Pagkakamit nin Pakipagkatoninongan sa Dios Paagi sa Pagdusay Asin Bautismo
“Si Jehova nagpadagos na magsabi: ‘ . . . Sa siisay man na igwa nin tanda dai kamo magrani.’”—EZEQUIEL 9:4, 6.
1, 2. (a) Taano an kagabsan na tawo ta mayo nin pakipagkatoninongan sa Dios? (b) Taano ta mahalaga para sa gabos na magkamit kan siring na pakipagkatoninongan?
PAGKAKAMIT nin pakipagkatoninongan sa Dios? Alagad taano? Pipira sana an ibinibilang an sadiri na kaiwal nin Dios. Minsan siring, posible daw na magin aktuwal na kaiwal nin Dios asin dai iyan maaraman? Si apostol Pablo nagpaliwanag sa mga Kristiano kan enot na siglo: “Kita gabos kaidto namuhay sono sa mga horot kan satong laman, na naggigibo kan mga bagay na mawot kan laman asin kan mga pag-isip, asin sono sa pagkamundag kita kaidto mga aki nin kaanggotan arog kan iba.”—Efeso 2:3.
2 Siring man ngonyan, minsan ngani tibaad kamo interesadong paogmahon an Dios, an kasalan na minana ki Adan nakaaapektar sa saindong punto-de-vista asin puwedeng magtulod sa saindo na gibohon an “mga bagay na mawot kan laman.” Dawa kun kamo saro na nag-aadal sa Biblia kaiba nin mga Saksi ni Jehova o sarong dai pa nabautismohan na hoben na an mga magurang Saksi, an paslong kaisipan na gigibohon ko an gusto ko tibaad iyo an nangyayari sa saindong buhay asin padagos kamong isinisiblag sa Dios. An tawo na nagdadanay sa siring na gawe ‘nagririmpos nin kaanggotan para sa saiya man sana.’ (Roma 2:5; Colosas 1:21; 3:5-8) Lubos na ipahahayag nin Dios an saiyang kaanggotan sa marikas na nagdadangadang na “aldaw nin kaanggotan asin kan pagpahayag kan matanos na paghokom nin Dios.” (Roma 1:28–2:6) Paano daw kamo magkakamit nin pakipagkatoninongan sa Dios asin makaligtas sa “aldaw nin kaanggotan” na ini?
An Pundasyon nin Katoninongan
3. Paano itinao nin Dios an basihan sa pakipag-uli?
3 Si Jehova an guminibo kan inisyatiba na tumabang. “Sia namoot sato asin isinugo an saiyang Aki bilang pantubos na atang para sa satong mga kasalan.” (1 Juan 4:10) An kagadanan bilang atang ni Jesus minatubos, an boot sabihon, kinakalma o pinaninigoan an hustisya ni Jehova. Ini nagtatao nin legal na basihan para sa kapatawadan nin mga kasalan asin, sa huri, para sa lubos na pagkahale kan pag-iiwal sa pag-oltanan nin Dios asin nin tawo. Iyo, posibleng ‘makipag-uli sa Dios paagi sa kagadanan kan saiyang Aki,’ arog kan isinurat ni apostol Pablo.—Roma 5:8-10.
4. Anong mahalagang bisyon an itinao ki Ezequiel, asin taano iyan ta mahalaga sa sato?
4 Alagad tanganing personal na makinabang sa atang ni Cristo, kaipuhan na may mga gibohon kita. An mga ini ipinaririsa sa dramatikong bisyon na itinao ki propeta Ezequiel, bisyon na naootob sa satong panahon na an “aldaw nin kaanggotan” nin Dios nagdadangadang. An hukbong mangagadan nin Dios ilinaladawan sa bisyon nin anom na armadong lalaki. Bago ipahayag kan mga ini an kaanggotan nin Dios, an ikapitong lalaki, na may darang tintero nin sekretaryo, sinasabihan: “‘Umagi ka sa tahaw kan siudad, . . . asin bugtakan mo nin tanda an angog kan mga tawo na nag-aaragagha asin nag-aaragrangay huli sa gabos na makababaldeng bagay na ginigibo sa tahaw kaiyan.’ Asin sa [anom na armadong lalaki] sia nagsabi sa sakuyang talinga: ‘Umagi kamo sa tahaw kan siudad na kasunod nia asin mangadan kamo. . . . Alagad sa siisay man na igwa nin tanda dai kamo magrani.’”—Ezequiel 9:1-6.
5. Ano an minagiya pasiring sa pagsolsol?
5 An mga ini na may nagpoprotehir na ‘tanda’ nababalde huli ta an mga naghihingakong nagsasamba sa tunay na Dios ‘pinano an daga nin kadahasan’ asin naggigibo nin seksuwal na inmoralidad, pagsamba sa ladawan, asin gabos na klase nin iba pang salang gibo. (Ezequiel 8:5-18; Jeremias 7:9) Siring man ngonyan, an mga ‘tatandaan’ kaipuhan ngunang makanood, paagi sa pag-adal sa Biblia, na magpahalaga sa mga pamantayan nin Dios asin magmondo nin odok sa puso, iyo, ‘mag-agagha asin mag-agrangay,’ huli sa mga katokdoan asin gibo na naglalanghad sa saiya. Tibaad huli sa ignoransia an iba naggibo nin sala o nagkonsinte kaiyan paagi sa pagtao kan saindang pagsuportar. Pero, ngonyan an pagheling ninda sa mga gibong iyan pareho na sa pagheling nin Dios—may pagkabalde! (Roma 1:24-32; Isaias 2:4; Kapahayagan 18:4; Juan 15:19) An nag-orog na pakasabot na ini minagiya sa saro sa enot na gigibohon tanganing kamtan an pakipagkatoninongan sa Dios: an pagsolsol. Si apostol Pedro nagsadol: “Kaya magsorolsol kamo asin magbakle tanganing an saindong mga kasalan mapara, tanganing dumatong an mga panahon nin kaginhawahan [imbes na kaanggotan] hale sa persona ni Jehova.” (Gibo 3:19) Nakagiginhawa nanggad an kapatawadan na iyan!
Pagkaigwa kan “Tanda”
6. Sa anong mga dahelan na an iba tinandaan kan suanoy na mga panahon?
6 Tanganing makaligtas sa kaanggotan nin Dios, an mga ‘nag-aragagha asin nag-aragrangay’ kaipuhan na matandaan sa saindang angog. (Ezequiel 9:4) Kan suanoy na mga panahon an mga oripon parateng tinatandaan sa angog tanganing mamidbid nin malinaw. An nagpapamidbid na mga tanda sa angog asin sa iba pa puwede man na magparisa na an saro nagsasamba sa sarong dios.a (Ikomparar an Isaias 44:5.) Kaya, sa satong aldaw, ano an nagpapamidbid, nagliligtas-buhay na tanda na malinaw na nagpapamidbid sa igwa kaiyan bilang tunay na mga parasamba asin oripon ni Jehova?
7. Ano an simbolikong tanda?
7 An simbolikong tanda iyo an ebidensia, na garo baga yaon sa saindong angog, (1) na kamo nagdusay, bautisadong disipulo ni Jesu-Cristo asin (2) na kamo nagsolog na kan arog-Cristong bagong pagkatawo. (Efeso 4:20-24) Mantang an mga ‘tinatandaan’ kaipuhan ngunang gumibo nin pagdusay, kaipuhan na maaraman niato kun ano an kalabot digdi. Si Jesus nagpapaliwanag: “Kun an siisay man boot na sumunod sa sako, paindahan nia an saiyang sadiri asin pasanon an saiyang hariging pasakitan patin padagos na sumunod sa sako.”—Marcos 8:34.
8, 9. (a) Ano an boot sabihon kan ‘pagpainda sa sadiri’? (b) Paano ikakailustrar an hinahagad nin pagdusay?
8 An termino sa Griego na isinalin na “paindahan” nangangahulogan “biyong deharan” o “isikwal.” Kun siring, an ‘pagpainda sa sadiri’ nangangahulogan bako sanang nin pagdenar sa saindong sadiri nin sarong kasingawan o kasiraman paminsanminsan. Imbes, iyan nangangahulogan nin pagigin andam na sayumahan an sadiri pag-abot sa pagtogot na an saindong buhay dominaron kan saindong personal na mga kamawotan asin ambisyon. Natatabangan kitang maheling an hiwas na sakop kan mga tataramon ni Jesus paagi sa pagrisa kun paano an ideyang ini isinasalin sa laen-laen na tataramon: “Pagpondo sa paggibo kan gusto kan sadiring puso” (Tzeltal, Mejico), “dai na pakasadiri sa sadiri” (K’anjobal, Guatemala), asin “pagtalikod sa sadiri” (Javanese, Indonesia). Iyo, ini nangangahulogan nin esklusibong pagdusay, bako sanang promesa na puwedeng gibohon sa nagkapirang bagay.
9 An sarong Kristiana na an ngaran Susan, na kaidto independienteng gayo, nagpapaliwanag kun ano an kahulogan sa saiya kan pagdusay: “Isinusuko ko na an bilog kong buhay sa iba. Si Jehova na ngonyan an nagdedeterminar kan sakong buhay, nagsasabi sako kan sakong gigibohon, asin nagsasabi kan mga dapat kong ipaorog.” Kamo daw andam na gumibo kan arog kaining esklusibong pagdusay ki Jehova Dios? Girumdoma, an simbolikong tanda nagpapamidbid saindo bilang ‘rogaring’ nin Dios, bilang maogmang oripon kan saiyang Kagurangnan.—Ikomparar an Exodo 21:5, 6; Roma 14:8.
10. Anong mga bagay an maninigong konsideraron bago magdusay?
10 “Siisay saindo na boot na magtogdok nin torre an dai nguna minatukaw asin kinikuwenta an gastos, tanganing helingon kun igwa sia nin igo tanganing iyan matapos?” an hapot ni Jesus. (Lucas 14:28) Kaya kamo daw andam na: Dayaday na mag-atender sa Kristianong pagtiripon? (Hebreo 10:25) Papagdanayon an halangkaw na pamantayan sa moral na ibinugtak nin Dios para sa saiyang mga lingkod? (1 Tesalonica 4:3, 4, 7) Magkaigwa nin pinakalubos na kabtang sa paghuhulit kan Kahadean siring sa makakaya nindo? Enoton an kabotan nin Dios kun minapili nin karera o nagbubugtak nin mga pasohan sa buhay? (Mateo 6:33; Eclesiastes 12:1) Asikasohon an saindong mga obligasyon sa pamilya? (Efeso 5:22–6:4; 1 Timoteo 5:8) Oras na kamo nakagibo na nin personal na pagdusay sa pamibi, an saro pang dapat na gibohon opisyal na ipinaaaram ini sa iba.
An Bautismo—Para Kiisay?
11. Ano an isinisimbolo nin bautismo, asin ano an nagigibo kaiyan?
11 Si Jesus nagboot na an saiyang mga parasunod pabautismo. (Mateo 28:19, 20) Sinda kaipuhan na biyong ipairarom sa tubig asin hawason dian. Kapareho nin paglobong asin pagkabuhay liwat, ini naglaladawan nanggad sa pagkagadan nin saro sa paslong pamumuhay asin pagkabuhay liwat sa pag-otob kan kabotan nin Dios. Paagi sa bautismo ipinamimidbid nindo na kamo saro sa mga Saksi ni Jehova na kaasosyar kan lakop sa kinaban na kongregasyon nin Dios.b Ginigibong balido nin bautismo an solemneng pakipagkontrata sa Dios. (Ikomparar an Exodo 19:3-8.) An saindong buhay kaipuhan na kaoyon sa saiyang mga pagboot. (Salmo 15; 1 Corinto 6:9-11) An bautismo, na nag-oordenar sa saindo bilang ministro nin Dios, nagpaparisa man nin “paghagad sa Dios nin marahay na konsensia” huli ta aram nindo na kamo may pakipagkatoninongan sa Dios.—1 Pedro 3:21.
12. Noarin protehido an mga aki kan “tanda” kan saindang magurang?
12 Maninigo daw na pati mga hobenes maghorophorop na pabautismo? Bueno, girumdoma na sinabihan ni Jehova an anom na armadong lalaki sa bisyon: “An gurang, soltero asin daraga asin sadit na aki patin mga babae maninigo nindong gadanon—sagkod na maubos. Alagad sa siisay man na igwa nin tanda dai kamo magrani.” (Ezequiel 9:6) Siyempre, an mga aki na akion pa tanganing magdusay magigin protehido kan “tanda” kan magurang kun an magurang na iyan naghihingoang padakulaon an mga aki na mamoot ki Jehova asin kun sinda makinuyog na nag-aako. (1 Corinto 7:14) Pero, kun an aki may igo nang intelihensia na gumibo nin personal na desisyon asin nakaabot na sa punto na sia ‘nakaaaram na kun paano an paggibo nin tama,’ dai nindo honaon na sia sagkod lamang na masasakop kan merito kan “tanda” kan saiyang magurang.—Santiago 4:17.
13. Ano an pira sa mga bagay na maninigong konsideraron sa pagdeterminar sa pagigin andam nin sarong hoben para sa bautismo?
13 Bago magdusay, an hoben maninigong may igong kaaraman tanganing masabotan an napapalabot asin maninigong naghihingoang magkaigwa nin personal na relasyon sa Dios. Maninigo siang makasabot asin mangapot sa mga prinsipyo kan Biblia, sa pakaaram na sia papaninimbagon para sa ano man na pagbalga dian. Maninigo man na sia may bastanteng eksperyensia sa paghiras kan saiyang pagtubod sa iba asin aramon na ini mahalagang kabtang nin tunay na pagsamba; maninigo na sia tunay na nagmamawot na maglingkod sa Dios. Natural, dai sia lalaoman na magpaheling kan pagkamaygurang nin sarong nasa tama nang edad, pero an saiyang espirituwal na pag-oswag maninigong nagpapadagos.
14. Taano ta ibinilang nin sarong hoben na proteksion an saiyang bautismo?
14 Kun an saro ‘kinuwenta an gastos,’ an saro dai ibinubugtak sa disbentaha kan pagdusay bilang hoben. Sa haros gabos na bagong Kristiano, minararom an pagpapahalaga pakapabautismo. “An pagpabautismo bilang hoben nagin proteksion sa sako,” an paliwanag ni David. “Sa pagdakula ko, narisa ko kun paano an ibang tin-edyer na bakong bautisado sa kongregasyon nakamate na sinda libre sa autoridad kan kamagurangan asin bilang resulta naholog sa maraot na gibo. Pero permi kong nagigirumdoman na idinusay ko na an sakong buhay sa Dios. May kagsadiri na sa sakong buhay, kaya dai ko puwedeng arogon an mga tin-edyer na iyan.”
15. (a) Paano niato naaaraman na an mga hobenes puwedeng magkaigwa nin seryosong pagmansay sa tunay na pagsamba? (b) Paano makatatabang sa pinakamarahay na paagi an mga magurang?
15 ‘Pero, ano kun an aki kong lalaki o babae magpabautismo kun hoben pa dangan manlipot?’ an iniisip nin pirang magurang. Tunay na an sarong hoben dai maninigong pabautismo tangani sanang paoyonan an magurang o huli ta an ibang kaamigo nagpabautismo. Pero si Jose, Samuel, Hadeng Josias, asin Jesus kan tin-edyer pa gabos may seryosong pagmansay sa pagsamba sa Dios asin nangapot dian. (Genesis 37:2; 39:1-3; 1 Samuel 1:24-28; 2:18-21; 2 Cronica 34:3; Lucas 2:42-49) Sa modernong mga panahon, an sarong Kristiana na an ngaran Jean nabautismohan kan sia sampulo pa sana an edad. Kan hapoton pakalihis nin dakol na taon kun talagang nasabotan nia an ginibo nia, si Jean nagsimbag: “Aram ko na namomotan ko si Jehova, inaapresyar ko an ginibo ni Jesus para sa sato, asin boot kong maglingkod ki Jehova.” Sia maimbod na naglilingkod sa laog nin mga 40 taon na poon kan sia bautismohan. An kada hoben sarong indibiduwal; mayo nin makabubugtak nin pamantayan na limite sa edad. An mga magurang maninigong maghingoa na mataros an puso kan saindang aki, na tinatabangan sia na makapatalubo nin diosnon na debosyon.c Bako sana na maninigo nindang itokdo sa saindang aki an pribilehiyong magdusay asin pabautismo kundi pakosogon man sinda na magin marigon na mga parasamba.
Pakapanggana sa mga Kaolangan
16. Taano ta bako sanang kaaraman na nasa payo an hinahagad?
16 Minsan ngani kaipuhan an kaaraman sa Biblia, bako sanang kaaraman sa payo an kalabot sa “tanda.” Halimbawa, sa bisyon na itinao ki Ezequiel, posible na an kamagurangan na ginadan huli sa pagdolot nin insenso sa falsong mga dios dakol an kaaraman manongod sa nasusurat na Tataramon ni Jehova. Alagad an saindang ginigibo sa hilom nagparisa na sinda bakong tunay na mga parasamba. (Ezequiel 8:7-12; 9:6) Kaya, an pag-ako kan “tanda” para sa kaligtasan naghahagad kan pagsolog kan “bagong pagkatawo na linalang oyon sa kabotan nin Dios sa tunay na katanosan asin kaimbodan.”—Efeso 4:22-24.
17. (a) Anong kaolangan an minapogol sa iba na magpabautismo? (b) Paano ikakaaplikar an hatol kan Santiago 4:8?
17 An sarong dakulang kaolangan iyo an impluwensia kan saindong makasalan na laman. (Roma 8:7, 8) An iba ngani dai nagpapabautismo huli sa dai pakapogol sa seryosong kaluyahan sa laman o huli sa pagmawot na magpangana sa salang mga kasingawan sa kinaban. (Santiago 4:1, 4) An mga siring nawawaran nin sarong mahalagang relasyon. An Tataramon nin Dios naghahatol: “Rumani kamo sa Dios, asin sia marani sa saindo. Hanawe nindo an saindong mga kamot, kamong mga parakasala, asin linigi nindo an saindong mga puso, kamo na mga nagduduwaduwa.” (Santiago 4:8) Kaipuhan an desididong paghiro. Bilang halimbawa, an sarong lalaki na nagpoon na mag-adal sa Biblia nagpangana sa alkohol asin droga sa laog nin 16 na taon asin grabe an helang huli kaini. May determinasyon na nahale nia an maraot na mga bisyong ini. “Alagad ta kaidtong nag-ooswag na ako pasiring sa pagdusay, may sarong babae na nagpoon na makimaherak sako na makisambay sa saiya. Dakulaon idtong sugot,” an inadmitir nia. “Minsan ngani paghona kan babae narurungaw ako, sinabihan ko sia: ‘Nakikipag-adal ako kan Biblia sa mga Saksi ni Jehova, asin dai ko iyan magigibo.’” Ano an dahelan kan saiyang simbag? “Naheling ko an ginibo ni Jehova para sa sakong buhay paagi sa pagtabang sako na mahale an alkohol. Tinabangan man nia ako sa ibang paagi. Ini padagos na irinani ako sa saiya. Dai ko sia puwedeng pamondoon.” An tawong ini nagin harani na sa Dios.
18. Ano an sekreto sa pakapanggana sa mga kaolangan?
18 An mahalaga bakong kun gurano an aram mo kundi kun gurano an pagkamoot mo sa naaaraman mo. An Salmo 119:165 nagsasabi: “An nagsosopay na katoninongan nasa mga namomoot [bako sanang nakaaaram] sa saimong pagboot, asin sa sainda mayo nin masisingkogan.” An sekreto pagkamoot sa pagboot nin Dios, na inaapresyar na gayo an halaga kaiyan sa saindong buhay.—Isaias 48:17, 18.
19, 20. (a) Anong mga kaolangan an kaipuhan na mapangganahan, asin ano an kasarigan niato? (b) An pakapanggana sa gabos na kaolangan magbubunga nin ano?
19 Siyempre, tibaad may maglataw na ibang kaolangan o masisingkogan. “An pinakadepisil para sa sako,” sabi kan tugang na nasabihan sa enotan, “iyo an pagkatakot sa tawo. Igwa ako nin kinabanon na mga ‘amigo’ na dati kong kainoman. Depisilon para sa sako na sabihan sinda na pinuputol ko na an sakong pakikiiba ta idudusay ko na an sakong buhay sa Dios.” (Talinhaga 29:25) An iba man inatubang an pagtuya nin mga kaiba sa pamilya. An sarong bagong mabautismohan na Saksi, na napangganahan an pagtumang kan saiyang agom na lalaki, nagkomento: “Imbes na saro sanang dakulang kaolangan, igwa nin dakol na saradit na kaolangan na kinaipuhan kong mapangganahan nin saro-saro.” An maimbod na pakapanggana sa kada kaolangan pag-abot kaiyan maparigon sa saindong puso. Manarig kamo na mayo nin kaolangan na dai kayang mapangganahan kan mga namomoot sa pagboot nin Dios!—Lucas 16:10.
20 Sa pakapanggana nindo sa lambang masisingkogan, magkakamit kamo nin “nagsosopay na katoninongan.” (Salmo 119:165) Iyo, “ika maglalakaw sa katiwasayan sa saimong dalan . . . An saimong pagtorog magigin masiram. Dai ka kaipuhan na matakot sa ano man na makatatakot na bagay na biglang maabot, ni sa bagyo sa mga maraot, huli ta iyan maabot. Huli ta si Jehova mismo garo baga magigin saimong kapanarigan.”—Talinhaga 3:23-26.
[Mga Nota sa Ibaba]
a Mga 150 taon pakalihis kan bisyon ni Ezequiel, an Griegong historyador na si Herodotus, sa pakarisa na an mga tanda sa mga deboto sa dios na si Hercules nagtao sa sainda nin proteksion, nagsurat: “Kun an oripon nin siisay man magpaili [sa templo ni Hercules], asin magpabugtak nin banal na mga tanda, sa siring idinudusay an saiyang sadiri sa dios na iyan, bakong sono sa ley na gadanon sia.”
b Kasuarin pa sana an duwang hapot na itinatao sa mga kandidato sa bautismo ginibong simple tanganing an mga kandidato makasimbag na lubos an pakasabot sa kun ano an napapalabot sa paglaog sa dayupot na relasyon sa Dios asin sa saiyang daganon na organisasyon.
c Helingon an “Train Your Child to Develop Godly Devotion” sa luwas kan Watchtower na Agosto 15, 1985.
Mga Punto Para sa Repaso
◻ Paano kita tinatabangan nin Dios na magkamit nin pakipagkatoninongan sa saiya?
◻ Ano an simbolikong tanda na nagliligtas nin buhay?
◻ Ano an kahulogan nin pagdusay asin bautismo?
◻ Anong klaseng mga kaolangan an kaipuhan na atubangon, asin paano ini mapanggaganahan?
[Kahon sa pahina 11]
Pagbuntog o Pagwirik?
An kasaysayan kan bautismo ni Jesus nagsasabi kan saiyang “paghawas sa tubig.” (Marcos 1:10) Na si Jesus ibinuntog kaoyon sa kahulogan kan termino sa Griego na isinalin na bautismo (baʹpti·sma). Ini gikan sa terminong ba·ptiʹzo, na nangangahulogan “iirarom, ibuntog.” Kun beses iyan ginagamit sa paglaladawan sa pagkalunod nin barko. An parasurat kan ikaduwang siglo na si Lucian naggagamit nin konektadong termino sa pagladawan sa paglamos nin saro sa iba: “Ipinaiirarom sia nin hararomon [ba·ptiʹzon·ta] na dai na sia makabutwa.” An The New International Dictionary of New Testament Theology nagkonklusyon: “Sa ibong nin mga sinasabi kontra digdi, minalataw na an baptizō, pareho sa Judio asin Kristianong konteksto, sa normal nangangahulogan ‘ibuntog’, asin na dawa kan iyan magin teknikal na termino para sa bautismo, nagdadanay an ideya nin pagbuntog.”