Maogmang mga Hobenes sa Paglilingkod ki Jehova

“Minsan an sarong aki namimidbid paagi sa saiyang mga gawe, paagi sa kun baga an saiyang gawe malinig asin tama.”—TALINHAGA 20:11, New International Version.

1. Ano an pira sa pambihirang mga bagay na sinasabi kan Biblia manongod ki Samuel?

AN HOBEN na si Samuel tibaad tolo sagkod limang taon pa sana an edad kan sia pumoon na “maglingkod” sa tabernakulo ni Jehova sa Silo. An saro sa saiyang mga trabaho bukasan an “mga pinto kan harong ni Jehova.” An Biblia nagsasabi na “si Samuel nagdadakula asin nagigin orog na kawiliwili kapwa sa pagheling ni Jehova asin nin mga tawo man.” Kan sia dakula na, ibinalik nia an Israel sa tunay na pagsamba. Sia naglingkod sa Dios “sa bilog na panahon na nabuhay sia.” Dawa kan sia “gurang na asin ubanon na” sinasadol pa man giraray nia an banwaan na “matakot sana kamo ki Jehova, asin . . . maglingkod sa saiya sa katotoohan.” Bako daw na marahayon kun masabi nin mga tawo an mararahay na bagay na ini manongod sa saindo kun paanong sinasabi iyan kan Biblia manongod ki Samuel?—1 Samuel 1:24; 2:18, 26; 3:15; 7:2-4, 15; 12:2, 24.

2. Ano an nanonodan nin saradit sa pagtiripon kan banwaan ni Jehova ngonyan?

² Kun kamo saro sa mga Saksi ni Jehova o nag-aatender sa saindang mga pagtiripon na Kristiano, mangalagkalag kamo sa Kingdom Hall na duman pinag-aadalan an leksion na ini. Maheheling nindo an gabos na edad. Tibaad may mga “gurang na asin ubanon na.” Igwa man nin mga magurang, hobenes, saradit na aki, asin pati mga omboy pa. Nakakanood na daw an mga saradit? Iyo. Hapoton sana nindo an mga dinara sa siring na mga pagtiripon kan sinda sadit pa. Sasabihon ninda nin sadiosan sa saindo na poon pa sa saindang pagkaniaki, nakakanood na sindang igalang an Dios, kamotan an saiyang banwaan, asin apresyaron an mga lugar na duman sia sinasamba. Sa pag-agi nin panahon, an mga saradit nakakanood nin makangangalas na mga katotoohan. An dakol na hobenes, pakatalubo sa kaaraman asin pag-apresyar, nagigin kabtang kan ‘mga soltero asin mga daraga, mga gurang asin mga aki’ na sinadol kan salmista na ‘omawon an ngaran ni Jehova, huli ta an saiyang ngaran sana an halangkaw na dai maaabot.’—Salmo 148:12, 13.

3. Taano ta an mga hobenes na nakaaaram kan Biblia laen an punto-de-vista sa buhay kisa mga dai nakaaaram?

³ Kun kamo hoben pa na perming dinadara kan saindong mga magurang sa siring na mga pagtiripon, kamo nangorognang mapalad. An dakol na hobenes nariribok an isip huli sa mga problema sa kinaban. An iba tibaad natatakot na lalaglagon nin mga tawo an daga. Aram nindo na dai iyan itotogot nin Dios, na dai nia totogotan an mga tawo na padagos na laglagon an magayon na planetang ini. Imbes na itogot iyan, an Dios, sono sa Biblia, ‘lalaglagon idtong mga naglalaglag kan daga.’ Aram nindo na an Biblia nanunuga na harani na an maliwanag na ngapit sa matanos na bagong kinaban nin Dios.—Kapahayagan 11:18; Salmo 37:29; 2 Pedro 3:13.

An Saindong Sadiring Pagtubod

4. Anong paninimbagan an itinatao sa mga hobenes kan pakaaram sa mga dalan nin Dios, asin paano an aking si Samuel marahay na halimbawa digdi?

⁴ Sa primero, an dalan nin Kristianong katotoohan tibaad linalakawan sana kan saindong mga magurang. Tibaad nagduduman kamo sa Kristianong mga pagtiripon huli ta ipinag-iiba ninda kamo, asin tibaad nakikikabtang kamo sa diosnon na paglilingkod huli ta iyan an ginigibo ninda. Pero, sa pag-agi nin panahon, an paglilingkod asin pagkuyog ki Jehova puwedeng magin sadiri nindong kagayagayahan. An ina kan aking si Samuel ipinoon sia sa tamang dalan, pero sia personalmenteng kaipuhan na sumunod dian. Mababasa niato: “Minsan an sarong aki namimidbid paagi sa saiyang mga gawe, paagi sa kun baga an saiyang gawe malinig asin tama.”—Talinhaga 20:11, NIV.

5. (a) Ano an dakulang halaga kan Biblia? (b) Ano an isinabi ni Pablo ki Timoteo manongod sa halaga kan nasusurat na Tataramon nin Dios?

⁵ Sinasabi sato kan Kasuratan kun ano an gusto nin Dios sa sato. Malinaw na ipinaheheling kaiyan sato kun paano makapaoogma sa saiya, na nagtatao nin dakol na impormasyon na dakulang karahayan an magigibo para sa sato. Sinabihan ni apostol Pablo an saiyang hoben na katabang na si Timoteo: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, andam nanggad para sa lambang marahay na gibo.”—2 Timoteo 3:16, 17.

6. Ano an sinasabi kan librong Mga Talinhaga manongod sa halaga nin kaaraman asin diosnon na kadonongan?

⁶ Sinasabi man sato kan Biblia na “maghinanyog kamo sa disiplina asin magin madonong.” Iyan nagsasabi na “pahalagahan” an mga pagboot nin Dios, “mag-apod ka sa pakasabot,” asin “padagos mong hanapon” an pagmansay arog kan saindong paghanap sa mahahalagang kayamanan na natatago. Kun kukuyogon nindo an hatol na ini, “sa siring masasabotan mo an pagkatakot ki Jehova, asin makukua mo an mismong kaaraman dapit sa Dios.” Manonompongan man niato an hatol na ini: “Tara ngonyan, mga aki, paghinanyog kamo sako; iyo, maogma an mga nag-ootob kan sakuyang mga dalan. Maghinanyog kamo sa disiplina asin magin madonong, asin dai kamo magpabaya. Maogma an tawo na naghihinanyog sa sako . . . Huli ta an nakakakua sa sako tunay na makakakua nin buhay, asin magkakamit nin marahay na boot hale ki Jehova.” Arog daw kaiyan an saindong pagpahalaga sa Biblia asin ginigibo daw nindo an siring na paghihingoa na manodan an mga sinasabi kaiyan?—Talinhaga 2:1-5; 8:32-35.

Magkamit nin Kaaraman

7. Ano an pinakamahahalagang bagay na maninigo niatong manodan?

⁷ An ibang hobenes aram an gabos na estadistika sa karawat, o masasabi ninda saindo an gabos manongod sa saindang paboritong banda. Napapasilan sindang maaraman asin magirumdoman an mga bagay na ini ta sinda interesado dian. Alagad an pinakamahalagang hapot iyo ini, Ano an aram ninda manongod sa Dios? Isip-isipa na sana kun ano an saiyang ginibo. Ginibo nin Dios an uniberso. Ihinula nia kun ano an gigibohon nin mga tawo asin kun ano an mangyayari haloy pa bago mangyari. Bako sanang sinasabi sato kan Biblia an manongod sa Dios kundi tinotokdoan kita kaiyan kun paano niato sia mapaoogma. Ipinaliliwanag kaiyan sato kun paano kita magkakaigwa ngonyan nin maogmang buhay asin kun paano kita magkakamit nin buhay na daing katapusan sa saiyang matanos na bagong kinaban. Bako daw na iyan mas mahalaga kisa pakaaram kun siisay an nanggana sa karawat o sa pakatatao sa ngaran nin mga musikero na dai mahaloy malilingawan nin mga tawo?—Isaias 42:5, 9; 46:9, 10; Amos 3:7.

8. Anong marahay na halimbawa an itinao ni Josias asin ni Jesus?

⁸ Kan an hoben na si Hadeng Josias 15 anyos, “pinonan niang hanapon an Dios ni David na saiyang apoon.” Kan si Jesus 12 anyos, sia nanompongan na “nagtutukaw sa tahaw kan mga paratokdo” sa templo ni Jehova, na “naghihinanyog sa sainda asin naghahapot sa sainda.”a Ano man an edad nindo, kamo daw, kapareho ni Josias asin Jesus, nagpatalubo nin tunay na interes sa mga ginibo nin Dios asin gigibohon pa?—2 Cronica 34:3; Lucas 2:46.

9. (a) Ano an problema nin dakol na hobenes? (b) Ano an magpapagin pasil sa pagbasa asin pag-adal, asin ini daw personal nindong napatunayan?

⁹ Minsan siring, tibaad sabihon nindo: ‘An pag-adal magabat na trabaho.’ An dakol na tawo, hoben asin gurang, noarin man dai nagbasa nin igo tanganing magin pasil na an pagbasa. Mientras na orog kamong nagbabasa, magigin mas pasil man an pagbasa. Mientras na orog kamong nag-aadal, nagigin mas pasil man an pakanood. Ikinokonektar nindo an bagong mga ideya sa mga dati na nindong aram, na ginigibong mas pasil na masabotan iyan asin magirumdoman iyan.

10. (a) Paano kamo orog na makikinabang sa Kristianong mga pagtiripon? (b) Ano an sadiri nindong eksperyensia sa bagay na ini?

¹⁰ Ano an makatatabang saindo na makanood nin orog manongod sa Dios? Tibaad puwede kamong magin orog na regular sa pag-atender sa mga pagtiripon na Kristiano. Puwede daw kamong patienot na mag-andam asin talagang magpartisipar? Halimbawa, magkakamit daw kamo nin mas hararom na kaaraman sa leksion na ini paagi sa pagbasa sa mga teksto sa Kasuratan na sitado pero dai kotado? May isinurat daw kamong saro o duwang termino sa gilid na magpapagirumdom saindo kun ano an idinudugang na punto kan kada saro sa mga tekstong ini sa parapo o sa leksion? Ugale daw nindong iiba an kisuerra saro sa mga tekstong ini sa komento na nagpapaheling kan saindong apresasyon sa Makakasuratan na orolay? An sarong magurang sa kongregasyon na dakol nang taon na regular na nag-aatender sa mga pagtiripon nagsasabi: “Nadedepisilan akong isentro an sakong isip sa arin man na leksion na dai ko naandam, pero nakawiwili nanggad na sundan an biyo kong napag-adalan.”

11. Paano kamo orog na makikinabang sa mga pahayag na basado sa Biblia, asin taano ta napakahalaga kaini?

¹¹ Kun kamo naghihinanyog sa mga pahayag sa Biblia, nagkukua daw kamo nin haralipot na nota tanganing makatabang saindo na analisaron kun paano binibilog an pahayag asin itorohok an saindong isip sa sinasabi? Ikinokomparar daw nindo an saindong nadadangog sa dati na nindong aram tanganing mas madali nindong masabotan iyan asin mas magirumdoman nindo iyan? Si Jesus namibi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Bako daw na an kaaraman na minagiya pasiring sa buhay iyo an pinakamarahay na kaaraman na makakamtan nindo? Helinga an sinasabi kan Biblia manongod digdi: “Huli ta si Jehova nagtatao nin kadonongan; gikan sa saiyang ngoso an kaaraman asin pakamansay. Kun an kadonongan lumaog sa saimong puso asin an kaaraman mismo magin mahamis sa saimong kalag, an kaisipan mismo mag-iingat sa saimo, an pakamansay mismo magbabantay sa saimo.”—Talinhaga 2:6, 10, 11.

Magtalubo sa Pag-apresyar

12. Ano an pira sa pambihirang mga bagay na ginibo nin Dios para sa sato?

¹² Talaga daw na inaapresyar niato kun ano an ginibo nin Dios para sa sato? Sia naglalang nin magayon na daga asin inandam iyan para sa buhay. Linalang nia an enot niatong mga magurang, sa siring pinapangyayari na kita mamundag. Iinareglo nia na kita magkamit kan pagsuportar nin mga pamilya asin nin mamomoton na kongregasyon. (Genesis 1:27, 28; Juan 13:35; Hebreo 10:25) Isinugo nia an saiyang panganay na Aki digdi sa daga tanganing orog kitang tokdoan manongod sa Saiya asin magtao kan pantubos na nagpapagin posible sa buhay na daing katapusan. Talaga daw na inaapresyar nindo an siring na makangangalas na mga balaog? Iyan daw nagpapahiro sa saindo na akoon an saiyang pag-agda na mag-adal manongod sa saiya asin maglingkod sa saiya?—Mateo 20:28; Juan 1:18; Roma 5:21.

13. Taano sa paghona nindo ta interesado an Dios sa mga indibiduwal?

¹³ An Kaglalang sa uniberso interesado sa mga tawo. Inapod nia si Abraham na “sakong katood,” asin nagsabi sia ki Moises: “Midbid ta ka sa saimong ngaran.” (Isaias 41:8; Exodo 33:12) Ipinaririsa kan librong Kapahayagan na an Dios may simbolikong libro, o “balumbon nin buhay,” na igwa kan ngaran kan saiyang maimbod na mga lingkod “magpoon kan lalangon an kinaban.” Makakaiba daw dian an saindong ngaran?—Kapahayagan 3:5; 17:8; 2 Timoteo 2:19.

14. Paano an pagsunod sa mga prinsipyo nin Dios makapararahay sa saindong buhay?

¹⁴ An mga prinsipyo nin Dios epektibo. An paggibo sa mga bagay sono sa paagi nia nakahahale sa dakol na problema—inmoralidad, adiksion sa droga, alkoholismo, dai minamawot na pagbados, helang benereal, kadahasan, paggadan, asin an halabang lista nin iba pang kasakitan. An pagsunod sa saiyang mga dalan makatatabang man saindo na makanompong nin tunay na mga katood asin magkaigwa nin mas maogmang buhay. Bako daw na iyan kapakipakinabang na gibohon? (1 Corinto 6:9-11) Minsan an sarong hoben na dati nang determinado na gibohon an mga bagay sa paagi nin Dios puwedeng magkamit nin dagdag na kosog sa paggibo kan tama. An Biblia nagsasabi: “Sa sarong maimbod [si Jehova] mahiro sa kaimbodan.” Sinisierto man kaiyan sa sato na “dai nia pababayaan an saiyang mga maimbod” ni ‘pababayaan an saiyang banwaan.’—Salmo 18:25; 37:28; 94:14; Isaias 40:29-31.

Umabante sa Paglilingkod sa Dios

15. Anong diosnon na hatol an itinao ni Salomon sa mga hobenes?

¹⁵ An saindo daw na mga pasohan nasisentro sa magagadanon nang daan na kinaban o sa matanos na bagong kinaban? Kamo daw naghihinanyog sa Dios, o kamo daw naghihinanyog sa madodonong sa kinaban na minakontra sa saiya? An pag-aling-aling daw, mas halangkaw na inadalan, o nakauubos nin panahon na sekular na karera naeenot sa Dios asin sa paglilingkod sa saiya? An madonong na si Hadeng Salomon isinurat an bilog na libro sa Biblia na Eclesiastes tanganing ipaheling kun ano an maninigong maenot sa satong buhay. An konklusyon nia: “Girumdoma, ngonyan, an saimong dakulang Kaglalang sa mga aldaw kan saimong pagkabarobata, bago umabot an maraot na mga aldaw, o dumatong an mga taon na ika masabi: ‘Mayo ako nin kawilihan sa sainda.’ An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga pagboot. Huli ta ini iyo an bilog na katongdan nin tawo.”—Eclesiastes 12:1, 13.

16. Paano an mga hobenes makapaghihingoa na maabot an dugang pang mga pribilehiyo?

¹⁶ An gabos na may edad nang Kristianong mga tugang na lalaki na midbid nindo—an kamagurangan, mga payunir, asin an saindong mga paraataman sa sirkito asin distrito—nagin aki man. Ano an nagbunga kan mga bendisyon na nakakamtan ninda ngonyan? Namotan ninda an Dios asin boot na maglingkod sa saiya. An dakol sa sainda kan hoben pa inaprobetsaran an ekstrang oras ninda tanganing magkamit nin kaaraman asin kabatidan. Sinda nag-adal asin nakikabtang sa mga pagtiripon. Nakikabtang sinda sa pagtotokdo, asin naghingoa sindang maabot an dugang pang mga pribilehiyo—pagpapayunir, paglilingkod sa Bethel, o iba pang kapakipakinabang na aktibidad. Bako sindang mga ‘super hobenes’; sinda may normal na mga interes asin kahaditan arog nindo. Pero, sinda naghingoa kaoyon sa hatol na: “Ano man an saindong ginigibo, gibohon iyan nin bilog na kalag na siring baga kun para ki Jehova, asin bakong para sa mga tawo.”—Colosas 3:23; ikomparar an Lucas 10:27; 2 Timoteo 2:15.

17. Ano an makatatabang sa mga hobenes na umoswag sa paglilingkod sa Dios?

¹⁷ Kumusta man kamo? Talaga daw na inaapresyar nindo an diosnon na mga bagay? Minapili daw kamo nin mga katood sa mga inienot an espirituwal na mga bagay? Dinadagka daw nindo an iba na umiba sa saindo sa Kristianong aktibidad? Minaiba daw kamo sa Kristianong paglilingkod sa mas gurang, mas eksperyensiadong mga tugang tanganing makanood sa sainda, manamitan an saindang kagayagayahan, asin mapakosog kan saindang marahay na mga gibo? Nagigirumdoman nin sarong Saksi an aldaw, na haros 20 taon na an nakaagi, na sa enot na pangyayari sia mainit na inagda nin sarong may edad nang umiba sa saiya sa ministeryo sa langtad. Ini, sabi nia, panahon nin pagkaliwat sa saiyang buhay: “Sa enot na pangyayari nag-iba ako ta gusto ko, bako sanang huli ta ipinag-iiba ako kan sakong mga magurang.”

18. Ano an mga bagay na maninigong isip-isipon bago pabautismo?

¹⁸ Kun kamo nag-ooswag sa paggibo kan mga bagay sa paagi nin Dios, tibaad dai mahahaloy mag-iisip na kamong pabautismo. Mahalagang girumdomon na an bautismo bakong sarong rituwal nin paglaog sa pagkadaraga o pagkasoltero. Iyan dai nagpapatunay na kamo nagdadakula na, ni bagay man iyan na maninigo nindong gibohon huli ta ginibo iyan kan saindong mga katood. Bago pabautismo, maninigo na kamo may pundamental na kaaraman sa katotoohan asin namumuhay kaoyon sa Tataramon nin Dios. Maninigo na kamo may harohalawig nang eksperyensia sa pagdara kan kaaraman na iyan sa iba asin nakaaaram na ini mahalagang kabtang nin tunay na pagsamba. (Mateo 24:14; 28:19, 20) Maninigo na aram man nindo na pakagibo nindo kan mahalagang Kristianong tanggang ini lalaoman kamong mamuhay oyon sa matanos na moral na mga prinsipyo kan Biblia.b Sa saindong puso, maninigo na idinusay na nindo an saindong buhay sa saindong mamomoton na langitnon na Ama.—Ikomparar an Salmo 40:8, 9.

19. Noarin maninigong pabautismo an sarong tawo?

¹⁹ An bautismo bagay na ginigibo nindo kun kamo marigon nang nakapagdesisyon na ano man an mangyari sa saindong buhay, kamo maglilingkod nanggad sa Dios. Iyan pampublikong tanda na kamo guminibo nin biyo, lubos, daing limitasyon na pagdusay ki Jehova paagi ki Jesu-Cristo na gibohon an kabotan nin Dios. Nagigirumdoman nin sarong Kristianong magurang an aldaw, na haros kabangang siglo na an nakaagi, na narealisar nia: “Kaipuhan na ako may gibohon manongod dian!” Si Michelle, sarong hoben na Saksi na nabautismohan sa Newcastle, Inglaterra, kaidtong pirang taon na an nakaagi, nagsasabi: “Sa edad na 13, narealisar ko na maninigo kong idusay an sakong sadiri asin magpabautismo; mayo ako nin ibang gustong gibohon kundi an maglingkod sa Dios.”

20. (a) Anong marahay na halimbawa an itinao nin manampulong ribong hobenes? (b) Ano an maninigong magin punto-de-vista sa bagay na ini?

²⁰ Manampulong ribong hobenes an nabautismohan kasuarin pa sana. Pinag-adalan ninda an Tataramon nin Dios asin nanodan an saiyang mga dalan, dangan, paagi sa bautismo sa tubig, sinda maogmang nag-iba sa dakol na may edad na sa pagsimbolisar sa publiko kan saindang pagdusay sa Dios. Aram ninda na an bautismo bakong katapusan kundi kapinonan pa sana kan tunay na dusay na pamumuhay na determinado sindang gibohon sa paglilingkod ki Jehova sagkod lamang.

[Mga Nota sa Ibaba]

Ano an Isisimbag Nindo?

◻ Taano ta napakahalaga kan kaaraman sa Tataramon nin Dios?

◻ Paano kamo orog na makikinabang sa Kristianong mga pagtiripon?

◻ Anong mga bendisyon hale sa Dios an maninigong magmotibar sato na kumuyog sa saiya?

◻ Paano kamo maoswag sa paglilingkod sa Dios?

◻ Noarin maninigong pabautismo an saro?