Tawan nin Onra si Jehova—Taano Asin Paano?

“An nagtataong onra sa sako tatawan ko nin onra, asin an mga naoongis sa sako magigin daing halaga.”—1 SAMUEL 2:30.

1. Sairisay an tinatawan kan bantog sa kinaban na premyong Nobel, asin ano an pagheling nin dakol sa mga premyong ini?

KADA taon an apat na institusyon sa Scandinavia nagtatao kan mga premyong Nobel sa mga ‘nagtao kan pinakadakulang pakinabang sa katawohan sa nakaaging taon.’ An mga premyo itinatao para sa mga nagibo sa anom na laen-laen na klase nin langtad. An premyong Nobel ibinibilang nin dakol na pinakadakulang onra na ikatatao sa siisay man na tawo.

2. Siisay an nalilingawan kan mga nagtatao kan mga premyong Nobel, asin taano Sia ta espesyalmenteng maninigong tawan nin onra?

² Minsan ngani mayo man nin sala sa pagtao nin onra sa mga tawong maninigo, an mga nagtatao daw kan onrang ini nakaisip nang tawan nin onra an pinakadakulang Paratabang sa katawohan? An Paratabang na iyan iyo an saro na nagtao nin dai mabilang na pakinabang sa katawohan poon kan lalangon nia an enot na lalaki asin babae mga 6,000 na taon na an nakaagi. An parateng dai pakatao nin onra sa saiya puwedeng magpagirumdom sato kan mga tataramon ni Eliu, an katood kan suanoy na si Job, na nagkomento: “Alagad ta mayo nin siisay man na nagsabi, ‘Haen an Dios na Dakulang Kaggibo sa sakuya, an Saro na nagtatao nin mga awit kun banggi?’” (Job 35:10) An satong kadarudakulaing Paratabang padagos na naggigibo ‘nin marahay, na nagtatao nin oran hale sa langit asin mabungang mga panahon, na binabasog an mga puso nin kakanon asin marahay na kaogmahan.’ (Gibo 14:16, 17; Mateo 5:45) Si Jehova tunay na iyo an Paratao kan “lambang marahay na balaog asin lambang sangkap na regalo.”—Santiago 1:17.

An Kahulogan kan Pagtao nin Onra

3. Ano an pangenot na mga terminong Hebreo asin Griego na trinadusir na “onra,” asin ano an mga kahulogan kaiyan?

³ An pangenot na termino sa Hebreo para sa onra, ka·vohdhʹ, sa literal nangangahulogan “gabat.” Kaya an tawo na tinatawan nin onra ibinibilang na magabat, kahangahanga, o may halaga. Makahulogan nanggad, an terminong ini sa Hebreo, ka·vohdhʹ, parate man na tinatradusir sa Kasuratan bilang “kamurawayan,” na dugang pang nagpaparisa kun gurano kahangahanga o kun gurano kahalaga ibinibilang an saro na tinatawan nin onra. An saro pang termino sa Hebreo, yeqarʹ, na tinatradusir na “onra” sa Kasuratan, tinatradusir man na “mahalaga” asin “mahalagang mga bagay.” Kaya sa Hebreong Kasuratan, an terminong onra konektado sa kamurawayan asin pagigin mahalaga. An termino sa Griego na tinatradusir na “onra” sa Biblia ti·meʹ, asin iyan man nagtatao kan ideya nin pagpahalaga, halaga, pagigin mahalaga.

4, 5. (a) Ano an boot sabihon kan pagtao nin onra sa sarong indibiduwal? (b) Anong kamugtakan na isinasaysay sa Ester 6:1-9 an nag-iilustrar kun ano an kalabot sa pagtao nin onra?

⁴ Kun siring an saro nagtatao nin onra sa iba paagi sa pagpaheling nin hararom na paggalang asin pagpahalaga sa tawong iyan. Bilang ilustrasyon, horophoropa an kamugtakan na isinasaysay sa Biblia manongod sa maimbod na Judiong si Mardoqueo. Sarong beses ibinuyagyag ni Mardoqueo an sarong plano tumang sa buhay ni Hadeng Assuero kan suanoy na Persia. Dangan, sarong banggi na dai napapatorog an hade, an ginibo ni Mardoqueo iinapod sa atension kan hade. Kaya hinapot nia an saiyang mga surugoon: “Anong onra asin dakulang bagay an ginibo ki Mardoqueo para sa bagay na ini?” Sinda nagsimbag: “Mayo man lamang na ginibo sa saiya.” Nakapagpapapensar ini! Ilinigtas ni Mardoqueo an buhay kan hade, pero dai nakapagpaheling nin apresasyon an hade.—Ester 6:1-3.

⁵ Kaya, sa igong panahon, hinapot ni Assuero an saiyang primer ministro, si Aman, kun ano an pinakamarahay na paagi na tawan nin onra an saro na ikinaogma kan hade. Tolos-tolos na nangatanosan si Aman sa saiyang puso: “Kiisay ikaoogma kan hade na magtao nin onra nin labi pa sa sakuya?” Kaya sinabi ni Aman na an tawo maninigong sulotan kan “makahadeng gubing” asin sumakay sa “kabayo na kinakabayuan kan hade.” Sia nagkonklusyon: “Pasakayon sia ninda sa kabayo sa plasa kan siudad, asin sinda magkurahaw sa atubangan nia, ‘Ini an ginigibo sa tawo na an onra naogmahan kan hade.’” (Ester 6:4-9) An tinawan nin siring na onra pahahalagahan na gayo kan gabos na tawo.

Kun Taano ta Maninigong Tawan nin Onra si Jehova

6. (a) Siisay orog sa gabos an maninigo sa satong pagtao nin onra? (b) Taano an terminong “dakula” ta tamang naglaladawan ki Jehova?

⁶ Sa bilog na kasaysayan an mga tawo tinawan nin onra, sa parate dai man maninigo. (Gibo 12:21-23) Alagad ta siisay orog sa gabos an maninigong tawan nin onra? Tara, siyempre, si Jehova Dios! Sia maninigong tawan niato nin onra ta sia dakula nanggad. Parate na iinaaplikar saiya an terminong “dakula.” Sia an Sarong Dakula, an Dakulang Kaggibo, an Dakulang Kaglalang, an Dakulang Hade, an Dakulang Paratokdo, an Dakulang Kagurangnan. (Salmo 48:2; Eclesiastes 12:1; Isaias 30:20; 42:5; 54:5; Oseas 12:14) An sarong dakula may kamahalan, may dignidad, halangkaw, noble, bantog, asin kahangahanga. Si Jehova daing kabaing, sia mayo nin kapantay, sia nakalalabi. Sia mismo nagpapatotoo sa katotoohan na iyan, na sinasabi: “Sa kiisay nindo ako ibabaing o ipapareho o ikokomparar tanganing magkaagid kami?”—Isaias 46:5.

7. Sa kisuerra pirang laen-laen na paagi masasabi na si Jehova Dios pambihira, asin taano ta masasabi na sia daing kabaing kun manongod sa kapangyarihan?

⁷ Si Jehova Dios daing kabaing sa kisuerra pitong laen-laen na paagi, na nagtatao nin espisipikong mga dahelan na sia tawan nin onra. Enot sa gabos, si Jehova Dios maninigong tawan kan kadarudakulaing onra ta sia daing kabaing sa kapangyarihan. An Kagurangnan na Jehova iyo an Unibersal na Soberano—sia supremo. Sia an satong Hokom, Paraboot, asin Hade. An gabos na tawo sa langit asin sa daga maninimbag sa Saiya; pero sia mayo nin paninimbagan. Tamang-tama an pagkaladawan saiya na “dakula, makakamhan asin makangingirhat.”—Deuteronomio 10:17; Isaias 33:22; Daniel 4:35.

8. Taano ta masasabi na si Jehova daing kabaing (a) kun manongod sa saiyang katongdan? (b) kun manongod sa saiyang daing sagkod na pag-eksister?

⁸ Ikaduwa, si Jehova Dios maninigong tawan kan kadarudakulaing onra ta sia daing kabaing kun manongod sa saiyang katongdan. Sia “an Sarong Halangkaw asin Dakula,” an Kaharohalangkawe. Dai marorop an kalangkawan nia sa gabos niang daganon na mga linalang! (Isaias 40:15; 57:15; Salmo 83:18) Ikatolo, si Jehova Dios kaipuhan na tawan nin onra nin orog sa gabos pang iba ta sia daing kabaing kun manongod sa saiyang daing sagkod na pag-eksister. Sia sana an nungka na nagkaigwa nin kapinonan, mantang sia poon sa daing katapusan sagkod sa daing katapusan.—Salmo 90:2; 1 Timoteo 1:17.

9. Sa anong paagi na si Jehova daing kabaing (a) kun manongod sa saiyang kamurawayan? (b) kun manongod sa saiyang pundamental na mga atributo?

⁹ Ikaapat, si Jehova Dios maninigo sa pinakadakulang onra huli sa kagayonan kan saiyang personal na kamurawayan. Sia an “Ama kan langitnon na liwanag.” An saiyang persona may makuring kinang kaya mayo nin tawo na makakaheling saiya asin mabuhay pa. Tunay na sia kahangahanga. (Santiago 1:17; Exodo 33:22; Salmo 24:10) Ikalima, utang niato ki Jehova Dios an pinakadakulang onra huli sa saiyang makangangalas na mga atributo. Sia makapangyarihan sa gabos, daing sagkod an kapangyarihan; sia nakaaaram kan gabos, daing sagkod sa kadonongan; sia absolutong sangkap sa hustisya; asin sia an mismong personipikasyon nin pagkamoot.—Job 37:23; Talinhaga 3:19; Daniel 4:37; 1 Juan 4:8.

10. Sa anong paagi na si Jehova daing kabaing (a) kun manongod sa mga linalang asin rogaring? (b) kun manongod sa saiyang ngaran asin kabantugan?

¹⁰ Ikaanom, si Jehova Dios maninigo sa pinakadakulang onrang ikatatao huli sa saiyang dakulang mga linalang. Bilang Kaglalang kan gabos na bagay sa kalangitan asin sa daga, sia man an Dakulang Kagsadiri kan gabos na bagay. Mababasa niato sa Salmo 89:11: “Rogaring mo an langit, saimo man an daga.” Ikapito, si Jehova na satong Dios maninigo sa onra nin labi sa gabos pang iba huli ta sia daing kabaing, daing kapareho kun manongod sa saiyang ngaran asin kabantugan. Sia sana an may ngaran na Jehova, na an boot sabihon “Saiyang Pinapangyayari.”—Helingon an Genesis 2:4, nota sa ibaba.

Kun Paano Tatawan nin Onra si Jehova

11. (a) Ano an pirang paagi na matatawan niato nin onra si Jehova? (b) Paano niato ikapaheheling na talagang tinatawan niato nin onra si Jehova paagi sa pagsarig sa saiya?

¹¹ Huli sa gabos na kuwalidad ni Jehova, paano niato sia matatawan nin onra? Arog kan maheheling niato, matatawan niato sia nin onra paagi sa pagpaheling sa saiya nin takot asin paggalang, paagi sa pagkuyog sa saiya, paagi sa pagmidbid sa saiya sa gabos niatong dalan, paagi sa pagreregalo, paagi sa pag-arog sa saiya, asin paagi sa pag-arang sa saiya. Puwede man niato siang tawan nin onra paagi sa pagtubod sa saiya, paagi sa pagsarig sa saiya ano man an mangyari. “Manarig ka ki Jehova sa bilog mong puso,” an sadol sa sato. Kaya tinatawan niato nin onra si Jehova Dios paagi sa pagtubod sa saiyang tataramon. Halimbawa, sia nagsasabi: “Dai ka matakot, huli ta ako nasa saimo. Dai ka mangalagkalag [na may takot], huli ta ako an saimong Dios. Pakokosogon ta ka. Tatabangan ta ka nanggad.” (Talinhaga 3:5; Isaias 41:10) An dai pakasarig nin lubos sa saiya mangangahulogan nin dai pagtao nin onra sa saiya.

12. Ano an kabtang kan pagkuyog asin takot sa pagtaong onra ki Jehova?

¹² An konektadong marhay na paagi na kita nagtatao nin onra ki Jehova Dios iyo an pagkuyog sa saiya. Asin kaipuhan sa pagkuyog an diosnon na takot, iyo, takot na mapaanggot an Dios. Nagpapaheling kan relasyon nin pagkatakot asin pagkuyog an mga tataramon ni Jehova ki Abraham kan si Abraham makinuyog na magprobar na iatang si Isaac, an saiyang aki. “Ngonyan aram ko nang ika may pagkatakot sa Dios,” sabi ni Jehova. (Genesis 22:12) Kan ipinaliliwanag kun ano an utang nin mga aki sa saindang mga magurang, ipinaheling man ni apostol Pablo na an pagkuyog asin onra magkaibanan. (Efeso 6:1-3) Kaya sa pagkuyog kan mga pagboot nin Dios, na bako man na magabat, tinatawan niato nin onra si Jehova. Mayong duda, an pagmasumbikal ki Jehova Dios dai pagtao nin onra sa saiya.—1 Juan 5:3.

13. An pagtaong onra sa Dios magpapangyari sato na magkaigwa nin anong kaisipan manongod sa satong mga aktibidad asin plano?

¹³ Dugang pa, makatatao kita nin maninigong onra ki Jehova Dios paagi sa pagkuyog sa hatol na yaon sa Talinhaga 3:6: “Sa gabos mong dalan girumdomon mo sia [iyo, midbidon mo sia], asin itatanos nia an saimong mga dana.” Si disipulo Santiago nagtatao sato nin marahay na hatol sa bagay na ini. Imbes na nagkokompiar sa sadiri sa aroaldaw, na nananarig sa sadiri niatong mga abilidad, kaipuhan na sabihon niato: “Kun bobooton ni Jehova, mabubuhay kami asin gigibohon man niamo ini o iyan.” (Santiago 4:15) Kaidtong dakol nang taon an nakaagi kaugalean kan Internasyonal na mga Estudyante sa Biblia na idugang sa arin man na kapahayagan mapadapit sa ngapit an abrebiasyon na D.V., na nagrerepresentar sa Deo volente, na an kahulogan “Kun kabotan nin Dios.”

14. (a) Ano an dapat niatong magin kaisipan mapadapit sa satong mga paghihingoa tangani na matawan niato nin onra an Dios? (b) Anong kaisipan an ipinaheheling mapadapit sa pagpublikar kan mga babasahon kan Watch Tower Society?

¹⁴ Tinatawan ta man nin onra si Jehova Dios paagi sa pagpaheling nin mapakumbabang kaisipan, na iinaatribuwir sa Dios an ano man na kapangganahan na tibaad kamtan niato. Si apostol Pablo tamang nagkomento manongod sa saiyang ministeryo: “Ako an nagtanom, si Apolos an nagbaribi, alagad an Dios an nagpapatubo; kaya minsan an nagtatanom daing halaga ni an nagbabaribi, kundi an Dios na nagpapatubo kaiyan.” (1 Corinto 3:6, 7) Tunay nanggad, boot ni Pablo na itao an maninigong onra sa Dios, bakong sa saiya man sana o sa siisay pa man na ibang tawo. Kaya, ngonyan, an mga publikasyon kan Watch Tower Society dai nagsasabi kun siisay an kagsurat kaiyan, asin linilikayan nin mga parasurat na ipaaram sa iba kun ano an ikinontribuwir ninda. Sa paaging ini, an atension nasisentro sa impormasyon, na sinadyang magtao nin onra ki Jehova, asin bakong sa siisay pa man na tawo.

15. Anong eksperyensia an nag-iilustrar kan nagigin kasakitan nin nagkapira sa pagsabot sa hababang boot nin mga Saksi ni Jehova?

¹⁵ An prinsipyong ini na pagsentro kan atension ki Jehova, sa siring tinatawan sia nin onra, ipinagngangalas nin iba. Kaidtong pirang taon na an nakaagi, kan nagbubugtak nin sound system para sa sarong pahayag-publiko sa Central Park kan Siudad nin Nueva York, pinatotogtog kan mga Saksi an saro sa mga Kingdom Melodies tape bilang panprobar sa sistema. An sarong pustoradong mag-agom hinapot an saro sa mga Saksi kun ano an musika. Sa paghona na mga Saksi an mag-agom, sia nagsimbag: “Kingdom Melodies Num. 4 iyan.” “Iyo, pero siisay an nagkompuwesto kan musikang iyan?” an hapot ninda. An Saksi nagsimbag: “A, dai sinasabi an ngaran kan nagkompuwesto.” An mag-agom nagsimbag: “An mga nagkokompuwesto nin arog kaiyan na musika dai iyan ginigibo na dai nagpapamidbid.” An Saksi nagsimbag: “Pero an mga Saksi ni Jehova iyo.” Iyo, ginigibo ninda ini tanganing an gabos na onra itao ki Jehova Dios!

16. Sa anong laen-laen na paagi niato magagamit an satong tingog sa pagtao nin onra ki Jehova Dios?

¹⁶ An saro pang paagi na matawan nin onra si Jehova iyo an paggamit sa satong ngabil sa pagpatotoo manongod sa saiya. Kun talagang nagmamakolog kita sa pagtao nin onra sa saiya, magigin kitang maigot sa pagpalakop kan maogmang bareta kan Kahadean. Magigibo niato ini paagi sa pagharongharong asin sa ano pa man na ibang paagi na magigibo niato, na dai linilingawan an mga oportunidad na magpatotoo nin impormal. (Juan 4:6-26; Gibo 5:42; 20:20) Dugang pa, may mga oportunidad pa kita na matawan nin onra an satong Dios paagi sa satong mga tingog sa satong mga pagtiripon kan kongregasyon, kapwa paagi sa pagkokomento asin sa pag-iba sa odok sa pusong pagkanta kan satong pan-Kahadean na mga awit. (Hebreo 2:12; 10:24, 25) Sa satong pakikipag-olay sa aroaldaw, matatawan man niato nin onra si Jehova Dios paagi sa satong ngabil. Paagi sa kadikit na paghihingoa, madadara niato an orolay sa nakapakokosog na espirituwal na mga bagay, asin ini magbubunga nin pagtaong onra ki Jehova Dios.—Salmo 145:2.

17. (a) Ano an koneksion nin tamang gawe sa satong pagtao nin onra ki Jehova? (b) Ano an epekto nin salang gawe?

¹⁷ Minsan ngani marahay na tawan nin onra si Jehova Dios paagi sa satong ngabil, kaipuhan man na tawan sia nin onra paagi sa satong gawe. Kinondenar ni Jesus an mga, mantang tinatawan nin onra an Dios paagi sa saindang ngabil, an puso harayo sa Saiya. (Marcos 7:6) An salang gawe magtatao nin kasopganan ki Jehova Dios. Halimbawa, sa Roma 2:23, 24, mababasa niato: “Ika, na nag-oorgolyo sa katogonan, hinahalean mo daw nin onra an Dios huli sa saimong paglapas sa Katogonan? Huli ta ‘an ngaran nin Dios pinaglalanghadan huli sa saindo sa tahaw kan mga nasyon.’” Sa nakaaagi pa sanang mga taon rinibo an natitiwalag sa mga kongregasyon kan banwaan ni Jehova. Posible, mas dakol pa na nakaginibo nin makasosopog na gawe an dai natiwalag huli ta nagpaheling sinda nin tunay na pagsolsol. An gabos na ini nagtatao nin onra ki Jehova paagi sa saindang ngabil, pero dai ninda nagibo iyan paagi sa saindang gawe.

18. (a) Ano an dapat na magin obligasyon nin nagkapirang binendisyonan nin dakula tangani na sinda makapaheling nin maninigong onra ki Jehova? (b) Paano an kamugtakan kan pirang saserdote kan aldaw ni Malaquias nag-iilustrar kan pangangaipong magtao nin atension?

¹⁸ An mga sibot sa laen-laen na klase nin pambilog na panahon na paglilingkod—baga man sa Bethel, sa gibohon na pagbibiyahe o pagmimisyonero, o bilang payunir—binendisyonan nin dakula kun dapit sa saindang mga oportunidad na makakontribuwir sa onra ni Jehova. An obligasyon ninda gibohon an pinakamakakaya ninda sa ano man na trabahong itao sa sainda, na ‘maimbod sa kadikit saka sa dakol.’ (Lucas 16:10) Sa nagkapirang paagi an saindang kagalang-galang na katongdan ipinag-ilustrar, minsan ngani dai ipinanganino, kan mga saserdote asin Levita sa suanoy na Israel. Minsan siring, huli sa kapabayaan nin pirang saserdote kan aldaw ni Malaquias, sinabihan sinda ni Jehova: “Kun ako ama, haen an paggalang sa sako? Asin kun ako kagurangnan, haen an pagkatakot sa sako?” (Malaquias 1:6) An mga saserdoteng idto dinuduhagi an ngaran nin Dios paagi sa pagdolot nin mga hayop na buta, pilay, asin may helang bilang atang. Kun an mga may espesyal na pribilehiyo sa paglilingkod ngonyan dai maghingoa na gibohon an pinakamakakaya ninda, sinda espesyalmente puwedeng umako kan pagsagwe na itinao ni Jehova Dios sa mga saserdoteng idto. Magkukulang sinda sa pagtao nin onra sa Dios.

19. (a) Arog kan sinasabi sa Talinhaga 3:9, ano an dugang pang paagi nin pagtao nin onra ki Jehova? (b) Ano an saro pang mahalagang paagi nin pagtao nin onra ki Jehova?

¹⁹ An saro pang paagi na kita makatatao nin onra ki Jehova Dios iyo an pagtao nin kontribusyon na kuwarta sa pankinaban na paghuhulit na isinugo nia. “Tawan nin onra si Jehova paagi sa saimong mahahalagang bagay asin paagi sa enot na mga bunga kan saimong inani,” an sadol sa sato. (Talinhaga 3:9) An pribilehiyo na tumao nin siring na mga kontribusyon sarong oportunidad na matawan nin onra si Jehova Dios na dai maninigong lingawan nin siisay man. Matatawan man niato nin onra si Jehova Dios sa satong mga pamibi, na inoomaw asin pinasasalamatan sia. (1 Cronica 29:10-13) An totoo, huli ta kita minadolok sa saiya na may kapakumbabaan asin hararom na paggalang, an sato mismong pagdolok sa Dios sa pamibi pagtao saiya nin onra.

20. (a) Siisay an sa kadaklan tinatawan nin onra kan mga tagakinaban, asin paano? (b) Sa pagkuyog sa anong pagboot na matatawan pa niato nin dugang na onra si Jehova?

²⁰ Ngonyan an dakol na tawo, partikularmente an mga hobenes, nagtatao nin onra sa mga hinahangaan ninda paagi sa pag-arog sa sainda—paagi sa pagtaram arog ninda asin paggawe arog ninda. Parate na an mga inaarog ninda mga eroe sa karawat o mga bitoon sa kinaban nin aling-alingan. Kabaliktaran, bilang mga Kristiano, maninigo niatong tawan nin onra si Jehova Dios paagi sa paghihingoa na arogon sia. Si apostol Pablo nagsadol na gibohon niato iyan, na nagsurat: “Magin kamong mga paraarog sa Dios, bilang namomotan na mga aki, asin padagos kamong maglakaw sa pagkamoot.” (Efeso 5:1, 2) Iyo, paagi sa paghihingoa na arogon si Jehova, sia tinatawan niato nin onra.

21. (a) Ano an masangkap sato na matawan nin pagpapamuraway asin onra si Jehova? (b) Ano an mga balos na itinatao ni Jehova sa mga nagtatao nin onra sa saiya?

²¹ Tunay nanggad, kadakol kan paagi na kita puwede asin maninigong magtao nin pagpapamuraway asin onra sa Dios. Noarin man dai niato paglingawan na paagi sa regular na pagkakan kan saiyang Tataramon asin orog siang namimidbid, orog niato siang matatawan nin onra. Ano an mga balos sa paggibo kaiyan? “An nagtataong onra sa sako,” sabi ni Jehova, “tatawan ko nin onra.” (1 Samuel 2:30) Sa katapustapusi tatawan ni Jehova nin onra an saiyang mga parasamba paagi sa pagtao sainda nin buhay na daing katapusan na may kaogmahan, magsalang sa langit bilang mga kairibang hade kan saiyang Aki, si Jesu-Cristo, o digdi sa Paraisong daga.

Nagigirumdoman daw Nindo?

◻ Siisay an sa kadaklan tinatawan nin onra nin mga tawo, asin siisay an sa kadaklan nalilingawan nindang tawan nin onra?

◻ Ano an boot sabihon kan pagtao nin onra sa saro, asin ano an mga paagi na ini magibo?

◻ Ano an pira sa pundamental na mga dahelan kun taano si Jehova Dios ta maninigong tawan nin onra?

◻ Ano an pira sa mga paagi na matatawan niato nin onra si Jehova?

◻ Sa anong mga paagi na binabalosan ni Jehova an mga nagtatao nin onra sa saiya?