nginaranan sa Kasuratan na mga saksing ini ni Jehova pinagpukpuk sagkod na magadan, na nagsayumang akoon an kaligtasan na naghahagad na ikompromiso ninda an saindang pagtubod. An saindang pagkabuhay liwat magigin “mas marahay” ta iyan mayo na kan dai malilikayan na pangangaipo na magadan liwat (arog kan mga binuhay ni Elias asin Eliseo) asin mangyayari sa pagsakop kan Kahadean ni Jesu-Cristo, an “Amang Daing Katapusan” na an pantubos nagtatao nin oportunidad sa daing sagkod na buhay sa daga.—Isaias 9:6; Juan 5:28, 29.
13. (a) An mga “pag-olog-olog asin paglatigo” tinios niisay? (b) Siisay an nag-agi sa “pagkagapos asin pagkabilanggo”?
13 Kun kita may pagtubod, matatagalan niato an paglamag. (Basahon an Hebreo 11:36-38.) Kun kita pinaglalamag, makatatabang na girumdomon an paglaom sa pagkabuhay liwat asin aramon na kaya kitang tabangan nin Dios arog kan ginibo nia sa “iba [na] nabalo [o, naprobaran an pagtubod] paagi sa pag-olog-olog asin paglatigo, sa katotoohan, labi pa kaiyan, paagi sa mga pagkagapos asin pagkabilanggo.” An mga Israelitas “daing ontok na . . . inolog-olog an saiyang mga propeta, sagkod na an kabangisan ni Jehova lumaad tumang sa saiyang banwaan.” (2 Cronica 36:15, 16) Huli sa pagtubod, si Micaya, Eliseo, asin an iba pang lingkod nin Dios nagtagal sa mga “pag-olog-olog.” (1 Hade 22:24; 2 Hade 2:23, 24; Salmo 42:3) An mga “paglatigo” bantog kan kaaldawan kan mga hade asin propeta nin Israel, asin “hinampak” si Jeremias nin mga nagtutumang, bako sanang tinampal sia bilang insulto. An mga “pagkagapos asin pagkabilanggo” tibaad magpagirumdom sato kan saiyang mga inagihan saka kan mga propetang si Micaya asin Hanani. (Jeremias 20:1, 2; 37:15; 1 Hade 12:11; 22:26, 27; 2 Cronica 16:7, 10) Huli sa pagkaigwa nin kaparehong pagtubod, an mga saksi ni Jehova sa modernong aldaw nakatagal sa kaagid na mga kasakitan “huli sa katanosan.”—1 Pedro 3:14.
14. (a) Siisay an kabilang sa mga “ginapo”? (b) Siisay an posibleng “pinaglagadi”?
14 “Sinda ginapo,” sabi ni Pablo. An saro sa siring na tawong may pagtubod iyo si Zacarias, aki kan saserdoteng si Joiada. Pano kan espiritu nin Dios, sia nagtaram tumang sa mga apostata sa Juda. An resulta? Sa pagboot ni Hadeng Joas, ginapo sia sagkod na magadan nin mga nagkasapakat sa patyo kan harong ni Jehova. (2 Cronica 24:20-22; Mateo 23:33-35) Idinugang ni Pablo: “Sinda . . . pinagbista, pinaglagadi.” Tibaad nasa isip nia an propetang si Micaya bilang saro na “pinagbista,” asin an bakong seguradong Judiong tradisyon nagsasabi na si Isaias binaak nin lagadi kaidtong paghade ni Hadeng Manases.—1 Hade 22:24-28.
15. Siisay an ‘inapi’ asin “nagdurulag sa mga kapatagan”?
15 An iba “ginaradan sa minasbad,” arog halimbawa kan mga kairiba ni Elias na propeta nin Dios na “ginaradan sa minasbad” kan kaaldawan kan maraot na si Hadeng Acab. (1 Hade 19:9, 10) Si Elias asin Eliseo kabilang sa mga may pagtubod na “naggurubing nin anit nin karnero, nin kanding, mantang sinda nagtitios, nasasakitan, inaapi.” (1 Hade 19:5-8, 19; 2 Hade 1:8; 2:13; ikomparar an Jeremias 38:6.) An mga “nagdurulag sa mga kapatagan asin kabukidan asin mga lungib patin mga kuweba kan daga” bilang patamaan nin paglamag seguradong kaiba bako sanang si Elias asin Eliseo kundi pati an 100 na propeta na itinago ni Abdias nin manlimalimang polo sa sarong lungib, na dinadarahan sinda nin tinapay asin tubig kan an parasamba sa ladawan na si Reyna Jezabel magpoon na “laglagon an mga propeta ni Jehova.” (1 Hade 18:4, 13; 2 Hade 2:13; 6:13, 30, 31) Mga nagdadanay nanggad sa integridad! Bakong makangangalas na si Pablo nagsabi: “An kinaban [maraot na sosyedad nin tawo] bakong angay sa sainda”!
16. (a) Taano an bago-Kristianong mga saksi ni Jehova ta dai pa nag-ako “kan kaotoban kan panuga”? (b) Para sa mga saksi ni Jehova kaidtong mga panahon bago-Kristiano, an ‘paggibong sangkap’ sa sainda seguradong may koneksion sa ano?
16 An pagtubod nagtatao sato nin marigon na paniniwala na sa itinalaan na panahon nin Dios an gabos na namomoot sa saiya ‘magkakamit kan kaotoban kan panuga.’ (Basahon an Hebreo 11:39, 40.) An bago-Kristianong mga nagdanay sa integridad “tinawan nin patotoo huli sa saindang pagtubod,” na ngonyan nakatala na sa Kasuratan. Alagad ta dai pa ninda inako an “kaotoban kan panuga” nin Dios paagi sa daganon na pagkabuhay liwat na may esperansang mabuhay sagkod lamang sakop kan Kahadean. Taano? “Tanganing dai sinda gibohon na sangkap na siblag sa” linahidan na mga parasunod ni Jesus, na para sa sainda “an Dios patienot na nakaheling nin sarong bagay na mas marahay”—an inmortal na buhay sa langit asin mga pribilehiyo na maghade kaiba ni Cristo Jesus. Paagi sa saindang pagkabuhay liwat, poon kan matindog na an Kahadean kan 1914, an linahidan na mga Kristiano ‘ginigibong sangkap’ sa kalangitan bago an mga saksi ni Jehova kaidtong panahon bago-Kristiano buhayon liwat sa daga. (1 Corinto 15:50-57; Kapahayagan 12:1-5) Para sa naenot na mga saksing idto, an ‘paggibong sangkap’ sa sainda seguradong may koneksion sa saindang daganon na pagkabuhay liwat, sa saindang ‘pagkabutas hale sa kaoripnan nin kalapaan,’ asin pakaabot sa pagkasangkap nin tawo paagi sa paglilingkod kan Halangkaw na Saserdoteng Jesu-Cristo asin kan saiyang 144,000 na langitnon na mga katabang na saserdote sa laog kan saiyang Milenyal na Paghade.—Roma 8:20, 21; Hebreo 7:26; Kapahayagan 14:1; 20:4-6.
Magheling sa Parasangkap kan Satong Pagtubod
17, 18. (a) Tanganing magin mapanggana sa satong pakiumbasan para sa buhay na daing sagkod, ano an kaipuhan na gibohon niato? (b) Paano na si Jesu-Cristo an “Parasangkap kan satong pagtubod”?
17 Pakatapos na ikasaysay an mga ginibo kan bago-Kristianong mga saksi ni Jehova, itinokdo ni Pablo an pangenot na halimbawa nin pagtubod. (Basahon an Hebreo 12:1-3.) Nakapakokosog nanggad na ‘mapalibotan nin dakulang panganoron nin mga saksi’! Ini nagpapahiro sato na haleon an gabos na pagabat na makaoolang sa satong espirituwal na pag-oswag. Iyan nakatatabang sato na malikayan an kasalan nin pagkawara o kakulangan nin pagtubod asin dumalagan na may pakatagal sa Kristianong paorumbasan para sa buhay na daing katapusan. Alagad, tanganing maabot an satong pasohan, kaipuhan na may gibohon pa kita. Alagad ano iyan?
18 Tangani kitang magin mapanggana sa satong pakiumbasan para sa buhay na daing sagkod sa bagong palakaw nin Dios, kaipuhan na kita “nagheheling nin maingat sa Poon na Ahente [o, Poon na Nangengenot] asin Parasangkap kan satong pagtubod, si Jesus.” An pagtubod ni Abraham asin nin iba pang nagdanay sa integridad na nabuhay bago an ministeryo sa daga ni Jesu-Cristo bakong sangkap, bakong kompleto, huli ta dai ninda nasabotan kaidto an dai pa naootob na mga hula manongod sa Mesiyas. (Ikomparar an 1 Pedro 1:10-12.) Alagad paagi sa pagkamundag, ministeryo, kagadanan, asin pagkabuhay liwat ni Jesus, an dakol na hula manongod sa Mesiyas naotob. Kaya an pagtubod sa sangkap nang sentido “nagdatong” paagi ki Jesu-Cristo. (Galacia 3:24, 25) Dugang pa, gikan sa saiyang kamugtakan sa langit si Jesus nagpadagos na magin Parasangkap kan pagtubod kan saiyang mga parasunod, arog kan ibubo sa sainda an banal na espiritu kan Pentecostes nin 33 C.E. asin paagi sa mga kapahayagan na progresibong nagpatalubo sa saindang pagtubod. (Gibo 2:32, 33; Roma 10:17; Kapahayagan 1:1, 2; 22:16) Kadakula nanggad kan pagpasalamat niato sa “Maimbod na Saksing” ini, sa “Poon na Nangengenot” na ini sa mga Saksi ni Jehova!—Kapahayagan 1:5; Mateo 23:10.
19. Taano si Jesus ta maninigong ‘horophoropon’?
19 Huling bakong pasil na tagalan an mga pag-olog-olog kan mga daing pagtubod, si Pablo nagsadol: “Paghorophoropa nindo an saro [si Jesus] na nagtios nin siring na paglibak nin mga parakasala tumang sa saindang sadiring kapakanan, tanganing dai kamo mapagal asin manluya sa saindong kalag.” An totoo, kun itotorohok niato an satong mata sa “Maimbod na Saksi,” si Jesu-Cristo, dai kita noarin man mapapagal sa paggibo kan banal na kabotan.—Juan 4:34.
20. Ano an nagkapirang nanodan nindo manongod sa pagtubod paagi sa pag-adal sa Hebreo 11:1–12:3?
20 Sa ‘dakulang panganoron nin mga saksi’ dakol an nanonodan niato manongod sa mga kabtang nin pagtubod. Halimbawa, an pagtubod na kapareho kan ki Abel nagpapakosog sa satong pag-apresyar sa atang ni Jesus. An tunay na pagtubod ginigibo kitang mapusong mga saksi, kun paanong si Enoc mapusong nagtaram kan mensahe ni Jehova. Kapareho ni Noe, an satong pagtubod nagpapahiro sato na maingat na otobon an mga instruksion nin Dios asin maglingkod bilang mga parahulit nin katanosan. An pagtubod ni Abraham nagdodoon sato kan pangangaipo na kumuyog sa Dios asin manarig sa Saiyang mga panuga, minsan an iba dai pa naootob. An halimbawa ni Moises nagpapaheling na an pagtubod nagpapangyari sato na magdanay na daing digta kan kinaban na ini asin maimbod na manindogan kaiba kan banwaan ni Jehova. An mga ginibo kan mga hokom, hade, asin propeta sa Israel nagpapatunay na an pagtubod sa Dios makapakokosog sato sa tahaw nin paglamag asin mga pagbalo. Asin kanigoan an satong pasalamat na an daing kaagid na halimbawa ni Jesu-Cristo ginigibo an satong pagtubod na marigon asin dai natatanyog! Kun siring, huli ta si Jesus an Nangengenot sa sato asin sa kosog kan satong Dios, padagos kitang magpaheling nin nagdadanay na pagtubod bilang mga Saksi ni Jehova.
Ano an Simbag Nindo?
◻ Anong mga ginibo nin bago-Kristianong mga saksi ni Jehova an nagpapatunay na an pagtubod ipinaheheling paagi sa lubos na pagsarig sa Dios sa atubang nin peligro?
◻ Taano ta masasabi na huli sa pagtubod kaya niatong mapangganang atubangon an gabos na pagbalo sa satong integridad?
◻ Ano an patotoo na paagi sa pagtubod puwede niatong tagalan an paglamag?
◻ Taano si Jesus ta inapod na an “Parasangkap kan satong pagtubod”?
◻ Ano an nagkapira sa dakol na kabtang nin pagtubod?
[Ritrato sa pahina 14, 15]
Si David nagpaheling nin pagtubod paagi sa lubos na pagsarig ki Jehova. Marahayon nanggad na halimbawa para sa banwaan ni Jehova ngonyan!
[Ritrato sa pahina 16]
“An mga babae nag-ako kan saindang mga gadan paagi sa pagkabuhay liwat.” An pagtubod sa pagkabuhay liwat minatabang sato na mapagdanay an integridad ki Jehova