Maglaom ki Jehova

“Maglaom ki Jehova asin otobon an saiyang dalan, asin ika ilalangkaw nia na makasadiri sa daga. Kun pohoon na an mga maraot, maheheling mo iyan.”—SALMO 37:34.

1, 2. Ano an garo baga kamugtakan nin katawohan, asin paano napapalabot an Naciones Unidas?

SA INTELEKTUWAL na paagi, an pamilya nin tawo nakaabot na sa pinakahalangkaw na grado kan pagtalubo kaiyan. Huli sa paghihingoa kaiyan, sa katapustapusi naabot na kaiyan an panahon nuklear. An puwersa atomika garo baga kayang tumao nin abundang enerhiya asin kun siring magbukas nin makangangalas na mga bagay sa bilog na globo. Kabaliktaran sa linalaoman, iyan man an nagbukas kan dalan para sa grabeng danyos sa rasa nin tawo.

² Ano an nakaoolang sa pagsadiring paglaglag kan pamilya nin tawo sa sarong nuklear na pagkatunaw? Puwedeng garo baga an Naciones Unidas, na nag-oorgolyong igwa nin mga 159 miembrong nasyon na may dakol na klase nin gobyerno. Sa politikal, an mga gobyernong ini dai nagkakaoroyon, na an kada saro naniniwala na an sadiring paagi nin pagsakop kaiyan superyor, iyo, an pinakamarahay. Kaya sa saiyang sadiri, an NU sarong grupong dai nagkakaoroyon. Lakop an nasyonal na pag-orgolyo asin pagmawot nin independensia. Dugang pa, an nagkapirang nasyon tinalikdan na an pagtubod sa Dios, na nagin nang ateistiko.

3. Paano an punto-de-vista kan Kakristianohan sa Dios laen sa punto-de-vista mismo nin Dios?

³ An ngaran na Kakristianohan sagkod ngonyan aplikado sa mga nasyon na habong ibilang na daing Dios kundi naghihingako nin pagtubod ki Jesu-Cristo kaiba kan “Dios na Ama” na konektado ki Jesus sa sarong trinidad asin kaiba an ginibong personang “espiritu santo,” o banal na espiritu. An mga miembro kan Trinidad sinasabi na pantay-pantay. Alagad ta ipinasurat kan Ama ni Jesus ki propeta Isaias an mga tataramon na ini nin pagpamidbid: “Ako si Jehova. Iyan an sakong ngaran; asin dai ko itatao sa iba an sakong kamurawayan, ni an sakong kaomawan sa mga imahen.” (Isaias 42:8) Si Jehova, o Yahweh (The Jerusalem Bible), guminibo nin dai mapapantayan na historikal na rekord para sa saiya man sana.

4. Sa ano irinarayo kan Naciones Unidas an katawohan?

⁴ Bako nanggad na sa ikararahay kaiyan, an Naciones Unidas naglikay sa pagtao sa ngaran nin Dios nin maninigong onra asin pagmidbid. Dai kaiyan sinasadol an katawohan, na ngonyan napapaatubang sa pinakamasakit na kamugtakan kaiyan, na maglaom sa nagdadara kan ngaran na iyan. Pero, an Sarong iyan tamang inaapod na “Dios nin paglaom,” huli ta sia an nagbugtak kan pasisikadan para sa solamenteng balidong paglaom na puwedeng pangaptan ngonyan nin katawohan. (Roma 15:13, King James Version) An paglaom na itinatao nia nagpakosog asin nagsustenir sa dakol na lalaki asin babae.

Kaidto Pa—Paglaom!

5. Kasuarin ibinugtak an pasisikadan sa paglaom?

⁵ An pasisikadan sa pagkaigwa kan paglaom na iyan ibinugtak sa kapinonan pa sana kan kasaysayan kan pamilya nin tawo. Iyo, idto ibinugtak bago paluwason an satong enot na mga magurang sa saindang Edenikong erokan sa Tahaw na Sirangan. An rekord na nasusurat sa tataramon na Hebreo manongod sa tatamnan na iyan, o Paraiso, bakong pabula, o eroestorya sana nin mga tawo na ruminayo na sa pagsamba sa saindang Kaglalang.—Genesis 2:7–3:24.

6. Paano nagkaipo nin paglaom an katawohan?

⁶ Pakalihis nin labing 4,000 na taon, an Kristianong apostol na si Pablo pinasabngan na sumurat: “Paagi sa sarong tawo an kasalan naglaog sa kinaban asin an kagadanan huli sa kasalan, asin kaya an kagadanan nakalakop sa gabos na tawo huli ta sinda gabos nagkasala.” (Roma 5:12) Sa saro pa niang surat, ipinamidbid nia an sarong tawong nagkasala: “Kun paanong an gabos nagagadan dian ki Adan, siring man an gabos bubuhayon dian ki Cristo.” (1 Corinto 15:22) An doktor na an ngaran Lucas, sa ika-3 kapitulo kan saiyang Ebanghelyo, sinusog an linahe ni Jesus pabalik ki Adan, na, bago paluwason sa Eden, nadangog an mensahe ni Jehova manongod sa paglaom.—Lucas 3:23-38.

7. Anong nakapakokosog sa boot an ginibo nin Dios kan buhay pa si Adan?

⁷ Natural sana, maninigong mawoton nindong maaraman an laog kan mensaheng iyan. Alagad bago iyan basahon, mangnohon an bagay na sa halawig na panahon si Jehova paratao nin paglaom. Sa kapinonan si Adan daganon na aki nin Dios, asin tinogotan sia nin Dios na mangaki. Kun may natatanaw kamong mamondong kamugtakan, tibaad booton nindong pakosogon an boot o tawan nin paglaom an saindong aki. Nakaaagid dian an ginibo nin Dios. Pagkadangog ni Adan sa mga tataramon nin pagkondenar nin Dios na isinabi personalmente sa saiya, nakadangog sia nin mga tataramon nin paglaom para sa saiyang mga aki.

8. Paano an Genesis 3:15 nagtao nin pasisikadan sa paglaom?

⁸ Ano daw an mga tataramon na idto gikan sa nagtatao nin paglaom na Dios na ini? Sa sarong “halas” na napalabot sa pagkakasala ni Adan, an Dios nagsabi: “Pag-iiwalon ko ika asin an babae asin an saimong banhi asin an saiyang banhi [aki]. Lulugadon ka nia sa payo asin lulugadon mo sia sa bool.” (Genesis 3:14, 15) Tibaad isipon nindo kun paano an mga tataramon na idto masasabi na nagtatao nin paglaom. Enot, nanonodan niato na an “halas” lulugadon an payo.

9. Siisay an “halas” na sinasabi sa Genesis 3:14, 15?

⁹ Sa Kapahayagan 12:9 nasusurat: “Kaya ihinolog an dakulang dragon, an enot na halas, an inaapod Diablo asin Satanas, na nagdadaya sa bilog na ineerokan na daga; ihinolog sia sa daga, asin an saiyang mga anghel ihinolog sa kaibanan nia.” Iyo, an “halas” na napalabot sa Eden daing iba kundi an maraot na espiritung linalang na inaapod Satanas na Diablo. An simbolikong halas na iyan bako sanang nagkaigwa nin mga anghel sa langit kundi nagkaigwa man sia nin “banhi” digdi sa daga, “banhi” na pag-abot nin panahon roronoton kaiba nia.

10. Paano pinatunayan ni Jesus an pagpamidbid sa “halas”?

¹⁰ Sa pagpatunay sa pagpamidbid na ini sa Diablo bilang an “halas” na nasa likod kan pagkaholog kan satong enot na mga magurang, si Jesu-Cristo nagsabi sa Judiong mga namomoon sa relihiyon kan enot na siglo: “Gikan kamo sa saindong ama na Diablo, asin boot nindo na gibohon an mga horot kan saindong ama. An sarong iyan paragadan sa kapinonan, asin dai sia nagdanay sa katotoohan . . . Kun sia nagtataram nin putik, sia nagtataram oyon sa saiyang sadiring boot, huli ta sia putikon asin iyo an ama kan kaputikan.” (Juan 8:44) Inapod man ni Jesus na “aki nin mga rimoranon” an relihiyosong mga paratumang na idto.—Mateo 12:34; 23:33.

An Paglaom Pinapagdanay na Buhay

11. Anong dugang pang dahelan sa paglaom an itinao kan Genesis 3:15?

¹¹ An banal na panuga manongod sa paglugad sa payo kan simbolikong halas sa katotoohan nagtao nin nakaoogmang paglaom sa matungang bilog na pamilya nin tawo. Maheheling niato kun taano paagi sa pagsiyasat sa ibang kabtang kan Genesis 3:15. An “banhi” kan babae nasasabihan. Haloy na misteryo kun siisay an “banhing” iyan. Alagad malinaw na ibubugtak ni Jehova Dios an dai pa midbid na “banhing” iyan sa pakikipag-iwal sa simbolikong halas asin sa tumang sa Dios na “banhi” kaiyan. Ipinanuga an kapangganahan, iyo, iginarantiya, para sa “banhi” kan “babae”! An kapangganahan kaiyan ibinugtak bilang paglaom sa atubang nin katawohan. Kaya an mga miembro kan pamilya nin tawo makakalaom sa pagdatong kan “banhing” iyan kan “babae.”

12. Pag-abot nin panahon, ano pa an ipinahayag manongod sa “banhi” kan “babae”?

¹² Sa nag-aging mga siglo, ipinahayag nin Dios na an “banhing” ini iyo an saiyang bugtong na Aki, na isinugo sa daga na magin Mesiyas asin idolot an saiyang buhay bilang pantubos na atang. (Genesis 22:17, 18; Galacia 3:16; 1 Juan 2:2; Kapahayagan 5:9, 10) Sa dahelan na ini an paglaom nin mga Saksi ni Jehova bakong sa Naciones Unidas. Iyan nasa nabubuhay na si Jesu-Cristo, Pangenot na Representante sa Pagtaram ni Jehova Dios. Makasasarig kita na si Cristo buhay, ta sia nabuhay liwat hale sa mga gadan tanganing tumukaw sa too ni Jehova sa langit. Arog kan sabi ni Pablo: “Kun sa buhay sanang ini [buhay na kaiba na an satong ika-20 siglo] kita naglaom ki Cristo, kita an pinakakaherakherak sa gabos na tawo. Alagad, ngonyan si Cristo binuhay na liwat hale sa mga gadan, an enot na bunga kan mga natorog sa kagadanan.” (1 Corinto 15:19, 20) Arog kan parateng pinatutunayan sa Biblia sa mga pahina kan magasin na ini, si Jesu-Cristo ngonyan natutukaw na bilang langitnon na Hade.—Kapahayagan 11:15.

13, 14. Saen naglalaom an mga Saksi ni Jehova, asin ano an ginigibo ninda manongod kaiyan?

¹³ Siyempre, dai sinalidahan ni Jesus si Jehova bilang an paglaom kan katawohan. An Salmo 37:34 nagdadanay na aplikado: “Maglaom ki Jehova asin otobon an saiyang dalan, asin ika ilalangkaw nia na makasadiri sa daga. Kun pohoon na an mga maraot, maheheling mo iyan.” Kaipuhan pa man giraray na maglaom ki Jehova asin sadolon an gabos na pumondo na sa paglaom sa gibong-tawong mga institusyon.

¹⁴ Kaoyon sa bagay na ini, an mga Saksi ni Jehova aktibo sa 208 kadagaan, na naghuhulit kan maogmang bareta kan Kahadean. Dai sinda mapapopondo sa paggibo kaiyan. An politikal na mga institusyon, na tinatabangan asin suportado nin relihiyosong mga organisasyon, mayo nin banal na diretso sa paghihingoang papondohon sinda. Makapagpapadagos kitang magin mga saksi ni Jehova asin maglaom sa saiya, kapareho ni David na taga-Betlehem, na nagsurat:

15. Anong klaseng paglaom igwa si Hadeng David ki Jehova?

¹⁵ “Si Jehova iyo an sakuyang pastor; dai ako magkukulang. Pinahihigda nia ako sa berdeng mga sabsaban; dinadara nia ako sa kataed nin toninong na katubigan. Pinababagsik nia liwat an sakuyang kalag: Ginigiyahan nia ako sa mga dalan nin katanosan para sa saiyang ngaran. Iyo, minsan ako naglalakaw sa kababan kan anino nin kagadanan, dai ako matatakot sa maraot; huli ta ika nasa kaibanan ko; an saimong badas asin an saimong sogkod, iyan nakararanga sa sako. Ika nag-aandam nin lamesa sa atubangan ko sa atubangan kan sakong mga kaiwal: Linahidan mo nin lana an sakuyang payo; nagsusulwak an sakong kopa. Tunay na an karahayan asin mamomoton na kabootan magsusunod sa sako sa gabos na aldaw kan sakuyang buhay; asin ako mag-eerok sa harong ni Jehova sagkod lamang.”—Salmo 23, American Standard Version.

16. Taano ta masasabi na si Jesus kapareho ki David an punto-de-vista?

¹⁶ Si Hadeng David iyo an espirituwal na pastor ni Jehova sa mga tribo nin suanoy na Israel, asin sia an nag-andam kan dalan na an Jerusalem magin an kabesera kan nasyon, na duman an aki niang si Salomon naghade sa laog nin 40 taon. May marahay na dahelan, si Jesu-Cristo inaapod na “aki ni David.” (Lucas 1:31; 18:39; 20:41) Kun si David naglaom ki Jehova Dios, an daganon niang gikan na si Jesu-Cristo arog man kaiyan an gigibohon. Asin iyo man nanggad.

17. Ano an ebidensia na si Jesus naglaom ki Jehova?

¹⁷ Bilang ebidensia na an pinakabantog na daganon na gikan ni David, si Jesu-Cristo, nagkuyog sa hatol kan Salmo 37:34 kan sia naghihigagdan sa hariging pasakitan, si Jesus nagsabi: “Ama, sa saimong mga kamot idinodolot ko an sakong espiritu.” (Lucas 23:46) Kinokotar asin inootob nia an mga tataramon ni David sa Salmo 31:5, na isinabi sa Dios: “Sa saimong kamot idinodolot ko an sakuyang espiritu.” An paglaom ni Jesus dai nasudya, kun paanong an paglaom ni Hadeng David dai man. Si Cristo binuhay liwat hale sa mga gadan kan ikatolong aldaw. Pakalihis nin apat na polong aldaw nagbalik sia sa saiyang langitnon na Ama. Sa katapusan kan Mga Panahon nin mga Hentil kan 1914, ilinangkaw ni Jehova an saiyang Aki na magin Hade sa daga.

Sarong Panahon nin Paglaom Ngonyan

18. Taano ta angay na panahon ngonyan para sa paglaom?

¹⁸ Ngonyan, mantang an bagong taon nin 6,014 A.M. (sa Taon kan Kinaban) dinadara paabante sa ngapit an pamilya nin tawo, ano an puwedeng magin paglaom kan pamilya nin tawo? An hapot na iyan angay nanggad ta haros 1,900 na taon na an nakalihis poon kan matapos na isurat an Biblia. Haloy nang panahon an nag-agi poon kan isurat ni David an Salmo 37:34.

19. Ano an ginibo ni Jehova para ki Jesus, na nagtatao sato nin paglaom?

¹⁹ Si Jehova Dios, an Makakamhan sa gabos na Dios na buminuhay liwat ki Jesus hale sa mga gadan, igwa nin mas dakulang katongdan na itinatagama sa saiya kisa iniisip nin mga tawong halipot an pananaw. Paagi sa pagbuhay liwat asin paglangkaw kan saiyang bugtong na Aki sa saiyang toong kamot sa kalangitan, si Jehova Dios igwa nin dagdag na dahelan para sa sato na magsarig sa Saiya na may dai nasusudyang paglaom, ultimong paglaom. Iyan puwedeng mangahulogan kan satong daing katapusan na buhay sa kaogmahan, arog kan sinasabi kan pinasabngan na parasurat na si Pablo: “Kita nakaligtas sa paglaom na ini.”—Roma 8:24.

20. Taano ta masasabi niato na si Jehova sagkod ngonyan iyo an “Dios nin paglaom”?

²⁰ An apostol nagpapadagos sa pagsabi: “Alagad an paglaom na naheheling bakong paglaom, huli ta kun an sarong tawo nakakaheling sa sarong bagay, naglalaom pa daw sia para kaiyan? Alagad kun kita naglalaom sa dai niato naheheling, padagos kitang naghahalat kaiyan na may pakatagal.” (Roma 8:24, 25) Kaya an orihinal na paglaom na iyan nabubuhay sagkod ngonyan, iyo, harani na sa mamuraway na pagkaotob sa rasa nin tawo. (2 Pedro 3:13; Kapahayagan 21:4, 5) Huli sa mismong dahelan na iyan paglaom para sa bilog na katawohan, iyan maninigo na ipaaram sa gabos. Ini an katuyohan kan satong “Dios nin paglaom.”

21, 22. Ano an malalaoman niatong gibohon kan mga nasyon sa harani nang ngapit?

²¹ Orog kisa kasuarin pa man ngonyan na an saiyang panahon na an katuyohan na ini maotob. Minsan sa satong panahon na an nagkapirang nasyon kan NU nagin nang eksperto sa sientipikong paagi sa mismong nukleo kan gabos na bagay, an mga namomoon sa mga gobyernong ini dai nakakamate kan pangangaipo na ipabaya sa mas halangkaw na intelihensia an pagresolber sa mga problema.—Ikomparar an Genesis 11:6.

²² Orog kisa kasuarin pa man, an popular na relihiyon namemeligrong salakayon, na daing madudulagan. Kaipuhan na haleon an nakababangang impluwensia kaiyan. Ipinaheheling kan Biblia na an mga elementong namamahala ipaheheling an pagkasuperyor ninda asin isisiblag an saindang sadiri sa garo-lintang mga relihiyon na haloyon nang naghihingoa na supsupon sa kinabanon na palakaw nin mga bagay an gabos na makukua ninda. Kaya bakong makangangalas na ini an gigibohon kan politikal na elemento. An pakalibre ninda sa pagsalakay na ini sa relihiyon magpaparisa, sa saindang punto-de-vista, na mayo nin Dios na maninigong sambahon asin paglingkodan. Ipinaheheling kan hula na sunod nindang bibirikan an mga saksi nin Dios, na yaon pa. Tatanawon ninda an pinakapasil na kapangganahan sa mga Saksi ni Jehova bilang an katapusan kan saindang kampanya tumang sa Dios.—Kapahayagan 17:12-17; Ezequiel 38:10-23.

23, 24. Ano an magigin reaksion ni Jehova sa pagsalakay kan mga nasyon sa saiyang banwaan?

²³ Minsan siring, sa katapustapusi mamamatean ninda an makasosopog na pagkadaog na siertong minaabot sa saro na nangangahas na makipaglaban ki Jehova nin mga hukbo, na noarin man dai pa nadaog sa ralaban. Liliwanagon nanggad kaiyan na inootob ninda an katuyohan kan pangenot na paratumang sa sarong tunay na Dios, arin na baga, an “halas,” si Satanas, “an dios kan palakaw na ini nin mga bagay.”—2 Corinto 4:4.

²⁴ Kanigoan na kasopganan an magigin kahulogan kaini para sa sainda! An linalaoman nindang ikapaheling magigin an pinakagrabeng daing sopog na kapangahasan, na pinupukaw an mismong Dios nin langit asin daga sa matanos na kaanggotan. Sa maluyang katawohan masasabi nia: “‘Huling an saindong mga kaisipan bakong an sakong mga kaisipan, minsan an sakong dalan bakong an saindong dalan,’ sabi ni Jehova. ‘Huling kun paanong an kalangitan mas halangkaw sa daga, siring man an sakong mga dalan mas halangkaw sa saindong mga dalan, asin an sakong mga kaisipan kisa saindong mga kaisipan. Huli ta kun paanong an oran minaibaba, asin an niyebe, hale sa kalangitan asin dai na minabalik dian, sagkod na dai kaiyan tookon an daga asin papangyarihon iyan na magbunga asin magtubo, asin tawan nin banhi an parasabwag asin nin tinapay an makakan, siring man an sakong tataramon na magluwas sa sakong ngoso. Dai iyan mabalik sako na daing laog, kundi gigibohon kaiyan an sakong boot, asin iyan siertong magigin mapanggana sa sakuyang sinobolan kaiyan.’”—Isaias 55:8-11.

25. Kun siring, taano ta may marahay na dahelan kita ngonyan na maglaom ki Jehova bilang an satong “Dios nin paglaom”?

²⁵ An Kaglalang sa tawo ibinugtak sa puso nin tawo an makosog na pagkasensitibo, siring kan yaon sa saiya mismo. “Huli ta iyo ini an isinabi ni Jehova nin mga hukbo, ‘Sa pagsunod sa kamurawayan isinugo nia ako sa mga nasyon na nananamsam sa saindo; huli ta an nagtitikwil sa saindo nagtitikwil sa sakong mata.’” (Zacarias 2:8) Kun siring, an mga Saksi ni Jehova kaipuhan na maglaom ki Jehova. Ootobon nia an paglaom na iyan sagkod sa pinakamagayon na samno sa saiyang unibersal na pagkasoberano. Patutunayan nia na dai na liwat magigin isyu na sia an kaharohalangkawe, makakamhan sa gabos, daing sagkod na Dios, na nag-otob sa pinakahalangkaw na mga paglaom kan saiyang mga linalang sa bilog na kalangitan asin daga. Aleluya!—Salmo 150:6.

Ano an Isisimbag Nindo?

◻ Taano ta nakadadaya an paglaom na itinatao kan mga nasyon?

◻ Paano nagtao an Dios nin pasisikadan sa paglaom sa Genesis 3:15?

◻ Ano an paninindogan ni Jesus manongod sa Salmo 37:34?

◻ Taano ta may dahelan kita ngonyan na maglaom?

[Ritrato sa pahina 8]

Kun paanong an mga karnero nagsusunod sa saindang pastor, si David man nagsarig asin naglaom ki Jehova

[Credit Line]

Pictorial Archive (Near Eastern History) Est.