Mga Hapot Hale sa mga Parabasa
◼ Ano an ginibo ni Jesus “tanganing mag-andam nin lugar” sa langit para sa saiyang mga parasunod?
Dai mahaloy bago establisaron an Pamanggihan kan Kagurangnan, sinabihan ni Jesus an saiyang maimbod na mga apostol na sia kaipuhan na humale. Siyempre, an boot niang sabihon, pagkagadan nia sa nahuhuring mga oras kan aldaw na idto, sia kaipuhan na paduman sa langit. An reaksion ni Pedro hagadon na togotan siang sumunod sa saiya. Dangan si Jesus nagsabi: “Dai mahadit an saindong puso. Tumubod kamo sa Dios, tumubod man kamo sa sako. Sa harong kan sakong Ama kadakol kan ontokan. Ta kun bako, sinabihan ko kutana kamo, huli ta ako maduman tanganing mag-andam nin lugar para sa saindo. Siring man, kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.”—Juan 14:1-3.
Anong mga “ontokan” an kaipuhan na andamon para sa mga apostol? An ibang paratradusir kan Biblia isinalin an Juan 14:2 sa paagi na nagsusuherir na si Jesus nagtataram manongod sa pagkaipo nin mga “pahingaloan” kan mga apostol sa pagduman ninda sa langit o sa pakanompong nin laen-laen na kuwarto sa langit. Pero, si W. E. Vine nagsasabi manongod sa termino sa Griego na napapalabot: “Mayo nin ano man sa termino na nagpaparisa nin separadong mga kuwarto sa Langit; ni nagsusuherir man iyan nin temporaryong mga pahingaloan sa pagbiyahe.” An termino nangangahulogan sana nin sarong lugar na ontokan. Kaya an ipinanunuga ni Jesus mga ontokan sa espirituwal na kalangitan na duman makakaibanan sia kan saiyang Ama.—Efeso 1:20; 1 Pedro 1:4; 3:21, 22.
Alagad paano aandamon ni Jesus an mga ontokan na iyan para sa saiyang maimbod na mga parasunod? Mantang nagadan bilang atang, si Jesus nagsakat sa langit tanganing ipresentar sa Dios an halaga kan saiyang dugo. An enot na makikinabang digdi iyo an mga inapod na magin kairibang paramana sa langitnon na buhay. Si apostol Pablo nagsurat: “Si Cristo naglaog, bakong sa banal na lugar na ginibo nin mga kamot, na inarog sa tunay, kundi sa langit mismo, tanganing tumindog sa atubang nin Dios para sa sato.” (Hebreo 9:12, 24-28; Roma 6:5; 8:17) Kaya kan sabihan ni Jesus an mga apostol na sia ’mag-aandam nin lugar’ para sa sainda, segurado na an nasa isip nia iyo an saiyang ’pagtindog sa atubang nin Dios para sa’ sainda. Pakatapos sana na iyan gibohon nia na sinda o an ibang tawo makasusunod sa saiya sa langit.—Filipos 3:20, 21.
May iba pa daw na kaipuhan na gibohon si Jesus tanganing mag-andam nin lugar para sa sainda? Pag-abot nin panahon, sia makapot nin kapangyarihan bilang hade asin makikipaglaban ki Satanas, na pinalalayas sia asin an saiyang mga demonyo sa langit. (Kapahayagan 12:7-9) Ini mangyayari bago an pagpopoon kan langitnon na pagkabuhay liwat kan mga apostol asin kan iba pang linahidan na natotorog sa kagadanan. (1 Tesalonica 4:14-17) Kun baga an komento ni Jesus manongod sa ’pag-andam nin lugar para sa’ saiyang mga parasunod kaiba an saiyang pagpalayas ki Satanas sa langit, dai niato masasabi.
Dugang pa, dai niato aram kun baga si Jesus may ibang asignasyon na may koneksion sa pag-andam nin lugar sa langit para sa linahidan na mga Kristiano. Pero, minsan paano masisierto niato na talagang inandam ni Jesus an dalan para sa saiyang linahidan na mga parasunod paagi sa pagpresentar sa Dios kan halaga kan saiyang “mahalagang dugo.” (1 Pedro 1:19) Basado sa dugong iyan, an bagong tipan inestablisar sa pag-oltanan ni Jehova Dios asin kan linahidan nin espiritung mga Kristiano.