Kun Paano Niato Mamimidbid an Dios

AN IBA naniniwala na an Dios nasa gabos na lugar, yaon sa mga bitoon asin planeta, nasa hablondawani, sa pakpak nin sarong gamgam, sa doot. Minsan siring, an Biblia nagtotokdo na an Dios, bilang Persona, may depinidong namumugtakan. An madonong na si Hadeng Salomon nagsabi sa sarong pamibi sa Dios: “Ika magdangog man hale sa kalangitan, an saimong lugar na ontokan.” Asin sa libro kan Biblia na Isaias, an Dios mismo kinokotar na nagsasabi: “An kalangitan iyo an sakuyang trono.”—1 Hade 8:49; Isaias 66:1.

Minsan ngani an Dios mismo bakong presente sa saiyang mga linalang, an saiyang personalidad naririsa dian. Sabi ni apostol Pablo sa Roma 1:20: “An saiyang dai naheheling na mga kuwalidad malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.” An salmistang si David nagsurat man: “An kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan. An sunod-sunod na aldaw nagpapaluwas nin tataramon, asin an sunod-sunod na banggi nagpapaheling nin kaaraman.”—Salmo 19:1, 2.

Iyo, mangalagkalag kamo kun bangging mabitoon asin horophoropon sa kadikit an labi-labing kadonongan asin kapangyarihan na kinaipuhan sa paglalang asin pagmentenar sa satong uniberso! (Ikomparar an Isaias 40:26.) Tunay nanggad, an mga linalang daing sagkod na burabod nin impormasyon manongod sa personalidad nin Dios. Asin noarin man dai lubos na masasabotan nin tawo an labi-labing patotoo na itinatao kaiyan manongod sa mga kuwalidad asin atributo nin Dios. Ipinagigirumdom sato kan libro ni Job: “Uya! Ini an mga gilid kan saiyang mga dalan, asin guranong hinghing nin sarong bagay an nadangog dapit sa saiya!” (Job 26:14) Igwa nin gurangan nang sarabihon na Sueco: ‘An maestro orog na dakula sa saiyang mga ginibo.’ Kaya, kun an mga linalang dakula, an Dios seguradong orog na dakula; kun an mga linalang nagpapaheling nin kadonongan, an Dios seguradong orog na madonong; kun an mga linalang nagpapaheling nin kapangyarihan, an Dios seguradong orog nanggad na makapangyarihan!

An Biblia—Libro nin Dios

Kaya an mga linalang nagtatao nin dakol na impormasyon manongod sa Dios. Minsan siring, an pag-adal daw sa mga linalang magsasabi saindo kan ngaran nin Dios? Ipahahayag daw kaiyan kun ano an katuyohan sa likod nin mga linalang o kun taano ta tinotogotan nia an karatan? An mga simbag sa siring na mga hapot nagkakaipo nin labi pa sa pag-adal sana sa materyal na mga ginibo nin Dios. Marahay sana ta sineguro nin Dios na an siring na impormasyon manongod sa saiya ibugtak sa Biblia.

Dian an Dios noarin man dai iinaatubang bilang impersonal, dai ikapaliwanag na intelihensia o sarong puwersa o kapangyarihan na presente sa gabos na lugar. Sa Gibo 3:19 mababasa niato an manongod sa “persona ni Jehova.” Kan an saiyang Aki, si Jesu-Cristo, buhayon liwat hale sa mga gadan, an Biblia nagsasabi na sia naglaog sa langit mismo tanganing umatubang “sa persona [sa literal, “lalauogon”] nin Dios.” (Hebreo 9:24, Kingdom Interlinear) Tunay na noarin man dai inapod ni Jesus an Dios na Dakulang Puwersa, Daing Sagkod na Intelihensia, o ano pa man na ibang impersonal na termino kun sia nagtataram manongod sa saiya o namimibi sa saiya. Al kontraryo, parate nia siang inaapod na langitnon na Ama, sarong termino na nagpaparisa kan saiyang hararom na pagkadayupot sa Dios.—Mateo 5:48; 6:14, 26, 32.

Kun siring an Dios bakong daing ngaran na “Sarong Bagay” kundi sarong Persona na may ngaran. An sabi kan Salmo 83:18: “Tanganing an mga tawo makaaram na ika, na an ngaran iyo si Jehova, ika sana an Kaharohalangkawe sa bilog na daga.” Totoo, an Biblia naggagamit man nin mga titulo o naglaladawan na mga termino para sa Dios: “Makakamhan sa gabos,” “Hadeng daing sagkod,” “paraligtas,” “Pastor,” “Suanoy nin mga Aldaw,” “paraataman,” “Kaharohalangkaweng Paratokdo,” “Dakulang Kaggibo,” “Gapo.” (Rut 1:20; 1 Timoteo 1:17; Isaias 43:11; Salmo 23:1; Daniel 7:9, 13, 22; 1 Pedro 2:25; Isaias 30:20; 54:5; Deuteronomio 32:4) Alagad an mga terminong iyan nagpapahayag nin dugang pang mga kabtang kan personalidad nin Dios, arog baga kan saiyang pagigin makakamhan sa gabos, kan saiyang mamomoton na pagmakolog sa saiyang banwaan, asin kan saiyang daing sagkod na kadonongan.

Huling an Dios sarong Persona, sia igwa man nin mga gusto asin dai gusto—pagmate pa ngani. Sinasabi sato kan Biblia na sia namomoot sa saiyang banwaan (1 Hade 10:9), nag-oogma sa saiyang mga ginibo (Salmo 104:31), naoongis sa pagsamba sa ladawan (Deuteronomio 16:22), asin nakokolgan an boot huli sa karatan. (Genesis 6:6) Sa 1 Timoteo 1:11 sia inaapod pa nganing “maogmang Dios.”

Pagkamidbid sa Dios nin Dayupot

Totoo, mayo nin hotok nin tawo na pagkakaigoan kan bilog na kapahayagan kan personalidad nin Dios. “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan! Huli ta ‘siisay an nakaaram kan kaisipan ni Jehova, o siisay an nagin saiyang parahatol?’” (Roma 11:33, 34) Minsan siring, para sa saro na may pagtubod, an Dios puwedeng magin arog katunay kan siisay pa man na ibang persona. An Biblia nagsasaysay sato na “si Noe naglakaw sa kaibanan kan tunay na Dios,” na garo baga si Jehova nasa kataed nia. (Genesis 6:9) An Dios tunay man na gayo ki Moises kaya garo baga sia “nakakaheling kan Saro na dai naheheling.” (Hebreo 11:27) Asin manongod ki Abraham sinasabi na sia “katood ni Jehova.”—Santiago 2:23.

Siyempre, an Dios personal na ipinahayag an saiyang sadiri ki Noe, Abraham, asin Moises. ‘Bueno, kun ipahahayag nin Dios an saiyang sadiri sa sako nin arog kaiyan kapersonal,’ tibaad sabihon nin iba, ‘sia magigin man tunay para sa sako.’ Alagad girumdoma na si Noe, Abraham, asin Moises mayo kan Biblia. Dai ninda aram an manongod ki Jesu-Cristo ni an gabos na dinosenang hula na inotob nia. Bilang resulta, an gabos na ipinahayag ni Jesu-Cristo manongod sa Dios dai ninda aram. Sa siring na mga kamugtakan, kaipuhan asin maninigo na an Dios gumibo nin direktang pagpahayag kan saiyang sadiri.

Alagad, ngonyan, nasa sato pareho an Biblia asin an pagmansay nin dakol na siglong pagkaotob kan mga hula sa Biblia. Nasa sato an rekord kan mga Ebanghelyo manongod sa nagin buhay, ginibo, asin mga sinabi ni Jesu-Cristo. Asin sabi ni Pablo: “Sa saiya [si Cristo] namumugtak an bilog na kapanoan kan banal na kuwalidad.” (Colosas 2:9) Iyo, kita nasa kamugtakan na mamidbid an Dios na may pagkadayupot na dai mapupuwede kan kaaldawan kan mga patriarka. Bako daw na nababawi na nin labi-labi digdi an bagay na dai nia direktang ipinahayag an saiyang sadiri sa sato?

Irinarani Kita sa Dios kan Pagbasa sa Biblia

Mababasa niato sa Santiago 4:8: “Rumani kamo sa Dios, asin sia marani sa saindo.” Paagi sa pagbasa sa Biblia, makararani kita sa Dios. Alagad paano? Primero, paagi sa pagbasa sa sarong kabtang kan Biblia aroaldaw, manonodan nindo an bagong mga karakteristiko asin atributo kan saiyang personalidad. Sa pagbasa nindo, paorootrong pumondo asin ihapot sa sadiri: ‘Ano an nanodan ko manongod sa Dios sa bersikulo o kabtang na ini?’ Dugang pa, puwede nindong arangon an espiritu nin Dios na magserbing “paratabang” sa saindong pagsabot asin sa saindong pagrani sa Dios.—Juan 14:26.

“Inaapresyar ko an pagkaigwa nin mas marahay na pagsabot ki Jehova bilang sarong persona,” an sabi nin sarong Kristiana na binasa an bilog na Biblia. Estudyante sia sa Watchtower Bible School of Gilead, na nagtotokdo sa mga misyonero na isinusugo sa bilog na kinaban. Anong paagi nin pag-adal sa Biblia an ginagamit sa paadalan na ini? An paliwanag kan saro sa mga instruktor: “Pinonan mi an proyekto nin pag-adal sa bilog na Biblia bilang sarong grupo. Pinag-adalan mi an 10 sagkod 15 pahina kada aldaw, na an gabos . . . na estudyante nagsisiyasat asin nagpapartisipar sa orolay niamo. Kun may nanonompongan kaming depisil na bersikulo, pinag-oolayan mi (1) an konteksto, (2) an mga pangyayari sa panahon nin pagsurat, asin (3) an kahulogan kan pangenot na mga tataramon sa teksto. Permi niamong ihinahapot, ‘Ano an sinasabi kaini sa sato manongod ki Jehova asin sa saiyang mga kuwalidad?’ Nadiskobre mi na iyan perming may sinasabi manongod sa saiya.”

Minsan ngani tibaad dai kamo magkapribilehiyo na mag-adal nin pormal sa Biblia sa paadalan na ini, tibaad magin epektibo an iba sa mga paaging ini sa pag-adal para sa saindo asin sa saindong pamilya. Halimbawa, sa mga Saksi ni Jehova kaugalean na an pag-adal sa pirang kapitulo kan Biblia serosemana may koneksion sa saindang pagtiripon sa kongregasyon. Taano ta dai sundan an iskedyul na ini nin babasahon sa Biblia bilang pamilya? Saro pa, an Watch Tower Society nagpupublikar nin mga pantabang sa pagsiyasat, arog baga kan Aid to Bible Understanding asin New World Translation Reference Bible, na makatatabang saindo sa depisil na mga teksto sa Biblia.a An regular na programa nin pagbasa sa Biblia makadudugang nanggad sa saindong pagsabot sa personalidad ni Jehova.

Puwede man kamong pumili nin sarong kabtang kan Biblia na partikularmente nindong nagugustohan. Kun, halimbawa, pilion nindong pag-adalan an 17 bersikulo sa Salmo 86, manonompongan nindo an kisuerra 15 ugale sa personalidad nin Dios: Sia marahay, andam na magpatawad, abunda sa mamomoton na kabootan, andam na sumimbag sa mga pamibi, daing kapantay sa mga dios, daing kabaing bilang paralalang, soberanong hade, dakulang paragibo nin mga ngangalasan, paraligtas sa kagadanan, maheherakon, maugayon, maluway sa pagkaanggot, abunda sa katotoohan, sarong paratabang, asin pararanga. Ano pa an maorog sa pasohan na pagmaigotan na makanood manongod sa saindong Kaglalang?

Dakulang mga Pakinabang sa Pakamidbid sa Dios

An pakaabot sa satong ultimong pasohan na buhay na daing katapusan saro sanang pakinabang sa pakamidbid sa Dios. (Juan 17:3) Dugang pa, yaon an pakinabang na pagkaigwa nin kaibaiba sa aroaldaw na nagmamakolog sa saindo asin arog karigon sa gapo. (Salmo 18:31) Kan si Hadeng David nakamate na sia napalilibotan nin mga kaiwal asin nagagabatan nin mga problema, nadiskobre nia na an Dios sana an tunay na paratabang na yaon. Kaya sia nagsabi: “Bugtakan an saimong pasan ki Jehova mismo, asin sia matabang sa saimo. Noarin man dai nia totogotan na matanyog an matanos.”—Salmo 55:22.

Kamo man puwedeng magkamit nin siring na relasyon sa Dios, kun kamo magtatao sana nin panahon na mamidbid sia. Bako man iyan na depisil na gayo. Gibohon an paghihingoa na basahon an saiyang Tataramon. Makiasosyar sa mga an pamumuhay nagpapaheling na midbid ninda an Dios, arog baga kan mga nagdara sa saindo kan babasahon na ini. Mag-apod ki Jehova sa pamibi. Huli ta an Dios bakong impersonal na puwersa na bongog sa saindong mga pagngayongayo. Sia buhay na Dios asin “Paradangog nin pamibi.” Asin “kun hanapon mo sia, mapakua sia sa saimo.”—Salmo 65:2; 1 Cronica 28:9.

[Nota sa Ibaba]

[Ritrato sa pahina 5]

Personal na ipinahayag nin Dios an saiyang sadiri ki Noe, Abraham, asin Moises

[Ritrato sa pahina 7]

An mga linalang daing sagkod na burabod nin impormasyon manongod sa personalidad nin Dios