Gibohon na Saindong Sinasarigan si Jehova
“Manarig ka ki Jehova asin gumibo ka nin marahay; . . . maranga nanggad dian ki Jehova.”—SALMO 37:3, 4.
1, 2. (a) Ano an nangyari sa mga dai nanarig ki Jehova kan enot na siglo, asin sa mga nanarig? (b) Ano an mga puwedeng ihapot manongod sa relihiyon sa satong panahon?
SA ENOT na siglo kan satong Komon na Kapanahonan, an Judiong mga namomoon sa relihiyon naghingako na nagsasamba sa Dios. Alagad sinda dai nanarig sa saiya. Linapas ninda an saiyang mga pagboot asin pinaglamag an saiyang mga representante. (Mateo 15:3; Juan 15:20) Bilang resulta, ‘an saindang harong pinabayaan’ ni Jehova. (Mateo 23:38) Kan 70 C.E., linaglag kan mga hukbong Romano an Jerusalem asin an templo kaiyan, na grabe an napierdeng buhay sa mga namomoon sa relihiyon asin sa saindang mga parasunod. Pero an mga nanarig ki Jehova iningatan, huli ta sinda naghinanyog sa mga patanid kan saiyang mga representante asin nagdulag para sa ikaliligtas.—Mateo 24:15-22; Lucas 21:20-24.
2 Sa huring mga aldaw na ini kan palakaw na ini nin mga bagay, an mga relihiyon daw kan kinaban na ini may panarig sa tunay na Dios, si Jehova? Sinda daw nagkukuyog sa saiyang mga pagboot asin nag-ootob sa saiyang kabotan, o inaarog daw ninda an mga namomoon sa relihiyon kan enot na siglo na pinabayaan nin Dios? Arin sa mga relihiyon ngonyan an makakalaom na ingatan ni Jehova huli ta sinda ‘nanarig ki Jehova asin guminibo nin marahay’?—Salmo 37:3.
Haen an Pagkamoot sa Tugang?
3. Taano ta nasudya an relihiyosong mga paghihingoa na magkaigwa nin katoninongan?
3 Dai pa nahahaloy, si Papa Juan Paulo II nagpatanid na “an bilog na katawohan napapaatubang sa grabeng mga peligro sa kaligtasan kaiyan.” Idinoon nia na “an mga peligrong iyan mapaglalabanan sa pinakamarahay na paagi sa sararong mga paghihingoa nin laen-laen na grupong relihiyoso.” Kabotan nin Dios, sabi nia, na an mga namomoon sa relihiyon “magtarabang” para sa “katoninongan asin pagkakaoyon liwat.” Minsan siring, kun iyan kabotan nin Dios, kun siring taano ta dai binendisyonan nin Dios an dakol na siglong mga paghihingoa digdi? Dai nia iyan ginibo ta an mga relihiyon na ini dai nanarig sa paagi sa saiyang langitnon na Kahadean. (Mateo 6:9, 10) Imbes, sinuportaran ninda an mga politika asin guerra kan mga nasyon. Bilang resulta, sa panahon nin guerra, an mga relihiyoso nin sarong nasyon ginadan an mga relihiyoso nin sarong nasyon, ginagadan pati an saindang mga karelihiyon. An Katoliko ginadan an Katoliko, an Protestante ginadan an Protestante, asin iyan man an ginibo nin ibang relihiyon. Alagad an tunay daw na espirituwal na magturugang naggagaradanan mantang naghihingakong nagsasamba sa Dios?
4. Ano an isinabi ni Jesus na pamantayan para sa tunay na relihiyon, asin taano ini ta “bagong togon”?
4 Ibinugtak ni Jesus an pamantayan para sa tunay na relihiyon kan sabihan nia an saiyang mga parasunod: “Tinatawan ko kamo nin bagong togon, na kamo magkamirootmootan; siring sa pagkamoot ko sa saindo, na kamo man magkaminorootmootan. Paagi kaini an gabos makaaaram na kamo an sakong mga disipulo kun kamo nagkakaminorootmootan.” (Juan 13:34, 35) Kaya an mga naggigibo nin tunay na relihiyon dapat na magkaminoroot-mootan. Ini “bagong togon” ta si Jesus nagsabi: “Siring sa pagkamoot ko sa saindo, . . . kamo man magkaminorootmootan.” Andam siang itao an saiyang buhay para sa saiyang mga parasunod. Kaipuhan na andam man sindang gibohon iyan—bako, bakong kuanon an buhay nin mga kapagtubod, kundi itao an saindang buhay kun kaipuhan. Iyan bago, huli ta an siring dai hinagad kan Pagboot ni Moises.
5. Paano mapuwersang idinodoon kan Tataramon nin Dios an pangangaipo nin pagkamoot asin pagkasararo sa tahaw kan saiyang tunay na mga parasamba?
5 An Tataramon nin Dios nagsasabi: “Kun an siisay man nagsasabi: ‘Namomoot ako sa Dios,’ alagad naoongis sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai makakahimong mamoot sa Dios, na dai nia naheheling. Asin kita igwa kan togon na ini hale sa saiya, na an namomoot sa Dios maninigo man na mamoot sa saiyang tugang.” (1 Juan 4:20, 21) Paagi sa pagkamoot na ini, an mga nananarig ki Jehova napagdadanay an tunay na internasyonal na pagkasararo. Si apostol Pablo, sa 1 Corinto 1:10, nagsasabi: “Sinasadol ko kamo, mga tugang, paagi sa ngaran kan satong Kagurangnan na si Jesu-Cristo na kamo gabos maninigong magtaram na may pagkaoroyon asin na dai magkaigwa nin pagkabaranga dian sa sainda, kundi na kamo dayupot na magkasararo sa saro sanang pag-isip asin sa saro sanang paghonahona.”—Helingon man an 1 Juan 3:10-12.
6. Taano ta masasabi nin mga Saksi ni Jehova na sinda ‘malinig sa dugo kan gabos na tawo’?
6 An The World Book Encyclopedia nagsasabi na 55 milyones katawo an nagadan kan Guerra Mundial II. Sinda ginadan nin mga miembro nin gabos na mayor na relihiyon apuwera an Mga Saksi ni Jehova. Mayo ni saro sa mga pagkagadan na idto an gibo nin sarong saksi ni Jehova, huli ta kinuyog ninda an pagboot na magkaminootan asin nagsayumang mapalabot sa mga guerra kan mga nasyon. Minsan ngani dakol na saksi an ginadan huli sa saindang neutral na paninindogan, makapagsasabi sinda kapareho ni apostol Pablo: “Malinig ako sa dugo kan gabos na tawo.”—Gibo 20:26.
7, 8. Paano inaadmitir nin nagkapirang klerigo an saindang kasalan sa dugo?
7 An sarong Katolikong kapelyan para sa mga abyador na nagholog kan mga bomba atomo sa Hapon kan 1945 nagsabi kasuarin pa sana: “Sa nakaaging 1,700 na taon ginigibo kan iglesya na magin kagalang-galang an guerra. Sinusutsutan kaiyan an mga tawo na maniwala na iyan kagalang-galang na Kristianong propesyon. Ini bakong totoo. Kita nadoktrinahan. . . . An ebanghelyo kan Makatanosan na Guerra ebanghelyo na noarin man dai itinokdo ni Jesus. . . . Mayo man lamang sa buhay o katokdoan ni Jesus na nagsusuherir na mantang ilegal an tomtomon an mga tawo paagi sa bomba nuklear legal na tomtomon an mga tawo paagi sa napalm o flamethrower.”
8 An Catholic Herald sa Londres nagsabi: “An enot na mga Kristiano . . . tinubod nanggad an tataramon ni Jesus asin nagsayuma na apodon na magsoldado sa hukbong Romano dawa kun an penalidad kagadanan. Nagin laen daw kutana an bilog na kasaysayan kun an Iglesya nagdanay sa orihinal na paninindogan kaiyan? . . . Kun an mga iglesya ngonyan iribang kokondenaron an guerra . . . , na mangangahulogan na an lambang miembro magigin obligado konsensia na, kapareho kan mga Kristiano, magsayuma huli sa konsensia, tibaad pa maseguro an katoninongan. Alagad ta aram niato na ini noarin man dai mangyayari.”
9. Taano ta sinasabi niato na pinabayaan na ni Jehova an mga relihiyon kan kinaban na ini?
9 Kaya, ikinompromiso nanggad kan mga relihiyon kan kinaban na ini an mga pagboot nin Dios. Sinda dai nananarig sa saiya kapareho kan mga Fariseo. “Sinda nagpapahayag na midbid ninda an Dios, alagad ta sinda nagpapainda sa saiya paagi sa saindang mga gibo huli ta sinda makababalde asin masumbikal patin bakong aprobado para sa ano man na marahay na gibo.” (Tito 1:16) Bilang resulta, pinabayaan nin Dios an mga relihiyon kan kinaban na ini kun paanong pinabayaan nia an mapagsaginsagin na Judiong relihiyon kan enot na siglo.—Mateo 15:9, 14.
Pagkaligtas Paagi sa Pananarig ki Jehova
10, 11. Ano an sinabi ni Hadeng Ezequias kan hagadon kan Asiria na sumuko an Jerusalem, asin siisay an dinuduhagi kan representante ni Senaquerib?
10 Dai kamo manarig sa mga solusyon nin tawo sa mga problema kan kinaban na ini. Imbes, manarig sa Saro na makaootob sa saiyang mga panuga. (Josue 23:14) Bilang halimbawa, helinga an nangyari kan ikawalong siglo bago si Cristo, kan kaaldawan ni Hadeng Ezequias sa Juda. An Biblia nagsasabi manongod sa saiya: “Padagos niang ginibo an tama sa mga mata ni Jehova.” (2 Hade 18:3) Kaidtong saiyang paghade, an makosog na kapangyarihan pankinaban nin Asiria suminalakay sa Jerusalem. An representante kan hade nin Asiria na si Senaquerib hinagad na sumuko an Jerusalem, na an sabi: “Iyo ini an sabi kan hade, ‘Dai kamo magpadaya ki Ezequias, huli ta dai nia kamo ikaliligtas sa sakong kamot. Asin dai nindo togotan si Ezequias na papagsarigon kamo ki Jehova.’”—2 Hade 18:29, 30.
11 Ano an ginibo ni Ezequias? An Biblia nagsasabi: “Si Ezequias namibi sa atubangan ni Jehova asin nagsabi: ‘O Jehova na Dios nin Israel, na nagtutukaw sa ibabaw nin mga kerubin, ika sana an tunay na Dios kan gabos na kahadean sa daga. Ika an guminibo sa kalangitan asin sa daga. Kilingan an saimong talinga, O Jehova, asin pagdangog. Buklata an saimong mga mata, O Jehova, asin helinga, asin dangoga an mga tataramon ni Senaquerib na saiyang isinugo sa pagduhagi sa nabubuhay na Dios. . . . O Jehova na samuyang Dios, ligtasan kami, tabi, sa saiyang kamot, tanganing an gabos na kahadean sa daga makaaram na ika, O Jehova, iyo an iyo-iyong Dios.’”—2 Hade 19:15-19.
12. Paano sinimbag ni Jehova an pamibi ni Ezequias?
12 Dinangog ni Jehova an pamibing ini asin isinugo si propeta Isaias na sabihan si Ezequias: “Ini an sinabi ni Jehova manongod sa hade sa Asiria: ‘Dai sia malaog sa siudad na ini ni mapalupad man sia nin pana dian ni maatubang dian na may kalasag ni mapatindog man nin kuta na pansalikop tumang dian.’” Lalabanan daw ni Ezequias an Asiria paagi sa sarong hukbo? Dai, kaipuhan siyang manarig ki Jehova, na ginibo man nia. An resulta? “Luminuwas an anghel ni Jehova asin linugad an sanggatos may walong polo may limang ribo sa kampo kan mga Asirio.” Si Senaquerib mismo nagbayad sa pagduhagi ki Jehova asin sa mga lingkod ni Jehova, huli ta ginadan sia mismo kan saiyang mga aki. Totoo sa mga tataramon ni Jehova, mayo ni sarong armas na tuminama sa Jerusalem.—2 Hade 19:32-37.
13, 14. Basado sa ano na an mga tawo hale sa gabos na nasyon makaliligtas sa katapusan kan presenteng palakaw na ini nin mga bagay?
13 Sa satong kaaldawan mangyayari an kapareho kaiyan. An mga nanarig ki Jehova makaliligtas sa mga pagduhagi kan kinaban na ini asin sa katapusan kan kinaban na ini. “An mga nakakamidbid sa saimong ngaran mananarig sa saimo, ta dai mo nanggad pababayaan an mga naghahanap saimo, O Jehova.” (Salmo 9:10) Alagad bago hokoman ni Jehova an makasalan sa dugong kinaban na ini, inaagda nia an mga may sadiosan na puso na dumulok sa saiya para sa katiwasayan. An mga ini minakompuwesto sa “dakulang kadaklan” hale sa gabos na nasyon, na “nagluwas sa dakulang kahorasaan.” Makaliligtas sinda sa katapusan kan palakaw na ini huli ta sinda nananarig ki Jehova asin naglilingkod sa saiya “aldaw asin banggi.”—Kapahayagan 7:9-15.
14 Sinisimbag ninda an pag-apod ngonyan na may nag-oorog na kosog sa bilog na kinaban, siring kan ihinula sa Isaias 2:2, 3: “Asin mangyayari sa huring kabtang kan mga aldaw na an bukid kan harong ni Jehova [an tunay na pagsamba sa saiya] magigin marigon . . . Asin dakol na banwaan an maduruman asin masarabi: ‘Madia kamo, banwaan, asin magtukad kita sa bukid ni Jehova, . . . asin totokdoan nia kita dapit sa saiyang mga dalan, asin kita maglalakaw sa saiyang mga dana.’” An Isa 2 bersikulo 4 nagsasabi: “Asin dadaragopdopon ninda an saindang mga minasbad na magin tarom nin arado asin an saindang mga budyak na magin mga sanggot. An nasyon dai mabingat nin minasbad tumang sa nasyon, asin dai na sinda mag-aadal sa pakilaban.”
15. Siisay an nakaootob sa hula kan Isaias 2:2-4, asin paano?
15 Siisay, sa satong panahon, an ‘ginigibong tarom nin arado an saindang minasbad’? Siisay an ‘dai na nag-aadal sa pakilaban’? Siisay an may dai mababaring pagkamoot sa saindang espirituwal na mga tugang na lalaki asin babae sa bilog na daga asin kasaro ninda? Siisay an tunay na nananarig ki Jehova asin inaagda an iba na gibohon man iyan? An mga katunayan sa satong panahon nagpapaheling na an solamenteng simbag; an mga Saksi ni Jehova. Sinda, kapareho ni Ezequias, nananarig ki Jehova sa bilog nindang puso asin ipinaheheling iyan paagi sa pag-otob sa saiyang mga pagboot.
Sarong Maliwanag na Ngapit
16, 17. Anong maliwanag na ngapit an inoopresir ni Jehova sa mga nananarig sa saiya?
16 Sa mga nananarig sa saiya, si Jehova nag-oopresir kan pinakamaliwanag na ngapit na maiimahinar kun salidahan na nia an daan na sosyedad na ini kan kinaban nin bago. Sa bagong kinaban digdi sa daga, mayo na nin takot o pagdiskompiar, mayo na nin pagtios, inhustisya, o krimen. An mga tawo dai na gagadanon sa mga guerra o paagi sa aborsion. An Kapahayagan 21:4 nanunuga pa ngani na “an kagadanan mawawara na, dai na sagkod magkakaigwa nin pagmondo ni pagtangis ni kolog.”
17 Pag-abot nin panahon, an daga magigin paraiso siring sa ipinanuga ni Jesus. (Lucas 23:43) Asin mantang pati kagadanan paparaon na, an mga nananarig ki Jehova mabubuhay sagkod lamang sa Paraiso. Lubos pang maootob an Miqueas 4:4: “Sinda magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.” Imahinara nindo an mabuhay sa sarong sosyedad na an gabos na masabat nindo saro na masasarigan nindo! Taano ta magigin siring? Huli ta, arog kan sabi kan Isaias 54:13: “An saimo gabos na aki magigin mga tawo na tinokdoan ni Jehova, asin magsosopay an katoninongan kan saimong mga aki.”
18. Anong mga pakinabang an inaani minsan ngonyan kan mga nananarig ki Jehova?
18 Minsan siring ngonyan pa an minilyon na saksi ni Jehova sa bilog na kinaban nag-aani na nin mga pakinabang sa pananarig ki Jehova. Halimbawa, huli sa pagkuyog sa mga ley asin prinsipyo ni Jehova, an mga lingkod ni Jehova libre sa kanser sa pulmon huli sa pagtatabako. huli sa pamumuhay nin malinig sa moral, sa kadaklan dai sinda namemeligro sa lakop sa kinaban na epidemya nin mga helang na ikinakaolakit sa seksuwal na paagi, pati an AIDS. An dai ninda pag-abuso sa droga nakapoprotehir na gayo sa sainda tumang sa nakadadanyar sa isip asin nakagagadan na mga helang nin dakol na paraabuso sa droga. Asin mantang dai sinda nagpapasalin nin dugo, nalilikayan ninda an nakagagadan na mga helang na ikinakaolakit paagi sa dugo, pati an hepatitis, na nakagagadan o permanenteng nakadadanyar sa dies mil na nagpasalin nin dugo kada taon duman sana sa Estados Unidos.
19. Paano ililigtas ni Jehova an mga naglilingkod sa saiya minsan sinda magadan ngonyan?
19 Dawa pa kun an iba sa mga nananarig ngonyan ki Jehova magadan huli sa kagurangan, helang, o aksidente, ililigtas sinda ni Jehova. Babalukaton nia sinda paagi sa pagbuhay liwat. Kaya, sinadol kita ni apostol Pablo na ‘kita manarig, bakong sa sato man sana, kundi sa Dios na nagbabangon kan mga gadan.’—2 Corinto 1:9.
Sinusuportaran ni Jehova an Saiyang mga Lingkod
20, 21. (a) Anong pagtumang an malalaoman niato, arog kan ipinaheheling kan nangyari ki Jesus? (b) Paano ibinibindikar ni Jehova an saiyang banwaan, arog kan ginibo nia ki Jesus?
20 Girumdomon na “an bilog na kinaban namumugtak sa kapangyarihan kan maraot,” si Satanas na Diablo. (1 Juan 5:19) Kaya kun kamo nananarig sa Dios tutumangon kamo ni Satanas asin kan saiyang kinaban. hihingohahon nindang raoton an saindong panarig paagi sa pagtuya o paglamag, arog kan nangyari ki Jesus. Kan sia ikapako na sa hariging pasakitan, “an mga nag-aaragi nagpoon na magtuya sa saiya, na nagtatarangotango kan saindang payo asin nagsasarabi: . . . ‘Kun ika aki nin Dios, humilig ka sa hariging pasakitan!’ Sa siring man na paagi an mga poon na saserdote kairiba an mga eskriba asin kagurangnan na lalaki nagpoon na mag-olog-olog sa saiya asin nagsasarabi: ‘Nagligtas sia sa iba; an sadiri nia dai ikinakaligtas! . . . Nanarig sia sa Dios; iligtas Nia sia ngonyan kun boot Nia sia.’”—Mateo 27:39-43.
21 Pakalihis nin tolong aldaw, talagang ilinigtas nin Dios si Jesus paagi sa pagbuhay liwat sa saiya hale sa mga gadan. Alagad an kapag-arakian na idto nin mga paratuya ginadan o inoripon kan mga hukbong Romano. Mantang si Cristo bilang Hade sa langitnon na Kahadean nin Dios iyo an mamamahala sa pagbuhay liwat, kun an mga paratuyang idto mabuhay liwat, kaipuhan sindang pumasakop sa saro na tinuya ninda duwang ribong taon na an nakaagi! Iyo ibinibindikar ni Jehova an saiyang mga lingkod, na nagsasabi: “Sa Dios ako nanarig. dai ako matatakot. Ano an magigibo sakuya nin daganon na tawo?”—Salmo 56:11.
22. Ano an sinasabi ni Jehova manongod sa mga nananarig sa saiya, asin sa mga dai?
22 Manongod sa saiyang mga lingkod, si Jehova nagsasabi: “Maogma an makosog na tawo na nananarig ki Jehova, asin na an nagin kompiansa iyo si Jehova. Asin sia magigin siring sa kahoy na itinanom sa kataed kan katubigan, na pinatubo an mga gamot sa mismong kataed kan solog; asin dai nia maheheling kun dumatong an init, kundi an saiyang mga dahon magigin marambong. Asin sa taon nin paghuraw dai sia mahahadit, ni maontok man sia sa pamumunga.” Alagad sinabi man ni Jehova: “Isumpa an makosog na lalaking nananarig sa tawo asin ginigibo an laman na mani saiyang takyag, asin na an saiyang puso minarayo ki Jehova mismo. Asin sia tunay nanggad na magigin siring sa solo-solong kahoy sa kapatagan asin dai makaheheling kun dumatong an karahayan.”—Jeremias 17:5-8.
23. Ano an kaipuhan niatong gibohon kun boot niato nin buhay na daing katapusan?
23 Kaya, sa delikadong mga panahon na ini, “manarig ka ki Jehova asin gumibo ka nin marahay; mag-erok ka sa daga, asin gumawe kang may kaimbodan. Siring man maranga nanggad dian ki Jehova, asin itatao nia sa saimo an mga hinahagad kan saimong puso.” (Salmo 37:3, 4) Magin kabilang logod sa saindong naotob na mga kahagadan an balaog na buhay na daing katapusan sa matanos na bagong kinaban, na ipinanuga nin Dios na satong sinasarigan.
Mga Hapot sa Pagrepaso
◻ Anong pamantayan an dapat na otobon kan mga nananarig ki Jehova?
◻ An mga relihiyon daw kan kinaban na ini nagtotokdo nin pananarig ki Jehova?
◻ Paano nabindikar an panarig ni Hadeng Ezequias ki Jehova?
◻ Sa satong kaaldawan, paano naotob an hula sa Isaias 2:2-4?
◻ Anong ngapit an kakamtan kan mga nananarig ki Jehova?
[Ritrato sa pahina 15]
An representante kan hade nin Asiria dinuhagi si Jehova asin hinagad na sumuko an Jerusalem
[Ritrato sa pahina 16]
Sa bagong kinaban, an mga nananarig ki Jehova magkakamit nin lubos na katoninongan asin katiwasayan