Paano Kita Makababalos nin Daing Kapasloan sa Pagkamoot nin Dios?
“Kun siring kaini an pagkamoot sato nin Dios, kun siring kita may paninimbagan na magkaminorootmootan.”—1 JUAN 4:11.
1, 2. Ano an kaipuhan tangani na kita makabalos na daing kapasloan sa mga kapahayagan kan pagkamoot nin Dios?
SI Jehova an mismong personipikasyon nin pagkamoot. Sa katunayan, sa sinusundan na artikulo, naheling niato kun gurano man nanggad kadakol kan mga kapahayagan kan saiyang pagkamoot. Naheling man niato kun paano si Moises, David, asin Jesu-Cristo daing kapasloan na nagbalos sa mga kapahayagan na iyan nin pagkamoot. Bako daw na maninigo na an kada saro sa mga Saksi ni Jehova magmawot na gumibo man nin siring? Iyo nanggad!
2 Ano an kaipuhan tangani kitang makabalos na daing kapasloan sa mga kapahayagan kan pagkamoot nin Dios? Enot, kaipuhan na sia tawan niato kan enot na lugar sa satong buhay, na namomotan sia sa bilog niatong puso, kalag, isip, asin kosog. (Marcos 12:29, 30) Iyan nangangahulogan nin pagigin maki-Dios, na may mainit na personal na relasyon ki Jehova. Minamawot daw niato na makipag-olay sa satong langitnon na Ama sa pamibi? Kita daw namimibi nin daing ontok asin nagmamaigot sa pamibi? O naghihidale daw kita sa pamimibi, kun beses dai nang panahon na mamibi huli sa kasibotan? (Roma 12:12; 1 Tesalonica 5:17) Itinotokdo daw niato an atension ki Jehova, na itinatao saiya asin sa saiyang organisasyon an kaomawan para sa tibaad nagibo niato? (1 Corinto 3:7; 4:7) An totoo, an saboot daw niato kapareho kan sa salmista? Mapadapit sa Dios, sia nagsabi: “Makapito sa laog kan aldaw inomaw taka.”—Salmo 119:164.
3. Kun kita nagtitiripontipon, paano niato puwedeng ipaheling na kita nagbabalos na daing kapasloan sa pagkamoot nin Dios?
3 Kun baga kita nagbabalos na daing kapasloan sa pagkamoot nin Dios o dai puwedeng mahayag kun kita nagtitiripontipon sa pag-aling-aling. An satuya daw na orolay sa panahon na iyan manongod sa sekular na mga bagay o sa espirituwal na mga bagay? Dai man boot sabihon na kaipuhan na kita magkaigwa nin seryosong pag-adal sa Biblia kada makipagtipon kita sa mga kapwa niato Kristiano. Pero segurado na may makukua kitang kawiliwiling espirituwal na mga bagay na ikaiiba sa satong orolay. Halimbawa an pag-estorya nin mga eksperyensia sa langtad, pagpaliwanag kan satong paboritong teksto sa Biblia, pagsaysay kun paano niato nanodan an katotoohan, o pagsitar sa mga ebidensia kan mamomoton na pangataman asin bendisyon nin Dios?
4. Ano an maninigong magin punto-de-vista niato sa mga bagay kun kita nabigo mapadapit sa sarong pribilehiyo nin paglilingkod?
4 An saro pang kamugtakan na puwedeng magparisa kun gurano an satong pag-apresyar sa pagkamoot nin Dios iyo an kun kita nalilipasan mapadapit sa sarong pribilehiyo nin paglilingkod sa organisasyon ni Jehova. Ano an reaksion niato? Kun sa pangenot an gusto niato matawan nin onra si Jehova, maoyon kita na posibleng gayo na an Dios matatawan nin parehong onra kan siisay man na igwa kan pribilehiyo nin paglilingkod na iyan. (Ikomparar an Lucas 9:48.) Alagad kun kita may sobrang pagmakolog sa sadiri niatong bentaha o ngaran, ikakokolog kan satong boot na kita nalipasan, sa paghona niato. Maninigo niatong girumdomon na kita namomotan ni Jehova asin tibaad aram nia na sa ngonyan dai niato kayang pasanon an sarong teokratikong paninimbagan. Tibaad kita tinatawan nia nin nagsosopay na bendisyon sa ibang mga paagi, asin an siring na mga kapahayagan kan saiyang pagkamoot maninigong tumabang sato na mapagdanay an satong espirituwal na pagkatimbang.—Talinhaga 10:22.
Pagkamoot sa Katanosan, Pagkaongis sa Katampalasanan
5. An mga kapahayagan kan pagkamoot nin Dios maninigong magkaigwa nin anong epekto sa satong gawe?
5 An mga kapahayagan kan pagkamoot nin Dios sa sato maninigong magmotibar sato na arogon si Cristo sa pagkamoot sa katanosan asin pagkaongis sa katampalasanan. (Hebreo 1:9) Totoo, dai niato ini magigibo nin sangkap, arog kan ginibo ni Jesus. Pero, puwede niatong gibohon na pasohan na magin banal, sadiosan, asin makinuyog sa ley sagkod sa mapupuwede sa satong bakong sangkap na kamugtakan. Tanganing magibo ini, kaipuhan na kita bako sanang magpatalubo nin pagkamoot sa mga bagay na matanos asin marahay kundi magpatalubo man nin pagkaongis, paghabo, pagkabalde, sa maraot. Arog kan pagkasabi ni apostol Pablo: “Ikabalde an maraot, magdanay sa marahay.” (Roma 12:9) An “ikabalde” makosogon na termino, na an boot sabihon “paghelingon na may makuring pagkasurang.”—Webster’s New Collegiate Dictionary.
6. Ano an makatatabang sato na magmaan tumang sa mga sugot na itinatao sa sato kan kinaban, kan satong makasalan na laman, asin kan Diablo?
6 Ano an makatatabang sato na magmaan tumang sa mga sugot na itinatao sa sato kan kinaban, kan satong makasalan na laman, asin kan Diablo? An kaimbodan ki Jehova Dios. Sia nakikiolay sa sato: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.” (Talinhaga 27:11) Iyo, an kaimbodan ki Jehova magmomotibar sato na lumakaw sa madonong na dalan nin pagkaongis sa ikinaoongis nia. Saro pa, minsan pa gurano garo kaogma o kasiram an paglapas sa saro sa mga pagboot nin Dios, kaipuhan na daing ontok na sabihon niato sa satong sadiri na an paggibo kaiyan dai nanggad nin pakinabang. (Galacia 6:7, 8) An puso nin tawo traydor, tuso, madaya, arog kan ipinagigirumdom sato sa Jeremias 17:9. An Kristianong puso gusto sa marahay, magayon, malinig na mga bagay. Pero kun beses an makasalan na mga tendensia dinadara iyan na magmawot man kan maraot. Kapareho kan puso kan mga Israelitas na nagsamba ki Jehova pero pinapagdanay man an saindang idolatrosong “haralangkaw na lugar,” an satuya man na puso tibaad magin paslo asin madaya. (1 Hade 22:43; Deuteronomio 12:2) An satuyang bakong sangkap na puso tibaad probaran na maghanap nin mga sarahotan na ibugtak kita sa dalan nin sugot. Tibaad probaran kaiyan na pasaditon an pagkaseryoso kan pagkakasala na isinusugot sa sato. O tibaad probaran kan satong puso na kombensiron kita na an ano man na padusa temporaryo sana.
7. Taano ta kaipuhan kitang magbantay tumang sa pagmawot kan maraot?
7 Huli sa pag-apresyar sa pagkamoot nin Dios, kaipuhan na kita magbantay tumang sa pagmawot kan maraot, arog baga kan pagkahilig sa seksuwal na inmoralidad, baga man kita daing agom o may agom. Paorootro, an nagpoon na garo baga daing peligrong paggitilan nagbunga kan pagkagustohan nin duwang Kristiano na sinda naggibo nin kasalan asin natiwalag. Pati an kamagurangan, na maninigo na magin daing kanawayan na mga arogan sa aripompon, napahamak sa mga bagay na ini!—Ikomparar an 1 Hade 15:4, 5.
8. Anong nagpapatanid na halimbawa an itinao sato ni apostol Pablo, asin paano ikaiilustrar an siring na problema?
8 Horophoropa si apostol Pablo, na binendisyonan nin milagrosong mga bisyon asin kapangyarihan saka kan balaog nin banal na pagpasabong. Tanganing manggana sa saiyang pakikilaban tumang sa makasalan na mga tendensia, kinaipuhan niang lanogon—iyo, bugbugon—an saiyang hawak. Mangangahas daw kitang makontento na sa paggibo nin mas kadikit digdi? (Roma 7:15-25; 1 Corinto 9:27) Garo kita sakay sa sadit na baroto sa masulog na salog asin iinaanod pasiring sa busay. Tanganing malikayan an kapahamakan, kaipuhan kitang maigot na sumagwan nin pasabat sa makosog na sulog. Tibaad garo dai kita nag-aabante, pero sagkod na kita maigot na naghihingoa, dai kita mahoholog sa busay pasiring sa kapahamakan. Tunay nanggad, an mga kapahayagan kan pagkamoot ni Jehova Dios sa sato maninigo na magpangyari sato na maghingoa nin maigot na magmaimbod sa saiya paagi sa pagkaongis sa katampalasanan asin pagkamoot sa katanosan.
Pagpaheling nin Pagkamoot sa Tugang
9. Ano an ihinatol ni apostol Juan manongod sa pagkamoot sa satong tugang?
9 An mga kapahayagan kan pagkamoot nin Dios maninigo man na makamotibar sato na kamotan an satong mga tugang siring kan pagkamoot ni Jesu-Cristo sa saiyang mga disipulo. (Juan 13:1) Angay nanggad, si apostol Juan nagsasabi: “An pagkamoot sa bagay na ini, bakong huli ta kita namoot sa Dios, kundi na sia namoot sato asin isinugo an saiyang Aki bilang pantubos na atang para sa satong mga kasalan. Mga namomotan, kun siring kaini an pagkamoot sato nin Dios, kun siring kita may paninimbagan na magkaminorootmootan.” (1 Juan 4:10, 11) Sa katotoohan, sinabi ni Jesus na an saiyang tunay na mga parasunod mamimidbid paagi sa saindang pagkaminorootmootan.—Juan 13:34, 35.
10, 11. Ano an pirang paagi na kita makapagpapaheling nin pagkamoot sa tugang?
10 Aram niato na an mga Kristiano maninigong magpaheling nin pagkamoot sa tugang. Pero bako man na sala na ipagirumdom niato sa satong sadiri an laen-laen na paagi na kita makapagpapaheling kan arog-Cristong pagkamoot na ini sa lambang saro. An siring na pagkamoot makatatabang sato na dai pag-intindihon an mga pagkalaenlaen kun dapit sa rasa, nasyonalidad, edukasyon, kultura, asin grado sa ekonomiya. Saro pa, an pagkamoot sa tugang magpapahiro sato na magtiripon. Kun talagang namomotan niato an satong mga tugang, dai niato itotogot na huli sa maraot na panahon o kadikit na pisikal na kamatean mawaran kita kan kagayagayahan nin pakikiasosyar sa sainda asin pakikikabtang sa pagriribayan nin pagpakosog. (Roma 1:11, 12) Labi pa dian, an pagkamoot sa tugang magpapangyari sato na mag-andam nin marhay para sa satong mga pagtiripon asin aktibong makikabtang dian tangani na magkasinaradolsadolan kita sa pagkamoot asin marahay na mga gibo.—Hebreo 10:23-25.
11 Kumusta man an pagtabang sa satong mga tugang sa ministeryo sa langtad? Namasdan na an kamagurangan asin ministeryal na mga lingkod parate na sinda-sinda an naghaharongharong o nagsosolo mantang puwede na, paagi sa kadikit na pagplano, imbitaran ninda na umiba sa sainda an mga parahayag kan Kahadean na nagkakaipo nin tabang sa ministeryo. An pagpaheling nin pagkamoot sa paaging ini gigibohon na doble an pakinabang sa paglilingkod sa langtad nin kamagurangan asin ministeryal na mga lingkod. Asin kumusta man an pag-iba nin bagong parahayag sa pag-adal sa Biblia?—Roma 15:1, 2.
12. Paano niato sasaboton an 1 Juan 3:16-18?
12 An pagkamoot magpapangyari man sato na tumabang sa satong mga tugang na tibaad talagang nangangaipo sa materyal. Si apostol Juan nagsurat: “Paagi kaini namidbid niato an pagkamoot, huli ta an sarong iyan nagtao kan saiyang kalag para sa sato; asin kita may paninimbagan man na itao an satong kalag para sa satong mga tugang. Alagad an siisay man na igwa nin kaya sa buhay asin naheheling an saiyang tugang na nasa pangangaipo alagad minapinto kan saiyang pagkaherak sa saiya, paano an pag-erok kan pagkamoot nin Dios sa saiya? Saradit na aki, mamoot kita, bakong sa tataramon ni sa dila, kundi sa gibo asin katotoohan.” (1 Juan 3:16-18) Tibaad dai hagadon sato ngonyan na itao an satong kalag para sa sainda, pero kun beses kita may mga oportunidad na magpahayag nin pagkamoot sa sainda sa ibang mga paagi, bako sanang sa tataramon o sa dila kundi siring man sa mga gibo. Mayo man nin sala sa pagkamoot sa satong mga tugang sa tataramon, pero habo niato na abot na sana digdi an satong pagkamoot kun sinda nagkakaipo nin materyal na mga bagay. An sinabi ni Jesus na “igwang orog na kaogmahan sa pagtao kisa pag-ako” aplikado man sa pagtao nin materyal na tabang.—Gibo 20:35.
13. (a) Ano an pira sa pundamental na mga katotoohan na nanodan niato sa tabang kan naheheling na organisasyon ni Jehova? (b) Ano an balidong punto na idinoon ni Charles Taze Russell?
13 Igwa kita kan oportunidad na magpaheling nin pagkamoot sa satong mga tugang na nangengenot sa kongregasyon o may koneksion sa naheheling na organisasyon ni Jehova sa bilog na kinaban. Kabale digdi an pagigin maimbod sa “maimbod asin madonong na oripon.” (Mateo 24:45-47) Atubangon niato an katotoohan na minsan pa guranong pagbasa sa Biblia an ginibo niato, noarin man dai kutana niato nanodan an katotoohan sa sadiri sana niato. Dai kutana niato nadiskobre an katotoohan manongod ki Jehova, sa saiyang mga katuyohan asin atributo, sa kahulogan asin halaga kan saiyang ngaran, sa Kahadean, sa pantubos ni Jesus, sa pagkakalaen kan organisasyon nin Dios asin ni Satanas, ni kun taano ta tinogotan nin Dios an karatan. Iyan siring nanggad sa isinurat kan enot na presidente kan Watch Tower Society, si Charles Taze Russell, kan 1914: “Bako daw na kita binendisyonan, maogmang banwaan? Bako daw na maimbod an satong Dios? Kun an siisay man may aram na mas marahay, kuanon nia iyan. Kun an siisay man sa saindo may manompongan na mas marahay, linalaom mi na sasabihan nindo kami. Mayo kami nin aram na mas marahay o kabanga man lang an karahayan sa nanompongan mi sa Tataramon nin Dios. . . . Mayo nin dila o pluma na makapagsasaysay kan katoninongan, kan kagayagayahan asin kan bendisyon na itinao nin malinaw na kaaraman sa tunay na Dios sa samong puso asin buhay. An Kasaysayan manongod sa Kadonongan, Hustisya, Kapangyarihan asin Pagkamoot nin Dios lubos na nagpapanigo sa mga pagmawot kapwa kan samong payo asin kan samong puso. Dai na kami naghahanap nin orog pa. Mayo na nin mas mamawoton pa kisa orog pang luminaw sa samong isip an makangangalas na Kasaysayan na ini.” (The Watch Tower, Disyembre 15, 1914, pahina 377-8) Totoo nanggad an marahayon an pagkasurat na mga tataramon na idto!
Paglilingkod sa mga Nasa Luwas
14. An mga kapahayagan kan pagkamoot nin Dios maninigong magmotibar sato na ano an igawe sa mga nasa luwas?
14 An mga kapahayagan kan pagkamoot nin Dios na satong nakamtan maninigong magmotibar sato na magpaheling nin pagkamoot sa kataed sa mga nasa luwas kan kongregasyon. Paano daw niato magigibo ini? Tibaad ipaheling nin mga kamugtakan na puwede niatong tabangan an satong pagtaraed sa materyal na paagi. Alagad, an orog pang mahalaga, puwede kitang magpaheling nin pagkamoot sa kataed paagi sa pagdara sa iba kan maogmang bareta kan Kahadean nin Dios asin pagtabang sa mga mamomoton sa katanosan na magin mga disipulo ni Jesu-Cristo. Kita daw regular na nakikikabtang sa ministeryong ini sa publiko, o napababayaan daw niato iyan? Iyan daw nagin na sanang rutina o paramas sanang paglilingkod? O kita daw talagang minomotibar nin pagkamoot sa kataed? Kita daw nagpapaheling nin empatiya? Kita daw mapasensia, na hinahalat na makasimbag an tawo? Dinadagka daw niato an mga kagharong na ipahayag an nasa boot ninda? Iyo, imbes na kita sana an magparataram, togotan niato na an pagkamoot sa kataed magpahiro sato na maghinanyog asin magkaigwa nin kapakipakinabang na mga pakipag-olay sa mga tawo na nanonompongan niato sa satong ministeryo manongod sa Biblia.
15. (a) Taano an “impormal na pagpatotoo” ta mas marahay na termino kisa “insidental na pagpatotoo”? (b) Taano ta maninigong aprobetsaran an mga oportunidad na magpatotoo sa impormal?
15 Kita daw alisto nin igo na aprobetsaran an mga oportunidad na magpatotoo nin impormal? Maninigong mangnohon na ini bako sanang insidental na pagpatotoo, na nagsusuherir nin aktibidad na dai plinano o daing gayo mahalaga. An impormal na pagpatotoo napakahalaga, asin an pagkamoot sa kapwa mapahiro sato na gumibo nin mga oportunidad na makikabtang dian. Parate na nagigin mabungahon an siring na pagpatotoo! Halimbawa, kan nag-aatender sa sarong kombension nin mga Saksi ni Jehova sa norte nin Italia, an sarong tugang nagduman sa sarong talyer tanganing pasalidahan an sarong ilaw sa kotse. Mantang naghahalat, sia nagpatotoo sa mga nasa palibot nia asin tinawan sinda nin mga handbill na nag-iimbitar sainda sa pampublikong pahayag sa Biblia sa Domingo. Sa sarong internasyonal na kombension sa Roma pakalihis nin sarong taon, an sarong tugang na dai nia namidbid mainit siang tinaratara. Siisay an tugang na ini? Tara, saro sia sa mga lalaki na tinawan nia nin handbill sa talyer kan nakaaging taon! An tawo nagdangog sa pahayag-publiko asin itinao an saiyang ngaran para sa pag-adal sa Biblia. Ngonyan sia asin an saiyang agom pareho na nagdusay na Saksi ni Jehova. Mayo nin duda na puwedeng magin kapakipakinabang nanggad an impormal na pagpatotoo!
Padagos na Magbalos sa Pagkamoot nin Dios
16. Anong mga hapot an marahay na ihapot niato sa satong sadiri?
16 Si Jehova tunay na nagin matinao sa pagpahayag nin pagkamoot sa saiyang mga linalang. Arog kan naheling niato, an Kasuratan nagtatao sato nin marahay na mga halimbawa kan mga daing kapasloan na nagbalos sa mga kapahayagan kan pagkamoot nin Dios. Angay na gayo, an pinasabngan na salmista nagsabi: “O magpasalamat logod an mga tawo ki Jehova huli sa saiyang mamomoton na kabootan asin huli sa saiyang makangangalas na mga ginibo sa mga aki nin tawo.” (Salmo 107:8, 15, 21, 31) Aakoon daw niato an dai na kutana maninigong kabootan nin Dios pakatapos basangbasangon sana iyan? Nungka logod na iyan mangyari! (2 Corinto 6:1) Kaya an lambang saro sa sato maghapot sa sadiri: ‘Talaga daw na inaapresyar ko an mga kapahayagan kan pagkamoot nin Dios na nakamtan ko na asin may kompiansang naglalaom na kamtan pa sa ngapit? Iyan daw nagmomotibar sako na kamotan si Jehova sa bilog kong puso, kalag, isip, asin kosog? Ako daw talagang maki-Dios? Ako daw namomoot sa katanosan asin naoongis sa katampalasanan? Ako daw nagpapaheling nin pagkamoot sa tugang? Asin gurano karani sa mga lakad ni Jesus na ako naghihingoang lumakaw kun dapit sa sakong ministeryo?’
17. Ano an ibubunga kun kita mabalos nin daing kapasloan sa mga kapahayagan kan pagkamoot ni Jehova Dios?
17 Tunay nanggad, kadakol kan paagi na ikapaheling an satong odok na pagpasalamat sa gabos na kapahayagan kan pagkamoot nin Dios na naeksperyensiahan niato. Paagi sa lubos na pag-aprobetsar sa mga oportunidad na magpaheling kan siring na apresasyon, kita makapaoogma sa puso kan satong langitnon na Ama, magigin bendisyon sa iba, asin magkakamit mismo nin kagayagayahan, katoninongan, asin pagkakontento. Kun siring kita logod padagos na magbalos na daing kapasloan sa mga kapahayagan kan pagkamoot nin Dios.
Ano an Isisimbag Nindo?
◻ Ano an kaipuhan tanganing makabalos na daing kapasloan sa pagkamoot nin Dios?
◻ Paano kita makapagbabantay tumang sa mga sugot?
◻ Ano an pirang mga paagi na ikapaheling an pagkamoot sa tugang?
◻ An mga kapahayagan kan pagkamoot ni Jehova maninigong magmotibar sato na gumawe nin paano sa satong pagtaraed?
[Ritrato sa pahina 15]
Kaipuhan na paglabanan niato an makasalan na mga tendensia tanganing malikayan an kapahamakan
[Ritrato sa pahina 16]
An kamagurangan nagpapaheling nin pagkamoot sa tugang paagi sa pag-iba sa iba sa ministeryong pan-Kahadean
[Ritrato sa pahina 17]
Si Charles Taze Russell, an enot na presidente kan Watch Tower Society, nag-apod nin atension sa katoninongan, kagayagayahan, asin bendisyon na solamente an Dios an makatatao