Inaapresyar daw Nindo an Ginibo nin Dios?

“Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.”—LUCAS 9:23.

1. Ano an pira sa makangangalas na mga balaog nin Dios?

UTANG niato sa Dios an satong buhay. Kun dai nia linalang an tawo, noarin man dai kutana kita namundag. Alagad bako sanang buhay an linalang nin Dios. Ginibo nia kita tanganing maogma kita sa dakol na bagay: an namit nin kakanon, an himbong kan init nin aldaw, an tanog nin musika, an kapreskohan sa aldaw nin tigsoli, an pagpadangat nin pagkamoot. Orog pa dian, tinawan kita nin Dios nin isip asin kan kamawotan na mag-adal manongod sa saiya. Ipinasabong nia an Biblia, na nagtatao sato nin madonong na giya, nagtotokdo sato kun paano magigin mas maogma an buhay, asin nagtatao kan paglaom na mabuhay sagkod lamang sa saiyang matanos na bagong kinaban. Itinatao man nin Dios an saiyang banal na espiritu, an pagsuportar nin lokal na kongregasyon, asin an mamomoton na mga gurang na lalaki asin babae na makatatabang sato na magmarigon sa paglilingkod sa saiya.—Genesis 1:1, 26-28; 2 Timoteo 3:15-17; Hebreo 10:24, 25; Santiago 5:14, 15.

2. (a) Ano an pinakapambihirang ginibo nin Dios para sa sato? (b) Puwede daw kitang magkamit nin kaligtasan bilang bayad sa mga gibo?

² Apuwera pa kaiyan, isinugo nin Dios an saiya mismong panganay na Aki tanganing magsabi sato nin orog manongod sa kun ano an linalaoman sato kan Ama asin magtao kan “pagkabutas paagi sa pantubos” para sa gabos na maako kaiyan. (Efeso 1:7; Roma 5:18) An aking iyan, si Jesu-Cristo, nagsabi: “Namotan na gayo nin Dios an kinaban, kaya itinao nia an saiyang bugtong na Aki, tanganing an siisay man na tumubod sa saiya dai mapara, kundi magkaigwa nin buhay na daing katapusan.” (Juan 3:16, King James Version) An kaligtasan na pinapangyari kan pantubos na iyan daing kaagid an halaga kaya mayo nanggad nin paagi na an siisay man makagibo nin mga bagay tanganing kamtan iyan bilang bayad, orog na an mga gibo na dating ginigibo sakop kan Mosaikong Pagboot. Kaya, si Pablo nagsurat: “An tawo ipinahahayag na matanos, bakong huli sa mga gibo kan pagboot, kundi paagi sana sa pagtubod ki Cristo Jesus.”—Galacia 2:16; Roma 3:20-24.

Pagtubod Asin Gibo

3. Ano an isinabi ni Santiago manongod sa pagtubod asin mga gibo?

³ An kaligtasan minadatong paagi sa pagtubod, alagad an pagtubod asin apresasyon sa gabos na ginibo nin Dios maninigong magpahiro sa sato. Iyan maninigong magmotibar sato na gumibo nin mga bagay na nagpapaheling kan satong pagtubod. An tugang ni Jesus sa ina na si Santiago nagsurat: “An pagtubod, kun dai nin gibo, gadan sa saiya man sana.” Sinabi pa nia: “Pahelingan sa sako an saimong pagtubod na bulag sa mga gibo, asin ipaheheling ko saimo an sakong pagtubod paagi sa sakong mga gibo.” Idinoon ni Santiago na pati an mga demonyo “nagtutubod asin nagtatakig,” alagad ta malinaw na an mga demonyo dai naggigibo nin diosnon na mga gibo. Si Abraham, sa ibong na lado, igwa kapwa nin pagtubod asin gibo. “An saiyang pagtubod naggibo na katabang kan saiyang mga gibo asin paagi sa saiyang mga gibo an saiyang pagtubod nasangkap.” Inotro ni Santiago: “An pagtubod na daing gibo gadan.”—Santiago 2:17-26.

4. Ano an sinabi ni Jesus na maninigong gibohon kan mga boot na sumunod sa saiya?

⁴ Ipinaheling man ni Jesus an halaga nin tamang mga gibo, na sinasabi: “Paliwanaga an saindong ilaw sa atubang nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” “Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.”a Kun satuyang “paindahan” an satong sadiri, isinusuko niato an dakol sa satong personal na mga gusto. Minimidbid niato na utang niato sa Dios an gabos, kaya itinatao niato an satong sadiri sa saiya bilang saiyang mga oripon, na naghihingoang manodan asin gibohon an saiyang kabotan, arog kan ginibo ni Jesus.—Mateo 5:16; Lucas 9:23; Juan 6:38.

Apektado an mga Buhay

5. (a) Ano an ipinaheling ni Pedro na maninigong makaapektar sa bilog niatong pamumuhay? (b) Anong marahay na mga gibo an saiyang irinekomendar?

⁵ Idinoon ni Pedro na an “mahalagang dugo” ni Cristo, na itinao para sa sato, halangkawon an halaga kaya an pag-apresyar niato dian maninigong marisa sa bilog niatong pamumuhay. Ilinista kan apostol an dakol na bagay na maninigong ipagibo sato kan satong apresasyon. Ihinatol nia: “Haleon nindo an gabos na karatan.” “Magkaigwa kamo nin pagmawot sa daing kasalak na gatas kan tataramon.” “Ipahayag nindo an mga kamurawayan kan saro na nag-apod sa saindo hale sa kadikloman pasiring sa saiyang makangangalas na liwanag.” “Rumayo sia sa maraot asin gumibo sia nin marahay.” “Sumimbag sa lambang naghahagad saindo nin rason para sa saindong paglaom.” ‘Mamuhay sa natatada pa kan [saimong] panahon sa laman, bako nang huli sa mga horot nin tawo, kundi huli sa kabotan nin Dios.’—1 Pedro 1:19; 2:1, 2, 9; 3:11, 15; 4:2.

6. (a) Paano ipinaheling nin mga Kristiano kan enot na siglo an saindang pagtubod? (b) Anong arogan an maninigong itao kaini sa sato?

⁶ An mga Kristiano kan enot na siglo namuhay sono sa saindang pagtubod. Liniwat kaiyan an saindang punto-de-vista asin an saindang personalidad, na minomotibar sindang ioyon an saindang buhay sa kabotan nin Dios. Tinios ninda an pagkadistiyero, paggapo, paghampak, pagkabilanggo, asin pati an kagadanan imbes na lapason an saindang pagtubod. (Gibo 7:58-60; 8:1; 14:19; 16:22; 1 Corinto 6:9-11; Efeso 4:22-24; Colosas 4:3; Filemon 9, 10) An bantog na historyador na Romano na si Tacitus, na namundag kaidtong mga 56 C.E., nagsasabi na an mga Kristiano “isinugba sa kalayo asin sinolo, tanganing magserbing ilaw kun banggi, kun mayo na an aldaw.” Pero dai sinda nanluya!—The Annals, Libro XV, parapo 44.

7. Ano an tibaad magin kamugtakan nin nagkapira?

⁷ Sa nagkapirang kongregasyon tibaad may manompongan kamo na dakol nang taon na nag-aatender sa pagtiripon. Namomotan ninda an organisasyon ni Jehova, naghohona sinda na an saiyang banwaan iyo an pinakamaboot na mga tawong namidbid ninda, nagtatao nin marahay na mga komento manongod sa katotoohan, asin sinosorog an katotoohan sa mga taga-luwas. Pero may nakaoolang, may nakapopogol sa sainda. Dai pa ninda ginibo an marahay na ginibo kan 3,000 kan aldaw nin Pentecostes, na ihinapot kan may pagtubod na Etiope, o isinadol ni Ananias ki Saulo kan oras mismo na narealisar kan dating paralamag na ini na si Jesus man nanggad an Mesiyas. (Gibo 2:41; 8:36; 22:16) Ano an kulang sa mga siring ngonyan? Taano ta dai ninda ginigibo an inaapod kan Biblia na “an paghagad sa Dios nin marahay na konsensia”? (1 Pedro 3:21) Kun kamo nasa situwasyon na ini—na nakaaaram kan katotoohan alagad nag-aalangan na may gibohon dian—ibilang nindo na an artikulong ini inandam huli sa espesyal na pagkamoot sa saindo.

Pakapanggana sa mga Kaolangan sa Pagpabautismo

8. Kun dai pa kamo noarin man nagin matibay na estudyante, ano ngonyan an madonong na gibohon?

⁸ Ano an puwedeng makaolang sa saindo? Ipinaheling kan nakaaging luwas kan magasin na ini na an iba tibaad magkaproblema sa personal na pag-adal. Tinawan kita nin Dios nin makangangalas na mga isip, asin linalaoman nia kitang gamiton iyan sa paglilingkod sa saiya. An iba na dai pa ngani nakanood na magbasa naghingoa sa gibong iyan tanganing orog na makanood manongod sa Dios asin sa saiyang mga katuyohan. Kumusta man kamo? Kun dati na kamong tataong magbasa, kamo daw talagang nag-aadal, arog kan mga taga-Berea, “na maingat na sinisiyasat an Kasuratan aroaldaw” kun baga an mga bagay na ini iyo man nanggad? Rinorop daw nindo “an lakbang asin laba asin langkaw asin rarom” kan katotoohan? Kinotkot daw nindo nin hararom an Tataramon nin Dios? Nadiskobre daw nindo kun gurano nanggad iyan kanakawiwili? Nakapatalubo daw kamo nin tunay na kamawotan na aramon an kabotan nin Dios? Igwa daw kamo nin tunay na pagkagutom sa katotoohan?—Gibo 17:10, 11; Efeso 3:18.

9. Ano an tamang gibohon kun kamo may problema sa saro na nasa kongregasyon?

⁹ Kun beses may nag-aalangan huli sa tunay o iniimahinar sanang problema sa sarong indibiduwal sa kongregasyon. May nagkasala daw sa saindo nin magabat? Kun siring sunodon an giyang itinao kan mga tataramon ni Jesus: “Magduman asin ihayag an saiyang kasalan na kamo sanang duwa.” (Mateo 18:15) Tibaad mapangalas kamong maaraman na dai ngani aram kan tawo na kamo nakolgan an boot. Alagad dawa kun aram nia, tibaad mahimo pa man giraray nindong ‘ikaligtas an saindong tugang,’ arog kan sabi ni Jesus. Tibaad matabangan man sia nindo na malikayan an pagkapasingkog sa iba. Dugang pa, kun iisip-isipon nindo, siisay an talagang pinaglilingkodan nindo—an tawong iyan o an Dios? Kadikiton daw an saindong pagkamoot sa Dios na totogotan nindo na an sala nin siisay man na tawong bakong sangkap makaolang sa saindong pagkamoot sa Saiya?

10, 11. Ano an maninigo nindong gibohon kun pinopogolan kamo nin itinatagong kasalan?

¹⁰ An sarong tinatagong kasalan puwedeng makapogol sa saro sa pagpabautismo. Ini puwedeng nangyari kaidto pa, o tibaad iyan nagpapadagos na sala. Kun ini problema nindo, bako daw panahon nang itanos an bagay? (1 Corinto 7:29-31) An dakol sa banwaan ni Jehova kinaipuhan na magbakle sa saindang buhay. An Biblia nagsasabi: “Magsorolsol kamo asin magbakle tanganing an saindong mga kasalan mapara, tanganing dumatong an mga panahon nin kaginhawahan hale sa persona ni Jehova.”—Gibo 3:19.

¹¹ Ano man an ginibo nindo kan nakaagi, puwede kamong magsolsol, magbakle, asin hagadon an kapatawadan nin Dios. “Kaya gadanon nindo an mga kabtang kan saindong hawak na yaon sa ibabaw kan daga kun dapit sa pakikisaro, karigsokan, seksuwal na horot, maraot na mawot . . . Halea nindo an daan na pagkatawo asin an mga gibo kaini, asin isolog nindo an bagong pagkatawo, na binabago paagi sa tamang kaaraman oyon sa ladawan kan Saro na naglalang kaiyan.” Puwede nindong ioyon an saindong buhay sa saiyang mga dalan, kamtan an malinig na konsensia, asin an paglaom na mabuhay nin daing katapusan sa saiyang matanos na bagong kinaban. Bako daw na bawi dian an ano man na paghihingoang kaipuhanon?—Colosas 3:5-10; Isaias 1:16, 18; 1 Corinto 6:9-11; Hebreo 9:14.

12. Ano an maninigo nindong gibohon kun nagigin kaolangan an tabako, pag-abuso sa mga inomon na de alkohol, o nakaaadiktong mga droga sa pag-oltanan nindo asin nin malinig na konsensia?

¹² An paggamit daw nin tabako, pag-abuso sa inomon na de alkohol, o pagkaadikto sa droga nagigin kaolangan sa pag-oltanan nindo asin nin malinig na konsensia? Bako daw na an mga bisyong iyan na nagsasapeligro nin buhay nagpapaheling nin kadaihan nin paggalang sa makangangalas na regalo nin Dios na buhay? Kun an siring na mga bisyo nakaoolang sa saindo, tunay na panahon nang itanos iyan. An mga bisyo daw na ini arog kahalaga kan saindong buhay? Si Pablo nagsabi: “Magpakalinig kita sa lambang ramog nin laman asin espiritu, na sinasangkap an kabanalan sa pagkatakot sa Dios.” May igo daw kamong apresasyon sa malinig asin matanos na mga dalan nin Dios tanganing gibohon iyan?b—2 Corinto 7:1.

Materyal na mga Bagay

13, 14. (a) Ano an sinasabi kan Kasuratan manongod sa materyal na mga pasohan? (b) Taano ta mahalaga na enoton an langitnon na mga bagay?

¹³ An kinaban ngonyan ipinaoorog an pag-asenso asin “an pagpaabaw-abaw kan kaya sa buhay” sa haros gabos na ibang bagay. Alagad ta ibinaing ni Jesus “an mga kahaditan sa palakaw na ini nin mga bagay asin an mapandayang kapangyarihan nin kayamanan” sa “mga tonok” na minalamos sa tataramon nin Dios. Sia naghapot man: “Ano an pakikinabangon nin sarong tawo kun makamtan nia an bilog na kinaban alagad mawara naman an saiyang kalag?”—1 Juan 2:16; Marcos 4:2-8, 18, 19; Mateo 16:26.

¹⁴ Idinoon ni Jesus na iinareglo nin Dios na an mga gamgam makakua nin kakanon asin an mga liryo mamurak nin magayonon. Dangan sia naghapot: “Gurano kalabi an saindong halaga kisa mga gamgam? . . . Kamo pa daw an dai [nin Dios] gubingan nin orog!” Madonong na sinabihan kita ni Jesus na “umontok na kamo sa paghadit” dapit sa materyal na mga bagay. Sia nagsabi: “Padagos nindong hanapon an . . . kahadean [nin Dios], asin an mga bagay na ini idadagdag sa saindo.” Sinabi nia na maninigo niatong enoton an langitnon na mga bagay ta ‘kun saen an satong kayamanan, dian man an satong puso.’—Lucas 12:22-31; Mateo 6:20, 21.

Diosnon na Paglilingkod sa Tabang nin Dios

15. Anong marahay na pagpakosog an itinatao sato kan halimbawa nin mga Kristiano kan enot na siglo?

¹⁵ Garo daw problema sa saindo an pagpatotoo sa iba? Kamo daw nag-aalangan huli sa pagkasopog? Kun iyo, mahalagang girumdomon na an mga Kristiano kan enot na siglo nagkaigwa man nin mga saboot na kapareho niato ngonyan. Dai pinili nin Dios an dakol na madonong asin makapangyarihan, kundi pinili nia “an mga maluya kan kinaban, tanganing sopogon nia an mga makosog.” (1 Corinto 1:26-29) An makapangyarihan na mga namomoon sa relihiyon tinumang an “ordinaryong” mga tawong ini asin pinagbotan sinda na pumondo sa paghuhulit. Ano an ginibo kan mga Kristiano? Namibi sinda. Naghagad sinda nin kapusoan sa Dios, asin itinao nia iyan sa sainda. Bilang resulta, an saindang mensahe nakapano sa Jerusalem asin kan huri nakatanyog sa bilog na kinaban!—Gibo 4:1-4, 13, 17, 23, 24, 29-31; 5:28, 29; Colosas 1:23.

16. Ano an nanonodan niato sa dakulang “panganoron nin mga saksi” na sinasabi sa Hebreo kapitulo 11?

¹⁶ Kun siring, an takot sa tawo dai maninigong magin kaolangan sa pag-oltanan niato asin kan paglilingkod sa Dios. An Hebreo kapitulo 11 nagsasaysay manongod sa dakulang “panganoron nin mga saksi” na natakot, bakong sa tawo, kundi sa Dios. Maninigo kitang magpaheling nin kaparehong pagtubod. An apostol nagsurat: “Huli ta napalilibotan kita nin dakulang panganoron nin mga saksi, pabayaan ta man an gabos na kagabatan asin an kasalan na pasil sanang nakagagapos sa sato, asin dumalagan kita na may pakatios sa paorumbasan na nasa atubang ta.”—Hebreo 12:1.

17. Anong pagpakosog an itinao nin Dios paagi ki Isaias?

¹⁷ An Dios makatatao nin dakulaon na tabang sa saiyang mga lingkod. An Kaglalang sa uniberso nagsabi ki Isaias: “An mga nananarig ki Jehova magkakamit nin bagong kosog. Sinda maralayog na may mga pakpak na siring sa agila. Sinda madaralagan asin dai magkakaparagal; sinda maralakaw asin dai panluluyahon.”—Isaias 40:31.

18. Paano nindo mahahale an pagkamasosopgon tanganing makapakikabtang sa paghuhulit kan Kahadean?

¹⁸ An mapuso asin maogmang mga Saksi na naheheling nindo sa lokal na kongregasyon sadit sanang kabtang kan labing tolo may kabangang milyon na mahigos na mga lingkod sa bilog na daga. Sinda naggagayagaya na magkaigwa nin kabtang sa gibohon na ihinula mismo ni Jesu-Cristo sa mga tataramon na ini: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” Kun an pakikikabtang sa paghuhulit kan Kahadean nagtatao nin problema sa saindo dawa kamo kuwalipikadong gumibo kaiyan, taano ta dai hapoton an sarong Saksi na matibay sa ministeryo na paibanon kamo sa paghuhulit? An Dios talagang nagtatao nin “kapangyarihan na lihis sa ordinaryo,” asin tibaad mapangalas kamong madiskobre na kanigoan palan na kagayagayahan an diosnon na paglilingkod na ini.—Mateo 24:14; 2 Corinto 4:7; helingon man an Salmo 56:11; Mateo 5:11, 12; Filipos 4:13.

19. Anong pagtotokdo an ipinagboot ni Jesus sa saiyang mga parasunod?

¹⁹ Linalaoman ni Jesus na an mga may pag-apresyar sa mensahe kan Kahadean may gibohon manongod dian. Sia nagsabi: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”—Mateo 28:19, 20.

20. Kun kamo nag-ooswag sa espirituwal, anong hapot an tibaad madali nang magin angay?

²⁰ An saindo daw na apresasyon sa mga bendisyon nin Dios, sa “mahalagang dugo” ni Jesus, asin sa makangangalas na paglaom na buhay na daing katapusan nagpapahiro sa saindo? (1 Pedro 1:19) Iinoyon daw nindo an saindong pamumuhay sa matanos na mga kahagadan nin Dios? Kamo daw regular na nakikakabtang sa paggibo nin mga disipulo? Pinaindahan na daw nindo an saindong sadiri asin idinusay an saindong buhay sa Dios? Kun an simbag sa gabos na hapot na ini talagang iyo, tibaad panahon nang ihapot sa saro sa kamagurangan sa kongregasyon na inaatenderan nindo an hapot na kapareho kan ihinapot ki Felipe kan nagtutubod na Etiope: “Ano an nakaoolang sako na mabautismohan?”—Gibo 8:36.

[Mga Nota sa Ibaba]

Nagigirumdoman daw Nindo?

◻ Ano an espesyal na mga dahelan niato na magpasalamat sa Dios?

◻ An pagtubod asin apresasyon maninigong magmotibar sato na gibohon an ano?

◻ Anong mga problema an tibaad magin kaolangan sa pag-oltanan niato asin kan pagkuyog sa Dios, asin ano an magigibo niato manongod dian?

◻ Ano an puwedeng ihapot sa saindang sadiri nin mga tawong dai pa nabautismohan?

[Kahon sa pahina 10]

‘Anong klase daw akong “daga”?’

Si Jesus nagtao nin ilustrasyon manongod sa tawo na nagsabwag nin banhi. An ibang banhi naholog sa gilid kan dalan asin tinuka nin mga gamgam. An iba naholog sa magapong mga lugar na kakadikit kan daga. An mga ini tuminubo, pero kan sumirang an aldaw, iyan naluyos asin nagadan. An iba man na banhi naholog sa tahaw nin katotonokan asin nalamos. Sinabi ni Jesus na an tolong grupong ini nagrerepresentar: enot, sa tawo na ‘nakadangog kan tataramon nin kahadean alagad dai nakasasabot kaiyan’; ikaduwa, sa saro na nag-ako kan tataramon alagad nanluya sa init nin “kahorasaan o paglamag”; asin ikatolo, sa tawo na “an kahaditan kan palakaw na ini nin mga bagay asin an mapandayang kapangyarihan nin kayamanan minalamos kan tataramon.”

Alagad si Jesus nagtaram man manongod sa ibang banhi na naholog sa marahay na daga. Sia nagsabi: “Ini an nagdadangog kan tataramon asin nakakasabot kaiyan, na tunay na nagbubunga.”—Mateo 13:3-8, 18-23.

Tibaad marahay na ihapot sa satong sadiri: ‘Anong klase daw akong “daga”?’

[Kahon sa pahina 11]

Sinda nagadan para sa saindang pagtubod

May midbid daw kamo na gugustohon pang magadan kisa lapason an saiyang pagtubod? Rinibong Saksi ni Jehova an guminibo kaiyan. Sa The Nazi State and the New Religions: Five Case Studies in Non-Conformity, si Dr. Christine E. King nagsurat: “An saro sa kada duwang Aleman na Saksi nabilanggo, an saro sa kada apat nawaran kan saindang buhay.”

Kan sa katapustapusi matapos an makatatakot na mga pangyayari sa mga kampo kan 1945, “nagdakol an mga Saksi asin mayo nin pakipagkompromiso.” Sa The Nazi Persecution of the Churches, si J. S. Conway nagsurat manongod sa mga Saksi: “Mayo nin ibang sekta na nagpaheling nin kaagid na determinasyon sa atubang kan bilog na puwersa kan terorismong Gestapo.”

An mga Saksi ni Jehova dai pinaglamag huli sa politika o rasa. Imbes, sinda nagsakit huli sana sa saindang pagkamoot sa Dios asin sa saindang pagsayuma na lapason an saindang konsensia na natokdoan sa Biblia.