An Falsong Relihiyon Nagpapakang Patotot
1. Ano an pagheling nin dakol sa pagpapatotot?
INAAPOD iyan nin iba na an kagurang-guranging propesyon—an sa patotot, puta, o pampam. Sono sa usong pagkagamit, an gabos na terminong ini parareho an kahulogan, na an boot sabihon sarong inmoral na babae na ipinababakal an saiyang hawak sa mga lalaki. Pero, may panahon kaidto na ini ibinilang na sarong iginagalang na propesyon!
2, 3. Paano an trabaho nin mga saserdotisa sa suanoy na Babilonya kabaliktaran sa pagboot ni Jehova sa Israel manongod sa pagpapatotot nin mga lalaki asin babae?
2 Sa pagtaram manongod sa mga saserdote sa suanoy na Babilonya, si Propesor S. H. Hooke, sarong autoridad sa Biblikal na arkeolohiya, nagsabi: “An pagkasaserdote bako sanang sa mga lalaki, kundi an mga babae kaiba sa mga nagtatrabaho sa darakulang templo. Ibinibilang kaidto na sarong onra na makabilang sa orden nin mga saserdotisa, asin may mababaretaan kitang nagkapirang hade na idinusay an saindang mga aking babae sa pagkasaserdotisa. . . . An pinakamahalaga nindang trabaho magserbing banal na mga patotot sa darakulang kapiyestahan. . . . An templo ni Ishtar [diosa nin pangangaki asin guerra], naturalmente, igwa nin dakol na nagtatrabahong siring na mga babae.”
3 Ini kabaliktaran nanggad sa pagsamba na itatao ki Jehova Dios kan nasyon nin Israel. An Pagboot malinaw na nagsabi: “Mayo sa mga aking babae nin Israel an puwedeng magin patotot sa templo, ni puwede man na magin patotot sa templo an siisay man sa mga aking lalaki nin Israel [na naggigibo nin homoseksuwalidad]. Dai mo pagdarahon an bayad sa patotot o an halaga nin ayam sa harong ni Jehova na saimong Dios para sa ano man na sumpa, huli ta iyan bagay na ikinababalde ni Jehova na saimong Dios.” (Deuteronomio 23:17, 18) Kaya, an bayad sa patotot dai inaako bilang kontribusyon sa santuaryo nin Dios. Minsan an pagpapatotot na mayo nin relihiyosong koneksion makasosopog. An mga Israelitas pinagbotan: “Dai mo pagdigtaan an saimong aking babae sa paggibo sa saiya na mani patotot, tangani na an daga dai makaginibo nin pagpapatotot asin an daga mapano nin hababang moral.” An mga pagboot tumang sa pagpapatotot asin homoseksuwalidad, na sinasabing “makababaldeng bagay,” sarong proteksion sa nasyon, sa espirituwal asin pisikal.—Levitico 19:29; 20:13.
Mas Maraot Pa an Espirituwal na Pagpapatotot
4. Ano an pinakamaraot na klase nin pagpapatotot?
4 Alagad, sa punto-de-vista nin Dios, igwa nin mas maraot pang klase nin pagpapatotot—an espirituwal na pagpapatotot, na paghihingakong nagsasamba sa tunay na Dios mantang sa katotoohan nagsasamba asin namomoot sa ibang dios. Dinugangan pa kan suanoy na Jerusalem an saiyang pagpapatotot. Renegalohan nia an mga nasyon na nakisaro sa saiya sa espirituwal, na inaatian an tunay na pagsamba.—Ezequiel 16:34.
5, 6. Sairisay an nakakaginibo nin espirituwal na pagpapatotot sa ika-20 siglong ini, na minagiya sa anong mga hapot?
5 Dawa sa ika-20 siglong ini, an espirituwal na pagpapatotot uso sa relihiyosong sistema kan kinaban. An Kakristianohan an pinakaprominenteng kabtang kan sistemang iyan—sarong sistema na inaapod kan Biblia na “Dakulang Babilonya, an ina kan mga patotot asin kan makababaldeng mga bagay kan daga.”—Kapahayagan 17:5.
6 Alagad ta ano an ultimong kaaabtan kan Dakulang Babilonya? Asin paano makakaapektar an ultimong kaaabtan na iyan sa saindo asin sa saindong mga namomotan? Kun sinilotan nin Dios an mga patotot sa suanoy na Israel, ano an gigibohon nia manongod sa modernong espirituwal na pagpapatotot? An minasunod na artikulo sisiyasaton an mga hapot na iyan asin an mga may koneksion dian.