Daing Agom Alagad Kompleto Para sa Paglilingkod sa Dios
“An nagtatao man kan saiyang pagkasoltero sa pag-agom marahay an ginigibo, alagad an dai nagtatao kaiyan sa pag-agom orog karahay.”—1 CORINTO 7:38.
1. Paano nagin bendisyon an pag-agom?
NOARIN man dai linaoman ni Jehova an enot na lalaki na magdanay na daing agom. Imbes, an Dios naglalang nin agom para ki Adan, an ginikanan kan rasa nin tawo. (Genesis 2:20-24; Gibo 17:26) Asin nagin nanggad dakulang bendisyon an pag-agom! Iyan nagtao nin kaibaiba, pinagin posible an pagtinabangan, sarong kagalang-galang na areglo para sa pag-aki, asin nakakontribuwir nin dakula sa kaogmahan nin tawo. Tara, minsan an dukha asin inaapi puwedeng magkamit kan bagay na dai mababakal nin kuwarta—an pagkamoot nin agom!—Awit ni Salomon 8:6, 7.
2, 3. (a) Ano an punto-de-vista nin sarong relihiyosong publikasyon manongod sa selibasiya asin pag-agom? (b) Sono sa Kasuratan, ano an maninigong magin punto-de-vista sa pag-agom?
2 Alagad, an iba laen man an punto-de-vista sa pag-agom. An sabi nin sarong relihiyosong babasahon: “An selibasiya iyo an eklesiastikong ley sa Iglesya sa Solnopan na ipinaootob sa mga klerigo na nangangalad na maordenan an mga may agom asin mag-agom an mga nasa banal na orden. Kaiba dian an obligasyon na otobon an sangkap na kalinigan sa irarom nin sumpa. An mga dahelan digdi iyo: tanganing an mga inoordenan makapaglingkod sa Dios na orog na saro sana an katuyohan (1 Cor. 7:32), asin tanganing huli sa pamumuhay na nagpopogol na padara sa horot maotob ninda an pagigin daing agom, na mas banal asin mas halangkaw sa pag-agom. Sa BT [Bagong Tipan] an pagigin daing agom o soltero ibinubugtak sa mas halangkaw na grado kisa may agom.”—The Catholic Encyclopedia, na binilog ni Robert C. Broderick.
3 Talaga daw na posible na an obligadong dai pag-agom ‘mas banal asin mas halangkaw sa pag-agom’? Bako sono sa “Bagong Tipan,” na nagsasabi sa Katolikong Jerusalem Bible: “An Espiritu malinaw na nagsabi na sa huring mga panahon igwa nin nagkapira na matalikod sa pagtubod asin pipilion na maghinanyog sa madayang mga espiritu asin sa mga katokdoan na gikan sa mga diablo; asin an dahelan kaini iyo an mga kaputikan na itinataram nin mga parasaginsagin na an konsensia natimbrehan na garo nin namumula sa init na batbat: sinda masarabi na an pag-agom ipinangangalad, asin magbubugtak nin mga pagboot manongod sa paglikay sa mga kakanon na linalang nin Dios tanganing akoon na may pasasalamat kan gabos na nagtutubod asin nakaaaram kan katotoohan.” (1 Timoteo 4:1-3) An totoo, an pag-agom balaog gikan sa Dios, asin iyan marahay.—Rut 1:9.
4. Huli sa 1 Corinto 7:38, anong mga hapot an minalataw?
4 Minsan ngani an pag-agom balaog gikan sa Dios, si apostol Pablo nagsurat: “An nagtatao man kan saiyang pagkasoltero sa pag-agom marahay an ginigibo, alagad an dai nagtatao kaiyan sa pag-agom orog karahay.” (1 Corinto 7:38) Taano ta ipinarisa ni Pablo na orog karahay an dai pag-agom? Maninigo daw na makamate an daing agom na sia bakong kompleto?
An Pinakasentro nin Kristianong Buhay
5. Ano an maninigong magin pinakasentro nin Kristianong buhay?
5 An paglilingkod ki Jehova maninigo na magin an pinakasentro kan satong Kristianong buhay, baga man kita daing agom o may agom. An banal na paglilingkod na maogmang itinatao sa Dios nagtatao nin ebidensia kan satong pagkadayupot sa saiya bilang an Unibersal na Soberano. An bilog na pusong pagkuyog asin maigot na pakikikabtang sa Kristianong ministeryo mga paagi na ikapaheling an pagkadayupot na iyan. (1 Juan 5:2, 3; 1 Corinto 9:16) An ministeryo asin iba pang makinuyog na mga gibo kaoyon sa banal na kabotan pareho magigibo kun an saro daing agom.
6. Baga man kita may agom o daing agom, an maigot na ministeryo nagpapangyari sato na gibohon an ano?
6 An mga paraebanghelyo ginigibo ngonyan an paghuhulit kan Kahadean para sa kaomawan ni Jehova. Asin baga man kita may agom o daing agom, an maigot na ministeryo nagtatao sato nin oportunidad na idusay kisuerra an iba sa satong personal na kayamanan asin kakayahan sa paglilingkod sa Dios. Alagad kaipuhan na kultibaron niato asin pamogolan an satong mga kamugtakan tanganing an ministeryo dai noarin man ikabugtak sa lugar na bakong iyo an pinakasentro kan satong buhay. Kaipuhan na satong ‘hanapon nguna an Kahadean.’ (Mateo 6:33) Igwa nin kagayagayahan sa pagkonsentrar sa banal na mga intereses imbes na sa personal sanang intereses.
Kompleto Para sa Ministeryo
7. Ano an halimbawa na nagpapaheling na an Kristianong daing agom puwedeng magin kompleto para sa ministeryo?
7 An mga Kristiano puwedeng magin kompleto para sa ministeryo baga man sinda daing agom o may agom. Kaya an pagigin daing agom sarong pundasyon na dai man nagkakaipong liwaton. (Ikomparar an 1 Corinto 7:24, 27.) An Tataramon nin Dios mayo kan punto-de-vista nin nagkapirang tribo na an lalaki dai nakaaabot sa lubos niang pagkatawo sagkod na sia dai mag-agom. Si Jesu-Cristo nagadan na daing agom, asin an solamenteng agom na itinogot ni Jehova ki Jesus iyo an sarong espirituwal na agom sa langit. (Kapahayagan 21:2, 9) Pero, an Aki nin Dios, minsan ngani daing agom bilang tawo, iyo an pangenot na halimbawa nin tawo na kompleto para sa ministeryo.
8. Arog kan ipinaliliwanag ni Pablo, an pagigin daing agom nagtatao nin lugar sa ano?
8 An totoo, an pagigin daing agom nagtatao nin orog na personal na libertad asin panahon para sa ministeryo. Sa pagrekomendar kan pagigin daing agom, si Pablo nagsabi: “Boot ko na kamo dai mapurisaw. An daing agom na lalaki napupurisaw sa mga bagay kan Kagurangnan, kun paano nia mapaooyonan an Kagurangnan. . . . Siring man, an babaeng daing agom, asin an daraga, napupurisaw sa mga bagay kan Kagurangnan.” (1 Corinto 7:32-34) Ini aplikado sa mga Kristianong daing agom asin sa mga dating may agom pero naliwat an kamugtakan, na ibinabalik sinda sa kamugtakan na daing agom.—Mateo 19:9; Roma 7:2, 3.
9. Paano ipinaheheling kan halimbawa ni Jesus na an pagigin daing agom dai ginigibo an saro na bakong kompleto para sa Kristianong ministeryo?
9 An pakaabot sa pisikal, mental, asin espirituwal na pagkamaygurang nagdadara nin pagkakompleto para sa paglilingkod sa Dios. Si Jesu-Cristo dai nagkaipo nin agom tanganing magin kompleto para sa katongdan na Pangenot na Ministro nin Dios asin an saro na paagi sa saiya itatao an pantubos. (Mateo 20:28) Huling daing agom, si Jesus libreng idusay an bilog niang kosog sa saiyang ministeryo. An saiyang pagigin daing agom laen nanggad sa kaugalean na Judio, na dian an pag-agom asin mga aki idinodoon. Minsan siring, si Jesus biyong may kakayahan na tapuson an saiyang gibo na itinao nin Dios. (Lucas 3:23; Juan 17:3, 4) Kun siring, an pagigin daing agom dai minagibo sa saro na bakong kompleto para sa Kristianong ministeryo.
An mga May Agom “Nababanga”
10. Huli sa bogkos na pagigin “sarong laman,” ano an isinabi ni Pablo manongod sa mga may agom kun ikokomparar sa mga daing agom?
10 Bakong arog nin mga daing agom, an mga Kristianong may agom maninigo na gibohon an ministeryo na may pagmidbid sa saindang bogkos na pagigin “sarong laman.” (Mateo 19:5, 6) Huli sa bogkos na iyan asin sa laen-laen na paninimbagan kaiyan, sinabi ni Pablo na an mga may agom “nababanga.” Sia nagsurat: “Boot ko na kamo dai mapurisaw. An daing agom na lalaki napupurisaw sa mga bagay kan Kagurangnan, kun paano nia mapaooyonan an Kagurangnan. Alagad an may agom na lalaki napupurisaw sa mga bagay kan kinaban, kun paano nia mapaooyonan an saiyang agom na babae, asin sia nababanga. Siring man, an babaeng daing agom, asin an daraga, napupurisaw sa mga bagay kan Kagurangnan, tangani na sia magin banal kapwa sa saiyang hawak asin sa saiyang espiritu. Minsan siring, an babaeng may agom napupurisaw sa mga bagay kan kinaban, kun paano nia mapaooyonan an saiyang agom. Alagad ini isinasabi ko sa saindong sadiring pakinabang, bakong tanganing siodon ko kamo, kundi tanganing pahiroon kamo sa bagay na maninigo asin nangangahulogan nin danay na paglilingkod sa Kagurangnan na mayo nin kaolangan.”—1 Corinto 7:32-35.
11. Ano an ipinaliliwanag ni Pablo sa 1 Corinto 7:32-35?
11 Malinaw na, para sa buhay na mas daing kaolangan, irenerekomendar ni Pablo an pagigin daing agom. Sia mismo tibaad balo na dai na nag-agom liwat. (1 Corinto 9:5) Ano man an kamugtakan, aram nia na may mga kapurisawan na konektado sa pagigin may agom sa kinaban na ini. Ipinaliliwanag nia an libertad na puwedeng kamtan nin mga Kristianong daing agom asin kun paano an intereses nin mga may pagtubod na may agom talagang nababanga sa makalaman asin espirituwal na mga bagay. An tawong may agom mayo nin lubos na kapangyarihan sa saiyang hawak, huli ta kasaro niang laman an saiyang agom asin kun siring may diretso sa saiyang hawak. (1 Corinto 7:3-5) Huli kaini, tama an pagkasabi ni Pablo na an Kristianong daing agom nahihimong magin banal, an boot sabihon, lubos na ikinakalaen asin ikinakatagama para sa direktang paggamit ni Jehova Dios, kapwa sa hawak asin sa espiritu.
12. Huling mayo nin agom, ano an magigibo nin sarong daing agom?
12 An espiritu, o tendensia kan isip, kan Kristianong daing agom nagpapahiro sa saiya sa aktibo, daing kaolangan na paglilingkod sa Kahadean nin Dios. Mantang mayo nin agom na naghahagad nin parsial na pamomogol sa saiyang hawak, masusunod nia an espiritu, o tendensia, kan saiyang isip asin puso. Puwede niang isentro an saiyang paghihingoa sa paglilingkod ki Jehova na konsentrado an hawak asin isip. Kaya an lalaki o babae na daing agom makahihingoa sa pinakamarahay na paagi na paoyonan sana an Kagurangnan na igwa kan pinakadakulang personal na libertad. Dai niato masasabi na dai aplikado sa sato an isinabi ni Pablo, ta pinagmarahay ni Jehova na ipasurat iyan para sa pagtotokdo sa sato.
Bakong Kompleto an May Agom?
13, 14. Anong salang gibo an nagpapabaya sa bogkos na pagigin “sarong laman” asin ginigibo an may agom na bakong kompleto para sa Kristianong ministeryo?
13 Huli sa salang ideya na madugangan pa an ginigibo ninda sa paglilingkod sa Dios, tibaad an ibang Kristianong may agom ibugtak na sana an saindang pag-agom sa daing halagang lugar sa buhay. Halimbawa, an babae tibaad pumoon na gumawe nin independiente sa saiyang agom sa importanteng mga paagi. An lalaki tibaad magin preokupado sa mga gibohon kan kongregasyon. Sa irarom nin siring na mga kamugtakan, tibaad isipon ninda na marahay an ginigibo ninda sa paglilingkod ki Jehova. Alagad, an totoo, tibaad minagawe sinda sa paagi na nagpapabaya sa bogkos na pagigin “sarong laman.” Kun iyo, dai iyan ikaoogma ni Jehova.
14 An totoo, an pagpabaya sa bogkos na pagigin “sarong laman” gigibohon an may agom na bakong kompleto para sa Kristianong ministeryo. An pag-agom dai nakadudugang sa pagkakompleto sa ministeryo kundi iniinaan an personal na atension na ikatatao sa ministeryo. (Ikomparar an Lucas 14:16, 17, 20.) Alagad, tanganing an mga may agom makapaoyon sa Dios asin magin kompleto bilang saiyang mga ministro, kaipuhan na otobon ninda an saindang mga obligasyon sa agom.
Daing Agom Para sa Kahadean
15. (a) Anong kuwalidad an maninigong kultibaron nin mga Kristianong daing agom? (b) Anong pundamental na punto manongod sa pag-agom asin pagigin daing agom an idinoon ni Pablo sa 1 Corinto 7:36, 37?
15 Mantang an mga may agom na lingkod ni Jehova maninigo na otobon an saindang mga obligasyon sa agom, an mga Kristianong daing agom maninigo na pataluboon an pagkakontento sa saindang pagigin kompleto na daing agom. Arog kan sabi ni Pablo: “Ngonyan ako nagsasabi sa mga dai pang agom asin sa mga balo, marahay sa sainda na magdanay na siring sa sako [daing agom]. Nagagapos ka sa agom? Dai ka maghingoa na makahubad. Talingkas ka sa agom? Dai ka maghanap nin agom.” (1 Corinto 7:8, 27) Sa tabang ni Jehova, bilang daing agom, pataluboon an pagkakontento na pinagigin posible nin Dios. An ano man na pagliliwat sa kamugtakan sa buhay dai maninigo na dati nang linalaoman na mangyari, huli sana sa kostumbre o reaksion sa impluwensia nin mga kaedad. Imbes, iyan maninigong gikan sa Makakasuratan na pangangaipo, huli ta si Pablo nagsabi: “Kun an siisay man naghohona na sia naggigibo kan bakong maninigo sa saiyang pagkasoltero, kun iyan lihis na sa pagbukad nin pagkabarobata, asin ini man nanggad an maninigong mangyari, gibohon nia an saiyang boot; dai sia nagkakasala. Mag-agom sinda. Alagad kun an siisay man trangkilo sa saiyang puso, na dai nangangaipo, kundi may kapangyarihan sa saiyang sadiring boot asin nagdesisyon na sa saiyang puso, na papagdanayon an saiyang pagkasoltero, marahay an saiyang ginigibo.”—1 Corinto 7:36, 37.
16. (a) Ano an boot sabihon kan pagigin “lihis na sa pagbukad nin pagkabarobata”? (b) An Kristianong nagdadanay na daing agom maninigong kombensido sa ano?
16 Kaya ipinaliwanag ni Pablo na bakong sala an mag-agom kun an saro minagawe nin bakong maninigo sa saiyang pagkasoltero, minsan ngani daing duwa-duwa na bakong magabat na kasalan an boot sabihon kan apostol. Arog kan sabi nia sa enotan, “Marahay pang mag-agom sinda kisa maglaad sa horot.” (1 Corinto 7:9) Siyempre, an boot niang sabihon pag-agom sa irarom kan siring na mga kamugtakan kun an saro “lihis na sa pagbukad nin pagkabarobata,” lihis na sa panahon na enot na kuminosog an seksuwal na interes. Kun an sarong tawong maygurang “may kapangyarihan sa saiyang sadiring boot” asin marigon na nagdesisyon sa saiyang puso na tawan nin lugar an pagigin daing agom, marahay. An mapangganang pagigin daing agom dai nangangahulogan nin pagpopogol sa dai nawawara asin haros nakadadaog na pagmawot na mag-agom asin magpamilya. Imbes, an Kristiano na pinipili an dai pag-agom maninigo na lubos na kombensido sa puso na an pagdadanay na daing agom tama sa kamugtakan nia asin maninigo na andam na gibohon an ano man na paghihingoang kaipuhan tanganing mapagdanay an kamugtakan na iyan na malinig. An Kristiano na naggigibo nin siring mas kadikit an kaolangan asin mas dakula an libertad na maglingkod sa Kagurangnan.
17. Sono ki Jesus, taano an iba ta dai nag-aagom?
17 An mga Kristianong daing agom matatabangan na mapagdanay an pagigin daing agom kun patataluboon ninda an kaisipan ni Jesu-Cristo. Minsan ngani sia daing agom sa sarong kultura na nagdodoon nin pag-agom, ikinonsentrar nia an saiyang panahon asin mga kakayahan sa saiyang ministeryo na dai na maootro. Kapareho ni Jesus, an Kristianong daing agom makapag-oogma sa balaog nin pagigin daing agom na itinatao nin Dios sa mga nagtatao nin lugar dian. Mapadapit digdi, si Jesus nagsabi: “Bakong gabos na lalaki nagtatao nin lugar sa kasabihan, kundi idto sanang igwa kan balaog. Huli ta igwa nin mga kapon na namundag na siring sa matris kan saindang ina, asin igwa nin mga kapon na ginibong kapon nin mga tawo, asin igwa nin mga kapon na ginibo an saindang sadiri na mga kapon huli sa kahadean kan kalangitan. An makapagtatao nin lugar kaiyan magtao nin lugar.”—Mateo 19:11, 12.
18. Ano an minaolang sa “mga kapon” para sa kahadean na mag-agom?
18 Dai sinasabi ni Jesus na an daing agom superyor sa may agom. Dai nia isinadol an pagigin daing agom tangani sanang magkaigwa nin buhay na daing iniintinding obligasyon, asin sierto na dai nia iyan irenekomendar tanganing an daing agom ikalakop an saiyang atension sa nagkapirang bako niang kasekso. Dai, kundi an mga ginigibo an sadiri na “kapon” para sa Kahadean mga tawong matanos sa moral na tinatawan ini nin lugar sa saindang puso. Ano an minaolang sa sainda sa pag-agom? Bakong pisikal na diperensia kundi makosog na pagmawot na idusay sa pinakalubos na mahihimo an saindang sadiri sa paglilingkod sa Dios. An paglilingkod na ini nangorognang mahalaga ngonyan ta an Kahadean napatindog sa langit kan 1914 asin “an maogmang baretang ini kan kahadean” kaipuhan na ihulit sa bilog na daga para sa pagpatotoo bago an marikas sa pagdangadang na katapusan kan malalaglag na palakaw na ini nin mga bagay.—Mateo 24:14.
Tawan nin Komendasyon an mga Kristianong Daing Agom
19. Mapadapit sa mga nagdadanay na daing agom para sa Kahadean, ano an maninigong gibohon nin gabos na Kristiano?
19 An gabos na Kristiano maninigong magtao nin komendasyon asin pagpakosog sa mga nagdadanay na daing agom para sa Kahadean. Total, an pagigin daing agom “nangangahulogan nin danay na paglilingkod sa Kagurangnan na mayo nin kaolangan.” (1 Corinto 7:35) An mga magurang marahay na itokdo sa saindang mga aki an sinasabi kan Biblia manongod sa pagigin daing agom asin an mga bentaha kaiyan para sa paglilingkod ki Jehova. Kita gabos makapakokosog sa mga kapagtubod na daing agom asin maninigo na dai noarin man paluyahon an saindang desisyon na magdanay na daing agom para sa Kahadean.
20. Kun kamo Kristianong daing agom, ano an maninigo nindong gibohon?
20 An mga Kristianong daing agom makapag-oogma bilang kompletong mga ministro nin Dios. Sa napakahalagang mga panahon na ini, nawiwili sindang makikabtang sa apretadong gibo na paghuhulit kan Kahadean. Kun siring, kun kamo daing agom, ikaogma na kamo ginagamit ni Jehova bilang kompletong Kristianong ministro na daing agom. ‘Maghingoa na kamtan an saindong kaligtasan na may takot asin pagtakig, mantang kamo nagliliwanag siring sa ilaw kan kinaban, na marigon na nangangapot sa tataramon nin buhay.’ (Filipos 2:12-16) Magkonsentrar sa mga intereses kan Kahadean mantang kamo nagdadanay na kasaro kan internasyonal na kasararoan nin magturugang kan mga Saksi ni Jehova asin otobon an Kristianong ministeryo.
Ano an Simbag Nindo?
◻ Ano an maninigong magin pinakasentro nin Kristianong buhay?
◻ Taano an daing agom na mga lingkod ni Jehova ta puwedeng magin kompleto para sa Kristianong ministeryo?
◻ Sa anong paagi na puwedeng magin bakong kompleto an may agom?
◻ Ano an boot sabihon kan pagigin “kapon” para sa Kahadean?
◻ Taano ta maninigo niatong pakosogon an mga Kristianong daing agom?
[Ritrato sa pahina 19]
Minsan ngani daing agom, si apostol Pablo kompleto
[Ritrato sa pahina 21]
Si Jesus an pangenot na halimbawa nin tawo na kompleto para sa ministeryo
[Ritrato sa pahina 24]
Tinatawan daw nindo nin komendasyon an mga nagdadanay na daing agom para sa Kahadean?