Kamo Daw Nagdadanay na Malinig sa Gabos na Bagay?
“Sumiblag kamo, sumiblag kamo, humale kamo dian, dai kamo magdotdot nin maating bagay; humale kamo sa tahaw nia, papagdanayon na malinig an saindong sadiri, kamo na nagdadara kan mga kasangkapan ni Jehova.”—ISAIAS 52:11.
1. (a) Paano an sarong pagboot kan hade nagtogot na an mga kasangkapan ni Jehova ikapuli sa Jerusalem? (b) Paano naatian an iba sa mga lalagan na idto?
SA PANALE sinda talingkas na—pakalihis nin 70 taon na kaoripnan! An pagboot kan hade kaidtong mga 538 B.C.E. nagtogot sa Judiong nasyon na magpuli “asin itogdok giraray an harong ni Jehova na Dios nin Israel.” (Esdras 1:2, 3) Sumunod, saro na naman na makangangalas na pangyayari: “Ilinuwas mismo ni Hadeng Ciro [nin Persia] an mga kasangkapan kan harong ni Jehova, na dinara ni Nabucodonosor hale sa Jerusalem.” (Esdras 1:7, 8) Kabilang digdi an banal na mga lalagan na inatian ni Belsasar asin kan saiyang mga mahal na tawo kan banggi na bumagsak an Babilonya paagi sa pangahas na paggamit kaiyan sa pag-omaw sa falsong mga dios! (Daniel 5:3, 4) Ngonyan an dating mga desterrado puwede nang ipuli an mga kasangkapan na ini sa Jerusalem tanganing magamit sa pag-omaw ki Jehova!
2. (a) Anong hula ni Isaias an magigirumdoman kan mga mapuruli? Kiisay iyan aplikado? (b) Taano ta sinadol sinda na dai dumotdot nin ano man na maati?
2 Mantang sinda maogmang nag-aandam sa paghale, daing duwa-duwa na nagirumdoman kan mapuling mga Judio an mga tataramon ni propeta Isaias: “Sumiblag kamo, sumiblag kamo, humale kamo dian, dai kamo magdotdot nin maating bagay; humale kamo sa tahaw nia, papagdanayon na malinig an saindong sadiri, kamo na nagdadara kan mga kasangkapan ni Jehova.” (Isaias 52:11) Siyempre, an mga Levita iyo an aktuwal na nagdara kan mga kasangkapan. (Bilang 1:50, 51; 4:15) Minsan siring, ihinula ni Isaias na an gabos na mapuli magigin onoraryong mga paradara kan kasangkapan. Kaya an gabos obligadong magin malinig. Dai ninda kukuanan nin mga mahahalagang bagay an mga Babilonyo arog kan ginibo kan mga Israelitas kan maghale sa Egipto. (Ikomparar an Exodo 12:34-38.) Kaipuhan na sinda mayo nin ano man na materyalistiko o paslong motibo sa pagpuli. Kun manongod sa “marigsok na mga ladawan” nin Babilonya, an pagdotdot sana dian makaaati.a (Jeremias 50:1, 2) Sa pagigin sanang malinig sa gabos na paagi na an mga Judio makalalakaw sa “Dalan nin Kabanalan” papuli sa Jerusalem.—Isaias 35:8, 9.
3. Siisay ngonyan an may dara kan “mga kasangkapan” ni Jehova? Taano ta dakulang angat sa sainda an magdanay na malinig?
3 An mga Saksi ni Jehova ngonyan kaipuhan man na magin malinig bilang mga paradara kan “mga kasangkapan” ni Jehova. Kinotar ni apostol Pablo an mga tataramon ni Isaias asin iinaplikar iyan sa mga Kristiano kan saiyang kaaldawan, na an sabi: “Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” (2 Corinto 6:17–7:1) Apuwera sa pag-istar sa sarong marigsok na kinaban, kaipuhan na paglabanan niato an satong minanang makasalan na mga hilig. (Genesis 8:21) Ipinagigirumdom sato kan Jeremias 17:9: “Madaya an puso nin labi sa ano pa man na bagay asin maraot. Siisay an makakamidbid kaiyan?” An iba dinadaya an sadiri asin an iba na maniwala na an saindang buhay malinig asin inooyonan nin Dios, mantang an totoo bako. Sinda naggigibo nin sarong klase nin pagsaginsagin. Kaya kaipuhan na ihapot kan lambang saro sa sato, ‘Ginigibo ko daw an gabos na paghihingoa na magin malinig sa atubangan ni Jehova sa gabos na bagay?’ Tanganing matabangan kitang magibo iyan, isentro niato an satong atension sa apat na kabtang nin kalinigan.
Pisikal na Kalinigan: Sarong Pangenot na Bagay
4. (a) Taano an pisikal na kalinigan ta sarong pangenot na bagay sa banwaan ni Jehova? (b) Taano ta may beses na masakit na papagdanayon an halangkaw na pamantayan sa kalinigan?
4 An pisikal na kalinigan pangenot na bagay sa banwaan ni Jehova ngonyan kun paano kaidtong suanoy na mga panahon. (Exodo 30:17-21; 40:30-32) Total, iginagalang daw niato an “mga kasangkapan ni Jehova” kun an satong buhok, kamot, lalauogon, ngipon, o kuko maati, o kun may nagsusungaw sato na bakong mahamot na mga parong nin hawak? Pero madali na paimpluwensia sa hababang pamantayan kan kinaban.—Roma 12:2.
5. (a) Taano ta napakahalaga na papagdanayon niatong halangkaw an satong pamantayan sa kalinigan? Tumao nin lokal na mga halimbawa kun paano ikaaaplikar an hatol na ini. (b) Paano makatatabang an kamagurangan?
5 Paano kita maririsa na napapalaen sa kinaban kun aarogon niato an hababang mga pamantayan kan kinaban? Bako daw na an maating harong o maating lugar nin pagsamba magigin dahelan na ‘an tataramon nin Dios mapaglanghadan’? (Tito 2:5) Pero kun kita naggigibo nin marahay na personal na kalinigan, pinupurot an basura sa mga lugar nin kombension, nagtatabang sa mantension kan Kingdom Hall, asin pinapagdadanay an satong harong—dawa an pinakapobreng istaran—na areglado asin malinig, kita nagtatao nin kaomawan sa Dios! (Ikomparar an 1 Pedro 2:12.) Kamagurangan, magtao nin marahay na personal na halimbawa sa kalinigan. Dai ‘magpogol’ sa pagtao nin angay na hatol kun kaipuhan.—Gibo 20:20.
6. Ano an maninigong magin pamantayan niato sa gubing para sa mga pagtiripon asin paglilingkod sa langtad?
6 Kumusta man an gubing niato kun nagsasamba sa mga pagtiripon asin kun nasa paglilingkod sa langtad? Bako daw na iyan maninigong ‘mabini asin husay’? (1 Timoteo 2:9; Hebreo 10:23-25) Dai mangatanosan na kita obligado sanang magbulos nin puwerte kun kita may kabtang sa pagtiripon. An sobra kakaswal na gubing bakong mabini asin bakong angay para sa pagsamba. An daan nang mga bag asin Bibliang lukot na an mga kanto kan pahina o may ati na nakapararayo man kan atension sa mensahe kan Kahadean.
Paglikay sa Ati sa Isip
7. Ano an liyabe sa kalinigan sa isip, sono sa Filipos 4:8?
7 Sa Filipos 4:8 si Pablo naghatol: “Sa katapustapusi, mga tugang, ano man na totoo, ano man na seryosong bagay, ano man na matanos, ano man na malinig, ano man na makawiwili, ano man na marahay an dangog, ano man na marahay asin ano man na inoomaw, padagos na horophoropon an mga bagay na ini.” Minsan siring, sa gabos na lugar kita sinasalakay kan sugot na humeling sa “hararom na mga bagay ni Satanas.”—Kapahayagan 2:24.
8. Paano ikaiilustrar an mga peligro sa laen-laen na klase nin aling-alingan? Tumao nin lokal na halimbawa.
8 Halimbawa, an pagigin madaling makua nin pornograpiko asin sobra kadahas na materyal nagbunga nin seryosong mga problema sa nagkapirang naggagamit nin mga videocassette recorder. Sa Europa, an sarong may agom nang tugang na lalaki nagheheling nin marigsok na mga tape kun torog na an saiyang agom. An banhi nin pagkakasala marigon na natanom, na nagbunga nin pagsambay. (Ikomparar an Santiago 1:14, 15.) Sa sarong nasyon sa Aprika, an sarong grupo nin mga hobenes na Saksi nagsubli nin marigsok na mga tape sa mga kaamigo ninda sa eskuwelahan asin pinagheling iyan kan mayo an saindang mga magurang. Alagad, an saro sa kamagurangan sa Nigeria nagkomento: ‘Parate na mas dakula an peligro sa regular na mga programa sa TV na nagpapaheling man nin kadahasan, krimen, guerra, mga eksena nin pagdodorog, asin pagmenus sa integridad sa pag-agom.’ An baratong mga diaryo, pornograpikong mga magasin, nakapupukaw sa seksong mga nobela, pelikula, asin nakararaot na musika lakop man na mga peligro.
9. (a) Taano ta kaipuhan kitang magin mapamili sa satong dinadangog, hiniheling, asin binabasa? (b) Ano an maninigong magin reaksion niato kun napapaatubang sa maraot na materyal?
9 Dai niato puwedeng atian an satong isip nin mga bagay na “makasosopog minsan sabihon sana.” (Efeso 5:12) Kaya magin mapamili sa saindong dinadangog, hiniheling, asin binabasa. Magbantay asin magin alistong isikwal an maraot na mga materyal. (Salmo 119:37) Ini magkakaipo nin tunay na pagpopogol sa sadiri, tibaad sa piguratibo ‘linalanog an saindong hawak asin inooripon iyan.’ (1 Corinto 9:27) Alagad perming girumdomon na an pinagheheling niato sa hilom naheheling kan “Saro na dai naheheling.” (Hebreo 11:27) Kaya isikwal an bagay na kustionable. “Padagos na seguradohon kun ano an inooyonan kan Kagurangnan.”—Efeso 5:10.
“Pag-iingat” na Magdanay na Malinig sa Moral
10. (a) Ano an sarong dahelan na kadakol kan sinasagwe o itinitiwalag kada taon? (b) Anong mga prinsipyo sa Biblia an maninigong gumiya sa satong gawe sa pagbabakasyon asin sa trabaho?
10 Sa Efeso 5:5 si Pablo nagpatanid: “Huli ta aram nindo, mantang minimidbid iyan nindo mismo, na mayo nin parasambay o marigsok na tawo o paslong tawo—na nangangahulogan nin pagigin parasamba sa ladawan—na may mamanahon sa kahadean kan Cristo asin nin Dios.” Pero, rinibo taon-taon an sinasagwe o itinitiwalag huli sa seksuwal na inmoralidad—‘pagkakasala tumang sa hawak.’ (1 Corinto 6:18) Parate na iyan bunga sana nin dai “pag-iingat sono sa tataramon [nin Dios].” (Salmo 119:9) Halimbawa, an dakol na tugang linilingawan an saindang moral na pag-iingat kun bakasyon. Napapabayaan an teokratikong pakikiiba, nakikiamigo sinda sa kinabanon na mga bakasyonista. Sa pangangatanosan na an mga ini ‘marahay man na mga tawo,’ an ibang Kristiano uminiba sa sainda sa kustionableng mga aktibidad. Siring man, an iba nagin sobra an pakikiamigo sa saindang mga katrabaho. An sarong Kristianong magurang naholog na gayo an boot sa sarong babaeng empleyada na binayaan nia an saiyang pamilya asin nakisaro sa babae! Pagkatiwalag an ibinunga. Totoo nanggad an mga tataramon kan Biblia, “An maraot na pag-iriba nakararaot sa marahay na mga ugale”!—1 Corinto 15:33.
11. Taano ta maninigong asikasohon nin tama an Kristianong mga pagtiripontipon?
11 Gikan sa South Africa an baretang ini: “An saro pang pag-alaman na nagbubugtak sa peligro kan pagigin matanos sa moral nin dakol iyo an darakulang parti . . . na an iba ginibo pakatapos kan mga sesyon kan pandistritong kombension.” Minsan siring, an mas saradit na Kristianong katiriponan na naaasikaso nin marhay bihirang magin “mariribok na katiriponan sa pag-ogma.” (Galacia 5:21) Kun may iseserbing mga inomon na de alkohol, gibohon iyan sa irarom nin superbisyon asin tama sana. “An arak paraolog-olog,” asin sa irarom kan impluwensia kaiyan, may mga tugang na liningawan an saindang moral na pag-iingat o napukaw an natotorog na mga kaluyahan. (Talinhaga 20:1) Kaya, may duwang hoben na ministro na naggibo nin homoseksuwalidad pakatapos na magpalabilabi sa alkohol.
12, 13. (a) Paano ipinangatanosan nin iba an inmoral na gibo? Taano ta falso an siring na pangangatanosan? (b) Paano kita makapag-iingat tumang sa mga peligro sa marahay na moral?
12 Kun nasusugotan na magkasala, girumdomon na, minsan pa gurano kita kalinig sa luwas, an mahalaga kun ano kita sa laog. (Talinhaga 21:2) An iba malinaw na naghohona na patatawadon nin Dios an paorootrong paggibo nin inmoral na gawe huli ta sinda maluya. Alagad bako daw na ini “ginagamit na sarahotan an dai na kutana maninigong pagkaherak kan satong Dios sa malaswang gawe”? (Judas 4) An iba ngani naghohona na “dai kami naheheling ni Jehova.” (Ezequiel 8:12) Alagad girumdoma na “mayo nin linalang na bakong hayag sa saiyang pagheling, kundi an gabos na bagay huba asin bukas sa mga mata kaidtong satong paninimbagan.”—Hebreo 4:13.
13 Kaya mag-ingat sa mga peligro sa marahay na moral. “An pakikisaro asin gabos na klase nin karigsokan o kapasloan dai ngani masambitan dian sa saindo, siring sa maninigo sa mga banal; ni an makasosopog na gawe ni an rungaw na orolay ni an bastos na sorobahan, mga bagay na bakong maninigo.” (Efeso 5:3, 4) “Ikabalde an maraot,” minsan pa gurano iyan kasiram sa laman.—Roma 12:9.
Pagdadanay na Malinig sa Espirituwal
14, 15. (a) Paano ibinugtak nin iba an saindang sadiri sa peligro na maatian sa espirituwal? (b) Paano ginagamit nin mga apostata an saindang ‘ngoso tanganing ipahamak an saindang kapwa’? (c) Sa anong mga paagi na an mga apostata sa katotoohan marigsok, asin ano an nalingawan ninda?
14 An iba isinapeligro an saindang sadiri na maatian sa espirituwal paagi sa pagbukas sa relihiyosong mga brodkast sa radyo asin telebisyon. Sa sarong nasyon sa Aprika, an iba nagheling nin mga drama sa TV na nagpapaheling kan mga superstisyon nin tradisyonal na mga relihiyon na animista sa paborableng paagi. Alagad si apostol Pablo nagpatanid manongod sa mas nakagagadan na peligro—an mga apostata na ‘nanlalaglag sa pagtubod nin nagkapira.’ (2 Timoteo 2:16-18) Igwa pa nin siring na mga tawo! (2 Pedro 2:1-3) Asin kun beses naaatian ninda an kaisipan nin iba. Arog kan sabi kan Talinhaga 11:9: “Paagi sa saiyang ngoso an tawong apostata ipinahahamak an saiyang kapwa.”
15 An mga apostata parateng pinupukaw an pagpahalaga sa sadiri, na sinasabi na hinalean kita kan satong libertad, kaiba na an libertad na interpretaron an Biblia para sa satong sadiri. (Ikomparar an Genesis 3:1-5.) An totoo, an mga paraating ini mayo nin ibang iinoopresir kundi pagbuwelta sa nakasusukang mga katokdoan kan “Dakulang Babilonya.” (Kapahayagan 17:5; 2 Pedro 2:19-22) An iba pinupukaw an laman, na sinasadol an mga dating kairiba na “magrelaks” ta an hababang trabaho nin paghuhulit sa harong-harong “dai kaipuhan” o “bakong sono sa Kasuratan.” (Ikomparar an Mateo 16:22, 23.) Totoo, an matibay na mga parataram na iyan tibaad garo baga sa luwas malinig sa pisikal asin moral na paagi. Pero sa laog sinda marigsok sa espirituwal, na napadara sa mapalangkaw, independienteng kaisipan. Nalingawan na ninda an gabos na nanodan ninda manongod ki Jehova, sa saiyang banal na ngaran asin mga atributo. Dai na ninda minimidbid na an gabos na nanodan ninda manongod sa katotoohan kan Biblia—an mamuraway na paglaom sa Kahadean asin sa paraisong daga asin an pagtumba sa falsong mga doktrina, arog kan Trinidad, inmortal na kalag nin tawo, daing sagkod na padusa, asin purgatoryo—iyo, ini gabos napasainda paagi sa “maimbod asin madonong na oripon.”—Mateo 24:45-47.
16. Paano an mga matanos naliligtas “paagi sa kaaraman”?
16 Interesante nanggad, an sarong paraataman sa sirkito sa Pransia nagkomento: “An ibang tugang nadadaya huli ta kulang sinda nin tamang kaaraman.” Iyan an dahelan na an Talinhaga 11:9 nagsasabi: “Paagi sa kaaraman na an matanos naliligtas.” Dai ini nangangahulogan nin pagdangog sa mga apostata o pagbasa sa saindang mga isinurat. Imbes, iyan nangangahulogan nin pagkaigwa nin “tamang kaaraman manongod sa banal na hilom nin Dios” paagi sa maigot na personal na pag-adal sa Biblia asin sa mga publikasyon kan Sosyedad na basado sa Biblia. Kun igwa na kan tamang kaaraman na ini, siisay an mag-uusyoso na magtao nin atension sa apostatang mga tataramon? Mayo logod nin siisay man na “makadaya sa saindo paagi sa nakabibihag na mga pangangatanosan”! (Colosas 2:2-4) An falsong relihiyosong propaganda saen man hale maninigong likayan na garo ilo! An totoo, mantang ginamit kan satong Kagurangnan an “maimbod asin madonong na oripon” na magtao sato kan “mga tataramon nin buhay na daing sagkod,” taano man ta magmamawot pa kitang humanap sa iba?—Juan 6:68.
Magdadanay daw Kamong Malinig?
17, 18. Taano ta kaipuhan na kultibaron an (a) pisikal na kalinigan, (b) kalinigan sa isip, (c) moral na kalinigan, asin (d) espirituwal na kalinigan?
17 Kaya dakol an napapalabot sa pagdadanay na malinig sa atubangan ni Jehova Dios. An pagpapadanay sa satong hawak, sa satong harong, sa satong gubing, asin sa satong Kingdom Hall na malinig sa pisikal nakasasamno sa satong mensahe sa Kahadean. An pagpapadanay na malinig sa isip nakatatabang sato na magdanay na malinig sa moral asin espirituwal. Ini nagkakaipo kan pagkuyog niato sa sadol ni Pablo sa Filipos 4:8, na itorohok an satong isip sa mga bagay na totoo, malinig, asin maoomaw.
18 Nasasabotan man niato nin orog kisa kasuarin pa man na kaipuhan kitang magdanay na malinig sa moral sa tataramon asin gibo. Malinaw na pinatatanidan kita ni Jehova na an mga naggigibo nin ano man na porma nin inmoralidad dai magmamana kan Kahadean nin Dios. (1 Corinto 6:9-11) Minsan pa gurano kasiram kan marigsok na mga bagay na iyan, kun kita magtatanom sa laman, kita mag-aani nin pagkatunaw sa laman. (Galacia 6:8) Ultimo, yaon an manongod sa pagdadanay na malinig sa espirituwal, malinig sa doktrina. An siring na kalinigan nakatatabang sato na mapagdanay an kalinigan kan satong puso asin isip. Sa siring kita napahihiro na perming hanapon an kaisipan nin Dios sa mga bagay-bagay—bakong an satong sadiri.
19. Ano an makatatabang pareho sa mga linahidan asin sa “dakulang kadaklan” sa pagdadanay na malinig sa gabos na bagay?
19 Dai na mahahaloy an mayor na promotor nin karigsokan—si Satanas na Diablo—iaapon, kaiba an saiyang mga demonyo, sa hararom na bungaw. Sagkod sa panahon na iyan, an gabos logod na lingkod ni Jehova—na kabilang sa linahidan asin sa “dakulang kadaklan”—magdanay na malinig bilang mga paradara kan mga lalagan ni Jehova. (Kapahayagan 7:9, 13-15; 19:7, 8; 20:1-3) An pakikilaban daing pondo asin masakit. Alagad girumdoma na si Jehova abundang nagtatao kan saiyang “espiritu nin kabanalan.” (Roma 1:4) An saiyang malinig na organisasyon, kaiba an kamagurangan kaiyan, andam man na tabangan kita paagi sa pagtao nin tama, Makakasuratan na hatol. Paagi sa tabang na iyan asin sa sato mismong determinasyon, makapagdadanay kitang malinig sa gabos na bagay!
[Nota sa Ibaba]
a An termino sa Hebreo para sa marigsok na mga ladawan, na gil·lu·limʹ, sarong termino nin pagmenus na an orihinal na kahulogan “mga bilog-bilog na odo”—bagay na makababalde para sa mga Judio.—Deuteronomio 23:12-14; 1 Hade 14:10; Ezequiel 4:12-17.
Mga Hapot Para sa Pagrepaso
◻ Taano an mga Judio na nagpuli hale sa Babilonya ta kaipuhan na magin malinig?
◻ Paano niato matatawan nin atension an pisikal na kalinigan?
◻ Paano niato maiingatan an satong isip na dai maatian?
◻ Paano kita makapag-iingat tumang sa moral na mga peligro?
◻ Paano niato mapagdadanay an satong espirituwal na kalinigan?
[Ritrato sa pahina 14]
An satong mga harong maninigo na magin mga modelo sa kalinigan
[Ritrato sa pahina 15]
An mga Kristiano kaipuhan na gumamit nin marahay na paghusgar sa paglikay sa mga “video tape” asin programa sa TV na puwedeng makaati sa isip
[Ritrato sa pahina 16]
An saradit na katiriponan puwedeng makapakosog sa moral
[Ritrato sa pahina 17]
An maigot na mga Saksi nagdadanay na malinig sa espirituwal asin nakakanompong nin proteksion saka kagayagayahan sa maigot na pag-adal sa Biblia