Sunodon an Diosnon na Debosyon Bilang Nabautismohan na mga Kristiano
“Minsan siring, ika, O tawo nin Dios, . . . sunodon mo an katanosan, diosnon na debosyon.”—1 TIMOTEO 6:11.
1. Ano an isisimbag nindo sa hapot na, Ano an pinakamahalagang aldaw sa saindong buhay? Taano ta iyan an simbag nindo?
ANO an pinakamahalagang aldaw sa saindong buhay? Kun kamo nabautismohan na Saksi ni Jehova, daing duwa-duwa na kamo masimbag, ‘Tara, an aldaw na ako nabautismohan!’ Totoo nanggad, an bautismo napakahalagang pangyayari sa saindong buhay. Iyan panluwas na simbolo na kamo guminibo nin kompleto asin lubos na pagdusay ki Jehova na gibohon an saiyang kabotan. An saindong bautismo nagtatanda sa petsa kan pagkaordenar sa saindo bilang ministro kan Kaharohalangkaweng Dios, si Jehova.
2. (a) Paano ikaiilustrar na an bautismo bakong an ultimong aksion na saindong ginigibo sa saindong pagigin Kristiano? (b) Anong mahahalagang preliminaryong aksion an ginibo nindo bago kamo nagpabautismo?
2 Alagad, an bautismo daw an ultimong aksion na gigibohon nindo sa saindong pagigin Kristiano? Dai nanggad! Bilang ilustrasyon: Sa dakol na kadagaan an kasal nagtatanda sa katapusan nin sarong panahon nin pagplano asin pag-andam (asin sa parate nin pag-ilusyonan). Kadungan kaiyan, iyan nagtatanda sa kapinonan nin pag-ibaiba sa buhay bilang mag-agom. Siring man, an saindong bautismo iyo an kulminasyon nin sarong panahon nin pag-andam na dian kamo guminibo nin nagkapirang mahahalagang preliminaryong aksion. Nagkamit kamo nin kaaraman sa Dios asin ki Cristo. (Juan 17:3) Nagpoon kamong tumubod ki Jehova bilang an tunay na Dios, ki Cristo bilang saindong Paraligtas, asin sa Biblia bilang Tataramon nin Dios. (Gibo 4:12; 1 Tesalonica 2:13; Hebreo 11:6) Ipinaheling nindo an pagtubod na iyan paagi sa pagsolsol sa dati nindong gawe asin pagbakle pasiring sa matanos na gawe. (Gibo 3:19) Dangan nagdesisyon kamo na idusay an saindong sadiri ki Jehova na gibohon an saiyang kabotan. (Mateo 16:24) Sa katapustapusi, nabautismohan kamo.—Mateo 28:19, 20.
3. (a) Paano niato ikapaheheling na an satong bautismo nagtatanda sa kapinonan kan buhay nin dusay na paglilingkod sa Dios? (b) Anong mga hapot an minalataw, asin taano ta maninigo kitang magkainteres na gayo sa mga simbag?
3 Alagad, an saindong bautismo bakong an katapusan kundi an kapinonan kan buhay nin dusay na banal na paglilingkod sa Dios. Arog kan komento nin sarong iskolar sa Biblia, an Kristianong buhay dapat na bakong ‘biglang paghiro sa primero na sinusundan nin pinagkatodan nang dai paghiro.’ Kun siring, paano nindo ikapaheheling na sa kaso nindo, an bautismo bako sanang ‘biglang paghiro sa primero’? Paagi sa pagsunod sa parasiyempreng dalan nin diosnon na debosyon. Ano ining diosnon na debosyon? Taano ta kaipuhan na sunodon iyan? Paano daw nindo orog na mapatatalubo iyan sa saindong buhay? An mga simbag maninigong pagkainteresan na gayo niato, huh ta kaipuhan na kita magin mga tawo na midbid sa mga “gibo nin diosnon na debosyon” tangani kitang makaligtas sa nagdadangadang na aldaw kan paghokom ni Jehova.—2 Pedro 3:11, 12.
An Kahulogan nin Diosnon na Debosyon
4. Ano an ihinatol ni Pablo na gibohon ni Timoteo, asin ano an kamugtakan ni Timoteo kan panahon na ini?
4 Sa pag-oltanan nin 61 asin 64 C.E., isinurat ni apostol Pablo an enot niang pinasabngan na surat sa Kristianong disipulong si Timoteo. Pakasaysayan kan mga peligro na puwedeng sagkodan kan pagkamoot sa pirak, si Pablo nagsurat: “Minsan siring, ika, 0 tawo nin Dios, dumulag ka sa mga bagay na ini. Kundi sunodon mo an . . . diosnon na debosyon.” (1 Timoteo 6:9-11) Interesante nanggad, kan panahon na idto si Timoteo seguro mga 30 anyos na. Nakapagbiyahe na sia nin hararayo kaiba ni apostol Pablo asin tinawan na kan autoridad na magnombra nin mga paraataman asin ministeryal na lingkod sa mga kongregasyon. (Gibo 16:3; 1 Timoteo 5:22) Pero, hinatolan ni Pablo an nagdusay asin nabautismohan, maygurang na Kristianong ini na sumunod sa diosnon na debosyon.
5. Ano an kahulogan kan mga tataramon na “diosnon debosyon”?
5 Ano an boot sabihon ni Pablo sa mga tataramon na “diosnon na debosyon“? An orihinal na termino sa Griego (eu·seʹbei·a) puwedeng itradusir sa literal na “naggagalang nin igo.” Manongod sa kahulogan kaiyan, mababasa niato: “An eusebeia minalataw kun beses sa sentido na nagsusuherir nin personal na relihiyosong debosyon sa modernong mga inskripsion . . . pen an mas pankagabsan na kahulogan kaiyan sa popular na Griego kan panahon na Romano ‘kaimbodan; . . . Para sa mga Kristiano an eusebeia iyo an pinakahalangkaw na klase nin debosyon sa Dios.” (Christian Words, ni Nigel Turner) Kaya sono sa pagkagamit sa Kasuratan, an mga tataramon na “diosnon na debosyon” napapanongod sa paggalang o debosyon na may kaimbodan ki Jehova Dios mismo.
6. Paano pinatutunayan nin sarong Kristiano an saiyag diosnon na debosyon?
6 Alagad, an diosnon na debosyon na ini bako sanang pagmateng may pagsamba. Kun paanong “an pagtubod na daing gibo gadan,” siring man, an diosnon na debosyon kaipuhan na ipahayag sa buhay nin saro. (Santiago 2:26) Sa New Testament Words, si William Barclay nag. surat: “Bako sana na [an eu·seʹbei·a asin iba pang konektadong termino] nagpapahayag kar pagmateng iyan nin hararom na paggalang asin pagtaong-onra, kundi iyan nagtatao man kan ideya nin pagsamba na angay sa hararom ns paggalang na iyan, asin nin buhay na may aktibong pagkuyog na angay sa pagtaong-onrang iyan.” An eu·seʹbei·a tinatawan pa nin dagdag na kahulogan na “praktikal na gayong paggirumdom sa Dios sa gabos na kabtang nin buhay.” (The Second Epistle General of Peter and the General Epistle of Jude, ni Michael Green) Kun siring, an Kristiano dapat na tumao nin patotoo sa saiyang personal na pagkadayupot ki Jehova paagi sa saiyang pamumuhay.—1 Timoteo 2:2; 2 Pedro 3:11.
Kaipuhan an Daing Kapagalan na Paghihingoa
7. Ano an boot sabihon ni Pablo kan sadolon nia si Timoteo, minsan ngani sia nabautismohan na, na “sunodon” an diosnon na debosyon?
7 Alagad, ano an napapalabot sa pagkultibar asin pagpaheling nin diosnon na debosyon? Iyan daw pagpabautismo sana? Girumdoma na si Timoteo, minsan ngani nabautismohan na, sinadol na “sunodon [sa literal, ‘padagos mong sunodon’ iyan.a (1 Timoteo 6:11, Kingdom Interlinear) Malinaw na dai boot sabihon ni Pablo na an disipulong si Timoteo mayo nin diosnon na debosyon. Imbes, idinodoon nia sa saiya an pangangaipo na padagos na sunodon iyan na may makosog na pagmawot asin kaigotan. (Ikomparar an Filipos 3:14.) Malinaw na ini parasiyempreng pagsunod. Si Timoteo, kapareho nin gabos na nabautismohan na Kristiano, puwedeng magpadagos na umoswag sa pagpaheling nin diosnon na debosyon.
8. Paano ipinaheling ni Pedro na kaipuhan an daing kapagalan na paghihingoa tanganing an nagdusay, nabautismohan na Kristiano, makasunod sa diosnon na debosyon?
8 Kaipuhan an daing kapagalan na paghihingoa tanganing an nagdusay, nabautismohan na Kristiano makasunod sa diosnon na debosyon. Sa pagsurat sa nabautismohan na mga Kristiano na may paglaom na “magin mga kaambit sa banal na naturalesa,” si apostol Pedro nagsabi: “Iyo, sa dahelan mismong ini, paagi sa pagtao nindo bilang simbag kan gabos na odok na paghihingoa, idagdag sa saindong pagtubod an karahayan, sa saindong karahayan an kaaraman, sa saindong kaaraman an pagpopogol sa sadiri, sa saindong pagpopogol sa sadiri an pakatagal, sa saindong pakatagal an diosnon na debosyon.” (2 Pedro 1:4-6) Malinaw na kaipuhan an pagtubod tanganing ikapresentar niato an satong sadiri sa bautismo. Minsan siring, pakapabautismo, dai kita puwedeng magpaa-tong, na kontento na sa paramas sanang Kris-tianismo. Imbes, mantang kita nag-ooswag sa Kristianong pamumuhay, kaipuhan na padagos kitang magkultibar nin ibang mararahay na kuwalidad, kaiba an diosnon na debosyon, na ikadadagdag sa satong pagtubod. Ini, sabi ni Pedro, nagkakaipo kan satong odok na paghihingoa.
9. (a) Paano ipinag-iilustrar kan termino sa Griego para sa “idagdag” kun guranong paghihingoa an kaipuhan tanganing makultibar an diosnon na debosyon? (b) Ano an isinasadol sa sato ni Pedro na gibohon?
9 An termino sa Griego na ginagamit ni Pedro para sa “idagdag” (e·pi·kho·re·geʹo) may interesanteng pinaghalean asin nag-iilustrar kun guranong paghihingoa an kaipuhan. Iyan gikan sa sarong nombre (kho·re·gosʹ) na sa literal nangangahulogan “an nangengenot sa sarong koro.” Iyan nanonongod sa saro na nagbabayad sa gabos na gastos sa pagtokdo asin pagsustento sa sarong koro sa pagpasale nin sarong drama. An siring na mga tawo boluntad na isinasaabaga an paninimbagan na ini huli sa pagkamoot sa saindang siudad asin binabayadan an gabos na gastos hale sa sadiri nindang bulsa. Ipinag-oorgolyo nin siring na mga tawo na gumastos nin dakol tanganing ikatao an gabos na kaipuhan para sa sarong nobleng pasale. An termino sa huri nangahulogan “idagdag, itao nin abunda.” (Ikomparar an 2 Pedro 1:11.) Kaya sinasadol kita ni Pedro na dagdagan niato an satong sadiri nin, bako sanang kadikit na diosnon na debosyon, kundi kan pinakaabundang kapahayagan na mahihimo niato kan mahalagang kuwalidad na ini.
10, 11. (a) Taano ta kaipuhan an paghihingoa tanganing makultibar asin ikapaheling an diosnon na debosyon? (b) Paano niato gaganahon an pakikilaban?
10 Alagad, taano ta kaipuhan an siring na paghihingoa tanganing makultibar asin ikapaheling an diosnon na debosyon? Primero, yaon an pakikilaban sa makasalan na laman. Mantang “an tendensia kan puso nin tawo maraot poon sa saiyang pagkaniaki,” bakong pasil na mamuhay sa aktibong pagkuyog sa Dios. (Genesis 8:21; Roma 7:21-23) “An gabos na nagmamawot na mamuhay sa kabanalan kaibahan ni Cristo Jesus paglalamagon man,” sabi ni apostol Pablo. (2 Timoteo 3:12) Iyo, an Kristiano na naghihingoang mamuhay sa paagi na ikinaoogma nin Dios kaipuhan na mapalaen sa kinaban. Sia may laen na pamantayan asin laen na mga pasohan. Arog kan patanid ni Jesus, ini nakapupukaw sa pagkaongis kan maraot na kinaban.—Juan 15:19; 1 Pedro 4:4.
11 Minsan siring, kaya niatong ganahon an pakikilaban, huli ta “si Jehova tataong magligtas sa mga tawong may diosnon na debosyon hale sa pagbalo.” (2 Pedro 2:9) Alagad, kaipuhan na gibohon niato an satong kabtang paagi sa pagpapadagos na sumunod sa diosnon na debosyon.
Pagkultibar sa Diosnon na Debosyon
12. Paano ipinaririsa ni Pedro kun ano an kaipuhan tanganing orog na makultibar an diosnon na debosyon?
12 Kun siring, paano daw nindo makukultibar nin orog pa an diosnon na debosyon? Si apostol Pedro nagtao nin ideya. Sa 2 Pedro 1:5, 6, kan ilinilista an mga kuwalidad na kaipuhan na idagdag sa satong pagtubod, ilinista nia an kaaraman na enot sa diosnon na debosyon. Sa eroenotan pa sa iyo man sanang kapitulo, sia nagsurat: “An saiyang banal na kapangyarihan nagtao sa sato nin daing bayad kan gabos na bagay na mapadapit sa buhay asin diosnon na debosyon, paagi sa tamang kaaraman kan saro na nag-apod sa sato.” (2 Pedro 1:3) Kaya iinaasosyar ni Pedro an diosnon na debosyon sa tamang kaaraman ki Jehova.
13. Taano ta kaipuhan an tamang kaaraman sa pagkultibar nin diosnon na debosyon?
13 An totoo, kun mayo nin tamang kaaraman imposible na makultibar an diosnon na debosyon. Taano? Bueno, girumdoma na an diosnon na debosyon para ki Jehova mismo asin pinatutunayan kan satong paagi nin pamumuhay. Kaya kaipuhan an tamang kaaraman ki Jehova, ta napapalabot dian an pakamidbid sa saiya sa personal, dayupot, na biyong naaaraman an saiyang mga kuwalidad asin an saiyang mga dalan. Labi pa kaiyan, kalabot dian an paghihingoa na arogon sia. (Efeso 5:1) Mientras na orog kitang nag-ooswag sa pakanood manongod ki Jehova asin sa pagpaheling kan saiyang mga dalan asin kuwalidad sa satong buhay, orog man niato siang namimidbid. (2 Corinto 3:18; ikomparar an 1 Juan 2:3-6.) Ini man nagbubunga nin mas hararom na pag-apresyar sa mahahalagang kuwalidad ni Jehova, nin orog na diosnon na debosyon.
14. Tanganing magkamit nin tamang kaaraman, ano maninigong kaiba sa satong programa nin personal na pag-adal sa Biblia, asin taano?
14 Paano nindo makakamtan an siring na tamang kaaraman? Mayo nin mga gutos. Tanganing magkamit nin tamang kaaraman, kaipuhan na mahigos kita sa pag-adal sa Tataramon nin Dios asin mga publikasyon na basado sa Biblia. Maninigong kaiba sa personal na pag-adal na iyan an regular na programa nin pagbasa sa Biblia, arog kan nakaiskedyul may koneksion sa Teokratikong Paadalan sa Pagmiministro. (Salmo 1:2) Mantang an Biblia regalo ni Jehova, an ginigibo niato sa personal na pag-adal sa Biblia nagpapaheling kun gurano an pag-apresyar niato sa regalong iyan. Ano an ipinaheheling kan saindong mga ugale sa personal na pag-adal manongod sa rarom kan saindong pag-apresyar sa espirituwal na mga probisyon ni Jehova?—Salmo 119:97.
15, 16. (a) Ano an makatatabang sato na tuboan nin espirituwal na gana para sa personal na pag-adal sa Biblia? (b) Tanganing an personal na pag-adal sa magbunga kan pakakultibar niato nin diosnon na debosyon, ano an maninigong gibohon kun binabasa an saroni kabtang kan Tataramon nin Dios?
15 Totoo, an pagbasa asin pag-adal bakong madali para sa nagkapira. Alagad sa pag-agi nin panahon asin paagi sa paghihingoa, puwede kamong tuboan nin espirituwal na gana para sa personal na pag-adal sa Biblia. (1 Pedro 2:2) Kun hohorophoropon nindo na may pag-apresyar an gabos na ginibo ni Jehova Dios, ginigibo, asin gigibohon pa para sa saindo, pahihiroon kamo kan saindong puso na adalan an gabos nindong kayang adalan manongod sa saiya.—Salmo 25:4.
16 Alagad tanganing an personal na pag-adal na iyan sa Biblia magbunga kan pakakultibar nindo nin diosnon na debosyon, an katuyohan nindo dai puwedeng makatapos sana nin mga pahina o panoon nin impormasyon an saindong isip. Imbes, kun binabasa nindo an sarong kalr tang kan Tataramon nin Dios, kaipuhan na tawan nindo nin panahon an paghorophorop sa pinag-adalan, na hinahapot an saindong sadri nin mga arog kaini: ‘Ano an itinotokdo kaiyan sa sako manongod sa maboot na mga kuwalidad asin dalan ni Jehova? Paano ko daw orog na maaarog si Jehova sa bagay na ini?’
17. (a) Ano an nanonodan niato manongod sa pagkaherak ni Jehova sa libro nin Oseas? (b) Paano kita maninigong maapektaran kan paghorophorop sa pagkaherak ni Jehova?
17 Helinga an sarong halimbawa. Kaidtong nahaloyhaloy na an asignasyon sa sato na basahon sa Biblia sa Teokratikong Paadalan sa Pagmiministro dinara kita sa librong Oseas. Pakabasaha kan librong ini sa Biblia, puwede nindong ihapot sa sadiri: ‘Ano an nanonodan ko manongod ki Jehova bilang sarong Persona—an saiyang mga kuwalidad asin an saiyang mga dalan—sa librong ini?’ An pagkagamit dian kan nahuhuring mga parasurat sa Biblia nagpaparisa na dakol an manonodan niato manongod sa maboot na pagkaherak ni Jehova sa libro nin Oseas. (Ikomparar an Mateo 9:13 sa Oseas 6:6; Roma 9:22-26 sa Oseas 1:10 asin 2:21-23.) An pagigin andam ni Jehova na magpaheling nin pagkaherak sa Israel ipinag-ilustrar kan pagtratar ni Oseas sa agom nia, si Gomer. (Oseas 1:2; 3:1-5) Minsan ngani lakop sa Israel an pagpabolos nin dugo, paghabon, pakikisaro, asin pagsamba sa ladawan, si Jehova ‘nagtaram sa puso nin Israel.’ (Oseas 2:13, 14; 4:2) Si Jehova dai obligadong magpaheling nin siring na pagkaherak pero gigibohon nia sa “sadiri niang kabotan,” basta an mga Israelitas magpaheling nin odok sa pusong pagsolsol asin talikdan an saindang makasalan na pamumuhay. (Oseas 14:4; ikomparar an Oseas 3:3.) Mantang hinohorophorop nindo nin arog kaini an pambihirang pagkaherak ni Jehova, pupukawon kaiyan an saindong puso, na pinasasarig an saindong personal na relasyon sa saiya.
18. Pakapaghorophorop sa pagkaherak ni Jehova na idinodoon sa Oseas, ano an puwede nindong ihapot sa saindong sadiri?
18 Alagad orog pa dian an kaipuhan. “Maogma an mga maheherakon, huh ta sinda man magkakamit nin pagkaherak,” sabi ni Jesus. (Mateo 5:7) Kun siring, pakapaghorophorop sa pagkaherak ni Jehova na idinodoon sa libro nin Oseas, hapota an saindong sadiri: ‘Paano ko daw orog na maaarog an pagkaherak ni Jehova sa sakong pakikiiba sa iba? Kun an tugang na lalaki o babae na nagkasala o nakakolog sa sako maghagad nin tawad, nagpapatawad daw ako “sa kaogmahan”?’ (Roma 12:8; Efeso 4:32) Kun kamo naglilingkod sa kongregasyon bilang nombradong magurang, puwede nindong hapoton an saindong sadiri: ‘Kun nagkakapot nin hudisyal na mga kaso, paano ko daw orog na maaarog si Jehova, na “andam na magpatawad,” partikularmente kun an nagkasala nagtatao nin tunay na ebidensia nin odok sa pusong pagsolsol?’ (Salmo 86:5; Talinhaga 28:13) ‘Ano an maninigo kong hanapon bilang basihan sa pagpaheling nin pagkaherak?’—Ikomparar an Oseas 5:4 asin 7:14.
19, 20. (a) Ano an ibinubunga kun an pag-adal sa Biblia ginigibo sa lubos na paagi? (b) Ano an dugang pang tabang sa pagkultibar sa diosnon na debosyon?
19 Magigin kapakipakinabang nanggad an saindong personal na pag-adal sa Biblia kun ginigibo sa siring kalubos na paagi! An saindong puso magsusulwak sa pag-apresyar sa mahahalagang kuwalidad ni Jehova. Asin paagi sa padagos na paghihingoa na arogon an mga kuwalidad na ini sa saindong buhay, mapakokosog nindo an saindong personal na relasyon sa saiya. Paagi kaiyan makasusunod kamo sa diosnon na debosyon bilang dusay, nabautismohan na lingkod ni Jehova.—1 Timoteo 6:11.
20 An dugang pang tabang sa pagkultibar sa mahalagang kuwalidad na ini manonompongan ki Jesu-Cristo—an sangkap na halimbawa sa diosnon na debosyon. Paano makatatabang saindo an pag-arog sa halimbawa ni Jesus kapwa sa pagkultibar asin sa pagpaheling rain diosnon na debosyon? An artikulo na nasa pahina 18 magpapaliwanag kaini asin kan iba pang konektadong hapot.
[Nota sa Ibaba]
a Mapadapit sa terminong Griego na di·oʹko (“sunodon”), an The New International Dictionary of New Testament nagpapaliwanag na sa mga klasikal na literatura an termino “nangangahulogan sa lit[eral] lapagon, sunodon, lamagon, . . . asin sa piguratibo sunodon na may kaigotan an sarong bagay, pagmaigotan na magibo an sarong bagay, pagmaigotan na kamtan.
Ano an Isisimbag Nindo?
◻ Taano an bautismo ta bakong an ultimong aksion na ginigibo nindo sa saindong pagigin Kristiano?
◻ Ano an kahulogan nin “diosnon na debosyon,” asin paano nindo pinatutunayan iyan?
◻ Taano ta kaipuhan an daing kapagaian na paghihingoa tanganing makultibar an diosnon na debosyon?
◻ Paano nindo orog na makukultibar an diosnon na debosyon?