An Panhuhula—Uso Pa
“IISIPON nin saro, sa kaaldawan na ini nin lakop na kaliwanagan asin edukasyon, na dai na kakaipuhanon na ibuyagyag na falso an mga paniniwala na basado sa mahika asin superstisyon.” Ini kaiba kan kapahayagan na pinirmahan nin 186 na bantog na mga sientista, kaiba an 18 nanggana kan premyong Nobel. Ano an boot nindang sabihon? An astrolohiya, sarong usong klase nin panhuhula na ginagamit an mga bitoon na, sono sa sainda, “lakop sa modernong sosyedad.” Kamo daw personal na nagtutubod sa pirang klase nin panhuhula? O kamo daw nagdududa, o kontra pa ngani, kapareho kan bantog na mga sientistang ini? An saindong punto-de-vista sa bagay na ini mahalaga. Helingon niato kun taano.
An gibong ini lakop na gayo. Sono sa representante nin sarong miting nin mga parahula sa Paris, “4 na milyon na Pranses an nagkokonsulta sa mga patagolainan kada anom na bulan.” Sa Estados Unidos igwa nin kinakarkulong 175,000 na mga astrologong por ora sana asin nin 10,000 na bilog na panahon an trabaho. Dakol man sinda sa Gran Britania, na duman igwa sinda nin sadiring mga eskuwelahan. Asin an magasin na Pranses na Ça m’intéresse (Iyan Kawiliwili) nagkokomento: “Sa gabos na lugar, pati sa pinakaedukadong mga sosyedad, maheheling niato an kaagid na mga estadistika. An mga patagolainan nag-ooswag sa paghinanapos kan satong siglo.”
Siisay an Nagkokonsulta Sainda—Asin Taano?
An iba tibaad naniniwala na an mga dai sanang inadalan, hababang klaseng mga tawo an interesado sa mga “siensia” nin okulto, na an pinakalakop tibaad iyo an astrolohiya. Alagad si Madame Soleil, sarong bantog na astrologong Pranses, nagbubuyagyag: “Gabos sinda minadolok sako, baga man konserbatibo o radikal, mga politiko na may gabos na klaseng punto-de-vista, asin mga namomoon sa estado hale sa ibang nasyon. Igwa pa ngani nin mga padi asin komunista.” Kaoyon digdi, kan magadan an salamangkerong si Frédéric Dieudonné, an sarong artikulo na nagluwas sa Le Figaro, sarong seryosong diaryong Pranses, nagsabi na sia kaidto nakaagyat sa “kadakol na parokyanong mga midbid na tawo sa Paris, mga ministro, haralangkaw na opisyales, parasurat asin artista.”
An mga hugador nagkokonsulta sa mga astrologo tanganing maaraman kun saen sinda mataya. An mga negosyante nagkokonsulta sainda tanganing aramon kun saen ibubugtak an saindang kuwarta. An mga astrologo andam pa nganing magsabi saindo kun noarin maninigong magbiyahe o kun ano an lulutoon. Asin nakalaog naman sa ibang bagay an panhuhula. An mga departamento nin pulisiya sa laen-laen na nasyon ginagamit an mga parahula sa paghanap nin mga kriminal o nawawarang tawo. Asin sono sa semanal na babasahon na Pranses na Le Figaro Magazine, “an Pentagon may sinusuweldohan na 34 katawo na may abilidad na maghula tanganing magtao nin impormasyon sa kun ano an nangyayari sa sekretong mga base militar sa U.S.S.R.” An magasin man sanang iyan nagbabareta na an kongresista nin E.U. na si Charles Rose nagsabi na an mga Ruso naggagamit man kan kapangyarihan nin mga patagolainan.
Taano ta uso pang marhay an astrolohiya? Iyan daw dai nakaaanong dibersion o aling-alingan? Iyan daw an pinakamarahay na paaging maaraman kun ano an mangyayari sa ngapit—o igwa daw nin mas marahay na paagi? Helingon niato kun makukua niato an simbag sa mahahalagang hapot na ini.