Si Satanas—Tunay daw Sia?

Nagtutubod daw kamo na si Satanas nag-eeksister? Kun iyo, minalataw na kaiba kamo sa nagdidikit na minoriya. “Pag-abot kan mga taon nin 1980 an pagtubod sa Diablo nawara na apuwera sa tahaw nin konserbatibong mga Katoliko, mga karismatiko, konserbatibong mga Protestante, Ortodokso Oriental, Muslim—asin pirang okultista.” Iyan an sabi kan librong Mephistopheles—The Devil in the Modern World, ni Jeffrey Burton Russell.

Pero bako man na gabos nagpondo na sa pagtubod na si Satanas tunay. “An diablo buhay pa asin nagtatrabaho sa kinaban,” sabi ni Papa Juan Paulo II sa bago pa sanang pahayag sa Italia.

Tama daw an papa? Kun iyo, si Satanas nasa marahay na kamugtakan na gibohon an gusto nia sa kinaban. Kun an mga tawo dai nagtutubod na sia nabubuhay, dai sia ninda tutumangon. Bakong makangangalas na si Kardinal Ratzinger, pangenot na autoridad kan Batikano sa doktrina, nagsabi: “An diablo makapagpapaili sa saiyang paboritong elemento, an pagigin dai midbid.”

Talaga daw na nag-eeksister si Satanas? Kun kita nagtutubod sa Biblia, kaipuhan na an simbag niato iyo! Si Satanas nginangaranan nin dakol na beses sa ipinasabong na rekord na iyan. Halimbawa, an parasurat sa Biblia na si Pablo, na nagpapatanid manongod sa “falsong mga apostol” asin “madayang mga trabahador” sa tahaw kan Kristianong kongregasyon, nagsurat: “Asin iyan bakong makangangalas, huli ta minsan si Satanas nagmamalemale na anghel nin liwanag.” An pagheling ni Pablo ki Satanas sarong intelihente, madayang persona.​—2 Corinto 11:13, 14.

Kun siring, taano ta dai isinasaboot ni kadaklan na tawo ngonyan an pag-eksister ni Satanas? Posible na iyan tanda kan espiritu kan satong panahon. Mantang kita nabubuhay sa inaapod nin iba na panahon pakalihis nin Kristianismo, an ateismo, hedonismo, materyalismo, asin komunismo nakasalida sa relihiyosong pagtubod sa dakol na sosyedad. An minilyon na tawo dai na nagtutubod sa Dios, na naghohona na an saiyang pag-eksister dai na kaipuhan sa saindang personal na mga pilosopiya. Asin liningawan naman ninda si Satanas kaiba nin Dios. An ibang relihiyoso sa Kakristianohan, minsan ngani nagsasabing nagtutubod sa Dios, naghohona na an pagtubod ki Satanas dai na uso sa ika-20 siglong ini.

Minsan siring mahalagang mangnohon na an pagsikwal sa Dios bakong bago. Kaidtong mga 3,000 na taon na an nakaagi, an parasurat nin bersong Hebreo na si David nagsurat: “An mangmang nagsabi sa saiyang puso: ‘Mayong Jehova.’ Nangagkarasala sinda, naggiribo sinda nin makababaldeng mga gibo.” (Salmo 14:1; 53:1) Sa iba man na lugar sia nagsabi: “Am maraot sono sa saiyang kapaabhawan dai nagsisiyasat; an gabos niang kaisipan iyo an: ‘Mayo nin Dios.’” (Salmo 10:4) Kaidto pa, an mga tawo minagawe na garo baga mayo nin Dios. Asin segurado na an lohikong konklusyon iyo na kun mayo nin Dios, mayo man nin Satanas.

An Iba Nagtutubod Pa

Alagad arog kan nasabi na, an iba sagkod ngonyan nagtutubod sa sarong literal na Diablo. May mga nagtutubod sa suanoy na Zoroastrianong katokdoan na dualismo, na nagsasabi na an karahayan, an Dios asin an Diablo, seguradong poon pa kaidto dungan na nag-eeksister. An iba ngani nagsasabi na an karahayan asin karahayan asin karatan pareho kabtang kan Dios na may tolong persona. Asin dakol pa sa Kakristianohan asin Islam an nagtutubod sa pag-eksister ni Satanas. An totoo, para sa kadaklan sa mga ini, sia sagkod ngonyan nag-eeksister bilang may pakpak na espiritu na may mga sungay asin ikog na namamahala sa kaaabtan kan mga “inmortal na kalag” na idinestino sa “impiernong may kalayo,” arog kan ipinaheheling sa mga inukit kan bantog na ilustrador na Pranses na si Gustave Doré.

An totoo, para sa nagkapira, labi pa dian an pagtubod ki Satanas. Sia sinasamba ninda—magsalang paagi sa mismong ngaran nia o sa sataniko o demonikong mga rituwal. Sa rinibong taon, an panraratak asin panlulumay konektado sa pagsamba ki Satanas. Minsan sa satong moderno, mapagdudang panahon, lakop pa man giraray an Satanismo. Kun siring, bago niato pag-olayan an sinasabi kan Biblia manongod ki Satanas mismo, pag-olayan niato an nagkapirang katunayan manongod sa modernong Satanismo.

[Ritrato sa pahina 3]

Paglaladawan na Budhista sa sarong satanikong “impierno”