Report kan mga Parabalangibog kan Kahadean
Binibendisyonan ni Jehova an mga Nagdadanay sa Integridad sa Cyprus
SI Jesus nagsabi sa saiyang mga parasunod: “Kun ako pinaglamag ninda, kamo man paglalamagon ninda.” (Juan 15:20) Asin si Jehova, paagi ki propeta Isaias, nagsabi: “An ano man na armas na gibohon tumang sa saimo dai magkakaepekto.” (Isaias 54:17) An mga kapahayagan na ini pareho nagin totoo sa Cyprus, na duman an nagdadanay sa integridad na mga Saksi ni Jehova sibot na naghuhulit kan maogmang bareta.
◻ “An Iglesya Griego Ortodokso nagin aktibo nanggad sa paghihingoa na raoton an samong gibo,” sabi nin sarong report hale sa nasyon na iyan. “An mga padi nagwawaras nin mga pulyeto na nagsasahot samo nin gabos na klaseng bagay asin sinasabihan an mga tawo na likayan an pakipag-olay sa mga Saksi ni Jehova. Sinosongko pa ngani ninda an mga nakikipag-adal kan Biblia sa mga Saksi asin hinihingoang papondohon sinda. Sa Paphos, an sarong pading teologo hiningoang kombensiron an tolo katawo na pumondo sa pakikipag-adal kan Biblia sa mga Saksi ni Jehova. Sa laen-laen na okasyon, an kada saro sa tolo nag-imbitar sa sarong tugang na kaolayon an teologong ini. Makaoogma, an tolo ngonyan aktibo nang nakikiasosyar sa organisasyon ni Jehova.” Siyempre, ini ikinauyam kan padi, na nagkomento: “Noarin man dai na ako makikipag-olay sa mga Saksi ni Jehova.” An ibang padi kinologan pa ngani an ibang tugang mantang sinda naggigibo kan ministeryo. Minsan siring, parate na minabuweltada an mga paghihingoa kan klero, asin mas dakol an naninindogan ngonyan para ki Jehova.
◻ An eksperyensiang ini hale sa Cyprus nagpapaheling na an pagdadanay sa integridad sa irarom nin pagtumang nagtatao nin mga bendisyon. An agom nin sarong babae nagadan kaidtong guerra kan 1974, na nawalat siang may padadakulaon na aking babae. Nagpaagom liwat an babae. Huling nadidisganar sa pagsaginsagin kan klero asin sa kadaihan nin kasegurohan kan ngapit, nag-oyon siang makipag-adal kan Biblia sa mga Saksi ni Jehova. Marikas siang nag-oswag asin nagpoon na isabi sa saiyang mga paryentes an marahay na mga nanonodan nia. Nagpoon an pagtumang. An pinakadakulang pagbalo nag-abot kan an 15 anyos niang aki magsabi: “Nawaran ako nin ama, asin kun dai ka mapondo sa pakikipag-adal sa mga Saksi ni Jehova, dedeharan ta ka bilang ina. Magigin akong ilo.” Minsan siring, an babae nagpadagos sa pag-adal.
Sarong aldaw sinongko kan daragita an sarong katood sa ospital. Sa kataed na katre, sinosongko nin sarong Saksi an saiyang paryente kan an sarong padi sumongko sa iyo man sanang pasyente. Nagpoon na mag-olay an tugang asin an padi. An tugang kalmado asin mataktika, na ginagamit an Biblia sa pagpaliwanag kan saiyang paninindogan. Sa ibong na kampi, an padi agresibo. Halangkaw an saiyang boses, pero dai man lamang nia binukasan an Biblia ni sarong beses. Pinagmasdan kan daragita an pangyayari asin hinangaan an kabootan kan tugang asin an bagay na ginamit nia an Biblia. Kan banggi man sanang idto, kan an tugang asin an saiyang agom sumongko sa ina kan daragita para sa pag-adal sa Biblia, ipinaliwanag kan daragita an nangyari sa ospital asin hinapot sinda: “Puwede man daw nindo akong adalan?” Ngonyan an daragita nag-aadal nin duwang beses sa semana, asin nag-aadal naman an agom na lalaki. An ina saro nang bautisadong parahayag.
Tunay nanggad, binibendisyonan ni Jehova an saiyang nagdadanay sa integridad na mga lingkod sa Cyprus!
[Ritrato sa pahina 23]
Si apostol Pablo napaatubang man sa pagtumang sa Paphos