Dai Kamo Makipagsakal sa mga Dai Nagtutubod
“Dai kamo makipagsakal na bakong timbang sa mga dai nagtutubod. Huli ta . . . ano an pakikikabtang kan tawong may pagtubod sa daing pagtubod?”—2 CORINTO 6:14, 15.
1. Paano an sarong tugang na babae nakaagom nin dai nagtutubod?
SARO sa mga Saksi ni Jehova sa sentrong solnopan kan Estados Unidos an nagadanan kan saiyang agom na lalaki sa aksidente sa auto nagkapirang bulan na an nakaagi. “Napurisaw na gayo ako kan enot,” an nagigirumdoman nia, “alagad determinado akong dai ini togotan na makaolang sa sakong paglilingkod ki Jehova. Minsan siring, pakalihis nin duwang taon, nagpoon akong makamate na garo pagabat sa mga mag-agom sa kongregasyon. Ako asin an aki kong babae dai perming iniimbitaran sa mga pag-aling-aling kan pamilya. Kan narisa ko an mga mag-agom na Kristiano na nagpapaheling nin pagkamoot sa lambang saro, orog akong nakamate na pinabayaan. Garo mayo nin nakakarisa na nagin mas maluya ako sa espirituwal. Kaya kan an sarong kinabanon na lalaki na midbid ko sa trabaho nag-agda sako na magkakan sa luwas, uminiba ako. Bago ko marealisar idto, namomotan ko na sia. Sa katapustapusi, maluyang gayo na ako asin napangganahan kan sakong kamondoan kaya nag-oyon akong magpaagom saiya.”
2. Taano ta natural an magmawot na mag-agom, asin sa pagporma nin ano dinesenyo an pag-aragoman?
2 Iyo, an pagmawot na mabuhay kaiba nin agom puwedeng magin makosog na gayo, asin natural man ini. Siring kan sinabi mismo ni Jehova: “Bakong marahay na an lalaki magsolosolo. Magibo ako nin katabang para sa saiya, bilang komplemento [“katimbang,” saro na angay para sa saiya] nia.” (Genesis 2:18, New World Translation Reference Bible, nota sa ibaba) Dinesenyo an pag-aragoman tanganing magporma nin dayupot, nagdadanay na bogkos nin pagkasaro sa pag-oltanan nin lalaki asin babae. Bakong si Adan kundi si Jehova an nagsabi: “Babayaan nin lalaki an saiyang ama asin ina asin sia magdadanay kaiba kan saiyang agom asin sinda magigin sarong laman.” (Genesis 2:22-24; ikomparar an Mateo 19:4-6.) Tibaad an saindong puso naghihidaw para sa siring na katimbang.
3, 4. (a) Paano nagpatanid an Biblia tumang sa pagkakaigwa nin dayupot na pakikiiba sa mga dai nagtutubod? (b) Sa anong paagi puwedeng iaplikar sa pag-aragoman an sadol ni Pablo manongod sa pakikipagsakal na bakong timbang? (c) Paano kutana nasabotan kan mga Kristianong taga-Corinto an terminong “mga dai nagtutubod”? (Helingon an nota sa ibaba.)
3 Alagad, an Biblia, nagpapatanid tumang sa pagkakaigwa nin dayupot na pakikiiba sa mga dai nagtutubod. Siring kan sinabi ni apostol Pablo: “Dai kamo makipagsakal na bakong timbang [“Dai kamo makipagsakal sa bakong timbang na grupo,” The Jerusalem Bible] sa mga dai nagtutubod.a Huli ta . . . ano an pakikikabtang kan tawong may pagtubod sa daing pagtubod.”b (2 Corinto 6:14, 15) Puwedeng nasa isip ni Pablo an pagbawal kan Mosaikong Pagboot tumang sa pagsakal na magkaiba kan baka asin asno sa pag-arado. (Deuteronomio 22:10) Mas sadit an asno asin bakong kapareho an kosog asin magtitios bilang resulta kan siring na bakong timbang na pagsakal. Mantang an pag-aragoman siring sa sarong sakal na nagbobogkos sa agom na lalaki asin babae, an pag-agom kan Kristiano sa bakong kapagtubod magbubunga nin bakong timbang na pakipagsakal. (Mateo 19:6) An siring na sakal parateng nagdadara nin dugang na panggigipit asin tension sa pag-aragoman.—Ikomparar an 1 Corinto 7:28.
4 Alagad, siring kan iniilustrar kan panbukas na eksperyensia, pinili kan ibang Kristiano na mag-agom nin mga dai nagtutubod. Taano ta nasasakitan an iba na mag-agom “sanang dian sa Kagurangnan”?—1 Corinto 7:39.
Kun Taano ta an Nagkapira Naghahanap sa Ibang Lugar
5. Iilustrar kun taano an iba ta napapalabot sa romantikong paagi sa dai nagtutubod.
5 Bako na permi nindang dai iniintindi an sadol nin Dios. Konsideraron an kamugtakan kan Kristianong tugang na babae na tibaad mawot nang magpaagom. Tibaad nagmamawot sia nin Kristianong agom, alagad mayong dakol na kuwalipikadong tugang na lalaki sa grupo kan saiyang nagtutubod na mga katood. Nahahadit na sia sa saiyang edad. Tibaad mawot niang magkaigwa nin pamilya. An takot na maggurang na solo asin an pangangaipo na makamateng namomotan puwedeng gibohon siang madaling mabiktima. Kun mangyari na sarong kinabanon na lalaki an magpaheling nin interes saiya, tibaad masakit ining mapangganahan. Tibaad maboot, mahoyo siang paghelingon. Tibaad dai sia naninigarilyo o nagtataram nin maraot. Dangan an mga pangangatanosan: ‘Tara, mas marahay sia kisa sa dakol na tugang na midbid ko!’ ‘Interesado siang mag-adal.’ ‘May aram akong mga kamugtakan na sarong tugang na babae an nagpaagom sa dai nagtutubod asin sia nagin kapagtubod.’ ‘Igwa nin nagkapirang Kristianong pag-aragoman na dai nagin mapanggana!’—Helingon an Jeremias 17:9.
6, 7. (a) Paano ilinadawan nin sarong daing agom na tugang na babae an saiyang panluluya nin boot? (b) Anong hapot an maninigo niatong konsideraron?
6 Iyo, puwede nanggad na magin nakapanluluya nin boot para sa sarong Kristiano na mawot nang mag-agom. An iba ngani nadedesesperar. “Dikit na gayo an bilang nin kuwalipikadong tugang,” an sinabi nin sarong daing agom na tugang na babae sa pagladawan kan kamugtakan sa saiyang lugar. “Alagad dakulang gayo an bilang kan daing agom na mga tugang na babae. Mantang naheheling nin sarong tugang na babae na matatapos na an saiyang pagkahoben, an saiyang pagpipilian nasagkod sa dai na sana magpaagom o magpaagom sa enot na oportunidad na mag-abot.”
7 Minsan siring, malinaw an sadol kan Biblia: ‘Dai kamo makipagsakal sa mga dai nagtutubod.’ (2 Corinto 6:14) An banal na patanid daw na ini maringis o bakong makatanosan?
Sarong Kapahayagan kan Mamomoton na Pangangataman nin Dios
8. Paano ipinaheling ni Jehova na nasa puso nia an satong pinakamarahay na mga interes?
8 Nagmamakolog nanggad si Jehova dapit sa satong daing sagkod na karahayan. Bako daw, na dakulang halaga sa saiya, an itao an saiyang Aki bilang “pantubos na karibay nin dakol”? (Mateo 20:28) Bako daw sia ‘an Saro na nagtotokdo sato na pakinabangon an satong sadiri’? (Isaias 48:17) Dai daw sia nanuga na ‘dai nia itotogot na kita masugotan nin labi sa satong makakaya’? (1 Corinto 10:13) Rasonable kun siring, kun sinasabi nia sato na dai kita makipagsakal sa mga dai nagtutubod, nasa puso nia nanggad an satong pinakamarahay na mga interes! Konsideraron kun paano an patanid na ini sarong kapahayagan kan saiyang mamomoton na pangangataman sa sato.
9. (a) Anong patanid an itinao ni Pablo tumang sa pagkakaigwa nin dayupot na bogkos nin sarong Kristiano sa dai nagtutubod? (b) Ano an kahulogan kan Griegong tataramon na itrinadusir na “pagkakaoyon,” asin paano kaini iniilustrar an kasakitan na minalataw kun an Kristiano nakipagsakal sa dai nagtutubod?
9 Katuyohan kan Kaglalang na an pag-aragoman an gumibo kan pinakadayupot na bogkos sa pag-oltanan nin mga tawo, na an agom na lalaki asin agom na babae nagigin “sarong laman.” (Genesis 2:24) Madonong daw para sa sarong Kristiano na magkaigwa nin siring na dayupot na bogkos sa sarong dai nagtutubod? Nagsimbag si Pablo paagi sa pagpalataw nin serye nin nakatataros na mga hapot, na an lambang saro patienot nang naglalaom nin negatibong simbag: “Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom? Dugang pa, ano an pagkakaoyon [sa Griego, sym·phoʹne·sis] ni Cristo asin ni Belial [Satanas]? O ano an pakikikabtang kan tawong may pagtubod sa daing pagtubod?” (2 Corinto 6:14, 15) An Griegong tataramon na sym·phoʹne·sis literal na nangangahulogan na “an magkaibang pagtanog” (hale sa syn, “kaiba,” asin pho·neʹ, “sarong tanog”). Manongod ini sa pagkaoroyon na bunga nin mga instrumento sa musika. Siyempre pa, dai nin pagkakaoyon si Cristo asin si Satanas. Sa kaagid na paagi, sa bakong timbang na sakal, masakit na gayo para sa agom na lalaki asin agom na babae na ‘magkaigwa nin parehong tanog.’ Siring sinda sa duwang instrumento sa musika na dai sa tono sa lambang saro, na nagtatao nin bakong oroyon na tanog imbes na musika.
10. Ano an kinakaipuhan na mga elemento sa maogmang pag-aragoman, asin ano an mga bentaha kan timbang na pakipagsakal?
10 Siring man, paano an espirituwal na tawo puwedeng magkaigwa nin lubos na pagkakaoyon sa pisikal na tawo? (1 Corinto 2:14) An parehong mga paniniwala, prinsipyo, asin pasohan mahalagang mga elemento sa maogmang pag-aragoman. Mayo nin ibang makatatao nin mas dakulang karigonan sa pag-aragoman kisa sa mutuwal na debosyon sa Kaglalang. Kun timbang an sakal, puwedeng pakosogon kan agom na lalaki asin agom na babae an lambang saro sa pagsamba. Puwede nindang helingon sa Kasuratan kun paano areglohon an saindang mga dai pagkakaoyon. Kun siring, bako daw maliwanag na sinasabi sato ni Jehova na dai kita makipagsakal sa mga daing pagtubod huli ta mawot niang magkaigwa kita kan pinakadayupot na posibleng bogkos sa satong agom?
11. Taano an pakipagbalae sa mga bakong parasamba ta ibinawal sa Israel, asin anong nagpapahiro sa isip na hapot an minalataw?
11 An pagkuyog sa patanid kan Biblia naglilibre man sato sa makolog na mga bunga na parateng resulta kun an sarong Kristiano nakikisakal sa daing pagtubod. Bilang halimbawa, igwa nin posibilidad na patalikodon kan dai nagtutubod an Kristianong agom sa paglilingkod ki Jehova. Konsideraron an patanid ni Jehova sa suanoy na Israel. Ibinawal an pakipagbalae sa mga bakong parasamba. Taano? “Huli ta papatalikodon nia an saimong aking lalaki sa pagsunod sa sako,” nagpatanid si Jehova, “asin sinda siertong maglilingkod sa ibang mga dios.” (Deuteronomio 7:3, 4) Nakaatubang sa pagtumang hale sa dai nagtutubod na agom, igwa nin tendensia na magpadara sa pinakapasil na paagi. Madali sanang isipon, ‘Dai iyan mangyayari sako!’ Alagad nangyari iyan sa lalaking may kadonongan siring ki Salomon. Dai daw iyan puwedeng mangyari saindo?—1 Hade 11:1-6; ikomparar an 1 Hade 4:29, 30.
12. Paano an pagboot nin Dios na nagbabawal kan mga pag-agom sa mga tagaibang daga nagserbe bilang proteksion sa mga Israelitas? Iilustrar.
12 Minsan pa kun an nagtutubod dai patalikodon sa tunay na pagsamba, igwa pa man nin mga problema asin panggigipit na parateng kairiba sa nababangang pamilya sa relihiyosong paagi. Konsideraron liwat, an pagboot nin Dios sa Israel. Ipamugtak na sarong Israelitang babae an nag-oyon magpaagom sa Cananeong lalaki. Huli sa seksuwal na mga gawe na lakop sa kadagaan kan Canaan, magkakaigwa daw sia nin paggalang sa pagboot kan Dios kan babae? Sia daw bilang halimbawa, andam an boot na dai makidorog durante kan pagtiempo, siring kan hinahagad sa Mosaikong Pagboot?c (Levitico 18:19; 20:18; ikomparar an Levitico 18:27.) Sa kamugtakan kan Israelitang lalaki na nag-agom nin Cananeong babae, sia daw magsusuportar kun nagbibiyahe an saiyang agom pasiring sa Jerusalem tolong beses kada taon tanganing mag-atender sa mga kapiyestahan? (Deuteronomio 16:16) Malinaw nanggad, an pagboot nin Dios na nagbabawal sa siring na pag-aragoman nagserbe bilang proteksion para sa mga Israelitas.
13. (a) Taano ta an kinabanon na tawo mayo nin pinatood sa Biblia, Kristianong konsensia? (b) Anong mga panggigipit asin problema an naatubang kan iba na nasa nababanga sa relihiyon na pamilya?
13 Kumusta ngonyan? An moral na mga pamantayan kan kinabanon na mga tawo harayoon na gayo kan sa Biblia. Minsan pa gurano kalinig paghelingon an ibang kinabanon na tawo, mayo sinda nin pinatood sa Bibliang Kristianong konsensia. Dai sinda naggamit nin mga taon sa pag-adal kan Tataramon nin Dios, ‘sa pagbago kan saindang pag-isip’ asin ‘paghale kan daan na pagkatawo.’ (Roma 12:2; Colosas 3:9) Kaya, an Kristiano na nakikipagsakal sa dai nagtutubod parateng nagsasapeligro kan saiyang sadiri sa grabeng kolog nin boot asin kamondoan. Napaatubang an iba sa paorootrong panggigipit na makikabtang sa marigsok na mga gawe sa sekso o sa pagselebrar nin kinabanon na mga kapiyestahan. Asin an iba nagrereklamo pa ngani nin kamondoan. Siring kan isinurat nin sarong tugang na babae: “An kamondoan na mamamatean nindo kun mag-agom kamo nin sarong dai namomoot ki Jehova iyo an pinakagrabeng maiimahinar na kamondoan. Helinga, mayo kamong kahiras kan katotoohan, na iyo an pinakamahalagang bagay sa saindong buhay.”
14. (a) Sa nababangang pamilya, taano ta masakit na padakulaon an mga aki sa “disiplina asin pagtatanos nin isip ni Jehova”? (b) Ano an puwedeng magin epekto sa mga aki sa nababangang pamilya?
14 Sa nababangang pamilya, masakit na gayo an pagpadakula sa mga aki sa “disiplina asin pagtatanos nin isip ni Jehova.” (Efeso 6:4) An dai nagtutubod daw bilang halimbawa, andam an boot na totogotan an mga aki na mag-atender sa mga pagtiripon o makikabtang sa ministeryo sa langtad? Parateng an mga aki minasagkod na nababanga sa saindang pagkamoot—namomotan ninda an parehong magurang, alagad saro sanang magurang an namomoot ki Jehova. Sinabi nin sarong tugang na babae na nagpaagom sa dai nagtutubod: “Naeksperyensiahan ko an kadakol na kolog nin boot durante kan sakong 20 taon nin pag-agom. Nagdakula an sakong mga aking lalaki sa kadakol na karibokan asin aburibo sa emosyon asin kabtang na ngonyan kan kinaban. An aki kong babae parateng aburido ta permi siang harayo sako huli sa mga katanosan sa pagsongko kan saiyang ama. An gabos na problemang ini nag-eksister huli ta kan ako 18, pinili kong dai intindihon an saro kan mga prinsipyo ni Jehova.” Anong prinsipyo? Dai kamo makipagsakal sa mga dai nagtutubod!
15. Taano ta nagsadol sato si Jehova na dai makipagsakal sa mga dai nagtutubod?
15 Malinaw nanggad, mawot ni Jehova na magkaigwa kita kan pinakamarahay sa buhay. An hinahagad nia sa sato, kairiba an sadol nia na dai kita makipagsakal sa mga dai nagtutubod, para sa satong karahayan. (Deuteronomio 10:12, 13) An pag-agom nin dai nagtutubod dai pag-intindi sa Makakasuratan na sadol, praktikal na kadonongan, asin an parateng makolog na eksperyensia kan iba.
Mga Hapot na Parateng Ihinahapot
16, 17. (a) Kun bako kitang maingat, paano an emosyon puwedeng makaolang sa marahay na pag-iisip? (b) Maninigo daw na dai intindihon an sadol nin Dios huli sa nalalaen na mga kamugtakan na dian an sarong Kristiano nag-agom nin dai nagtutubod asin ngonyan pareho na sindang naglilingkod ki Jehova? Ipaliwanag.
16 Alagad, kun bako kitang maingat, an emosyon puwedeng makaolang sa marahay na pag-iisip. Puwede kitang magpoon na makamateng nalalaen an satong kamugtakan. Konsideraron an nagkapirang hapot na mas parateng ihinahapot.
17 Ano an masasabi manongod sa mga kamugtakan na dian an sarong tugang na lalaki o tugang na babae nag-agom nin dai nagtutubod, asin ngonyan pareho na sindang naglilingkod ki Jehova? Minsan siring, nabalga an mga prinsipyo ni Jehova. An resulta daw nagpapakangmatanos kan mga paagi? Sa pag-ilustar kan pagmansay nin Dios sa mga dai nag-intindi kan saiyang sadol iyo an kaso kan mga Judio na nagbalik hale sa pagkabihag sa Babilonya. An iba nagkua nin paganong mga agom, an mga parasurat kan Biblia na si Esdras asin Nehemias prangka sa pagkondenar kan saindang mga gibo. An mga Judio “naghirong dai nin kaimbodan,” naggibo nin “dakulang karatan,” asin nagkaigwa nin “pagkakulpable.” (Esdras 10:10-14; Nehemias 13:27) Saro pang maninigong konsideraron: Kun dai niato iniintindi an sadol nin Dios, puwede niatong makolgan an satong sadiri sa espirituwal na paagi, na nakokolgan an satong konsensia. Sarong tugang na babae na an dai nagtutubod na agom sa katapustapusi nagin paratubod nagsabi: ‘Igwa pa akong emosyonal na mga pinilaan. Dai ko ikataram kun gurano kagrabe an namamatean ko kun itinotokdo kami kan iba asin nagsasabi, “Alagad nagin epektibo sa sainda.” ’
18. Ano an dalan nin kadonongan kun naaakit kamo sa saro na dai pa nabautismohan, asin sa siring ano an saindong ipinaheheling?
18 Kumusta kun naaakit kamo sa saro na nag-aadal kan Biblia asin nag-aatender sa mga pagtiripon, minsan siring na dai pa sia nabautismohan? Naggagayagaya kita kun may nagpaheling nin interes sa katotoohan kan Biblia. Alagad, an hapot iyo ini: Kaipuhan daw nindong ipadagos an saindong kaisipan? Sa prangkang pagtaram, an dalan nin kadonongan iyo an maghalat sagkod sa nagkapirang panahon pakatapos na mabautismohan an saindong katood asin mag-oswag sa pagpapaheling kan mga bunga kan espiritu nin Dios bago kamo mag-date. (Galacia 5:22, 23) Tibaad bakong madali na iaplikar an siring na sadol, alagad sa paggibo kan siring ipaheheling nindo an debosyon sa mga prinsipyo kan Biblia; magbubugtak ini nin marahay na pundasyon para sa tunay na kaogmahan sa pag-aragoman. Kun an saindong katood tunay nanggad na nagmamakolog para saindo asin tunay nanggad na namomoot ki Jehova, mayong duwa-duwa na andam siang maghalat sagkod na kamo pareho nang “dian sa Kagurangnan”—nagdusay asin bautisado—bago mag-ilusyon. Girumdomon man, na an tunay na pagkamoot dai nakokolgan sa paglihis kan panahon.—1 Corinto 7:39; Genesis 29:20.
19. Ano an maninigo nindong isipon kun nagkakaigwa kamo nin kasakitan sa paghanap nin agom sa tahaw kan mga kapagtubod?
19 Kumusta kun nagkakaigwa kamo nin kasakitan sa paghanap nin angay na magigin agom sa tahaw kan mga kapagtubod? “Ako 26 anyos an edad, daraga, asin tunay na mamondo,” an sinabi nin sarong tugang na babae. Totoo, an pagigin daing agom tibaad masakit para saindo, alagad an mga problema na bunga nin pakikipagsakal na bakong timbang sa pag-aragoman puwedeng magin mas masakit pa ngani! An pagkuyog sa sadol nin Dios nangangaipo nin pagtubod, pagpopogol sa sadiri, asin pakatios, alagad laoman na si Jehova nakakaaram asin nagmamawot kan pinakamarahay para saindo. (1 Pedro 5:6, 7) Ipamibi an bagay na ini, asin dangan maghalat ki Jehova. (Salmo 55:22) Sa sistemang ini nin mga bagay, mayo nin siisay man na igwa nin napanigoan na buhay sa sangkap na paagi. An saindong puso tibaad nagmamawot nin agom. Alagad, an iba igwa man kan saindang mga problema, an iba kan mga iyan dai mabobolong sa sistemang ini. Solamenteng sa madatong na bagong kinaban sana lubos na mapapanigoan “an mawot nin lambang bagay na may buhay.”—Salmo 145:16.
20. Paano ipinahayag kan sarong daing agom na tugang na babae an saiyang determinasyon, asin sa siring na pagigin determinado, magkakaigwa kamo nin anong satispaksion?
20 Mientras tanto, magin determinado na dai makipagsakal sa dai nagtutubod. Sarong 36 anyos an edad na tugang na babae an nagpahayag kan saiyang determinasyon sa paaging ini: “Aroaldaw namimibi ako ki Jehova para sa sarong agom. Mayo akong pagmawot na maghanap sa luwas kan organisasyon ni Jehova, alagad perming yaon an mga sugot. Mientras tanto, plano kong pataluboon an mga kuwalidad na magpapaoswag sa sako bilang sarong persona tanganing ako magin an klase nin espirituwal na babae na hinahanap nin sarong espirituwal na lalaki.” Siring daw kaiyan an saindong determinasyon? Kun siring, magkakaigwa kamo nin satispaksion na naggigikan sa pagpapatunay kan saindong kaimbodan sa Dios nin banal na hustisya.—Salmo 37:27, 28.
[Mga Nota sa Ibaba]
a Sa 1 Corinto 14:22, ginamit ni Pablo an terminong “mga dai nagtutubod” na laen sa “mga nagtutubod,” o bautisadong mga tawo. Kun siring, masasabotan kan mga taga-Corinto an tataramon na “mga dai nagtutubod” sa pagsambit sa bakong bautisadong mga tawo.—Helingon an Gibo 8:13; 16:31-34; 18:8.
b “Sa pinahiwas na porma an prinsipyo puwedeng ipahayag nin siring: ‘Dai magkaigwa nin ano man na relasyon, minsan temporaryo o permanente, sa mga dai nagtutubod na puwedeng gumiya sa pakikompromiso kan Kristianong mga pamantayan o magsapeligro kan karigonan kan Kristianong saksi. Asin taano ta magkaigwa nin siring na pagbulag? Huli ta an dai nagtutubod dai nin pakikisumaro sa Kristianong mga pamantayan, simpatiya, o mga pasohan.’ ”—The Expositor’s Bible Commentary, Tomo 10, pahina 359.
c Helingon an The Watchtower kan Setyembre 15, 1972, pahina 575-6.
Puwede daw Nindong Ipaliwanag?
◻ Paano nagpatanid an Biblia tumang sa pagkakaigwa nin dayupot na pakikiiba sa mga dai nagtutubod?
◻ Taano ta an ibang nagdusay na Kristiano naghahanap nin agom sa luwas kan kongregasyon?
◻ Paano an patanid ni Jehova manongod sa bakong timbang na pakipagsakal tunay na kapahayagan kan saiyang mamomoton na pagmakolog sa sato?
◻ Anong mga hapot manongod sa paghanap nin agom an parateng ihinahapot, asin paano nindo sisimbagon an mga iyan?